1 Nákhí rí ginii jayu xtáa máꞌ Ajngáa,

jamí tsí ñajuun Ajngáa xtáa ga̱jma̱á nindxu̱u̱ Ana̱ꞌlóꞌ,

jamí tsí ñajuun Ajngáa ikhaa̱ máꞌ ñajuu̱n Ana̱ꞌlóꞌ.

2 Ikhaa̱ xtáa̱ ga̱jma̱á nindxu̱u̱ Ana̱ꞌlóꞌ

nákhí rí ginii jayu.

3 Ga̱jma̱á majñu̱u̱ ikhaa̱ ni̱gu̱ma-ku̱maa mbá xúgíí rí ríga̱.

Xí ra̱ꞌkhá ga̱jma̱á numuu̱ ikhaa̱,

nimbá rí ríga̱ tágu̱ma-ku̱maa.

4 Ikhaa̱ naꞌnii̱ rí ma̱ju̱wá jámuu xa̱bo̱,

jamí ikhaa̱ tsí naꞌnii̱ rí ma̱ju̱wá xa̱bo̱ ñajuu̱n agu rí nambiꞌñúú xa̱bo̱ numbaa.

5 Agu ríge̱ꞌ nambiꞌi-taꞌa ná mijína,

jamí rí mijína tsíꞌngo̱o̱ gásnduíyuu ne̱.

6 Ana̱ꞌlóꞌ nixuꞌmaa mbáa xa̱bo̱ tsí mbiꞌyuu Juáán. 7 Ikhaa̱ ni̱ꞌkhe̱e̱ kajngó ma̱nindxu̱u̱ xa̱bo̱ tsí ndiꞌyoo ga̱jma̱á iduu, kajngó maꞌthée̱n ga̱jma̱á numuu tsí ñajuun agu, kajngó mbá xúgíin xa̱bo̱ gánimbu̱únꞌ ga̱jma̱á majñu̱u̱ rí naꞌthán Juáán. 8 Ra̱ꞌkhá máꞌ jmína̱a̱ꞌ Juáán ñajuun agu, rí ikhaa̱ ni̱ꞌkhe̱e̱ maꞌthée̱n ga̱jma̱á numuu tsí ñajuun agu. 9 Tsí gakon rí agu ñajuun, tsí nambiꞌñúú mbá xúgíin xa̱bo̱, inu xtáa̱ ma̱ꞌkhe̱e̱ ná numbaa ríge̱ꞌ nákhí xúꞌkhue̱n.

10 Tsí ñajuun Ajngáa xtáa̱ máꞌ ná numbaa, jamí numbaa ni̱gu̱ma-ku̱maa ga̱jma̱á majñu̱u̱ ikhaa̱, xómáꞌ xa̱bo̱ numbaa túne̱-nuwii̱n. 11 Ni̱ꞌkhe̱e̱ ná numbaa drígo̱o̱, i̱ndo̱ó máꞌ numuu rí xa̱bii̱ ra̱khúún gúdri̱guíi̱. 12 Xómáꞌ tsí ni̱dri̱guíi̱ jamí nanimbu̱únꞌ juyáa̱, ikhaa̱ niꞌnii̱ rí ma̱goo ma̱nindxúu̱n i̱ji̱in Ana̱ꞌlóꞌ. 13 Tsígu̱mii tsíge̱ꞌ xómá na̱gu̱mii i̱ji̱ín xa̱bo̱ numbaa, ni máꞌ ra̱ꞌkhá numuu rí nandúún o nuꞌgí-mijná xa̱bo̱, rí jmína̱a̱ꞌ máꞌ Ana̱ꞌlóꞌ naꞌne rí ma̱nindxúu̱n i̱jii̱n.

