1 Ikhúúnꞌ Páblo̱, ga̱jmi̱ꞌ Timotéo̱, tsáanꞌ ñajwanxo̱ꞌ yumbée Jesukrísto̱, nu̱ra̱xáanꞌlaꞌxo̱ꞌ mbá xúgiáanꞌlaꞌ tsáanꞌ ñajwanlaꞌ xa̱bi̱i Ana̱ꞌlóꞌ ga̱jma̱á majñu̱u̱ Krísto̱ Jesús, tsáanꞌ juwalaꞌ ná Filípo̱s. Nu̱ra̱xi̱inxo̱ꞌ mangiin xa̱bo̱ buanuu tsí nu̱ya̱xe̱-ra̱ꞌmáá jamí tsí nu̱mba̱yí-jmáá a̱ꞌkhue̱n.

2 Ana̱ꞌlóꞌ Mikhuíí jamí Tátiálóꞌ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.

3 Mbámbá rí na̱rmáꞌáan a̱kui̱nꞌ ja̱ya̱ꞌlaꞌ, na̱rígu̱u gamaku ná inuu Anu̱ꞌ Mikhuíí ga̱jma̱á numalaꞌ. 4 Jámba̱ miꞌtsú rí na̱thu̱u̱nlo̱ꞌ, phú gagi a̱kui̱nꞌ na̱tha̱n-jáñuu̱lo̱ꞌ ga̱jma̱á numalaꞌ mbá xúgiáanꞌlaꞌ. 5 Numuu rí ikháanꞌlaꞌ ni̱mbáyúꞌlaꞌ rí ma̱tha̱n-ráꞌalo̱ꞌ ajngáa máján, asndo nákhí máꞌ mbiꞌi rí ginii asndo xúge̱ꞌ. 6 Ikhúúnꞌ nda̱yo̱o̱ mújúnꞌ máꞌ rí Ana̱ꞌlóꞌ, tsí nigíꞌdu̱u̱n naꞌne mbá ñajun rí máján ga̱jma̱á nindxa̱ꞌlaꞌ, ikhaa̱ ma̱ꞌga-raꞌne gáxu̱u̱ ne̱ asndo mbiꞌi rí ma̱ꞌkha̱a Jesukrísto̱. 7 Phú ndaꞌyóo rí ma̱ju̱mu̱ꞌ xkuaꞌnii ga̱jma̱á numalaꞌ mbá xúgiáanꞌlaꞌ, numuu rí phú gúꞌdáanꞌlaꞌ ná ními̱ꞌ. Juwalaꞌ ga̱jma̱á nindxu̱ꞌ awúun ikhaa máꞌ rí na̱gu̱ma-tsakun-rámúú eꞌne Ana̱ꞌlóꞌ. Mbóó máꞌ juwalaꞌ ga̱jma̱á nindxu̱ꞌ, maske máꞌ xtáá ná géjwa̱nꞌ, o xtáá na̱tha̱n-mbáá numuu ajngáa máján kajngó ma̱kujma rí gakon ñajuun ne̱. 8 Ndaꞌyoo Ana̱ꞌlóꞌ rí gakon rí na̱tha̱nꞌlaꞌ: maphú nandoꞌ ja̱ya̱ꞌlaꞌ mbá xúgiáanꞌlaꞌ, asndo xómáꞌ a̱kui̱in Jesukrísto̱ jaꞌnii.

9 Ríge̱ꞌ ñajuun rí na̱ndo̱ꞌo̱o̱ Ana̱ꞌlóꞌ ga̱jma̱á numalaꞌ: rí ma̱ꞌga-ragaja̱a̱ máꞌ xúꞌkhue̱n rí nandalaꞌ ju̱ya̱-mijnálaꞌ. Xúꞌkhue̱n máꞌ na̱ndo̱ꞌo̱o̱ rí ma̱ma̱ñalaꞌ jamí ma̱fraꞌa̱ꞌ májánlaꞌ mbá xúgíí, 10 ikhaa jngó ma̱goo mu̱ra̱ꞌwíílaꞌ rí i̱tha̱án máján. Xkuaꞌnii ma̱ꞌne jaꞌwu a̱kia̱nꞌlaꞌ jamí ma̱xáríga̱ nimbá rí ra̱máján mi̱ꞌthán ga̱jma̱á numalaꞌ ído̱ rí ma̱ꞌkha̱a Krísto̱. 11 Numuu rí ga̱jma̱á majñu̱u̱ Jesukrísto̱ gatíí rí máján nu̱ne̱laꞌ, kajngó ma̱gu̱ma-mba̱a̱ Ana̱ꞌlóꞌ jamí mi̱ꞌthán rí máján ga̱jma̱á numuu̱.

