Apocalipse 3

Ajngáa rí na̱ka̱ inúú tsí nanimbu̱únꞌ juyáá Jesús ná xuajen Sárdi̱s

1 »Aratháán ajngáa ríge̱ꞌ ná i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Sárdi̱s. Xáꞌnii iꞌthán tsí gíꞌdiin mbá juwiin xe̱ꞌ drígo̱o̱ Ana̱ꞌlóꞌ jamí juwiin a̱ꞌgua̱án: Ikhúúnꞌ na̱ne̱-núwíinlo̱ꞌ ñajun rí nathane̱. Maske máꞌ phú mbaꞌiin xa̱bo̱ nuthan rí xtaa nathaya, xómáꞌ ikhúúnꞌ nda̱yo̱o̱lo̱ꞌ rí asndo xó rí nijáñaaꞌ máꞌ jaꞌnii. 2 Araxu̱unꞌ jamí araxná-mina̱aꞌ tsiakhe̱ rí ma̱tha̱ne̱-májáan wáa ñajun rí inu máꞌ xtaa rí ma̱ta̱tsi̱ꞌñáá-rathane̱, numuu nda̱yo̱o̱ rí na̱nguá xóó káxe̱ ñajun rí nathane̱ ná inuu Ana̱ꞌlóꞌ. 3 Ikhaa jngó, ga̱rmáꞌáan a̱kia̱anꞌ dí ñajuun rí ni̱tri̱gú jamí nitadxawíín. Athane̱-mbáníí ne̱ jamí ga̱thanga̱a a̱kia̱anꞌ. Xí tsíraxu̱unꞌ, ma̱ꞌkha gáxpríguáaꞌ, jamí asndo ni ma̱xátha̱ya̱á ído̱ gáꞌkha xómá eꞌne mbáa ku̱ꞌwá rí nda̱a̱ ajngóo i̱ꞌkha̱.

4 »Maske máꞌ xúꞌkhue̱n, júwa̱ꞌ ná xuajen Sárdi̱s a̱ꞌkhue̱n mbá tikhuun xa̱bo̱ tsí túne̱-maꞌchíí xtíñúú. Ikhiin tsúꞌkhue̱n jaꞌñúú rí ma̱júwúún xtíin miꞌxá jamí ma̱ngrigúu̱n ga̱jma̱á nindxu̱ꞌ ikhúúnꞌ. 5 Tsí ma̱ꞌngo̱o̱, majúwuu̱n xtíin miꞌxá. Ni miꞌtsú ma̱xárngudi̱i mbiꞌyuu̱ ná i̱yi̱i̱ꞌ rí tima mbiꞌñúú tsí nduya jámuu, xúꞌkhue̱n máꞌ ma̱tha̱n ná inuu Tátéꞌ rí xa̱bi̱ꞌ ñajuu̱n jamí ma̱tha̱n rúꞌkhue̱n ná inúú ánje̱l drígo̱o̱ Tátéꞌ mangaa.

6 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús.

