1 Ikhúúnꞌ ñajunꞌ Simón Pédro̱, yumbée Jesukrísto̱, jamí mangaa máꞌ ñajunꞌ mbáa xa̱bo̱ tsí waxúngua̱a̱ꞌ niꞌnii̱ ikhaa̱. Na̱ra̱xáanꞌlaꞌ tsáanꞌ nijanálaꞌ rí phú mitsaan ma̱we̱je̱ a̱kia̱nꞌlaꞌ ná inuu Ana̱ꞌlóꞌ, xómá jaꞌnii rí nijaná ikháanꞌxo̱ꞌ. Nijanálaꞌ rúꞌkhue̱n ga̱jma̱á numuu rí phú jmbii Ana̱ꞌlóꞌ jamí Jesukrísto̱ tsí naꞌne-jríñáaꞌlóꞌ.

2 Naꞌne a̱kui̱nꞌ rí phú mba̱a̱ gágu̱ma-tsakun-rámáaꞌlaꞌ jamí phú tsímáá gájuwalaꞌ ga̱jma̱á majñu̱u̱ rí nu̱ne̱-nuwiinlaꞌ Ana̱ꞌlóꞌ jamí Tátiálóꞌ Jesús.

3 Ana̱ꞌlóꞌ najmuu ski̱yu̱u̱ꞌ rí maxnálóꞌ mbá xúgíí rí ndaꞌyálóꞌ, kajngó ma̱juwalóꞌ xómá rí nandoo̱ ikhaa̱. Naxnálóꞌ mbá xúgíí rúꞌkhue̱n numuu rí nu̱ꞌne̱-nuwiinlóꞌ Jesukrísto̱, tsí nindxaꞌwálóꞌ ga̱jma̱á numuu rí phú gíꞌdoo numuu̱ jamí ninújngoo máján rí naꞌnii̱. 4 Ga̱jma̱á majñu̱u̱ rúꞌkhue̱n, phú mitsaan jamí phú mba̱a̱ rí nixuda-mina̱ꞌ Ana̱ꞌlóꞌ ga̱jma̱á nindxa̱ꞌlóꞌ, kajngó ma̱nindxa̱ꞌlaꞌ xómá jaꞌnii Ana̱ꞌlóꞌ, numuu rí ni̱ꞌnga̱ꞌlaꞌ máꞌ ni̱ga̱yálaꞌ inuu numbaa rí na̱ka̱-raꞌchúu máꞌ xúꞌkhue̱n ga̱jma̱á numuu aꞌkhán rí na̱wa̱ꞌa̱ a̱kui̱ín xa̱bo̱ mune̱.

5 Ikhaa numuu rúꞌkhue̱n, ra̱ꞌkhá máꞌ i̱ndo̱ó rí ma̱we̱je̱ a̱kia̱nꞌlaꞌ ná inuu Ana̱ꞌlóꞌ rí gu̱xna̱-míjnálaꞌ mbá xúgíí tsiakhe̱ rí ma̱nindxa̱ꞌlaꞌ mbáa xa̱bo̱ tsí naꞌne máꞌ xúꞌkhue̱n rí máján mangaa. Xúꞌkhue̱n máꞌ gu̱xna̱-míjnálaꞌ mbá xúgíí tsiakhe̱ rí mu̱ne̱-nuwiinlaꞌ i̱tha̱án xóó Ana̱ꞌlóꞌ mangaa. 6 Xúꞌkhue̱n máꞌ gu̱xna̱-míjnálaꞌ mbá xúgíí tsiakhe̱ rí ma̱ꞌnga̱ꞌlaꞌ mu̱tha̱n-ñájun-mijnálaꞌ mangaa. Mangaa máꞌ gu̱xna̱-míjnálaꞌ mbá xúgíí tsiakhe̱ rí ma̱ꞌngo̱o̱ a̱kia̱nꞌlaꞌ. Xúꞌkhue̱n máꞌ gu̱xna̱-míjnálaꞌ mbá xúgíí tsiakhe̱ rí mu̱ne̱laꞌ mbá xúgíí rí nandoo Ana̱ꞌlóꞌ mangaa. 7 Xúꞌkhue̱n máꞌ gu̱xna̱-míjnálaꞌ mbá xúgíí tsiakhe̱ rí ma̱galaꞌ ju̱ñu̱ú a̱ngia̱nꞌlaꞌ mangaa. Jamí gu̱xna̱-míjnálaꞌ mbá xúgíí tsiakhe̱ rí ma̱galaꞌ ju̱ñu̱ú mbá xúgíin xa̱bo̱ mangaa. 8 Xí ikháanꞌlaꞌ nu̱xna̱-míjnálaꞌ tsiakhe̱ rí mu̱ne̱laꞌ mbá xúgíí rúꞌkhue̱n jamí nagaja̱a̱ rí nu̱ne̱laꞌ, phú gíꞌdoo numuu rí juwalaꞌ xúꞌkhue̱n rá, xúꞌkhue̱n máꞌ phú ni̱gi̱ꞌdoo numuu rí ne̱ne̱-nuwiinlaꞌ Tátiálóꞌ Jesukrísto̱. 9 Xómáꞌ xa̱bo̱ tsí na̱nguá eꞌne rúꞌkhue̱n rá, ikhaa̱ ñajuu̱n mbáa xa̱bo̱ tsí tsíꞌngo̱o̱ gáyaxe̱ tsíngua̱ꞌ, numuu rí tsífrigo̱o̱ꞌ. Asndo nimbumuu̱ máꞌ rí Ana̱ꞌlóꞌ neꞌne mba̱a̱ a̱kui̱in jaꞌyoo aꞌkhúu̱n rí niꞌnii̱ wajyúú. 10 Ikhaa numuu rúꞌkhue̱n, a̱ngui̱nꞌ, gu̱xna̱-míjnálaꞌ i̱tha̱án xóó tsiakhe̱ rí ma̱kujma rí Ana̱ꞌlóꞌ nindxaꞌwálaꞌ jamí niraꞌwiáanꞌlaꞌ. Xí ikháanꞌlaꞌ nu̱ne̱laꞌ rúꞌkhue̱n, ni miꞌtsú mu̱xúne̱-tsíngua̱ꞌ-mijnálaꞌ inuu Ana̱ꞌlóꞌ. 11 A̱ꞌkhue̱n rí phú nadxu a̱kui̱in Ana̱ꞌlóꞌ marmáꞌthoo̱ xkrugua ma̱ta̱ꞌa̱ꞌlaꞌ ná jámuu naꞌthán-ñájun Tátiálóꞌ Jesukrísto̱, tsí naꞌne-jríñáaꞌlóꞌ.

