1 A̱ꞌkhue̱n rí asndo ná awúun i̱gi̱ꞌ Jonás niꞌthán-jáñuu Anu̱u̱ tsí xtáa Mikhuíí. 2 Xáꞌnii niꞌthée̱n:

«Awúun rí xtáá gaꞌkho̱ ni̱tha̱n-jáñaaꞌ, Táta̱,

jamí ikháánꞌ nitadxawunꞌ.

Awúun rí ku̱ꞌwu̱únꞌ ná iñá-wajíín, ni̱tha̱n-jáñaaꞌ,

jamí ikháánꞌ nitadxawíín a̱ꞌwóꞌ.

3 Nithada-muꞌúún ná phú me̱jno̱ꞌ awúun iya a̱pha̱.

I̱ndo̱ó máꞌ iya natuaꞌán ná ku̱ꞌwu̱únꞌ.

Mbá xúgíí ski̱yu̱u̱ꞌ iya rí narmbúxe̱-mina̱ꞌ nanújngoo ná tsu̱du̱ꞌ.

4 Asndo ni̱ndxa̱ꞌwa̱-mína̱ꞌ rí níyaaꞌ máꞌ xtayoꞌ.

Maske máꞌ xúꞌkhue̱n, ma̱thangu̱ún máꞌ tsiakhe̱ mba̱yo̱o̱ guꞌwá dxákiaanꞌ.

5 Ni̱rmúꞌúún mbá jayu ná awúun iya,

jamí waꞌdu-muꞌúún mbá jayu ná iñá me̱jno̱ꞌ.

I̱ndo̱ó máꞌ mbáꞌwá nimbróꞌoo ná idxu̱ꞌ.

6 Nigátáa asndo ná xtuun nakhúu júba̱.

Mbá jámuu nirugoo ju̱ba̱ꞌ ná tsu̱du̱ꞌ i̱yo̱o̱lo̱ꞌ.

Xómáꞌ ikháánꞌ rá, Tátéꞌ, Anu̱ꞌ Mikhuíí, nithane̱-jríñu̱úꞌ rí tájáñuꞌ.

7 Ído̱ nda̱yo̱o̱ rí na̱ka̱ máꞌ xu̱ꞌ rá,

ni̱rmáꞌáan a̱kui̱nꞌ ja̱ya̱a̱ꞌ, Táta̱.

Ni̱ga̱nú a̱ꞌwóꞌ asndo ná ñaꞌwaanꞌ ná guꞌwá dxákiaanꞌ.

8 Xómáꞌ xa̱bo̱ tsí nune̱-mbi̱in tsí ra̱ꞌkháa Ana̱ꞌlóꞌ ñajúún,

nu̱ni̱ꞌñáá-ranimbu̱únꞌ juyaaꞌ ikháánꞌ.

9 Xómáꞌ ikhúúnꞌ ma̱sian ajmúú rí ma̱ne̱-mba̱ánꞌ,

xúꞌkhue̱n máꞌ ma̱xna̱xáaꞌ tsi̱gi̱jña̱ꞌ,

jamí ma̱ne̱-mbánuu rí ni̱xu̱ꞌdá-mina̱ꞌ ná inaaꞌ.

¡I̱ndo̱ó máꞌ ikháánꞌ, Anu̱ꞌ Mikhuíí, na̱ꞌnga̱a̱ꞌ nathane̱-jáwíin xa̱bo̱!».

10 A̱ꞌkhue̱n rí Ana̱ꞌlóꞌ Mikhuíí niꞌthán-ñájuun i̱gi̱ꞌ, jamí i̱gi̱ꞌ ni̱ka̱ gáxi-ri̱ya̱aꞌ Jonás ná rawuun iya.