1 Ndiꞌyoo Táta̱ rí xa̱bo̱ fariséo̱ ni̱dxawíín ajngáa ríge̱ꞌ: «I̱tha̱án mbaꞌiin xa̱bo̱ tsí naꞌsngúún Jesús, xúꞌkhue̱n máꞌ i̱tha̱án mbaꞌiin tsí naxúꞌdu-maꞌíi̱n ná awúun iya xó rí Juáán». 2 (Xkuaꞌnii ithan xa̱bo̱ maske máꞌ ra̱ꞌkhá Jesús ñajuun tsí naxúꞌdu-maꞌíin xa̱bo̱ ná awúun iya, rí xa̱bo̱ tsí naꞌsngúu̱n nu̱xu̱ꞌdú-maꞌíi̱n.) 3 Ído̱ ndiꞌyoo Jesús rí xkuaꞌnii ni̱ma̱ñúú xa̱bo̱ fariséo̱, a̱ꞌkhue̱n niniñuu̱ numbaa Judéa̱, ni̱ꞌkhaa̱ ná numbaa Galiléa̱. 4 I̱ndo̱ó máꞌ numuu rí ndaꞌyóo ma̱ꞌkhaa̱-muu̱ ná numbaa Samária̱. 5 Ná jamba̱a̱ rúꞌkhue̱n ni̱ga̱níi̱ mbá xuajñuu Samária̱ rí mbiꞌyuu Sikár, ná mijngi ꞌgí mbaa rí Jakób niniñuu ñawúun José, tsí a̱dée̱ máꞌ. 6 Ikhín ꞌgí póso̱ ná niꞌña̱a̱ iya Jakób. Naꞌne xó mbá wakha̱ꞌ niníí wáa, jamí Jesús phú níꞌngo̱o̱ rí na̱ke̱e̱ jamba̱a̱, ikhaa jngó ni̱gi̱ꞌi̱i̱ mbayáa̱ xu̱u̱ꞌ ná rawuun póso̱. 7 A̱ꞌkhue̱n ni̱ꞌkha̱ mbáa a̱ꞌgo̱ Samária̱ gáyá iya. Jamí Jesús niꞌthúun a̱ꞌgo̱ tsúꞌkhue̱n: «Araxnúꞌ mbá lájwíin iya ma̱ga̱nꞌ». 8 Numuu rí xa̱bo̱ tsí naꞌsngúún Jesús nigóo̱ gútsi̱i̱ ganitsu ná xuajen.

9 A̱ꞌkhue̱n niriꞌña a̱ꞌgo̱:

―Xáne kajngó ikháánꞌ tsáánꞌ ñajwaanꞌ xa̱bo̱ judío̱ na̱ta̱ndo̱ꞌo̱ꞌ iya ikhúúnꞌ tsúún ñajunꞌ a̱ꞌgo̱ Samária̱ róꞌ.

Xkuaꞌnii niꞌthán a̱ꞌgo̱ numuu rí nákhí mbiꞌi rúꞌkhue̱n, tsíthan-mijná tsí xa̱bo̱ judío̱ gajmíí xa̱bo̱ Samária̱.

10 Xómáꞌ Jesús niriꞌñuu a̱ꞌgo̱:

―Xí numuu nathayáá dí ñajuun rí naxná Ana̱ꞌlóꞌ, jamí xí nathane̱-nuwiin tsí na̱nda̱ꞌa̱a̱ꞌ iya, ikháánꞌ ma̱ta̱nda̱ꞌáa̱ iya, jamí ikhaa̱ maxnáa̱ꞌ iya rí naꞌne rí mbuya xa̱bo̱.

