Ga̱juwalaꞌ rí mu̱ne̱laꞌ rí nandoo Xu̱u̱ꞌ Ana̱ꞌlóꞌ
16 Ikhaa jngó xáꞌnii i̱tha̱nꞌlaꞌ: Ga̱juwalaꞌ rí mu̱ne̱laꞌ rí nandoo Xu̱u̱ꞌ Ana̱ꞌlóꞌ, kajngó mu̱xúne̱laꞌ rí xkawe̱ꞌ nandoo xuyalaꞌ. 17 Numuu rí xuyalóꞌ na̱tsa̱ñu̱u̱ꞌ ga̱jmáa̱ Xu̱u̱ꞌ Ana̱ꞌlóꞌ. Xúꞌkhue̱n máꞌ Xu̱u̱ꞌ Ana̱ꞌlóꞌ na̱tsa̱ñu̱u̱ꞌ ga̱jmáa̱ xuyalóꞌ. Mbá nájmii̱ nawajún-ꞌthu̱n-mijnée̱, kajngó mu̱xúne̱laꞌ rí nandalaꞌ. 18 I̱ndo̱ó máꞌ xí nu̱ne̱-mbáníílaꞌ rí nandoo Xu̱u̱ꞌ Ana̱ꞌlóꞌ, na̱nguá máꞌ wéje̱ inalaꞌ rí mu̱ne̱-mbáníílaꞌ xtángoo xúꞌkhue̱n rá.
19 Nakujma nguáná máꞌ mbu̱ꞌyáálóꞌ tsáa ñajuun tsí naꞌne rí nandoo xuyuu: tsí nabóo ga̱jma̱á xa̱bo̱ tsí táyáa, tsí nanújngoo-rámuu naꞌne rí xkawe̱ꞌ, tsí maphú mate̱ꞌ rí naꞌne, 20 tsí naꞌne-mbi̱in tsí ra̱ꞌkháa Ana̱ꞌlóꞌ ñajúún, tsí naꞌne xawan, tsí gíꞌdiin sia̱nꞌ xa̱bo̱, tsí nakúxe̱ a̱ꞌwá, tsí naxíyu̱u̱ꞌ, tsí najiꞌnáa ga̱jma̱á numuu mbá xúgíí, tsí najiꞌnáa jaꞌñúú xa̱bo̱, tsí na̱tsa̱ñu̱u̱ꞌ gajmíí xa̱bo̱, tsí naꞌne rí mu̱xpi̱ꞌtha̱-mijná xa̱bo̱, 21 tsí naxígu̱u̱ꞌ, tsí na̱gu̱díin xa̱bo̱, tsí najnga̱a̱, tsí naꞌne ndxa̱a̱ numuu rí ma̱ꞌne rí xkawe̱ꞌ na̱nda̱ꞌa̱ xuyuu, jamí i̱ꞌwá rí xkuaꞌnii máꞌ xkawe̱ꞌ. Na̱tha̱nꞌlaꞌ mbu̱júꞌ, xómá ni̱tha̱nꞌlaꞌ nákhí xúꞌkhue̱n, tsí nune̱ máꞌ xúꞌkhue̱n rí xkawe̱ꞌ, nda̱a̱ rí gájanúu̱ ná naꞌthán-ñájun Ana̱ꞌlóꞌ.
22 Xómáꞌ tsí Xu̱u̱ꞌ Ana̱ꞌlóꞌ rá, naꞌnii̱ rí ma̱galóꞌ juꞌñúú xa̱bo̱, rí ma̱ꞌdxu a̱kia̱nꞌlóꞌ, rí ma̱juwalóꞌ tsímáá, rí ma̱ꞌngo̱o̱ a̱kia̱nꞌlóꞌ, rí ma̱ꞌne gamakuáanꞌlóꞌ, rí ma̱ꞌne májáan a̱kia̱nꞌlóꞌ, rí mu̱ꞌne̱-mbáníílóꞌ rí nuꞌthánlóꞌ, 23 rí mu̱xrígú-mijnálóꞌ, jamí rí mu̱xúꞌne̱lóꞌ rí xkawe̱ꞌ nandoo xuyalóꞌ. Nda̱a̱ nimbá xtángoo rí naꞌthán rí ra̱máján rí mu̱ꞌne̱lóꞌ mbá xúgíí rúꞌkhue̱n. 24 Jamí tsí ñajúún xa̱bi̱i Krísto̱,5.24 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «Krísto̱ Jesús». nini̱i̱ máꞌ rí ma̱ja̱ñúu ná ixe̱ krúsi̱ mbá xúgíí inii rí xkawe̱ꞌ rí nandoo gáꞌne xuñúu̱. 25 Numuu rí ga̱jma̱á numuu Xu̱u̱ꞌ Ana̱ꞌlóꞌ juwalóꞌ rí xúge̱ꞌ, ikhaa jngó jaꞌyoo rí mu̱ꞌgua̱-ru̱ꞌne̱lóꞌ rí nandoo Xu̱u̱ꞌ Ana̱ꞌlóꞌ mangaa. 26 Ma̱xáju̱ma̱ꞌlóꞌ rí ikháánꞌlóꞌ phú i̱tha̱án gíꞌdoo numalóꞌ xó rí i̱ꞌwíin, mu̱xúꞌne̱lóꞌ rí ma̱jiꞌnáaꞌlóꞌ juꞌya-mijnálóꞌ, ni máꞌ ma̱xáxígua̱ꞌlóꞌ juꞌya-mijnálóꞌ.