1 I̱mba̱ nda̱wa̱á ni̱ka̱ mbu̱júu Jesús ná Jerusalén, ná nigájnuu mbá ndxa̱a̱ ene̱ xa̱bo̱ judío̱. 2 Ná Jerusalén kri̱ga̱ mbá ná gajno̱ꞌ iya rí nuna xa̱bo̱ mbiꞌyuu Betésda̱ rí ajngáa ebréo̱, ꞌgí ne̱ ná mijngi xkrugúún xu̱kú mogo̱. Mbá nawa̱a̱ rawuun iya rúꞌkhue̱n triga̱ mbá witsu xka̱mixa mba̱ꞌwo̱. 3 Ikhín maphú mbaꞌiin xa̱bo̱ tsí najáñúú trigi̱in: tsí tsífrigu̱únꞌ, tsí réngu̱un jamí tsí nixtrigi̱in. [Tsúꞌkhue̱n guáꞌthi̱ín rí ma̱ꞌba̱a̱n iya. 4 Numuu rí ído̱ nguáná na̱ga̱taa mbáa ánje̱l rí ma̱ꞌne-maꞌba̱a̱n iya. Tsí ginii jayu najngúun ído̱ rí naꞌba̱a̱n iya, naꞌni̱i a̱kuii̱n asndo náá máꞌ rí nandii gíꞌdoo̱.]* 5 Ná majñu̱ú xa̱bo̱ tsí najáñúú kri̱ga̱a̱ mbáa xa̱bo̱ tsí asndo nákhí timbá skíñú gu̱wa̱ꞌ-nítsu i̱tsu̱ (38) tsigu tsíyoo gába̱ñi̱i̱ꞌ mbá jayu eꞌne nandii. 6 Ído̱ ndiꞌyoo Jesús rí jabóo̱ mbayíí, jamí ni̱ma̱ñuu̱ rí maphú wajyúú máꞌ najáñuu̱ xkuaꞌnii, a̱ꞌkhue̱n niraxu̱u̱ xa̱bo̱ tsíge̱ꞌ:

—Á nandaaꞌ ma̱ꞌni̱i a̱kia̱anꞌ dxe̱ꞌ.

7 Xómáꞌ xa̱bo̱ tsí najáñuu niriꞌña:

—Táta̱, ra̱gúꞌdaa nimbáa tsí marakhúúnlo̱ꞌ ná awúun iya ído̱ rí naꞌba̱a̱n. Mbámbá rí nandoꞌ ma̱jngúnꞌlo̱ꞌ, i̱mba̱a̱ꞌ najngúun wapha.

8 Jamí Jesús niꞌthúun xa̱bo̱:

—Araxu̱unꞌ, atiáxi̱i aguáaꞌ, jamí a̱ngriga̱a̱ꞌ.

9 A̱ꞌkhue̱n mbégo xúge̱ꞌ niꞌni̱i a̱kui̱in xa̱bo̱ tsúꞌkhue̱n, nimbúxii̱ agúu̱, jamí nigíꞌdu̱u̱n ningrigo̱o̱ꞌ. Mbiꞌi rí nduya̱a xu̱únꞌ xa̱bo̱ judío̱ ñajuun mbiꞌi rúꞌkhue̱n. 10 Ikhaa jngó xa̱bo̱ ñajun judío̱ nitháa̱n tsí niꞌni̱i a̱kui̱in:

—Mbiꞌi rí nduꞌyáa xa̱ꞌlóꞌ ñajuun xúge̱ꞌ, ma̱xáxóo rí ma̱ngriga̱a̱ꞌ ꞌcháa aguáaꞌ.

11 Xómáꞌ xa̱bo̱ tsí niꞌni̱i a̱kui̱in niriꞌñúu̱:

—Xa̱bo̱ tsí neꞌne-thanuꞌ niꞌthínꞌ: "Atambúxi̱i aguáaꞌ jamí a̱ngriga̱a̱ꞌ".

12 A̱ꞌkhue̱n ni̱ra̱xíi̱:

—Tsáa ñajuun tsí niꞌtháanꞌ: "Atambúxi̱i aguáaꞌ jamí a̱ngriga̱a̱ꞌ róꞌ".