11 A̱ꞌkhue̱n rí a̱ꞌgo̱ niꞌthúun Jesús:

―Táta̱, ni na̱nguá xtaꞌdáá rí ma̱tríya̱ꞌ ga̱jma̱á iya, jamí phú me̱jno̱ꞌ póso̱. Náá gátríya̱ꞌ iya rí naꞌne rí mbuya xa̱bo̱, rí narathán a̱ꞌkhue̱n róꞌ. 12 Táta̱-xi̱ꞌñáxo̱ꞌ Jakób niniñuu póso̱ ríge̱ꞌ ñawánxo̱ꞌ. Ge̱jyoꞌ niꞌña̱a̱ iya ikhaa̱ gajmíi̱ i̱jii̱n, xúꞌkhue̱n máꞌ xu̱kuíi̱n. Á phú i̱tha̱án gíꞌdoo numaaꞌ ikháánꞌ inuu táta̱-xi̱ꞌñáxo̱ꞌ Jakób i̱ju̱ma̱a̱ꞌ rá dxe̱ꞌ.

13 Xómáꞌ Jesús niriꞌñuu a̱ꞌgo̱:

―Asndo tsáa máꞌ tsí ma̱ga̱a̱n iya ná póso̱ ríge̱ꞌ, ma̱jándawoo̱ mbu̱júu̱. 14 Xómáꞌ tsí ma̱ga̱a̱n iya rí ma̱xnu̱u̱ ikhúúnꞌ rá, ni miꞌtsú náxájándawoo̱, rí ikhaa iya rúꞌkhue̱n ma̱ꞌni̱i asndo xó iduu iya ná awúu̱n. A̱ꞌkhue̱n ma̱ngujwíi máꞌ xúꞌkhue̱n iya rí naꞌne rí mba̱ꞌyee̱ jámuu.

15 A̱ꞌkhue̱n rí a̱ꞌgo̱ niꞌthúun Jesús:

―Táta̱, araxnúꞌ iya rúꞌkhue̱n ma̱ga̱nꞌ, kajngó náxájándawoꞌ, ni máꞌ náxáꞌkha ge̱jyoꞌ gáríya̱ꞌ ne̱.

16 Xómáꞌ Jesús niriꞌñuu a̱ꞌgo̱:

―Ayu gára̱tha̱án a̱jmba̱aꞌ ma̱ꞌkha̱, jamí aya̱aꞌ ge̱jyoꞌ.

17 A̱ꞌkhue̱n niriꞌña a̱ꞌgo̱:

―Ra̱gúꞌdaa a̱jmbeꞌ.

Xómáꞌ Jesús niꞌthúun a̱ꞌgo̱:

―Maphú ikhín nirathán rí ra̱xtáꞌdaa a̱jmba̱aꞌ. 18 Numuu rí witsuun a̱jmba̱aꞌ niraꞌdiin, jamí xa̱bo̱ tsí xtaa ga̱jma̱a̱ꞌ xúge̱ꞌ ra̱ꞌkhá a̱jmba̱aꞌ ñajuu̱n. Ikhaa jngó gakon rí nirathán xúꞌkhue̱n rá.

19 Ído̱ nidxawuun a̱ꞌgo̱ ríge̱ꞌ, a̱ꞌkhue̱n niꞌthúu̱n Jesús:

―Táta̱, ikháánꞌ ñajwaanꞌ mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ jno̱ꞌ. 20 Nákhí wajyúú mbiꞌi táta̱-xi̱ꞌñáxo̱ꞌ nene̱-mba̱a̱ Ana̱ꞌlóꞌ ná júba̱ ríge̱ꞌ, xómáꞌ ikháanꞌlaꞌ tsáanꞌ xa̱bo̱ judío̱ ñajwanlaꞌ nu̱tha̱nlaꞌ rí ná Jerusalén jaꞌyoo rí ma̱gu̱ma-mba̱a̱ Ana̱ꞌlóꞌ.

