1 I̱ndo̱ó máꞌ numuu rí nijúwa̱ꞌ xa̱bo̱ tsí ni̱rawíjnga̱a ajngáa mi̱nduwa ná xuajen Israél wajyúú mangaa, jamí xkuaꞌnii máꞌ ma̱ju̱wá ná majña̱ꞌlaꞌ xa̱bo̱ tsí musngáá rí mi̱nduwa mangaa. Ikháanꞌlaꞌ asndo ni mu̱xúya̱álaꞌ xáne gúxu̱da̱a̱ꞌ ná majña̱ꞌlaꞌ gisngáá mi̱nduwa ga̱jma̱á numuu Ana̱ꞌlóꞌ, jamí asndo muthee̱n rí ra̱ꞌkháa Táta̱ ñajuun tsí neꞌne-numuu rí ma̱jáwíi̱n. Rúꞌkhue̱n ma̱ꞌne rí asndo nda̱a̱ ajngóo rí ma̱mbíi̱n. 2 Phú mbaꞌiin xa̱bo̱ mbuya̱-ri̱dúún rí phú mate̱ꞌ nune̱ xa̱bo̱ tsí nusngáá rí mi̱nduwa. Ga̱jma̱á numúu̱ ikhii̱n muthan xkawe̱ꞌ xa̱bo̱ ga̱jma̱á numuu rí gakon nanimba̱ꞌlóꞌ. 3 Ga̱jma̱á numuu rí na̱ni̱gúu̱nꞌ ma̱guáꞌdáa̱ mi̱ndaꞌkho, mu̱rígú-jáꞌyálaꞌ mbúkha̱ꞌlaꞌ ga̱jma̱á majñu̱u̱ gisngáá rí mi̱nduwa. Xómáꞌ ikhii̱n, waꞌxná-máꞌíi̱n máꞌ rí mu̱míníi̱, numuu rí nixudaa máꞌ awan Ana̱ꞌlóꞌ numúu̱ asndo nákhí wajyúú, jamí ma̱xájáwíi̱n rí mu̱dri̱guíi̱ jamínu̱ꞌ.

4 Ana̱ꞌlóꞌ táꞌne mba̱a̱ a̱kui̱in jaꞌñúú ánje̱l tsí nene̱ aꞌkhán wajyúú, a̱ꞌkhue̱n gakon, nistuáꞌíi̱n ná awúun agu rí nakha jámuu jamí nirugua-raꞌii̱n ná iñá rí mijína. Ikhín ni̱gi̱xii̱n májíi̱n asndo mbiꞌi rí ma̱to̱ꞌo̱o̱ awan ga̱jma̱á numúú mbá xúgíin xa̱bo̱. 5 Ni máꞌ táꞌne mba̱a̱ a̱kui̱in Ana̱ꞌlóꞌ jaꞌñúú xa̱bo̱ ra̱májíin tsí nijúwa̱ꞌ wajyúú, nákhí rí nixungue̱e̱ꞌ ruꞌwa a̱pha̱ ma̱ꞌne-gámbi̱in xa̱bo̱ tsúꞌkhue̱n. I̱ndo̱ó máꞌ Noé, tsí niꞌsngáá rí ma̱ju̱wá xa̱bo̱ xómá rí nandoo Ana̱ꞌlóꞌ, nijríya̱a̱ꞌ gajmíi̱ mbá juwiin xa̱bo̱. 6 Xúꞌkhue̱n máꞌ mangaa Ana̱ꞌlóꞌ neꞌne-gámbi̱in xa̱bo̱ tsí nijúwa̱ꞌ ná xuajen Sodóma̱ ga̱jma̱á Gomóra̱, nikhii̱n asndo niꞌni̱i idi mbá jayu ñajúu̱n. Rí xkuaꞌnii neꞌne Ana̱ꞌlóꞌ, niꞌgíi̱ mbá xkri̱da rí ma̱gíꞌníí xa̱bo̱ ra̱májíin tsí ma̱ju̱wá nda̱wa̱á. 7 Xómáꞌ Ana̱ꞌlóꞌ neꞌne-jríya̱a̱ꞌ Lót, mbáa xa̱bo̱ májáan tsí níꞌngo̱o̱ a̱kuii̱n ga̱jma̱á numuu rí phú mate̱ꞌ nune̱ xa̱bo̱ tsúꞌkhue̱n. 8 Lót nixtáa ná majñu̱ú xa̱bo̱ tsúꞌkhue̱n, jamí mbámbá mbiꞌi maphú mingíná a̱kuii̱n ído̱ ndaꞌyoo̱ jamí nadxawuu̱n rí xkawe̱ꞌ nune̱ xa̱bo̱, numuu rí ikhaa̱ máján nixtáa̱ ná inuu Ana̱ꞌlóꞌ. 9 Rúꞌkhue̱n nasngájmalóꞌ rí Táta̱ gíꞌdoo̱ tsiakhe̱ rí ma̱ꞌne-jáwíi̱n ná awúun gaꞌkho̱ tsí júwa̱ꞌ xómá rí nandoo̱, jamí rí ma̱gu̱xii̱n mújúu̱n tsí nune̱ rí xkawe̱ꞌ kajngó mu̱dri̱guíi̱ jamínu̱ꞌ ído̱ gága̱nú mbiꞌi rí ma̱to̱ꞌo̱o̱ awan ga̱jma̱á numúú mbá xúgíin xa̱bo̱. 10 Ikhaa rúꞌkhue̱n ma̱gíꞌníí tsí nune̱ rí phú xkawe̱ꞌ nandoo xuñúú, jamí tsíya̱-makuíi̱ rí nithán-ñájúu̱n eꞌne Ana̱ꞌlóꞌ.

Phú nu̱xu̱xí-mijnée̱ jamí najñaguu̱n, jamí tsímíñúu̱ rí muthan-xkawi̱i̱ꞌ ga̱jma̱á numúú tsiakhe̱ ꞌguéen tsí phú mba̱a̱ ski̱ñu̱úꞌ. 11 Xómáꞌ tsí ánje̱l, maske máꞌ i̱tha̱án mba̱a̱ tsiakhe̱ guáꞌdáa̱ xó rí xa̱bo̱ tsí nusngáá rí mi̱nduwa, asndo ni tsíꞌngo̱o̱ a̱kuíi̱n gúthan-xkawi̱i̱ꞌ ga̱jma̱á numúú tsiakhe̱ ꞌguéen tsúꞌkhue̱n ná inuu Táta̱. 12 Xómáꞌ xa̱bo̱ tsí nusngáá rí mi̱nduwa, ikhii̱n nuthee̱n xkawe̱ꞌ numuu rí tsífruꞌúu̱n. Xómá xu̱kú jaꞌñúu̱, rí tsíndxa̱ꞌwa̱-mijnée̱ rí muni̱i̱. Ikhii̱n ni̱gu̱mii̱ rí ma̱tii̱n ma̱ja̱ñúu̱ jamí ma̱mbíi̱n xómá xu̱kú. 13 Mu̱dri̱guíi̱ jamínu̱ꞌ rí jaꞌñúu̱ ga̱jma̱á numuu rí ra̱máján niñuu̱ i̱ꞌwíin xa̱bo̱, jamí phú nadxúu̱n rí muni̱i̱ aꞌkhán ga̱jma̱á xuñúu̱ ná pa̱jnu inuu mbiꞌíí. Phú mate̱ꞌ rí ñajúu̱n jamí i̱ndii̱n, numuu ído̱ rí napiꞌtsii̱ ga̱jma̱á nindxa̱ꞌlaꞌ nadxu a̱kuíi̱n ga̱jma̱á numuu rí mi̱nduwa nuni̱i̱. 14 Mbámbá rí nduyáa̱ mbáa a̱ꞌgo̱, naꞌne a̱kuíi̱n rí mubúu̱n ga̱jma̱á nindxu̱u̱. Tsígi̱ꞌmúu̱ rí muni̱i̱ aꞌkhán jamí rí mune̱-rájíi̱n tsí wabiin mune̱ aꞌkhán. Phú naguꞌúu̱n máꞌ rí na̱ni̱gúu̱nꞌ ma̱guáꞌdáa̱ rí na̱nguá guáꞌdáa̱, jamí xa̱bo̱ tsí waꞌxná-máꞌíin ñajúu̱n. 15 Ni̱ni̱ꞌñáa̱ jamba̱a̱ rí máján, jamí nene̱-mbáti̱ga̱-mijnée̱ rí magóo̱ ná jambo̱o̱ Baláám, a̱dée táta̱ Beór, tsí ni̱ni̱gu̱u̱ꞌ madaa mbúkha̱a̱ ga̱jma̱á numuu rí ma̱ꞌne rí xkawe̱ꞌ. 16 Jamí watríyíí Baláám ga̱jma̱á numuu aꞌkhúun. Ana̱ꞌlóꞌ neꞌne rí mbáa xtángidi maꞌthúu̱n ga̱jma̱á a̱ꞌwóo xa̱bo̱ numbaa, jamí xkuaꞌnii watrikháa̱ kajngó ma̱xáꞌnii̱ rí tsiskágu̱nꞌ mbá jayu.

