1 Rí i̱mba̱ rí na̱tha̱nꞌlaꞌ, a̱ngui̱nꞌ, ga̱ꞌdxalaꞌ rí mbóó juwalaꞌ gajmiálaꞌ Táta̱ Jesús. Ra̱ꞌkhá gajmá ñajuun ná inuꞌ ikhúúnꞌ rí ma̱tháán ikhaa máꞌ ajngáa mbu̱júꞌ, jamí mbá rí mambáyálaꞌ ñajuun ne̱.

2 Gu̱ña̱wa̱n-mijnálaꞌ ná inúú xa̱bo̱ tsí xómá xu̱wánꞌ jaꞌñúú, ikhiin máꞌ tsí ra̱máján ene̱ ñajuun Ana̱ꞌlóꞌ, jamí i̱ndo̱ó nandúu̱n gúru̱thii̱n xuñúú xa̱bo̱. 3 Numuu rí ikháánꞌlóꞌ guaꞌdáálóꞌ máꞌ tsina jndi rí phú gakon, numuu rí nu̱ꞌne̱-mba̱ꞌwi̱i̱lóꞌ Ana̱ꞌlóꞌ ga̱jma̱á majñu̱u̱ Xu̱u̱ꞌ máꞌ ikhaa̱. Ikhaa jngó wéje̱ a̱kia̱nꞌlóꞌ ná inuu Krísto̱ Jesús, jamí nánguá máꞌ wéje̱ a̱kia̱nꞌlóꞌ ná inuu rí na̱ꞌnga̱ꞌlóꞌ nu̱ꞌne̱. 4 Maske máꞌ ikhúúnꞌ mangúúnꞌ ríga̱ numuu rí ma̱we̱je̱ a̱kui̱nꞌ ná inuu mbá xúgíí rúꞌkhue̱n. Xí mbáa na̱ju̱mu̱u̱ rí ríga̱ numuu rí ma̱we̱je̱ a̱kui̱in ná inuu mbá xúgíí rúꞌkhue̱n, i̱wa̱á máꞌ ga̱náꞌyoo rí xkuaꞌnii gáju̱mu̱ꞌ ikhúúnꞌ. 5 Numuu rí ikhúúnꞌ ni̱gruígú tsina jndi ído̱ nirámuu migiñu mbiꞌi rí ni̱gu̱múú, xúꞌkhue̱n máꞌ xa̱bi̱i Israél ñajunꞌ. Ná rí ri̱jyu̱u̱ꞌ Benjamín ni̱gu̱múú, jamí phú iꞌdiúún i̱ji̱ín xa̱bo̱ ebréo̱ ñajunꞌ. Xómáꞌ rí ga̱jma̱á numuu xtángoo rá, ne̱ne̱-mbánuu ne̱ mbá xúgíí numuu rí xa̱bo̱ fariséo̱ ñajunꞌ. 6 Phú ninújngoo gíꞌdoo numuu xtángoo i̱yo̱o̱lo̱ꞌ, rí asndo ne̱ne̱-ngíníi tsí nanimbu̱únꞌ juyáá Jesús, jamí asndo nimbáa táꞌthán ga̱jma̱á numuꞌ xí táne̱ rí máján xómáꞌ phú naꞌthán xtángoo.

7 I̱ndo̱ó máꞌ numuu rí mbá xúgíí ríge̱ꞌ rí phú ni̱gi̱ꞌdoo numuu ndi̱yo̱o̱lo̱ꞌ, rí xúge̱ꞌ rá, Krísto̱ naꞌne rí mba̱yo̱o̱ rí nda̱a̱ mbá jayu numuu ne̱. 8 Jamí phú gakon máꞌ, mbá xúgíí rúꞌkhue̱n nda̱yo̱o̱lo̱ꞌ rí nda̱a̱ nitháan numuu ne̱, jamí tsíyoo ma̱ꞌne mbéꞌtháán ne̱ ga̱jma̱á rí ma̱ne̱-núwíinlo̱ꞌ i̱tha̱án Krísto̱ Jesús, tsí naꞌthán-ñájwinꞌ. Ga̱jma̱á numuu̱ ikhaa̱ ni̱ni̱ꞌñúu mbá xúgíí rúꞌkhue̱n, jamí na̱ya̱xu̱u̱ ne̱ xómá náska, kajngó ma̱xtáá ga̱jmi̱ꞌ Krísto̱. 9 A̱ꞌkhue̱n rí ma̱xtáá mbóó ga̱jma̱á nindxu̱u̱. Ra̱ꞌkhá numuu rí ikhúúnꞌ ne̱ne̱-mbánuu xtángoo kajngó nánda̱a̱ aꞌkhúnꞌ ná inuu Ana̱ꞌlóꞌ, rí ga̱jma̱á numuu rí nanimbo̱ꞌ ja̱yo̱o̱ Krísto̱. Numuu rí nánda̱a̱ máꞌ aꞌkhánlóꞌ iꞌyoo Ana̱ꞌlóꞌ ga̱jma̱á numuu rí nanimba̱ꞌlóꞌ juꞌyáá Krísto̱. 10 Ni̱ni̱ꞌñúu máꞌ mbá xúgíí rúꞌkhue̱n kajngó ma̱goo ma̱ne̱-núwíinlo̱ꞌ i̱tha̱án Krísto̱, jamí mba̱yo̱o̱ ski̱yu̱u̱ꞌ rí ndiꞌyaa̱ ga̱jma̱á, xúꞌkhue̱n máꞌ ma̱mínu̱u̱ꞌ xómá rí nimínu̱u̱ꞌ ikhaa̱, jamí asndo ma̱goo ma̱ja̱ñúꞌ xómá rí nijáñuu̱ ikhaa̱. 11 Xkuaꞌnii máꞌ gúꞌthu̱u̱n rí mba̱ya̱a mbiꞌyuꞌ mangúúnꞌ.