21 Xómáꞌ Jesús niriꞌñuu a̱ꞌgo̱:

―Nána̱, ga̱nimba̱a̱ꞌ rí ma̱tha̱a̱nꞌlo̱ꞌ: Ma̱ga̱nú mbiꞌi rí mu̱ne̱-mba̱a̱laꞌ Ana̱ꞌlóꞌ, ma̱xáꞌyóo máꞌ rí ma̱guwalaꞌ ná júba̱ ríge̱ꞌ, ni máꞌ ná Jerusalén. 22 Ikháanꞌlaꞌ nu̱ne̱-mba̱a̱laꞌ tsí tsíne̱-nuwiinlaꞌ, xómáꞌ ikháanꞌxo̱ꞌ nu̱ne̱-mba̱a̱xo̱ꞌ tsí nu̱ne̱-nuwiinxo̱ꞌ, numuu rí ná majñu̱ú xa̱bo̱ judío̱ ma̱ꞌkha̱ tsí ma̱ꞌne-jáwíin xa̱bo̱. 23 Ma̱ga̱nú mbiꞌi, jamí ni̱ga̱nú máꞌ mbiꞌi rúꞌkhue̱n xúge̱ꞌ, rí xa̱bo̱ tsí gakon rí nune̱-mba̱a̱ Ana̱ꞌlóꞌ, mune̱-mba̱a̱ ga̱jma̱á majñu̱u̱ Xu̱u̱ꞌ jamí mune̱-mba̱a̱ xómá phú jaꞌnii̱ ikhaa̱. Numuu rí Ana̱ꞌlóꞌ ndaꞌñíi xa̱bo̱ tsí xkuaꞌnii mune̱-mba̱a̱. 24 Tsí Ana̱ꞌlóꞌ Xe̱ꞌ ñajuu̱n. Ikhaa jngó xa̱bo̱ tsí nune̱-mba̱a̱, ndaꞌyóo rí mune̱-mba̱a̱ ga̱jma̱á majñu̱u̱ Xu̱u̱ꞌ jamí mune̱-mba̱a̱ xómá phú jaꞌnii̱ ikhaa̱.

25 A̱ꞌkhue̱n niriꞌña a̱ꞌgo̱:

―Ikhúúnꞌ nda̱yo̱o̱ rí ma̱ꞌkha̱ Mesía̱s, ikhaa tsí nutháa̱n Krísto̱. Ído̱ gáꞌkhe̱e̱ ikhaa̱ maꞌthánlóꞌ mbá xúgíí rúꞌkhue̱n.

26 Xómáꞌ Jesús niꞌthúun a̱ꞌgo̱:

―Ikhaa tsúꞌkhue̱n ñajunꞌ ikhúúnꞌ, tsí nandxákuun ga̱jma̱á nindxa̱a̱ꞌ.

27 Awúun máꞌ rúꞌkhue̱n niguwáan tsí naꞌsngúu̱n, jamí phú nimakúu̱n rí Jesús naꞌthán-mina̱ꞌ ga̱jma̱á mbáa a̱ꞌgo̱. I̱ndo̱ó máꞌ numuu rí nimbáa táꞌne-maraxu̱u̱ dí iyoo a̱ꞌgo̱, o dí iꞌthán-mine̱e̱ꞌ ga̱jmáa̱ mbo̱ꞌ. 28 Xómáꞌ a̱ꞌgo̱ niniñuu rayoo, jamí ni̱kaa̱ ná xuajen. Ikhín niꞌthúu̱n xa̱bo̱: 29 «A̱guwalaꞌ mbu̱ya̱á mbáa xa̱bo̱ tsí niꞌthínꞌ mbá xúgíí rí ne̱ne̱lo̱ꞌ. Á ra̱ꞌkháa Krísto̱ ñajuun tsúꞌkhue̱n rá».

30 A̱ꞌkhue̱n nigájnúú xa̱bo̱ ná xuajen, nigóo̱ ná kua̱ꞌa̱a̱n Jesús. 31 Awúun máꞌ rúꞌkhue̱n, nithán-jáñíí Jesús rí ma̱kueꞌtso ene̱ tsí naꞌsngúu̱n:

―Táta̱ naꞌsngáá, atso tháan guma, ―itháa̱n.

32 Xómáꞌ Jesús niꞌthúu̱n:

―Ikhúúnꞌ gúꞌdo̱ꞌ mbá ganitsu rí me̱ꞌkholo̱ꞌ, rí ikháanꞌlaꞌ tsíne̱-nuwiinlaꞌ.

