1 I̱mba̱ nda̱wa̱á nisngájma-mina̱ꞌ mbu̱júꞌ Jesús ná inúú tsí niꞌsngúún, ná rawuun ñañuu a̱pha̱ rí mbiꞌyuu Tibéria̱s. Xáꞌnii niríga̱ mbiꞌi rúꞌkhue̱n: 2 Mbóó ná ni̱ru̱wa-mijnáa Simón Pédro̱, Tomás, tsí mbiꞌyuu máꞌ Dídi̱mo̱ mangaa, Natanaél, tsí na̱ꞌkha̱ ná Kaná mbayuu Galiléa̱, nájmi̱i i̱ji̱in Sebedéo̱, jamí i̱jmi̱i tsí niꞌsngúún Jesús. 3 A̱ꞌkhue̱n Simón Pédro̱ niꞌthúu̱n tsí i̱ꞌwíin:

―Ikhúúnꞌ ma̱ꞌgá gágúwíinlo̱ꞌ i̱gi̱ꞌ.

Xómáꞌ ikhii̱n nitháa̱n Pédro̱:

―Mu̱ꞌguá mangáanꞌxo̱ꞌ ga̱jma̱á nindxa̱a̱ꞌ.

Ikhaa jngó nigájnúu̱ nigóo̱, jamí nitsimúu̱ mbá ixe̱-rguwa. Xómáꞌ mbroꞌon rúꞌkhue̱n túríya̱a̱ꞌ nimbáa i̱gi̱ꞌ.

4 Ído̱ na̱ꞌkha̱ ra̱mbiꞌi máꞌ numbaa, a̱ꞌkhue̱n nikujma wéje̱ Jesús ná rawuun ñañuu a̱pha̱. Xómáꞌ tsí waꞌsngúún na̱nguá ndiyáá rí ikhaa̱ ñajuu̱n tsí wéje̱. 5 A̱ꞌkhue̱n Jesús niraxúu̱n:

―Jñáma, ni̱diinlaꞌ tháan i̱gi̱ꞌ mu̱ꞌphúúnlóꞌ ráanꞌ.

Xómáꞌ ikhii̱n ni̱riꞌñee̱:

―Na̱nguá.

6 Jesús niꞌthúu̱n:

―Gu̱ra̱khuáalaꞌ ama ná ñawún mújúun ixe̱-rguwa, jamí mu̱diinlaꞌ tháan i̱gi̱ꞌ.

Xkuaꞌnii nini̱i̱, jamí asndo ni tsíꞌngúu̱n gúríya̱aꞌ ama numuu rí maphú mbaꞌiin i̱gi̱ꞌ nitiin.

7 A̱ꞌkhue̱n tsí waꞌsngáá, ikhaa tsí phú nandoo Jesús jaꞌyoo, niꞌthúu̱n Pédro̱: «Táta̱ Jesús ñajuu̱n». Ído̱ nidxawuun Pédro̱ rí Táta̱ Jesús ñajuu̱n, mbá nacha̱ nijúwaa̱n xtíñuu̱, numuu rí ni̱gu̱wíi̱ ne̱ rí mañajwii̱n, a̱ꞌkhue̱n nixpátuáꞌán-mine̱e̱ꞌ ná awúun ñañuu a̱pha̱ kajngó ma̱ga̱núu̱ nacha̱ ná rawuun. 8 Xómáꞌ i̱ꞌwíin tsí waꞌsngúún, gachúu̱n ná awúun ixe̱-rguwa niguáꞌnúu̱ ná rawuun iya, niguwáa̱n-ru̱xma̱taa̱ ama rí xa̱ꞌ jayu gatiin i̱gi̱ꞌ. Numuu rí na̱nguá mba̱ꞌ gatii̱n, naꞌne máꞌ xí mbá 200 wáa itso̱ iduu ñawúun xa̱bo̱* gachúu̱n ná awúun iya. 9 Ído̱ niwátaa̱n mbayíí, ndiyáa̱ rí ꞌgí xa̱mbo̱ꞌ nakha. Ikhín ríguii mbáa i̱gi̱ꞌ nagui̱i̱ꞌ jamí nagu̱uꞌ mbá guma.

