1 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ríge̱ꞌ eꞌne riajma̱ nothon rí na̱xu̱ꞌmá i̱yi̱i̱ꞌ ná inalaꞌ. Ni̱xna̱-mína̱ꞌ tsiakhe̱ rí ma̱tha̱n-máꞌánlaꞌ ga̱jma̱á majñu̱u̱ mbá nájma̱ i̱yi̱i̱ꞌ, kajngó máján gúndxa̱ꞌwa̱-mijnálaꞌ. 2 Nandoꞌ rí ma̱rmáꞌáan a̱kia̱nꞌlaꞌ rí nithan xa̱bo̱ jaꞌwuun tsí ni̱rawíjnga̱a ajngóo Ana̱ꞌlóꞌ wajyúú, jamí ma̱rmáꞌáan a̱kia̱nꞌlaꞌ xtángoo rí niniñuu Táta̱ tsí naꞌne-jríñáaꞌlóꞌ, rí nisngálaꞌ tsí waxúngui̱inꞌ.

3 I̱tha̱án máꞌ gíꞌmaa rí ma̱ma̱ñalaꞌ ríge̱ꞌ: rí awúun mbiꞌi rí na̱ka̱-rayámba̱ numbaa ma̱ju̱wá xa̱bo̱ tsí na̱ni̱gu̱ún muthan-tsi̱ndíi rí gakon, jamí nune̱ máꞌ xúꞌkhue̱n rí xkawe̱ꞌ xómá rí nandoo xuñúú. 4 Xáꞌnii gúthee̱n: «Náá xtáa̱ Jesús, tsí nixuda-mina̱ꞌ rí ma̱ꞌkha̱a rá. Numuu rí asndo nákhí máꞌ nijáñúú táta̱-xi̱ꞌñálóꞌ, mbá xúgíí ikhaa máꞌ jaꞌnii kri̱ga̱, xómá jaꞌnii numbaa asndo nákhí rí neꞌne-ku̱maa ne̱ Ana̱ꞌlóꞌ». 5 I̱ndo̱ó máꞌ numuu rí xa̱bo̱ tsúꞌkhue̱n nuni̱i̱ ñajúu̱n rí na̱nguá iyáa̱, rí asndo nákhí máꞌ wajyúú ni̱gu̱ma-ku̱maa mbá xúgíí mikhu ga̱jma̱á majñu̱u̱ ajngáa rawuun Ana̱ꞌlóꞌ. Xúꞌkhue̱n máꞌ ju̱ba̱ꞌ mangaa, rí nijráꞌán ná awúun iya ga̱jma̱á majñu̱u̱ máꞌ ajngóo Ana̱ꞌlóꞌ, jamí ná inuu máꞌ iya kra̱ꞌmá ne̱. 6 Mangaa máꞌ ga̱jma̱á majñu̱u̱ iya wámba̱a numbaa wajyúú, nákhí nijni̱í iya ná inuu ne̱. 7 Xómáꞌ mbá xúgíí mikhu jamí ju̱ba̱ꞌ rí ríga̱ xúge̱ꞌ rá, na̱gi̱xi̱i mújúun ne̱ ga̱jma̱á majñu̱u̱ ikhaa máꞌ ajngóo Ana̱ꞌlóꞌ, asndo gíkha ne̱ ga̱jma̱á agu ído̱ gága̱nú mbiꞌi rí Ana̱ꞌlóꞌ maxúdaa awan ga̱jma̱á numúú mbá xúgíin xa̱bo̱. Ikhaa máꞌ mbiꞌi rúꞌkhue̱n ma̱mbíin xa̱bo̱ tsí ra̱májíin.

8 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ma̱xámbumalaꞌ rí ná inuu Ana̱ꞌlóꞌ, mbá mbiꞌi jaꞌnii xómá mbá míl (1 000) tsigu, jamí rí mbá míl tsigu jaꞌnii xómá mbá mbiꞌi. 9 Ra̱ꞌkhá máꞌ numuu rí naꞌne-gajyúu Táta̱ rí ma̱ꞌne-mbánuu rí nixuda-mina̱ꞌ, xómá rí nu̱ndxa̱ꞌwa̱-mijná mbá tikhuun xa̱bo̱, rí i̱ndo̱ó máꞌ numuu rí phú mba̱a̱ a̱kuii̱n gíꞌdáa̱nꞌlaꞌ. Tsíyoo Ana̱ꞌlóꞌ rí ma̱ja̱ñúu nimbáa xa̱bo̱, rí nandoo̱ rí mbá xúgíin xa̱bo̱ ma̱thanga̱a a̱kui̱ín ná inuu̱ ikhaa̱. 10 Xómáꞌ Táta̱ ma̱ꞌkhaa̱ mbá mbiꞌi rí ndawa̱a̱ tsí i̱ju̱mu̱u̱, xómá na̱ꞌkha̱ mbáa ku̱ꞌwá awúun mbroꞌon.* Ído̱ gága̱nú mbiꞌi rúꞌkhue̱n, phú gakhe̱ ma̱wán namídá rí ma̱mbáa mbá xúgíí mikhu, jamí mbá xúgíí rí ríga̱ ná inuu ne̱ ma̱ꞌni̱i idi mbá jayu gáꞌne agu. Xúꞌkhue̱n máꞌ ju̱ba̱ꞌ mangaa, mbá xúgíí rí ni̱gu̱ma ná inuu ne̱ mi̱kha.*