33 A̱ꞌkhue̱n tsí naꞌsngúu̱n ni̱gíꞌdi̱ín ni̱ra̱xe̱-mijná: «Tsáa lá ni̱ꞌkha̱ jayóo rí mi̱khui̱i̱ rá».

34 Xómáꞌ Jesús niꞌthúu̱n:

―Ganitsu drígo̱ꞌ ñajuun rí ma̱ne̱ rí nandoo tsí nixúngu̱únꞌ, jamí rí ma̱ne̱-gáxu̱u̱lo̱ꞌ ñajuu̱n. 35 Á ra̱ꞌkhá ikháanꞌlaꞌ nu̱tha̱nlaꞌ: "Ndaꞌyóo xóó i̱mbá akhu̱un go̱nꞌ rí mi̱ꞌda̱a rí nijma̱a̱ rá". Xómáꞌ ikhúúnꞌ na̱tha̱nꞌlaꞌ: Gu̱ya̱xe̱laꞌ mbu̱ya̱á rí nixtáa máꞌ mi̱ꞌda̱a rí nijma̱a̱ ná niwaꞌdu. 36 Tsí nagu̱u rí nijma̱a̱, nadaa̱ numuu̱, jamí xndúu rí naguu̱ ñajuun rí ma̱ju̱wá jámuu xa̱bo̱. Kajngó mbéꞌtháán gáꞌdxu a̱kui̱in tsí naꞌdu ga̱jma̱á tsí na̱gu̱xi̱i rí nijma̱a̱. 37 Xómá iꞌthán mbá ajngáa: "Mbáa ñajuun tsí naꞌdu, i̱mba̱a̱ꞌ ñajuun tsí na̱grui̱gúu rí nijma̱a̱". 38 Ikhúúnꞌ ni̱xu̱ꞌmáaꞌlaꞌ mu̱drígúu rí nijma̱a̱ ná túñajunlaꞌ. I̱ꞌwíin ñajúún tsí ni̱ñajun, jamí ikháanꞌlaꞌ ni̱ta̱ꞌa̱ꞌlaꞌ mu̱drígúu rí nijma̱a̱ ná ni̱ñajun i̱ꞌwíin.

39 Maphú mbaꞌiin xa̱bo̱ Samária̱ tsí júwa̱ꞌ ná xuajen rúꞌkhue̱n ninimbu̱únꞌ juyáá Jesús ga̱jma̱á numuu ajngáa rí niꞌthán a̱ꞌgo̱: «Niꞌthínꞌ mbá xúgíí rí ne̱ne̱lo̱ꞌ». 40 Ído̱ niguwá xa̱bo̱ ná ꞌgí Jesús, nithán-jáñíi̱ rí ma̱nguanúu̱ ga̱jma̱á nindxúu̱n. Ikhaa jngó ninguanúu Jesús a̱jma̱ mbiꞌi ikhín. 41 Jamí phú i̱tha̱án mbaꞌiin xa̱bo̱ ninimbu̱únꞌ ído̱ ni̱dxawíi̱n rí niꞌthán jmína̱a̱ꞌ Jesús. 42 A̱ꞌkhue̱n rí xa̱bo̱ xuajen nitháa̱n a̱ꞌgo̱: «Xúge̱ꞌ rí nanimba̱ꞌxo̱ꞌ, ra̱ꞌkhá i̱ndo̱ó ga̱jma̱á numuu rí ikháánꞌ nirathánxo̱ꞌ, rí ga̱jma̱á numuu rí jmínáaꞌxo̱ꞌ máꞌ ni̱dxawíín rí naꞌthée̱n mangaa. Ikháánꞌlóꞌ nduꞌyáálóꞌ rí phú gakon rí tsíge̱ꞌ ñajuun Krísto̱, tsí* ma̱ꞌne-jáwíin xa̱bo̱ numbaa».

43 Ído̱ ninújngoo a̱jma̱ mbiꞌi rí nixtáa Jesús ná xuajñúú xa̱bo̱ Samária̱, ndiyáa̱ la ikhoo̱ ni̱ke̱e̱ ná numbaa Galiléa̱. 44 Numuu rí jmína̱a̱ꞌ máꞌ Jesús niꞌthán rí nimbáa tsí na̱gu̱wíjnga̱a ajngóo Ana̱ꞌlóꞌ tsígu̱ma-makuíí ná xuajñuu. 45 Ído̱ ni̱ga̱níi̱ ná Galiléa̱ máján wa̱tri̱guíi̱ nene̱ xa̱bo̱ tsí júwa̱ꞌ ná numbaa rúꞌkhue̱n, numuu rí mangii̱n máꞌ nigóo̱ ndxa̱a̱ Páskua̱ ná Jerusalén, jamí ndiyáa̱ xúgíí rí neꞌne Jesús ná ndxa̱a̱ rúꞌkhue̱n.