10 Jesús niꞌthúu̱n: «A̱guwa ju̱diinlaꞌ mbá tikhuun i̱gi̱ꞌ tsí wámba̱ꞌlaꞌ ni̱rawíin». 11 Simón Pédro̱ nitsimuu ná ixe̱-rguwa jamí nixmátaa̱ ama rí gatiin i̱gi̱ꞌ asndo ná rawuun iya. Mbá juwan skíñú gu̱wa̱ꞌ i̱tsu̱un (153) i̱gi̱ꞌ tsí mba̱ꞌwu̱un nitiin ná ama, jamí maske máꞌ phú ji̱ñu̱u̱ ama, na̱nguá nithon ne̱.

12 A̱ꞌkhue̱n Jesús niꞌthúu̱n: «A̱guwalaꞌ mu̱peꞌtsolóꞌ». Nimbáa tsí waꞌsngáá táꞌkha̱ a̱kui̱in rí maraxu̱u̱: «Tsáa ñajwaanꞌ ikháánꞌ róꞌ», numuu rí mbá xúgíi̱n máꞌ nduyáa̱ rí Táta̱ Jesús ñajuu̱n. 13 A̱ꞌkhue̱n Jesús nixuꞌma-mina̱ꞌ, niwatuu̱n guma jamí nixnúu̱ ne̱ mu̱phi̱i̱, jamí ikhaa máꞌ niꞌnii̱ ga̱jma̱á i̱gi̱ꞌ. 14 Ikhaa ríge̱ꞌ eꞌne atsú nothon rí nasngájma-mina̱ꞌ Jesús ná inúú tsí niꞌsngúún, nda̱wa̱á rí ndiyáa̱ mbiꞌyuu̱.

15 Ído̱ wámbúu̱n nipiꞌtsii̱, a̱ꞌkhue̱n Jesús niraxu̱u̱ Pédro̱:

―Simón, a̱dée Jonás,* á gakon rí i̱tha̱án nandaaꞌ xtayoꞌ ikháánꞌ xó rí tsíge̱ꞌ rá.

A̱ꞌkhue̱n niriꞌña Pédro̱:

―Aan, Táta̱, ikháánꞌ nathayáá rí nandoꞌ ja̱ya̱a̱ꞌ.

A̱ꞌkhue̱n Jesús niꞌthúun Pédro̱:

―A̱tia̱wu̱ún tsí nanimbu̱únꞌ juyeꞌ xúꞌkhue̱n róꞌ, numuu rí ikhii̱n ñajúu̱n xómá i̱jín-móguíꞌ.

16 Jesús niraxu̱u̱ mbu̱júu Pédro̱, rí riajma̱ nothon:

―Simón, a̱dée Jonás, gakon rí nandaaꞌ xtayoꞌ ráanꞌ.

A̱ꞌkhue̱n niriꞌña mbu̱júu Pédro̱:

―Aan, Táta̱, ikháánꞌ nathayáá rí nandoꞌ ja̱ya̱a̱ꞌ.

A̱ꞌkhue̱n Jesús niꞌthúun Pédro̱:

―Ataxníꞌtsúún tsí nanimbu̱únꞌ juyeꞌ xúꞌkhue̱n róꞌ, numuu rí ikhii̱n ñajúu̱n asndo xómá xu̱kú mogui̱ꞌ.

17 Jesús niraxu̱u̱ Pédro̱ mbu̱júꞌ, rí naꞌne máꞌ riatsú nothon:

―Simón, a̱dée Jonás, gakon rí nandaaꞌ xtayoꞌ ráanꞌ.

A̱ꞌkhue̱n rí phú mingíná a̱kui̱in Pédro̱ neꞌne, numuu rí tiriatsú nothon ikhaa máꞌ watraxíi̱ neꞌne Jesús: «Gakon rí nandaaꞌ xtayoꞌ ráanꞌ». Ikhaa jngó xáꞌnii niriꞌñee̱:

―Táta̱, ikháánꞌ nathayáá mbá xúgíí, jamí ikháánꞌ nathayáá rí nandoꞌ ja̱ya̱a̱ꞌ.