11 Xkuaꞌnii ma̱mbáa mbá xúgíí rí ríga̱. Ikhaa numuu rúꞌkhue̱n, ikháanꞌlaꞌ jaꞌyoo rí ma̱juwalaꞌ xómá rí nandoo Ana̱ꞌlóꞌ jamí rí mu̱xna̱xí-mijnálaꞌ mbá jayu ná ñawúu̱n, 12 awúun máꞌ rí guáꞌthi̱ínlaꞌ jamí rí juwalaꞌ xawi rí ma̱ga̱nú mbiꞌi rí Ana̱ꞌlóꞌ maxúdaa awan ga̱jma̱á numúú xa̱bo̱. Mbiꞌi máꞌ rúꞌkhue̱n mi̱kha mbá xúgíí mikhu jamí ma̱mbáa ne̱, xúꞌkhue̱n máꞌ rí ríga̱ ná inuu ju̱ba̱ꞌ ma̱ꞌne-iya̱a ne̱ mbá jayu gáꞌne agu. 13 Xómáꞌ ikháánꞌlóꞌ guáꞌthi̱ínlóꞌ mbá mikhu nuxe̱ꞌ jamí mbá ju̱ba̱ꞌ nuxe̱ꞌ, xómá rí Ana̱ꞌlóꞌ nixuda-mina̱ꞌ rí ma̱ꞌne ku̱maa, ná mbá xúgíin xa̱bo̱ mune̱ i̱ndo̱ó máꞌ rí nandoo̱ ikhaa̱.

14 Ikhaa jngó, a̱ngui̱nꞌ, tsáanꞌ phú nandoꞌ ja̱ya̱ꞌlaꞌ, awúun máꞌ rí guáꞌthi̱ínlaꞌ rí ma̱ri̱gá mbá xúgíí rúꞌkhue̱n, gu̱xna̱-míjnálaꞌ tsiakhe̱ rí maxkamáaꞌlaꞌ Jesús ná awúun rí nu̱ne̱laꞌ rí máján, jamí rí ma̱xáxkamaa̱ nimbá rí ra̱máján nu̱ne̱laꞌ, xúꞌkhue̱n máꞌ rí tsímáá juwalaꞌ. 15 Jamí gu̱ya̱á májánlaꞌ rí Táta̱ Jesús nagajyúu̱ kajngó ma̱goo ma̱jríñáaꞌlóꞌ. Ikhaa máꞌ rúꞌkhue̱n ñajuun rí naꞌthánlaꞌ dxájwalóꞌ Páblo̱ mangaa ná awúun i̱yi̱i̱ꞌ rí nixungue̱e̱ꞌ inalaꞌ, xómá rí Ana̱ꞌlóꞌ naꞌne rí ma̱froꞌo̱o̱. 16 Mbá xúgíí máꞌ i̱yi̱i̱ꞌ rí naꞌnii̱ naꞌthée̱n ga̱jma̱á numuu ríge̱ꞌ, maske máꞌ ríga̱ mbá tikhu rí phú mingíjyúu rí ma̱fraꞌa̱ꞌlóꞌ ná awúun ne̱. Ikhaa jngó, xa̱bo̱ tsí júgoo inúú jamí tsí na̱nguá jañii a̱kui̱ín ná inuu Ana̱ꞌlóꞌ nu̱riꞌkhuíi̱ rí naꞌthán ne̱, xómá nuni̱i̱ ga̱jma̱á i̱ꞌwá i̱yi̱i̱ꞌ ajngóo Ana̱ꞌlóꞌ. Rí xkuaꞌnii ini̱i̱, mune̱-gámba̱-mijnée̱ máꞌ ikhii̱n.

17 Ikhaa jngó, a̱ngui̱nꞌ, tsáanꞌ phú nandoꞌ ja̱ya̱ꞌlaꞌ, numuu rí wapha máꞌ ndu̱ya̱álaꞌ mbá xúgíí ríge̱ꞌ, ga̱juwa-na̱ma̱ñalaꞌ, ra̱ꞌkhá ma̱gu̱ma-nduwáanꞌlaꞌ gúne̱ xa̱bo̱ tsí ra̱májíin, a̱ꞌkhue̱n mu̱ni̱ꞌñáá-ranimba̱laꞌ rí mbá jañii a̱kia̱nꞌlaꞌ ninimba̱ꞌlaꞌ ju̱ya̱á. 18 A̱ꞌkhue̱n gakon, a̱gajáanꞌlaꞌ rí nu̱ne̱-nuwiinlaꞌ Tátiálóꞌ Jesukrísto̱ tsí naꞌne-jríñáaꞌlóꞌ jamí a̱gajáanꞌlaꞌ ga̱jma̱á majñu̱u̱ rí nandoo̱ jaꞌyalaꞌ. A̱gu̱ma-mba̱a̱ ikhaa̱, xúge̱ꞌ jamí jámuu mbiꞌi. Xkuaꞌnii gáꞌne.