13 Xómáꞌ xa̱bo̱ tsí niꞌni̱i a̱kui̱in ni na̱nguá iꞌyoo̱ tsáa ñajuun tsí ni̱gu̱ma-thanáa̱ neꞌne, numuu rí nándawa̱a̱ Jesús ná majñu̱ú xa̱bo̱ tsí gachúún mi̱ndaꞌkho ikhín. 14 Nda̱wa̱á Jesús nixkamaa xa̱bo̱ tsúꞌkhue̱n ná awúun guꞌwá dxákuun, a̱ꞌkhue̱n niꞌthúu̱n: «Niꞌni̱i máꞌ a̱kia̱anꞌ rí xúge̱ꞌ rá. Náxátha̱ne̱ aꞌkhán rá, ra̱ꞌkhá mbayáaꞌ mbá nandii rí phú i̱tha̱án gakhi̱i̱». 15 A̱ꞌkhue̱n xa̱bo̱ tsúꞌkhue̱n ni̱ka̱ gáꞌthúún xa̱bo̱ ñajun judío̱ rí Jesús ñajuun tsí neꞌne-thanuu̱.

16 Ikhaa numuu rúꞌkhue̱n xa̱bo̱ ñajun judío̱ nduꞌyée̱ xáne muni̱i̱ aꞌkhúun Jesús, jamí naꞌne a̱kuíi̱n rí mu̱xíya̱a̱,* numuu rí naꞌne-thanúu̱ xa̱bo̱ awúun mbiꞌi rí nduꞌyáa xa̱ꞌlóꞌ. 17 Xómáꞌ Jesús nariꞌñúu̱: «Ni miꞌtsú na̱nguá iniñuu-rañajun tsí Tátéꞌ, xúꞌkhue̱n máꞌ ikhúúnꞌ na̱nguá i̱ni̱ꞌñúu-ra̱ñajunlo̱ꞌ». 18 Ikhaa numuu rúꞌkhue̱n, xa̱bo̱ ñajun judío̱ i̱tha̱án naꞌne a̱kuíi̱n rí mu̱xíya̱a̱ Jesús, numuu rí ra̱ꞌkhá i̱ndo̱ó tsíya-makuu̱ mbiꞌi rí nduyaa̱ xúu̱nꞌ, rí asndo naꞌthée̱n rí Ana̱ꞌlóꞌ ñajuun Tátée̱ mangaa. Rí xkuaꞌnii iꞌthée̱n, naꞌne mbéꞌtháán-mine̱e̱ꞌ ga̱jmáa̱ Ana̱ꞌlóꞌ.

19 A̱ꞌkhue̱n rí Jesús niꞌthúu̱n: «Na̱tha̱nꞌ-jmbalaꞌ rí asndo nimbá rí ma̱xáxóo ma̱ꞌne A̱dée Ana̱ꞌlóꞌ rí mbáwíi ikhaa, rí i̱ndo̱ó máꞌ rí ndaꞌyoo̱ naꞌne Anu̱u̱, ikhaa máꞌ iꞌnii̱ mangaa̱. Mbá xúgíí rí naꞌne Anu̱u̱, mbá xúgíí máꞌ naꞌne A̱dée̱ mangaa. 20 Numuu rí nandoo Anu̱u̱ jaꞌyoo A̱dée, ikhaa jngó nasngájmuu̱ mbá xúgíí rí naꞌnii̱. Jamí masngájmuu̱ rí phú i̱tha̱án wáá ma̱ꞌnii̱, rí asndo ma̱makualaꞌ gáꞌne. 21 Xómá rí Anu̱u̱ naꞌne rí ma̱wa̱xúunꞌ tsí nijáñúú, jamí naꞌnii̱ rí mbuyee̱ mbu̱júꞌ, xkuaꞌnii máꞌ A̱dée̱ mangaa, naꞌnii̱ rí mbuya tsí ikhaa̱ nandoo̱ rí mbuya. 22 Tsí Anu̱u̱ tsíxudaa awan ga̱jma̱á numuu nimbáa xa̱bo̱, ikhaa jngó nixnúu̱ mbá xúgíí tsiakhe̱ A̱dée̱ rí ma̱ꞌne-mbánuu ga̱jma̱á numúú xa̱bo̱. 23 Kajngó mbá xúgíin xa̱bo̱ gúya̱-makuíí A̱dée̱ xómá rí nduya-makuíi̱ Anu̱u̱. Tsí tsíya-makuu A̱dée̱, tsíya-makuu̱ máꞌ Anu̱u̱ tsí nixúngua̱a̱ꞌ A̱dée mangaa.

