1 Asndo ído̱ ninújngoo gu̱wa̱ꞌ i̱kho̱ (14) tsigu, a̱ꞌkhue̱n nika mbu̱júꞌ ná Jerusalén ga̱jmi̱ꞌ Bernabé. Ni̱ka̱ máꞌ Títo̱ mangaa ga̱jma̱á nindxa̱ꞌxo̱ꞌ. 2 Nikalo̱ꞌ numuu rí Ana̱ꞌlóꞌ nisngájmiꞌ rí jaꞌyoo ma̱ꞌgálo̱ꞌ. Ído̱ nigánú ná Jerusalén, ni̱ru̱wa-mina̱aꞌ gajmíꞌ i̱ndo̱ó máꞌ tsí na̱gu̱ma-nuwiin rí xa̱bo̱ ede̱ ñajúún. Ni̱tha̱n-makúu̱nlo̱ꞌ ajngáa máján rí na̱sngáálo̱ꞌ ná majña̱ꞌlaꞌ tsáanꞌ ra̱ꞌkháa xa̱bo̱ judío̱ ñajwanlaꞌ, kajngó ma̱xáꞌne rí ni̱ñajunlo̱ꞌ xúgi̱í jayu, ni máꞌ rí ma̱xági̱ꞌdoo numuu ñajun rí na̱ne̱lo̱ꞌ. 3 Xómáꞌ ikhii̱n máján máꞌ rí na̱sngáálo̱ꞌ ndiyáa̱, ikhaa jngó túne̱-tsu̱daa̱ máꞌ rí ma̱gu̱maa tsina jndi Títo̱, tsí ni̱ka̱ ga̱jma̱á nindxu̱ꞌ, maske máꞌ xa̱bo̱ griégo̱ ñajuu̱n. 4 Numuu rí ni̱tu̱ꞌu̱ún ngu̱ꞌwa̱ tikhuun tsí mi̱nduwa rí a̱ngia̱nꞌlóꞌ ñajúún. Ndiñúu̱ mu̱ña̱mee̱ kajngó mbuyáa̱ xáne juwalóꞌ numuu rí Krísto̱ Jesús neꞌne-jríñáa̱ꞌlóꞌ, kajngó mune̱-tsu̱dáa̱nꞌlóꞌ rí mu̱ꞌne̱-mbáníílóꞌ xtángoo. 5 Ni xí lájwíin tu̱ni̱ꞌñá-mijnáxo̱ꞌ rí muthan-ñajwanxo̱ꞌ, kajngó mu̱xúriꞌkhuííxo̱ꞌ ajngáa máján rí gakon rí nanimba̱ꞌlaꞌ máꞌ ju̱ya̱á.

6 Xómáꞌ tsí na̱gu̱ma-nuwiin rí xa̱bo̱ ede̱ ñajúún rá, na̱nguá máꞌ nithinꞌlo̱ꞌ i̱mba̱ rí nuxe̱ꞌ. (Ikhúúnꞌ tsíxná-gamiéjunꞌ xí phú gakon rí gíꞌdoo guéño numúu̱, numuu rí Ana̱ꞌlóꞌ tsíraꞌwíi̱n xa̱bo̱ tsí ma̱ꞌne-nga̱júu̱n.) 7 A̱ꞌkhue̱n gakon, nifruꞌúu̱n rí ikhúúnꞌ waꞌxnángawoꞌ rí ma̱tha̱n-rúꞌúúnlo̱ꞌ ajngáa máján xa̱bo̱ tsí ra̱ꞌkháa judío̱ ñajúún, xómá rí Pédro̱ waꞌxnángawíí rí maꞌthán-rúꞌúún ne̱ xa̱bo̱ judío̱. 