Ajngáa rí na̱ka̱ inúú tsí nanimbu̱únꞌ juyáá Jesús ná xuajen Filadélfia̱

7 »Aratháán ajngáa ríge̱ꞌ ná i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Filadélfia̱. Xáꞌnii iꞌthán Tsí Jaꞌwii, Tsí Kuwiin, tsí jayá ñawúun guꞌwóo thúngaa Dabíd. Ído̱ rí ikhaa̱ narmáꞌthoo̱ nimbáa tsíꞌngo̱o̱ gárugoo, jamí ído̱ rí narugoo̱ nimbáa tsíꞌngo̱o̱ gármáꞌthoo: 8 Ikhúúnꞌ na̱ne̱-núwíinlo̱ꞌ ñajun rí nathane̱. Ikhaa jngó, athayáá rí ná inaaꞌ a̱ꞌkhue̱n ni̱ni̱ꞌñúu ja̱ma̱ꞌtha mbá xkrugua rí nimbáa ma̱xáꞌngo̱o̱ gárugua̱a. Nda̱yo̱o̱ máꞌ rí maske máꞌ na̱nguá mba̱a̱ tsiakhe̱ xtaꞌdáá, nathane̱-mbáníí rí na̱tha̱a̱nꞌ jamí nirathán ná inúú xa̱bo̱ rí xa̱bi̱ꞌ ñajwaanꞌ. 9 Atiaxe̱ lá rí ma̱ñu̱ú tsí nune̱-nduwa rí xa̱bo̱ judío̱ ñajúún, tsí na̱gi̱mbíin ga̱jma̱á numuu Satanás. Ikhúúnꞌ ma̱ne̱ rí ma̱guwée̱ mu̱sma̱ti̱gúu̱n inaaꞌ kajngó mbuyáa̱ rí phú nandoꞌ ja̱ya̱a̱ꞌ.

10 »Ga̱jma̱á numuu rí ikháánꞌ nithane̱-mbáníí ajngóꞌ rí ni̱tha̱a̱nꞌ, rí ma̱riajún gúkuáaꞌ, ikhaa jngó ikhúúnꞌ mangúúnꞌ ma̱ña̱wa̱a̱nꞌ ído̱ ma̱ga̱nú mbiꞌi rí ma̱ꞌkha̱ jamínu̱ꞌ inúú mbá xúgíin xa̱bo̱ numbaa. Jamínu̱ꞌ rúꞌkhue̱n masngájmii tsí gakon rí nanimbu̱únꞌ juyeꞌ. 11 Ma̱ꞌkha máꞌ wapha, ikhaa jngó na̱tha̱a̱nꞌ rí a̱ra̱tuun xa̱ꞌ rí xtaꞌdáá máꞌ. A̱ꞌkhue̱n rí nimbáa ma̱xárígú-jáꞌyáaꞌ rí jaꞌyoo ma̱tri̱gú numuu rí ni̱ꞌnga̱a̱ꞌ. 12 Tsí ma̱ꞌngo̱o̱, ikhúúnꞌ ma̱ne̱ rí ikhaa̱ ma̱nindxu̱u̱ xómá xi̱gu̱u̱ guꞌwá dxákuiin Anu̱ꞌ, jamí ni miꞌtsú ma̱xágájnaa̱ ikhín. Jamí ma̱tháánlo̱ꞌ mbiꞌyuu Anu̱ꞌ jamí mbiꞌyuu máꞌ xuajñuu Anu̱ꞌ ná jédoo xa̱bo̱ tsúꞌkhue̱n. Xuajen rúꞌkhue̱n ñajuun Jerusalén rí nuxe̱ꞌ, rí na̱ga̱taa ná mikhu drígo̱o̱ Anu̱ꞌ. Xúꞌkhue̱n máꞌ ma̱tháán mbiꞌyuꞌ rí nuxe̱ꞌ ná jédoo̱, kajngó ma̱kujma rí xa̱bi̱ꞌ ñajuu̱n.

13 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús.