12 Tsíyoꞌ gátha̱n rí nijrúꞌúún máꞌ inuu mbá xúgíí ni máꞌ na̱nguá káxu̱ún xóó. I̱ndo̱ó máꞌ numuu rí naka máꞌ xúꞌkhue̱n i̱tha̱án inúú numuu rí gúꞌthu̱u̱n rí ma̱xkamaa rí nandoo Ana̱ꞌlóꞌ rí ma̱nindxu̱ꞌ. Numuu rúꞌkhue̱n nixkamúú Krísto̱ Jesús mangaa. 13 A̱ngui̱nꞌ, ni máꞌ ikhúúnꞌ tsítha̱n rí ni̱ꞌngo̱ꞌ máꞌ. I̱ndo̱ó máꞌ numuu rí mbóó rí na̱ne̱lo̱ꞌ: nambumuꞌ ja̱yo̱o̱ mbá xúgíí rí ninguanúu tsu̱di̱í, jamí na̱xna̱-mína̱ꞌ tsiakhe̱ rí ma̱xkamaa rí wéje̱ i̱tha̱án inúú. 14 Naka máꞌ xúꞌkhue̱n kajngó ma̱gánú ná rí jaꞌyoo ma̱gánúlo̱ꞌ, xúꞌkhue̱n máꞌ ma̱goo ma̱gruígú rí maxníꞌ Ana̱ꞌlóꞌ ná mikhuíí. Ikhaa numuu rúꞌkhue̱n nindxaꞌwálóꞌ ga̱jma̱á majñu̱u̱ Krísto̱ Jesús.

15 Ikhaa jngó, mbá xúgiáanꞌlóꞌ tsáánꞌ nikhiáanꞌlóꞌ máꞌ ná rí nanimba̱ꞌlóꞌ, xkuaꞌnii gíꞌmaa rí ma̱ju̱ma̱ꞌlóꞌ jayu. Jamí xí mbrúthun i̱ju̱ma̱ꞌlaꞌ rá, Ana̱ꞌlóꞌ masngájma rí ma̱fraꞌa̱ꞌlaꞌ rúꞌkhue̱n mangaa. 16 Rí phú i̱tha̱án gíꞌdoo numuu ñajuun rí mu̱xúni̱ꞌñáá-ru̱ꞌne̱lóꞌ rí ni̱ma̱ñalóꞌ máꞌ.

17 A̱ngui̱nꞌ, gu̱ya̱ri̱dáálaꞌ rí na̱ne̱ ikhúúnꞌ, xúꞌkhue̱n máꞌ gu̱ya̱álaꞌ xáne ene̱ tsí nduya̱ri̱dáá máꞌ rí ndu̱ya̱álaꞌ rí nu̱ne̱ ikháanꞌxo̱ꞌ. 18 Numuu rí maphú mbaꞌiin xa̱bo̱ tsí tsíya̱-makuíí rí nijáñuu Krísto̱ ná ixe̱ krúsi̱. Mbaꞌa máꞌ nothon rí xkuaꞌnii ni̱tha̱nꞌlaꞌ, jamí ikhaa máꞌ na̱tha̱nꞌlaꞌ mbu̱júꞌ xúge̱ꞌ, asndo na̱mbi̱ya̱ꞌ rí na̱tha̱nꞌlaꞌ. 19 Ikhiin xa̱bo̱ tsúꞌkhue̱n wéje̱ rí ma̱mbá-ri̱gi̱in. Rí na̱wa̱ꞌa̱ jayu xuñúu̱, rúꞌkhue̱n rí phú nune̱-mba̱a̱, jamí nu̱xu̱xí-mijnée̱ ga̱jma̱á numuu rí jaꞌyoo ma̱ti̱ñúu̱ꞌ gáꞌne. I̱ndo̱ó máꞌ rí ríga̱ ná numbaa ríge̱ꞌ nu̱ndxa̱ꞌwa̱-mijnée̱ ga̱jma̱á numuu. 20 Xómáꞌ ikháánꞌlóꞌ, xa̱bo̱ mikhuíí ñajwanlóꞌ, ná rí guáꞌthi̱ínlóꞌ rí ma̱ꞌkha̱a Táta̱ Jesukrísto̱ tsí naꞌne-jríñáaꞌlóꞌ. 21 Ikhaa̱ mariꞌkhu-ri̱yaa̱ꞌ la xuyalóꞌ rí phú ngíná ge̱jyoꞌ, kajngó ma̱nindxu̱u̱ ne̱ xómá jaꞌnii xuyuu̱ ikhaa̱ rí maphú wáá. Ma̱ꞌnii̱ rúꞌkhue̱n ga̱jma̱á máꞌ tsiakhe̱ rí naꞌthán-ñájuu̱n mbá xúgíí jayu rí ríga̱.