8 Jmína̱a̱ꞌ máꞌ Ana̱ꞌlóꞌ neꞌne rí Pédro̱ ma̱nindxu̱u̱ tsí waxúngua̱a̱ꞌ ná majñu̱ú xa̱bo̱ judío̱, ikhaa̱ máꞌ niꞌnii̱ rí ikhúúnꞌ ma̱nindxu̱ꞌ tsí waxúngua̱a̱ꞌ ná majñu̱ú xa̱bo̱ tsí ra̱ꞌkháa judío̱ ñajúún mangaa. 9 Ikhaa jngó Santiágo̱,* Pédro̱* jamí Juáán, xa̱bo̱ ede̱ tsí phú i̱tha̱án gíꞌdoo numúú, ndiyáa̱ rí Ana̱ꞌlóꞌ nixnángaweꞌ rí ma̱ne̱ ñajun rúꞌkhue̱n, a̱ꞌkhue̱n ni̱ra̱tuu̱n ñawún májánxo̱ꞌ. Xkuaꞌnii ni̱snga̱jmee̱ rí a̱ngia̱nꞌxo̱ꞌ ñajúu̱n, kajngó ikhúúnꞌ ga̱jmi̱ꞌ Bernabé mu̱tha̱n-ráꞌaxo̱ꞌ ná majñu̱ú xa̱bo̱ tsí ra̱ꞌkháa judío̱ ñajúún, xómáꞌ ikhii̱n muthan-raꞌee̱ ná majñu̱ú xa̱bo̱ judío̱. 10 I̱ndo̱ó máꞌ ni̱nda̱ꞌa̱ꞌxo̱ꞌ rí mu̱mbáñúúxo̱ꞌ xa̱bo̱ tsí ngíníi. Jamí ikhaa máꞌ rúꞌkhue̱n ñajuun rí na̱xna̱-mína̱ꞌ tsiakhe̱ rí ma̱ne̱ asndo xúge̱ꞌ.

11 Nda̱wa̱á ído̱ ni̱ꞌkha̱ Pédro̱ ná xuajen Antiokía̱, ni̱thu̱u̱nlo̱ꞌ ná inuu̱ rí ra̱máján iꞌnii̱. 12 Numuu rí nákhí xóó táguáꞌnú mbá tikhuun xa̱bo̱ judío̱ tsí nixúꞌmii Santiágo̱, nakuiꞌtsii̱ gajmíi̱ a̱ngia̱nꞌlóꞌ tsí ra̱ꞌkháa xa̱bo̱ judío̱ ñajúún. Jamí nda̱wa̱á ído̱ rí niguáꞌníi̱, neꞌne-níjníí-mine̱e̱ꞌ, numuu rí namíñuu̱ ene̱ tsí phú nu̱tsu̱da rí muda tsina jndi xa̱bo̱ tsí ra̱ꞌkháa judío̱ ñajúún. 13 Ído̱ ndiyáá tsí i̱ꞌwíin a̱ngia̱nꞌlóꞌ xa̱bo̱ judío̱ rí a̱jma̱ inuu Pédro̱, nene̱-níjníí-mi̱jnée̱ mangii̱n, jamí asndo Bernabé máꞌ mangaa neꞌne a̱jma̱ inuu numuu rí a̱jma̱ inúu̱ ikhii̱n. 14 Ikhaa jngó, ído̱ ndi̱yo̱o̱ rí tsíni̱i̱ xómá jaꞌyoo ajngáa máján rí gakon, a̱ꞌkhue̱n ni̱thu̱u̱nlo̱ꞌ Pédro̱ ná inúu̱ mbá xúgíi̱n: «Xí ikháánꞌ tsáánꞌ ñajwaanꞌ xa̱bo̱ judío̱, nathane̱ xómá xa̱bo̱ tsí ra̱ꞌkháa judío̱ ñajúún, náá numuu kajngó nathane̱-ski̱ñu̱ú tsí ra̱ꞌkháa judío̱ ñajúún rí mune̱ xómá xa̱bo̱ judío̱ xúꞌkhue̱n róꞌ».