12 A̱ngui̱nꞌ, nandoꞌ rí ma̱gi̱da̱ꞌ idxa̱ꞌlaꞌ ríge̱ꞌ: mbá xúgíí rí nigíꞌnuꞌ, i̱tha̱án máꞌ nimbáyúu ne̱ rí ma̱gu̱ma-nuwiin xóó ajngáa máján. 13 Numuu rí mbá xúgíin máꞌ xa̱bo̱ tsí ku̱ra̱tuun ajwa̱nꞌ ná guꞌwá-ñajun jamí i̱ꞌwíin xa̱bo̱, nduyáa̱ mújúu̱n máꞌ rí kru̱ꞌúún géjwa̱nꞌ numuu na̱sngáá ga̱jma̱á numuu Krísto̱. 14 Xúꞌkhue̱n máꞌ mbaꞌiin a̱ngia̱nꞌlóꞌ mangiin, ído̱ nduyáa̱ rí kru̱ꞌúún géjwa̱nꞌ, i̱tha̱án nduye̱e̱ tsiakhe̱ inuu Táta̱ Jesús. Ikhaa jngó nánguá i̱ti̱ñúu̱ ni máꞌ tsímíñúu̱ rí nuthan-raꞌee̱ ajngóo Ana̱ꞌlóꞌ.

15 Gakon máꞌ rí mbá tikhuun nune̱ rúꞌkhue̱n ga̱jma̱á numuu rí naxígúu̱n juyeꞌ, kajngó mbuyáa̱ tsáa i̱tha̱án naꞌne. Xómáꞌ tsí mbá jmbu a̱kui̱ín ene̱ rá, nuthan-raꞌee̱ ajngóo Krísto̱ ga̱jma̱á mbá jañii a̱kuíi̱n. 16 Tsí nandúún mbuyáá tsáa i̱tha̱án naꞌne rá, tsíthan-raꞌee̱ ajngóo Krísto̱ numuu rí gakon nanimbúu̱n juyáa̱, rí nuthan-raꞌee̱ ne̱ numuu rí nandúu̱n gúxneꞌ xóó gaꞌkho̱ ná awúun géjwa̱nꞌ.* 17 Xómáꞌ tsí i̱ꞌwíin rá, nuthan-raꞌee̱ numuu rí nandúu̱n juyáa̱ Krísto̱, jamí nduyáa̱ rí gúda̱ꞌ ná géjwa̱nꞌ kajngó ma̱tha̱n-mbáá numuu ajngáa máján. 18 Dí lá gáꞌñuu xúꞌkhue̱n rá. Nithán-raꞌa máꞌ tsiakhe̱ ga̱jma̱á numuu Krísto̱, maske máꞌ mbá tikhuun tsíne̱ ga̱jma̱á mbá jañii a̱kui̱ín, jamí i̱ꞌwíin nune̱ ga̱jma̱á mbá jañii a̱kui̱ín. Ga̱jma̱á numuu rúꞌkhue̱n ikhúúnꞌ nadxu a̱kui̱nꞌ, jamí ma̱ꞌdxu a̱kui̱nꞌ i̱tha̱án xóó.