14 Ikhaa tsí ñajuun Ajngáa neꞌne-mina̱ꞌ xa̱bo̱ numbaa jamí ni̱ꞌkhe̱e̱ gáxtáa̱ ga̱jma̱á nindxa̱ꞌxo̱ꞌ. Maphú májáan a̱kuii̱n jamí phú kuwii̱n mangaa. Ikháanꞌxo̱ꞌ ndi̱ya̱áxo̱ꞌ rí phú wáá jaꞌnii̱, wáá rí jaꞌyoo i̱ndo̱ó máꞌ Ada̱ Mbáwíi tsí gíꞌdaa Tátiálóꞌ.

15 Ga̱jma̱á numuu̱ ikhaa̱ niꞌthán-raꞌa a̱pha̱ Juáán: «Ikhaa tsíge̱ꞌ ñajuun tsí na̱tha̱nlo̱ꞌ numuu nákhí rí ni̱tha̱nlo̱ꞌ: "Phú i̱tha̱án gíꞌdoo numuu tsí na̱ꞌkha̱ tsu̱du̱ꞌlo̱ꞌ, numuu rí xtáa̱ máꞌ nákhí rí xóó tágu̱múú ikhúúnꞌ"». 16 Ga̱jma̱á numuu rí phú májáa̱n ikhaa̱, mbá xúgiáanꞌlóꞌ najanálóꞌ rí máján. I̱mba̱ jamí i̱mba̱ na̱gu̱ma-tsakun-rámáaꞌlóꞌ iꞌnii̱. 17 Numuu rí ga̱jma̱á majñu̱u̱ Moisés nixná Ana̱ꞌlóꞌ xtángoo, xómáꞌ ga̱jma̱á majñu̱u̱ Jesukrísto̱ nikujma rí maphú májáan a̱kui̱in jamí phú kuwiin Ana̱ꞌlóꞌ. 18 Asndo ni miꞌtsú nimbáa xa̱bo̱ numbaa táꞌyoo Ana̱ꞌlóꞌ ga̱jma̱á iduu. I̱ndo̱ó máꞌ Ada̱ Mbáwíi tsí ñajuun Ana̱ꞌlóꞌ jamí mbóó xtáa̱ ga̱jmáa̱ nindxu̱u̱ Tátiálóꞌ, nisngájmalóꞌ xáne jaꞌnii Ana̱ꞌlóꞌ.

19 Ríge̱ꞌ ñajuun rí niꞌthán Juáán, nákhí rí xa̱bo̱ ñajun judío̱ tsí júwa̱ꞌ ná Jerusalén ni̱xu̱ꞌmii̱ dxakuun jamí xa̱bo̱ tsí juya̱ iꞌdiuu Lebí rí mu̱ra̱xíi̱ Juáán:

—Tsáa ñajwaanꞌ ikháánꞌ róꞌ.

20 Jamí ikhaa̱ mbá jaꞌwu máꞌ niꞌthúu̱n, kajngó ma̱fruꞌúu̱n:

—Ra̱ꞌkhá ikhúúnꞌ ñajunꞌ Krísto̱.

21 A̱ꞌkhue̱n rí ni̱ra̱xíi̱:

—Tsáa ñajwaanꞌ xúꞌkhue̱n róꞌ. Á ikháánꞌ ñajwaanꞌ Elía̱s dxe̱ꞌ.

—Ra̱ꞌkháa Elía̱s ñajunꞌ ikhúúnꞌ, —niriꞌña̱a Juáán.

A̱ꞌkhue̱n ni̱ra̱xíi̱ mbu̱júꞌ:

—Á ikháánꞌ ñajwaanꞌ tsí na̱gu̱wíjnga̱a ajngóo Ana̱ꞌlóꞌ, tsí wéje̱ máꞌ rí maxúngua̱a̱ꞌ Ana̱ꞌlóꞌ dxe̱ꞌ.

—Na̱nguá, —niꞌthán Juáán.

22 A̱ꞌkhue̱n ni̱ra̱xíi̱ mbu̱júꞌ:

—Tsáa ñajwaanꞌ xúꞌkhue̱n róꞌ. Kajngó xkuaꞌnii gúthu̱únxo̱ꞌ tsí ni̱xu̱ꞌmáaꞌxo̱ꞌ. Dí irathán ikháánꞌ ga̱jma̱á numaaꞌ rá.

