1 A̱ꞌkhue̱n ni̱ꞌkha̱ rí riajma̱ nothon ajngáa rawuun Ana̱ꞌlóꞌ Mikhuíí inuu Jonás, xáꞌnii waꞌtháa̱n: 2 «Ayu re̱ ná xuajen Níni̱be̱ rí maphú mba̱a̱, jamí arathán-raꞌa a̱pha̱ ikhín ajngáa rí ma̱tha̱a̱nꞌ».

3 A̱ꞌkhue̱n rí Jonás ni̱ka̱ ná xuajen Níni̱be̱, xómá rí waꞌxná-ñájwíi̱n neꞌne Ana̱ꞌlóꞌ. Níni̱be̱ ñajuun mbá xuajen rí maphú mba̱a̱ mi̱ndaꞌkho, atsú mbiꞌi ma̱ꞌne xa̱bo̱ rí ma̱ꞌga nakhúu ná awúun ne̱ kajngó ma̱nújngoo̱ ne̱. 4 Jonás ni̱to̱ꞌo̱o̱ ná xuajen jamí ni̱ke̱e̱ nakhúu̱ mbá mbiꞌi jayu, a̱ꞌkhue̱n nigíꞌdu̱u̱n niꞌthán-raꞌee̱ gakhe̱ xáꞌnii: «Ana̱ꞌlóꞌ Mikhuíí ma̱ꞌne-gámba̱a xuajen ríge̱ꞌ, ído̱ gárámuu a̱jma̱ skíñú (40) mbiꞌi». 5 A̱ꞌkhue̱n rí mbá xúgíin xa̱bo̱ Níni̱be̱ ninimbu̱únꞌ rí niꞌthán Ana̱ꞌlóꞌ, jamí ni̱ꞌgí-mijnée̱ rí mbuya-miꞌkhíi̱. Asndo xa̱bo̱ tsí júwa̱ꞌ mújúún jamí asndo tsí ngíníi nijúwúún xtíin rí xíni, rí naꞌtsu̱ra̱ꞌa, rí nu̱snga̱jmee̱ rí nathanga̱a a̱kuíi̱n.

6 Ído̱ rí thúngaa drígu̱ún xa̱bo̱ Níni̱be̱ niꞌdxuun ajngáa rúꞌkhue̱n, a̱ꞌkhue̱n mangaa̱ niniñuu̱ ná ꞌgíi̱ naꞌthán-ñájwii̱n. Niríyaa̱ꞌ xtíin rí mitsaan júwuu̱n, nijúwaa̱n xtíin rí xíni rí naꞌtsu̱ra̱ꞌa jamí ni̱gi̱ꞌi̱i̱ mbayíí ná inuu idi. 7 Xúꞌkhue̱n máꞌ nixná-ñájwii̱n rí jámba̱a̱ xa̱bo̱ Níni̱be̱ madxawuun ajngáa rí naꞌthée̱n a̱pha̱ gajmíi̱ xa̱bii̱: «Nimbáa xa̱bo̱ ni máꞌ xu̱kú tsí ñajúún xede̱ jamí xu̱kú mogo̱, mu̱xúpeꞌtso ni máꞌ mu̱xúwa̱a̱n iya. 8 A̱ꞌkhue̱n gakon jámba̱a̱ xa̱bo̱ jamí xu̱kú gajúwúún xtíin rí xíni. Xúꞌkhue̱n máꞌ guthán-jáñíi̱ Ana̱ꞌlóꞌ ga̱jma̱á mbá xúgíí ski̱ñúu̱. Ga̱thanga̱a a̱kui̱in mbámbáa inuu rí xkawe̱ꞌ naꞌne jamí ganiñuu jamba̱a̱ rí ra̱máján ná na̱ka̱. 9 Á gáꞌne xí Ana̱ꞌlóꞌ mandxaꞌwá-mina̱aꞌ jamí maxrígúu̱ a̱kuii̱n rí najiꞌnáa̱, jamí ma̱xáꞌne-gámbáa̱nꞌlóꞌ».

10 Ído̱ ndiꞌyoo Ana̱ꞌlóꞌ rí xa̱bo̱ Níni̱be̱ ni̱ni̱ꞌñáá-rune̱ rí ra̱máján, a̱ꞌkhue̱n nithanga̱a a̱kuii̱n rí niꞌthée̱n ma̱ꞌñúu̱, jamí na̱nguá máꞌ neꞌne-gámbii̱n.