24 »Na̱tha̱nꞌ-jmbalaꞌ ríge̱ꞌ: tsí nadxawuun rí na̱tha̱nlo̱ꞌ jamí nanimbo̱o̱ꞌ jaꞌyoo̱ tsí nixúngu̱únꞌlo̱ꞌ, ndaꞌyee̱ jámuu jamí mi̱xáxnáxi̱i̱ rí mamínu̱u̱ꞌ jámuu. Numuu rí nijríya̱a̱ꞌ máꞌ inuu rí ma̱ja̱ñúu̱, jamí ndaꞌyee̱ rí xúge̱ꞌ rá. 25 Na̱tha̱nꞌ-jmbalaꞌ ríge̱ꞌ: ma̱ga̱nú mbiꞌi rí xa̱bo̱ tsí nijáñúú mu̱dxawíi̱n a̱ꞌwóo A̱dée Ana̱ꞌlóꞌ, ikhaa máꞌ mbiꞌi rúꞌkhue̱n ñajuun xúge̱ꞌ. Tsí nanimbu̱únꞌ rí naꞌthée̱n, mbuyee̱. 26 Xómá rí Ana̱ꞌlóꞌ gíꞌdoo tsiakhe̱ rí ma̱ꞌne rí mbuya xa̱bo̱, xkuaꞌnii máꞌ nixnúu̱ tsiakhe̱ A̱dée̱ rí ma̱ne̱ rí mbuya xa̱bo̱ mangaa. 27 Xúꞌkhue̱n máꞌ nixnúu̱ tsiakhe̱ rí ma̱ꞌne-mbánuu̱ ga̱jma̱á numúú xa̱bo̱, numuu rí ikhaa̱ ñajuu̱n A̱dée Xa̱bo̱ Numbaa.

28 »Ma̱xámakualaꞌ lá rí xkuaꞌnii ni̱tha̱nꞌlaꞌ, numuu rí ma̱ga̱nú mbiꞌi rí mbá xúgíin tsí gachúún ná iñá-wajíín mu̱dxawíi̱n a̱ꞌwóo̱, 29 jamí ma̱ga̱jnáa̱ ná iñá-wajíín. Tsí nene̱ rí máján, ma̱wa̱xúu̱nꞌ rí mbuyee̱ jámuu. Xómáꞌ tsí nene̱ rí ra̱máján rá, ma̱wa̱xúu̱nꞌ kajngó mi̱xnáxii̱n rí mbuyamíníi̱ jámuu.

30 »Ma̱xáxóo rí mba̱ya̱ idxu̱ꞌ ikhúúnꞌ rí ma̱ne̱lo̱ꞌ. Xómá na̱dxawuun, xkuaꞌnii máꞌ na̱xu̱ꞌdáalo̱ꞌ awan. Ído̱ rí na̱ne̱-mbánuulo̱ꞌ ga̱jma̱á numúú xa̱bo̱, na̱ne̱-mbánuu mújúnꞌlo̱ꞌ, numuu rí tsíꞌyá rí ma̱ne̱ rí nandoꞌ ikhúúnꞌ, rí na̱ne̱ rí nandoo Tátéꞌ tsí nixúngu̱únꞌlo̱ꞌ. 31 Xí jmínu̱úꞌ máꞌ ikhúúnꞌ na̱tha̱n rí máján ga̱jma̱á numuꞌ, ra̱gíꞌdoo numuu rí na̱tha̱nlo̱ꞌ. 32 I̱ndo̱ó máꞌ numuu rí xtáa i̱mba̱a̱ꞌ tsí naꞌthán rí máján ga̱jma̱á numuꞌ, jamí ikhúúnꞌ nda̱yo̱o̱ rí gakon rí naꞌthée̱n ga̱jma̱á numuꞌ.

33 »Nákhí ni̱xu̱ꞌmíilaꞌ xa̱bo̱ rí mu̱ra̱xi̱í Juáán, ikhaa̱ niꞌthánlaꞌ rí gakon. 34 Xómáꞌ ikhúúnꞌ tsíꞌyóꞌ rí maꞌthán rí máján nimbáa xa̱bo̱ ga̱jma̱á numuꞌ, i̱ndo̱ó máꞌ numuu rí nandoꞌ rí ma̱jríñáaꞌlaꞌ kajngó na̱tha̱nꞌlaꞌ ríge̱ꞌ. 35 Juáán ninindxu̱u̱ asndo xó mbá agu rí nakha jamí nambiꞌi-taꞌa, jamí ikháanꞌlaꞌ ni̱ni̱gua̱ꞌlaꞌ rí ma̱juwalaꞌ gagi mbá tikhu mbiꞌi ga̱jma̱á aguu̱.