Ajngáa rí na̱ka̱ inúú tsí nanimbu̱únꞌ juyáá Jesús ná xuajen Laodiséa̱

14 »Aratháán ajngáa ríge̱ꞌ ná i̱yi̱i̱ꞌ ma̱ꞌga inuu ánje̱l tsí na̱ña̱wu̱ún tsí nanimbu̱únꞌ juyeꞌ ná xuajen Laodiséa̱. Xáꞌnii iꞌthán tsí ñajuun Xkuaꞌnii gáꞌne, tsí ndiꞌyoo jamí jmbii, xúꞌkhue̱n máꞌ naꞌthán rí gakon, tsí ga̱jma̱á majñu̱u̱ ikhaa neꞌne-ku̱maa Ana̱ꞌlóꞌ mbá xúgíí rí ríga̱: 15 Ikhúúnꞌ na̱ne̱-núwíinlo̱ꞌ ñajun rí nathane̱, jamí nda̱yo̱o̱lo̱ꞌ rí na̱nguá mika a̱kia̱anꞌ xtayoꞌ ni máꞌ na̱nguá nguíꞌtsín ne̱. I̱tha̱án máꞌ máján xí numuu rí mika a̱kia̱anꞌ o mbáko máꞌ xí nguíꞌtsín ne̱ mbo̱ꞌ. 16 I̱ndo̱ó máꞌ numuu rí na̱nguá mika ni máꞌ na̱nguá nguíꞌtsín a̱kia̱anꞌ xtayoꞌ, rí wáa jayu mika ne̱, ikhaa numuu rúꞌkhue̱n ma̱xe̱ꞌ-ri̱ñáaꞌlo̱ꞌ ná rawunꞌ. 17 Ikháánꞌ narathán: "Ikhúúnꞌ ñajunꞌ xa̱bo̱ tsí phú gíꞌdoo, mbá xúgíí gúꞌdo̱ꞌlo̱ꞌ jamí nda̱a̱ rí iꞌyóꞌlo̱ꞌ". Tsíthayáá rí na̱nguá xtaa gagi, rí mingínááꞌ, rí nda̱a̱ rí xtaꞌdáá, rí tsífriga̱a̱ꞌ jamí tsaꞌtsáán nda̱a̱ xtíñaaꞌ. 18 Ikhaa jngó na̱tha̱a̱nꞌlo̱ꞌ rí ma̱ra̱tse̱ ná inuꞌ ikhúúnꞌ mbá atsú ríge̱ꞌ: ajwa̱nꞌ mo̱jmo̱ꞌ rí ni̱gu̱ma-jaꞌwu̱u ná awúun agu kajngó ma̱nindxa̱a̱ꞌ xa̱bo̱ tsí phú gíꞌdoo, xtíin miꞌxá rí ma̱thu̱ꞌwáanꞌ kajngó ma̱truguáá mate̱ꞌ dríga̱a̱ꞌ, jamí thana rí ma̱ta̱xta̱jmáá idaaꞌ kajngó ma̱friga̱a̱ꞌ.

19 »Ikhúúnꞌ na̱xprígúún jamí na̱ríñúú mbá xúgíin tsí nandoꞌ ja̱ñu̱ú. Ikhaa jngó, mbá jañii a̱kia̱anꞌ gátha̱ne̱ ñajun rí nathane̱ jamí ga̱thanga̱a a̱kia̱anꞌ. 20 Atadxawíín, ikhúúnꞌ wáju̱nlo̱ꞌ ná xkrugua jamí na̱tha̱n-ráꞌalo̱ꞌ. Xí mbáa nadxawuun a̱ꞌwóꞌ jamí narmáꞌthoo̱ xkrugua, a̱ꞌkhue̱n rí ma̱to̱ꞌo̱ꞌ jamí ma̱kuéꞌtsó-añuꞌlo̱ꞌ ga̱jma̱á nindxu̱u̱.

21 »Tsí ma̱ꞌngo̱o̱, ma̱xnu̱u̱lo̱ꞌ rí ma̱gi̱ꞌi̱i̱ maꞌthán-ñájwii̱n ga̱jma̱á nindxu̱ꞌ, xómá rí ikhúúnꞌ ni̱ꞌngo̱ꞌlo̱ꞌ jamí niꞌgúnꞌ rí ma̱tha̱n-ñájunlo̱ꞌ ga̱jma̱á nindxu̱u̱ Tátéꞌ.

22 »Tsí gíꞌdoo ñaꞌwuun, gadxawuu̱n rí naꞌthán Xu̱u̱ꞌ Ana̱ꞌlóꞌ, rí naꞌthúu̱n mbámbá kuthuun tsí nanimbu̱únꞌ juyáá Jesús».