15 Ikháanꞌ ñajwanxo̱ꞌ xa̱bo̱ judío̱ asndo nákhí rí ni̱gu̱máaꞌxo̱ꞌ, jamí ra̱ꞌkháa xa̱bo̱ tsí nune̱ aꞌkhán xómá rí nune̱ xa̱bo̱ tsí ra̱ꞌkháa judío̱ ñajúún. 16 Maske máꞌ xúꞌkhue̱n, nduꞌyáá májánlóꞌ rí Ana̱ꞌlóꞌ ma̱xáꞌthán rí nánda̱a̱ aꞌkhúun nimbáa xa̱bo̱ ga̱jma̱á majñu̱u̱ rí naꞌne-mbánuu xtángoo, rí ga̱jma̱á majñu̱u̱ rí wéje̱ a̱kuii̱n ná inuu Jesukrísto̱. Ikháanꞌ mangáanꞌxo̱ꞌ nanimba̱ꞌxo̱ꞌ ju̱ya̱á Jesukrísto̱ kajngó maꞌthán Ana̱ꞌlóꞌ rí nánda̱a̱ aꞌkhánxo̱ꞌ ga̱jma̱á majñu̱u̱ ikhaa̱, ra̱ꞌkhá ga̱jma̱á majñu̱u̱ rí nu̱ne̱-mbánííxo̱ꞌ xtángoo. Numuu rí Ana̱ꞌlóꞌ ma̱xáꞌthán rí nánda̱a̱ aꞌkhúun nimbáa xa̱bo̱ ga̱jma̱á numuu rí naꞌne-mbánuu̱ xtángoo.

17 Ikháanꞌ ndu̱ꞌyáxo̱ꞌ rí Ana̱ꞌlóꞌ maꞌthán rí nánda̱a̱ aꞌkhánxo̱ꞌ ga̱jma̱á majñu̱u̱ Krísto̱, numuu rí xa̱bo̱ tsí nune̱ máꞌ aꞌkhán ñajwan mangáanꞌxo̱ꞌ. Á rúꞌkhue̱n iꞌthán rí Krísto̱ naꞌne rí ma̱nindxa̱ꞌlóꞌ xa̱bo̱ tsí nune̱ aꞌkhán rá dxe̱ꞌ. ¡Na̱nguá mbá jayu! 18 Xí ikhúúnꞌ naka gáya̱a mbu̱júꞌ xtángoo rí ni̱ni̱ꞌñá-ti̱ga̱ máꞌ, na̱ne̱-mina̱ꞌ xa̱bo̱ aꞌkhán ná inuu Ana̱ꞌlóꞌ xúꞌkhue̱n rá. 19 Numuu rí ga̱jma̱á majñu̱u̱ xtángoo ikhúúnꞌ nijáñuꞌ máꞌ ná inuu xtángoo. Kajngó rí xúge̱ꞌ rá, ma̱xtáá ma̱ne̱ rí nandoo Ana̱ꞌlóꞌ. 20 Ikhúúnꞌ waꞌdujmúú ná ixe̱ krúsi̱ ma̱ja̱ñúꞌ ga̱jma̱á nindxu̱u̱ Krísto̱. Nánguá máꞌ xtáá nda̱ya̱ ikhúúnꞌ, rí Krísto̱ xtáa ndaꞌya ná awúun a̱kui̱nꞌ. Rí xúge̱ꞌ rá, xtáá nda̱ya̱ ga̱jma̱á numuu rí wéje̱ a̱kui̱nꞌ ná inuu A̱dée Ana̱ꞌlóꞌ, tsí ndiyoo jaꞌyeꞌ jamí nixnáxe̱-mina̱ꞌ rí ma̱ja̱ñúu ga̱jma̱á numuꞌ. 21 Ikhaa jngó, tsíyoꞌ gáni̱ꞌñúu rí phú máján naxná Ana̱ꞌlóꞌ. Xí ga̱jma̱á numuu xtángoo maꞌthán Ana̱ꞌlóꞌ rí nánda̱a̱ aꞌkhúún xa̱bo̱, nda̱a̱ máꞌ numuu rí nijáñuu Krísto̱ xúꞌkhue̱n rá.