12 Ikhaa jngó, ikhúúnꞌ ma̱ne̱ rí ma̱rmáꞌáan a̱kia̱nꞌlaꞌ jámba̱ miꞌtsú mbá xúgíí ríge̱ꞌ, maske máꞌ na̱ma̱ñalaꞌ ne̱, jamí kuajún-gúkuálaꞌ ná tsu̱du̱u̱ rí gakon rí waꞌsngálaꞌ. 13 Ikhúúnꞌ na̱ju̱mu̱ꞌ rí awúun mbiꞌi rí xóó xtáá nda̱ya̱lo̱ꞌ, gíꞌmúú ma̱ne̱ rí ma̱rmáꞌáan a̱kia̱nꞌlaꞌ mbá xúgíí ríge̱ꞌ. 14 Numuu rí jmína̱a̱ꞌ máꞌ Tátiálóꞌ Jesukrísto̱ niꞌnii̱ rí mba̱yo̱o̱ rí inu máꞌ ma̱ni̱ꞌñúu numbaa ríge̱ꞌ. 15 Xómáꞌ ikhúúnꞌ ma̱xna̱-mína̱ꞌ tsiakhe̱ rí ikháanꞌlaꞌ ma̱xámbumalaꞌ nimbá mbiꞌi gisngáá ríge̱ꞌ, maske máꞌ ikhúúnꞌ nándawu̱ún ná numbaa ríge̱ꞌ.

16 Nákhí ni̱sngááxo̱ꞌ ná inalaꞌ rí ma̱thanga̱a Tátiálóꞌ Jesukrísto̱ ga̱jma̱á mbá xúgíí ski̱yu̱u̱ꞌ, túne̱-ku̱maaxo̱ꞌ nimbá ajngáa kajngó mu̱ne̱xo̱ꞌ rí nacha̱ ma̱nimba̱ꞌlaꞌ, rí ni̱tha̱nꞌlaꞌxo̱ꞌ ga̱jma̱á numuu ski̱yu̱u̱ꞌ rí ndi̱ya̱áxo̱ꞌ ga̱jma̱á idaxo̱ꞌ. 17 Ikháanꞌxo̱ꞌ ndi̱yáa̱xo̱ꞌ nákhí rí ikhaa̱ ni̱grui̱gíi̱ tsiakhe̱ jamí nitiamakuíi̱ neꞌne Ana̱ꞌlóꞌ, tsí Anu̱u̱ máꞌ ikhaa̱. Nákhí mbiꞌi rúꞌkhue̱n, ni̱ga̱taa ná inuu̱ mbá a̱ꞌwá rí phú wáá niwán ná mikhuíí rí niꞌthán: «Tsíge̱ꞌ ñajuun A̱ꞌdéꞌ tsí phú nandoꞌ ja̱yo̱o̱, tsí phú nadxu a̱kui̱nꞌ eꞌne». 18 Jamí ikháanꞌxo̱ꞌ ni̱dxawíínxo̱ꞌ a̱ꞌwá rúꞌkhue̱n rí ni̱ꞌkha̱ mikhuíí, nákhí trámáaꞌxo̱ꞌ ná júbo̱o̱ Ana̱ꞌlóꞌ ga̱jma̱á nindxu̱u̱.

19 Rúꞌkhue̱n nasngájmalóꞌ rí maphú gakon rí nithan tsí ni̱rawíjnga̱a ajngóo Ana̱ꞌlóꞌ wajyúú. Phú máján máꞌ e̱ne̱ ikháanꞌlaꞌ rí nu̱ꞌgíi idxa̱ꞌlaꞌ rí mu̱dxawíínlaꞌ ajngáa rúꞌkhue̱n, numuu rí ikhaa ne̱ ñajuun xómá agu rí nambiꞌyalóꞌ ná mijína, asndo gámbiꞌi jamí ma̱kujmaa A̱ꞌgua̱án Natse ma̱ꞌne rí ma̱mbiꞌyalaꞌ. 20 I̱ndo̱ó máꞌ gíꞌmaa rí ma̱fraꞌa̱ꞌlaꞌ ginii ríge̱ꞌ: nimbá ajngáa rawuun Ana̱ꞌlóꞌ rí nithan tsí ni̱rawíjnga̱a ne̱, ma̱goo mi̱ꞌthán-ri̱ya̱aꞌ xómá rí naꞌne a̱kui̱in mbámbáa. 21 Numuu rí nimbáa tsí ni̱gu̱wíjnga̱a táyá idxu̱u̱ ikhaa rí maꞌthán, a̱ꞌkhue̱n gakon, nithee̱n ajngóo Ana̱ꞌlóꞌ, xómá rí Xu̱u̱ꞌ Ana̱ꞌlóꞌ niꞌthán-múꞌúu̱n.