36 »Xómáꞌ ikhúúnꞌ gúꞌdo̱ꞌ i̱mba̱ rí i̱tha̱án máján naꞌthán ga̱jma̱á numuꞌ xó rí Juáán. Numuu rí na̱ne̱lo̱ꞌ ñajun rí nigíꞌmúú Tátéꞌ ma̱ne̱lo̱ꞌ, ikhaa máꞌ rúꞌkhue̱n ñajuun rí naꞌthán rí máján ga̱jma̱á numuꞌ, jamí nasngájma ne̱ rí Tátéꞌ nixúngu̱únꞌlo̱ꞌ. 37 Jamí Tátéꞌ tsí nixúngu̱únꞌ naꞌthán rí máján ga̱jma̱á numuꞌ mangaa. Ikháanꞌlaꞌ ni miꞌtsú túdxawíínlaꞌ a̱ꞌwóo̱, ni máꞌ túya̱álaꞌ inuu̱, 38 ni máꞌ ra̱guáꞌdáálaꞌ ajngóo̱ ná awúun a̱kia̱nꞌlaꞌ, numuu rí tsínimba̱ꞌlaꞌ ju̱yo̱ꞌ, tsúún nixúngúu̱nꞌlo̱ꞌ. 39 Ikháanꞌlaꞌ nu̱ne̱-gajma̱a̱ guéñalaꞌ i̱yi̱i̱ꞌ ajngóo Ana̱ꞌlóꞌ numuu na̱ju̱ma̱ꞌlaꞌ rí ikhín mu̱xkamaalaꞌ rí naꞌne rí ma̱juwalaꞌ jámuu. Ikhaa máꞌ ne̱ naꞌthán rí máján ga̱jma̱á numuꞌ mangaa. 40 Xómáꞌ ikháanꞌlaꞌ tsíyalaꞌ gáguwalaꞌ inuꞌ kajngó ma̱juwalaꞌ jámuu.

41 »Ikhúúnꞌ tsíꞌyálo̱ꞌ rí muthan rí máján xa̱bo̱ numbaa ga̱jma̱á numuꞌ. 42 Numuu rí na̱ne̱-núwáanꞌ-májánlaꞌ, jamí nda̱yo̱o̱ rí nimbáa tsí ikháanꞌlaꞌ tsíyoo jaꞌyoo Ana̱ꞌlóꞌ. 43 Ikhúúnꞌ niꞌkha numuu rí Tátéꞌ nixúngu̱únꞌlo̱ꞌ, jamí ikháanꞌlaꞌ tsíyalaꞌ gúdrígúúnlaꞌ. Jamí xí i̱mba̱a̱ꞌ xa̱bo̱ na̱ꞌkha̱ ga̱jma̱á numuu rí xkuaꞌnii máꞌ ndiyá idxu̱u̱ ikhaa, tsúꞌkhue̱n tsí nu̱dríguíilaꞌ. 44 Xáne lá gágoo rí ma̱nimba̱ꞌlaꞌ ju̱yo̱ꞌ xí i̱ndo̱ó máꞌ na̱ni̱gua̱ꞌlaꞌ rí mu̱tha̱n máján numa-mijnálaꞌ, jamí tsíꞌyálaꞌ rí maꞌthán máján numalaꞌ Ana̱ꞌlóꞌ tsí mbáwíi rá.

45 »Ma̱xáju̱ma̱ꞌlaꞌ rí ikhúúnꞌ ma̱ne̱ aꞌkhánlaꞌ ná inuu Tátéꞌ. Xtáa tsí naꞌne aꞌkhánlaꞌ, ikhaa tsúꞌkhue̱n ñajuun Moisés, tsí guáꞌthi̱ínlaꞌ ga̱jma̱á mbá jañii a̱kia̱nꞌlaꞌ ná inuu. 46 Xí numuu rí gakon rí nanimba̱ꞌlaꞌ ju̱ya̱á Moisés, ma̱nimba̱ꞌlaꞌ máꞌ ju̱yo̱ꞌ mangúúnꞌ, numuu rí ikhaa̱ niꞌtháa̱n ga̱jma̱á numuꞌ ikhúúnꞌ. 47 Xí tsínimba̱ꞌlaꞌ ju̱ya̱á rí niꞌtháán Moisés, xáne lá gánimba̱ꞌlaꞌ rí na̱tha̱n ikhúúnꞌ xúꞌkhue̱n rá».