A̱ꞌkhue̱n Jesús niꞌthúun Pédro̱:

―A̱tia̱wu̱ún tsí nanimbu̱únꞌ juyeꞌ xúꞌkhue̱n róꞌ, numuu rí ikhii̱n ñajúu̱n asndo xómá xu̱kú mogui̱ꞌ.

18 »Na̱tha̱n-jmbaaꞌ rí nákhí xóó dxáma ñajwaanꞌ, natatsuaꞌan-mina̱aꞌ máꞌ ikháánꞌ xtíñaaꞌ jamí nadxo̱ꞌ ná naꞌne a̱kia̱anꞌ. I̱ndo̱ó máꞌ numuu rí ído̱ gáꞌne táta̱-xi̱ꞌñú ñajwaanꞌ, ma̱ta̱tsraꞌwíí ñawáanꞌ jamí i̱mba̱a̱ꞌ xa̱bo̱ gátsuaꞌáán xtíñaaꞌ jamí ma̱ꞌga jañáa̱ ná tsíyaaꞌ gídxú.

19 Jesús niꞌthán rúꞌkhue̱n kajngó masngájmee̱ xáne Pédro̱ ma̱ꞌne-mba̱a̱ Ana̱ꞌlóꞌ ga̱jma̱á majñu̱u̱ rí ma̱ja̱ñúu̱. A̱ꞌkhue̱n Jesús niꞌthúun xóó Pédro̱: «Aya̱ ga̱jma̱á nindxu̱ꞌ».

20 Ído̱ nitangayii Pédro̱, ndiꞌyoo̱ rí na̱ꞌkha̱ ná tsu̱dúu̱n tsí waꞌsngáá, ikhaa tsí phú nandoo Jesús jaꞌyoo, ikhaa máꞌ tsí nixuꞌma-mina̱ꞌ ná níjñúu Jesús nákhí napeꞌtso-añúu̱, jamí niraxu̱u̱: «Táta̱, tsáa ñajuun tsí maxnáxi̱ín róꞌ». 21 Ído̱ Pédro̱ ndiꞌyoo rí na̱ꞌkhe̱e̱, a̱ꞌkhue̱n niraxu̱u̱ Jesús:

―Táta̱, dí gágíꞌnuu tsíge̱ꞌ rá.

22 Xómáꞌ Jesús niriꞌñuu Pédro̱:

―Xí ikhúúnꞌ nandoꞌ rí ma̱xtáa̱ asndo mbiꞌi rí ma̱ꞌkha̱aꞌlo̱ꞌ, dí ixná-gamiéjwaanꞌ ikháánꞌ rúꞌkhue̱n rá. Ikháánꞌ aya̱ ga̱jma̱á nindxu̱ꞌ.

23 Ikhaa numuu rúꞌkhue̱n, ni̱dróꞌoo ajngáa ná majñu̱ú a̱ngia̱nꞌlóꞌ rí ma̱xájáñuu tsúꞌkhue̱n, ikhaa tsí waꞌsngáá. I̱ndo̱ó máꞌ numuu rí Jesús táꞌthée̱n rí ma̱xájáñuu tsúꞌkhue̱n, rí xáꞌnii niꞌthée̱n: «Xí ikhúúnꞌ nandoꞌ rí ma̱xtáa̱ asndo mbiꞌi rí ma̱ꞌkha̱aꞌlo̱ꞌ, dí ixná-gamiéjwaanꞌ ikháánꞌ rúꞌkhue̱n rá».

24 Jmína̱a̱ꞌ máꞌ tsíge̱ꞌ ñajuun tsí waꞌsngáá, tsí neꞌne inuu mbá xúgíí ríge̱ꞌ, jamí niꞌtháa̱n ne̱. Ikhaa numuu rúꞌkhue̱n nduꞌyáálóꞌ rí gakon rí naꞌthée̱n.

25 Ríga̱ mbaꞌa i̱ꞌwá xóó rí neꞌne Jesús mangaa. Xí mi̱ꞌtháán mbámbá rí niꞌnii̱, ikhúúnꞌ na̱ju̱mu̱ꞌ rí ma̱xáꞌngo̱o̱ inuu numbaa ma̱ti mbá xúgíí i̱yi̱i̱ꞌ rí mi̱ꞌtháán. Xkuaꞌnii gáꞌne.*