19 Nda̱yo̱o̱lo̱ꞌ máꞌ rí Xu̱u̱ꞌ Jesukrísto̱ mambáyíꞌ rí ma̱ga̱jnáaꞌlo̱ꞌ ná géjwa̱nꞌ, jamí xúꞌkhue̱n máꞌ mambáyúu rí nu̱tha̱n-jáñíílaꞌ Ana̱ꞌlóꞌ ga̱jma̱á numuꞌ. 20 Phú naꞌne a̱kui̱nꞌ, jamí gúꞌthu̱u̱n ga̱jma̱á mbá jañii a̱kui̱nꞌ ná inuu Ana̱ꞌlóꞌ rí ma̱xágájnuu nitháan gamakuꞌ. Numuu rí phú naꞌne jañii a̱kui̱nꞌ rí mbá xúgíí mbiꞌi mi̱ꞌthán rí máján numuu Krísto̱ ga̱jma̱á nindxu̱ꞌ. Ikhaa máꞌ gáꞌyoo xí xóó xtáá nda̱ya̱ o xí ma̱ja̱ñúꞌ mbo̱ꞌ. 21 Numuu rí ikhúúnꞌ xtáá ma̱ne̱ rí nandoo Krísto̱, jamí xí nijáñuꞌ rá, i̱tha̱án máꞌ máján ikhaa. 22 I̱ndo̱ó máꞌ numuu rí tsíyo̱o̱ dí ñajuun gára̱ꞌwíílo̱ꞌ, numuu rí xí xtáá nda̱ya̱lo̱ꞌ ná xuwi ríge̱ꞌ, nagaja̱a̱ ñajuun Krísto̱ rí na̱ne̱lo̱ꞌ. 23 Ikhaa jngó nájma̱ máꞌ mingíjyúu rí ma̱ra̱ꞌwíílo̱ꞌ. Naꞌne máꞌ a̱kui̱nꞌ rí ma̱ja̱ñúꞌ kajngó ma̱ꞌgáaꞌ ma̱xtáá ga̱jmi̱ꞌ Krísto̱, numuu rí phú i̱tha̱án máján rúꞌkhue̱n. 24 I̱ndo̱ó máꞌ numuu rí phú i̱tha̱án ndaꞌyóo rí ma̱xtáálo̱ꞌ xóó ga̱jma̱á numalaꞌ. 25 Phú nda̱yo̱o̱ mújúnꞌ máꞌ rí ma̱xájáñuꞌ xóó, jamí ma̱xtáá xóó ga̱jma̱á nindxa̱ꞌlaꞌ mbá xúgiáanꞌlaꞌ, ikhaa jngó ma̱gaja̱a̱ rí nanimba̱laꞌ ju̱ya̱á Ana̱ꞌlóꞌ jamí ma̱juwalaꞌ gagi. 26 Ikhaa jngó, ído̱ gáthangu̱únꞌ ma̱xtáá ga̱jma̱á nindxa̱ꞌlaꞌ mbu̱júꞌ, a̱ꞌkhue̱n rí phú i̱tha̱án ma̱guaꞌdáálaꞌ rí mu̱ne̱-mba̱a̱laꞌ Jesukrísto̱ ga̱jma̱á numuꞌ.

27 I̱ndo̱ó máꞌ na̱nda̱ꞌa̱ꞌlaꞌ, a̱ngui̱nꞌ, rí ga̱juwalaꞌ xómá jaꞌyoo ajngáa máján drígo̱o̱ Krísto̱. Ikhaa jngó xí naka gáya̱ꞌlaꞌ o tsíka mbo̱ꞌ, ma̱dxawuun rí kuajún-gúkuálaꞌ ga̱jma̱á mbóó a̱kia̱nꞌlaꞌ, jamí mbá ꞌnduꞌ nu̱ñajunlaꞌ ga̱jma̱á numuu rí nanimba̱ꞌlóꞌ juꞌyáá Ana̱ꞌlóꞌ xómá naꞌthán ajngáa máján. 28 Mu̱xúni̱ꞌñá-mijnálaꞌ rí mune̱-mi̱ꞌñálaꞌ xa̱bo̱ tsí tsíꞌkho̱ a̱kui̱ín juyalaꞌ. Rí xkuaꞌnii e̱ne̱laꞌ, rúꞌkhue̱n nasngájma jaꞌwu rí ikhii̱n ma̱mbá-ri̱gii̱n, xómáꞌ ikháanꞌlaꞌ nasngájma ne̱ rí ma̱jáwiáanꞌlaꞌ gáꞌne Ana̱ꞌlóꞌ. 29 Numuu rí ikháanꞌlaꞌ nijanálaꞌ rí ma̱nimba̱ꞌlaꞌ ju̱ya̱á Krísto̱, xúꞌkhue̱n máꞌ mangaa nijanálaꞌ rí mu̱míni̱ílaꞌ ga̱jma̱á numuu̱. 30 Ikhaa máꞌ gajmá guáꞌdáá ikháanꞌlaꞌ xómá ndi̱ya̱álaꞌ rí nigúꞌdo̱ꞌ ikhúúnꞌ, jamí nu̱dxawíínlaꞌ rí ikhaa máꞌ gajmá naka-ragúꞌdo̱ꞌ xóó.