27 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Ikháánꞌ nána̱, tsáánꞌ na̱nguá iyoo ma̱tha̱ni̱i e̱je̱n,
ga̱ꞌdxu a̱kia̱anꞌ.
Ikháánꞌ, tsáánꞌ ni miꞌtsú tátha̱ne̱ xuajen,
atandxaꞌwá numuu rí gagi xtaa.
Numuu rí i̱tha̱án mbaꞌiin e̱je̱n ma̱gi̱ꞌdiin a̱ꞌgo̱ tsí ninguaná-ti̱go̱o̱
xó rí a̱ꞌgo̱ tsí ninújún».4.27 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 54.1.
28 A̱ngui̱nꞌ, ikháánꞌlóꞌ4.28 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «ikháanꞌlaꞌ». ni̱gu̱máaꞌlóꞌ xómá ni̱gu̱maa Isaák. Ni̱gu̱máaꞌlóꞌ ga̱jma̱á numuu rí nixuda-mina̱ꞌ Ana̱ꞌlóꞌ ga̱jma̱á nindxu̱u̱ Abraám. 29 Jamí xúge̱ꞌ naríga̱ xómá niríga̱ nákhí wajyúú, rí ada̱ tsí ni̱gu̱maa xómá na̱gu̱mii jañúú xa̱bo̱ numbaa, naꞌne-ngínáa̱ tsí ni̱gu̱maa ga̱jma̱á ski̱yu̱u̱ꞌ Xu̱u̱ꞌ Ana̱ꞌlóꞌ.