46 Ni̱ꞌkha̱a mbu̱júu Jesús ná xuajen Kaná, mbayuu máꞌ Galiléa̱, ná nirtaxii̱ iya niꞌni̱i iyoo úba̱ rí ni̱ga̱yu̱u̱ꞌ nákhí rí wapha. Jamí ná xuajen Kapernaúm kri̱ga̱a̱ najáñuu a̱dée mbáa xa̱bi̱i thúngaa. 47 Ído̱ nidxawuun xa̱bi̱i thúngaa rí ni̱ga̱núu Jesús ná Galiléa̱ rí ni̱ꞌkha̱a ná Judéa̱, a̱ꞌkhue̱n ni̱ka̱ gáꞌyoo̱ jamí niꞌthán-jáñuu̱ rí ma̱ꞌga gáꞌne-thanuu a̱dée̱ ná Kapernaúm, numuu rí phú níꞌngo̱o̱ ada̱ kri̱ga̱a̱.

48 A̱ꞌkhue̱n Jesús niꞌthúun xa̱bi̱i thúngaa:

―Ikháanꞌlaꞌ ma̱xánimba̱ꞌlaꞌ ju̱yo̱ꞌ xí tsíya̱álaꞌ rí phú wáá jamí rí phú namakúún xa̱bo̱ eꞌne.

49 Xómáꞌ xa̱bi̱i thúngaa niꞌthúun Jesús:

―Táta̱, gu̱ꞌgua̱lóꞌ nacha̱, ra̱ꞌkhá ma̱ja̱ñúu a̱ꞌdéꞌ.

50 A̱ꞌkhue̱n Jesús niꞌthúu̱n:

―Ayu̱uꞌ guꞌwáaꞌ, niꞌni̱i máꞌ a̱kui̱in a̱ꞌdiáaꞌ.

Ninimbo̱o̱ꞌ xa̱bo̱ tsúꞌkhue̱n rí waꞌtháán neꞌne Jesús, jamí ni̱kaa̱ guꞌwóo̱. 51 Awúun máꞌ rí na̱kaa̱ ná guꞌwóo̱, a̱ꞌkhue̱n niguwá yumbée̱ gútsijníi̱ ná jamba̱a̱ jamí nitháa̱n rí niꞌni̱i la a̱kui̱in a̱dée̱. 52 Ído̱ niraxúu̱n náá kíxnuu i̱ka̱ iduu ajwa̱nꞌ rí ni̱ꞌkha̱-raꞌni̱i a̱kui̱in a̱dée̱, a̱ꞌkhue̱n ni̱riꞌñee̱: «Nákhí ri̱xi̱í timbá i̱ka̱ ajwa̱nꞌ rí wakha̱ꞌ ni̱gata̱a rí mikaa̱».

53 A̱ꞌkhue̱n ni̱rmáꞌáan a̱kui̱in xa̱bi̱i thúngaa rí maphú ikhaa máꞌ kíxnuu rúꞌkhue̱n i̱ka̱ iduu ajwa̱nꞌ rí waꞌtháa̱n neꞌne Jesús: «Niꞌni̱i máꞌ a̱kui̱in a̱ꞌdiáaꞌ». Ikhaa jngó ikhaa̱ jamí mbá xúgíin xa̱bo̱ guꞌwóo̱ ninimbúu̱n juyáa̱ Jesús. 54 Ríge̱ꞌ eꞌne riajma̱ nothon rí Jesús neꞌne rí phú wáá, nákhí nigájnuu̱ ná numbaa Judéa̱ jamí ni̱ꞌkhaa̱ ná numbaa Galiléa̱.