23 A̱ꞌkhue̱n niriꞌña Juáán:

—Ikhúúnꞌ ñajunꞌ mbáa xa̱bo̱ tsí nandxaꞌwá ná mbaa niníí: "¡Gu̱ne̱-jmbu̱ulaꞌ jambo̱o̱ Táta̱!",* xómá niꞌthán Isaía̱s tsí ni̱gu̱wíjnga̱a ajngóo Ana̱ꞌlóꞌ wajyúú.

24 A̱ꞌkhue̱n rí xa̱bo̱ tsí waxúꞌmii nene̱ xa̱bo̱ fariséo̱ 25 ni̱ra̱xíi̱ Juáán:

—Xí ra̱ꞌkháa Krísto̱ ñajwaanꞌ, ni máꞌ ra̱ꞌkháa Elía̱s ñajwaanꞌ, ni máꞌ ra̱ꞌkháa tsí na̱gu̱wíjnga̱a ajngóo Ana̱ꞌlóꞌ tsí wéje̱ máꞌ rí maxúngua̱a̱ꞌ Ana̱ꞌlóꞌ ñajwaanꞌ, náá numuu kajngó nataxúꞌdu-maꞌíin xa̱bo̱ ná awúun iya xúꞌkhue̱n róꞌ.

26 Xómáꞌ Juáán niriꞌñúu̱:

—Ikhúúnꞌ na̱xu̱ꞌdú-maꞌíinlo̱ꞌ xa̱bo̱ ná awúun iya, jamí ná majña̱ꞌlaꞌ a̱ꞌkhue̱n xtáa mbáa tsí ikháanꞌlaꞌ tsíne̱-nuwiinlaꞌ. 27 Ikhaa tsúꞌkhue̱n ñajuun tsí na̱ꞌkha̱ tsu̱du̱ꞌlo̱ꞌ. Ikhúúnꞌ na̱nguá gíꞌdoo numuꞌ rí ma̱ra̱khúu maske máꞌ asndo chádoo̱.

28 Mbá xúgíí ríge̱ꞌ niríga̱ ná xuajen Betába̱ra̱,* ná kri̱doo matha Jordán, ná kua̱ꞌa̱a̱n Juáán naxúꞌdu-maꞌíin xa̱bo̱ ná awúun iya.

29 I̱mbá gátsíí rí rúꞌkhue̱n ndiꞌyoo Juáán rí na̱ꞌkha̱-raxuꞌma-mina̱ꞌ Jesús ná inuu̱, a̱ꞌkhue̱n niꞌthée̱n: «Je̱én lá, ge̱jyoꞌ xtáa̱ A̱ꞌdá-móguíi Ana̱ꞌlóꞌ tsí narngudi̱i aꞌkhúún xa̱bo̱ numbaa. 30 Ga̱jma̱á numuu̱ ikhaa̱ na̱tha̱nlo̱ꞌ nákhí rí ni̱tha̱nlo̱ꞌ: "Phú i̱tha̱án gíꞌdoo numuu xa̱bo̱ tsí na̱ꞌkha̱ tsu̱du̱ꞌlo̱ꞌ, numuu rí xtáa̱ máꞌ nákhí rí xóó tágu̱múú ikhúúnꞌ". 31 Jmínu̱úꞌ máꞌ ikhúúnꞌ tsíne̱-núwíi̱nlo̱ꞌ nákhí rí ginii, i̱ndo̱ó máꞌ numuu rí niꞌkha ra̱xu̱ꞌdú-maꞌíinlo̱ꞌ xa̱bo̱ ná awúun iya kajngó xa̱bo̱ Israél mune̱-nuwii̱n ikhaa̱».