17 Xa̱bo̱ tsúꞌkhue̱n ñajúún xómá iduu iya rí nijndoo, xómá du̱u̱n rí na̱ka̱ jiꞌyá eꞌne gíñá rí phú gakhe̱ ixnúu. Ikhiin tsúꞌkhue̱n ni̱gu̱ma-mújúun ná magóó jámuu,* ná mijína mi̱ndaꞌkho. 18 Ído̱ nusngáa̱ nu̱xu̱xí-mijnée̱ jamí nda̱a̱ mbá jayu numuu ajngáa rí nuthee̱n. A̱ꞌkhue̱n nu̱xkaxii̱ rí xkawe̱ꞌ nandoo xuñúú jamí rí na̱ni̱gu̱ún mune̱ tsí ni̱kú máꞌ ni̱gíꞌdi̱ín nene̱-janíí-mijná inúú tsí na̱nguá júwa̱ꞌ xómá rí nandoo Ana̱ꞌlóꞌ. 19 Nu̱xu̱da̱ꞌ-mijnée̱ ná inúú xa̱bo̱ rí ma̱jáwíin ná inuu rí nithán-ñájúún eꞌne, i̱ndo̱ó máꞌ numuu rí jmínii̱ máꞌ ñajúu̱n yumbáá waꞌtsi̱in drígo̱o̱ rí ninújngoo xkawe̱ꞌ. Numuu rí mbámbáa xa̱bo̱ nanindxu̱u̱ yumbáá waꞌtsi̱i̱ ná inuu rí tsíꞌngo̱o̱ gáꞌne ga̱jmáa̱. 20 Numuu rí xa̱bo̱ tsí nene̱-nuwiin máꞌ Táta̱ Jesukrísto̱, tsí naꞌne-jríñáaꞌlóꞌ, ni̱ni̱ꞌñáa̱ máꞌ rí nuni̱i̱ rí xkawe̱ꞌ rí ríga̱ ná numbaa ríge̱ꞌ. Jamí xí nathangii̱n nu̱mbráꞌa-mijnée̱ mbu̱júꞌ ná awúun aꞌkhán jamí nánguá iyoo gúni̱ꞌñáa̱ rí muni̱i̱ ne̱, a̱ꞌkhue̱n naꞌne i̱tha̱án gúkú a̱kuíi̱n xúge̱ꞌ xó rí nákhí ginii. 21 I̱tha̱án máꞌ ni̱gi̱ꞌdoo numuu xí ni miꞌtsú túne̱-nuwii̱n rí gakon ga̱jma̱á numuu Ana̱ꞌlóꞌ, xó rí mune̱-nuwii̱n xtángoo drígo̱o̱ Ana̱ꞌlóꞌ jamí nda̱wa̱á mu̱ni̱ꞌñáa̱ ne̱. 22 Ga̱jma̱á nindxu̱ún xa̱bo̱ tsúꞌkhue̱n nambánuu ajngáa ríge̱ꞌ: «Tsí xu̱wánꞌ, nathanga̱a me̱kho̱ rí nixi». Jamí ajngáa ríge̱ꞌ: «A̱ga tsí ni̱gu̱ma-jaꞌwi̱i, nathanga̱a ma̱ꞌne-ju̱ba̱ꞌ-mina̱ꞌ mbu̱júꞌ ná ju̱ba̱ꞌ xtiꞌthi».