32 A̱ꞌkhue̱n niꞌthán xóó Juáán: «Ikhúúnꞌ ndi̱yo̱o̱ rí ná mikhuíí na̱ga̱taa Xu̱u̱ꞌ Ana̱ꞌlóꞌ, xómá na̱ga̱taa rigu, jamí nixtáa jayu ga̱jma̱á nindxu̱u̱. 33 Jmínu̱úꞌ máꞌ ikhúúnꞌ tsíne̱-núwíi̱nlo̱ꞌ nákhí rí ginii, xómáꞌ tsí nixúngu̱únꞌ rí ma̱xu̱ꞌdú-máꞌíin xa̱bo̱ ná awúun iya niꞌthínꞌlo̱ꞌ: "Ikhaa tsí na̱ga̱taa Xu̱ꞌ ga̱jma̱á nindxu̱u̱ gátha̱ya̱á jamí xtáa̱ jayu ga̱jma̱á nindxu̱u̱, ikhaa tsúꞌkhue̱n ñajuun tsí ma̱ꞌne rí xa̱bo̱ mu̱dríguíi Xu̱ꞌ". 34 Ikhúúnꞌ ndi̱yo̱o̱lo̱ꞌ, ikhaa jngó na̱tha̱nlo̱ꞌ rí ikhaa̱ ñajuu̱n A̱dée Ana̱ꞌlóꞌ».

35 I̱mbá gátsíí rí rúꞌkhue̱n, ikhín máꞌ kua̱ꞌa̱a̱n mbu̱júu Juáán, gajmíi̱ a̱jmi̱i tsí naꞌsngúu̱n. 36 Ído̱ ndiꞌyoo̱ rí ikhín máꞌ i̱ka̱-ranújngoo Jesús mangaa, a̱ꞌkhue̱n Juáán niꞌthán: «¡Je̱én lá! A̱ꞌkhue̱n i̱ka̱ A̱ꞌdá-móguíi Ana̱ꞌlóꞌ».

37 Ído̱ ni̱dxawíín ríge̱ꞌ nájmi̱i tsí naꞌsngúún Juáán, a̱ꞌkhue̱n nigóo̱ tsu̱du̱u̱ Jesús. 38 Ído̱ nitangayii Jesús, ndiꞌyoo̱ rí naguwá ná tsu̱du̱u̱, a̱ꞌkhue̱n niraxúu̱n:

—Dí ñajuun i̱ꞌyálaꞌ róꞌ.

Xómáꞌ ikhii̱n ni̱riꞌñee̱:

—Rabí, náá niriajún róꞌ. —(Rabí nandoo gáꞌthán «Táta̱ naꞌsngáá».)

39 Xómáꞌ Jesús niꞌthúu̱n:

—A̱guwalaꞌ kajngó mbu̱ya̱álaꞌ.

Ikhaa jngó nigóo̱ jamí ndiyáa̱ náá ni̱we̱je̱ Jesús. Ikhín máꞌ ninguanúu̱ mbiꞌi rúꞌkhue̱n gajmíi̱ Jesús, numuu rí naꞌne máꞌ akho̱ i̱ka̱ ajwa̱nꞌ rí wakhíí.

40 Andrés, dxíyo̱o̱ Simón Pédro̱, ñajuun mbáa tsí a̱jmi̱i nigóó tsu̱du̱u̱ Jesús ga̱jma̱á numuu rí niꞌthán Juáán. 41 Tsí phú ginii jayu nixkamaa Andrés ñajuun Simón, dxíyo̱o̱ máꞌ, jamí niꞌthúu̱n: «Ni̱xkamaaxo̱ꞌ Mesía̱s» (rí nandoo gáꞌthán «Krísto̱»).

42 A̱ꞌkhue̱n Andrés ni̱ꞌkha̱ jayáa̱ Simón ná inuu Jesús. Ído̱ Jesús ndiꞌyoo Simón, a̱ꞌkhue̱n niꞌthúu̱n: «Ikháánꞌ ñajwaanꞌ Simón, a̱dée Jonás.* Ikháánꞌ ma̱ꞌne mbiꞌyaaꞌ Séfa̱s» (rí nandoo gáꞌthán «Pédro̱»).*

43 I̱mbá gátsíí rí rúꞌkhue̱n niꞌgí-mina̱ꞌ Jesús rí ma̱ꞌga ná numbaa Galiléa̱. Nixkamaa̱ Felípe̱ jamí niꞌthúu̱n: «Aya̱ ga̱jma̱á nindxu̱ꞌ». 44 Xa̱bo̱ na̱ꞌkha̱ ná xuajen Betsáida̱ ñajuun tsí Felípe̱, ná xuajñuu máꞌ Andrés ga̱jma̱á Simón mangaa.

45 Xómáꞌ Felípe̱ ni̱ka̱ gáꞌyáa̱ Natanaél, jamí ído̱ nixkamaa̱ niꞌthúu̱n:

—Ni̱xkamaaxo̱ꞌ tsí niꞌtháán Moisés ga̱jma̱á numuu ná xtángoo, ikhaa máꞌ tsí nithan numuu mbo̱ ni̱rawíjnga̱a ajngóo Ana̱ꞌlóꞌ wajyúú mangiin. Ikhaa̱ ñajuun Jesús tsí na̱ꞌkha̱ ná xuajen Nasarét, a̱dée táta̱ José.

46 A̱ꞌkhue̱n niꞌthán Natanaél:

—Ná Nasarét ráanꞌ. Á nagájnuu mbá rí máján ná xuajen rúꞌkhue̱n dxe̱ꞌ.

Jamí Felípe̱ niriꞌñuu̱:

—Aya̱ kajngó ma̱tha̱ya̱á.

47 Ído̱ ndiꞌyoo Jesús rí na̱ꞌkha̱ máꞌ mijngi Natanaél ná inuu̱, a̱ꞌkhue̱n niꞌthée̱n:

—Ge̱jyoꞌ xtáa mbáa tsí phú gakon rí xa̱bo̱ Israél ñajuun, tsí tsíꞌne-nduwa.

48 A̱ꞌkhue̱n Natanaél niraxu̱u̱ Jesús:

—Xáne kajngó nathane̱-nuwúúnlo̱ꞌ róꞌ.

Xómáꞌ Jesús niriꞌñuu̱:

—Ikhúúnꞌ ndi̱ya̱a̱ꞌlo̱ꞌ asndo nákhí máꞌ xóó tándxaꞌwáaꞌ Felípe̱, jamí asndo nákhí máꞌ xóó xtaꞌún ná xtuun ixe̱ ígo̱.

49 A̱ꞌkhue̱n Natanaél niꞌthúu̱n Jesús:

—Táta̱ naꞌsngáá, ¡ikháánꞌ ñajwaanꞌ A̱dée Ana̱ꞌlóꞌ! ¡Ikháánꞌ ñajwaanꞌ Thúngaa tsí maꞌthán-ñájuun Israél!

50 Xómáꞌ Jesús niꞌthúun Natanaél:

—Nanimba̱a̱ꞌ e̱ne̱ i̱ndo̱ó máꞌ numuu rí ni̱tha̱a̱nꞌ rí ndi̱ya̱a̱ꞌ ná xtuun ixe̱ ígo̱ ráanꞌ. Ni̱kú ma̱tha̱ya̱á rí phú i̱tha̱án ma̱makuaaꞌ gáꞌne xó rí nithayáá xúge̱ꞌ.

51 A̱ꞌkhue̱n niꞌthán xóó Jesús: «Na̱tha̱nꞌ-jmbalaꞌ rí ikháanꞌlaꞌ mbu̱ya̱álaꞌ rí ja̱ma̱ꞌtha mikhu, jamí mbu̱ya̱álaꞌ rí nawátaan jamí natsimúú ánje̱l drígo̱o̱ Ana̱ꞌlóꞌ ná inuu A̱dée Xa̱bo̱ numbaa».