1 A̱ꞌkhue̱n Jesús niꞌthúu̱n: «Na̱tha̱nꞌ-jmbalaꞌ ríge̱ꞌ: tsí na̱nguá i̱to̱ꞌo̱o̱-muu ná xkrugoo kúru̱ún xu̱kú mogo̱, rí na̱ki̱xi̱i̱ janíí na̱to̱ꞌo̱o̱, tsúꞌkhue̱n ñajuun ku̱ꞌwá jamí tsí na̱grui̱gú-jáꞌñúú xa̱bo̱ ga̱jma̱á tsiakhe̱. 2 Xómáꞌ tsí na̱to̱ꞌo̱o̱-muu ná xkrugua rá, tsúꞌkhue̱n ñajuun waxtú drígu̱ún xu̱kú mogo̱. 3 Tsí na̱ña̱wu̱u̱n xkrugua narmáꞌthoo ma̱to̱ꞌo̱o̱. A̱ꞌkhue̱n naríye̱e̱ꞌ mbiꞌyuu mbámbáa moguii̱, jamí xu̱kú mogo̱ nune̱-nuwi̱in a̱ꞌwóo̱, ikhaa jngó nandoo na̱gu̱wíi̱n rixa̱á. 4 Jamí ído̱ ni̱gu̱wíi̱n mbá xúgíin moguii̱, na̱ke̱e̱ ginii̱ inúú, jamí moguii̱ nagóó tsu̱du̱u̱ numuu rí nune̱-nuwi̱in a̱ꞌwóo̱. 5 Xómáꞌ xa̱bo̱ tsí tsíne̱-nuwiin xu̱kú mogo̱, ma̱xágóo̱ tsu̱du̱u̱ tsúꞌkhue̱n, rí magáñúu̱ inuu, numuu rí tsíne̱-nuwii̱n a̱ꞌwóo̱».

6 Jesús niꞌthúu̱n ajngáa xkri̱da ríge̱ꞌ, xómáꞌ ikhii̱n táfruꞌúu̱n rí ndiyoo Jesús gáꞌthúu̱n.

7 Ikhaa jngó nithanga̱a Jesús niꞌthúu̱n mbu̱júꞌ: «Na̱tha̱nꞌ-jmbalaꞌ rí ikhúúnꞌ ñajunꞌ xkrugúún xu̱kú mogo̱. 8 Mbá xúgíin tsí niguwá ginii, tsúꞌkhue̱n ñajúún ku̱ꞌwá jamí tsí nu̱rígú-jáꞌñúú xa̱bo̱ ga̱jma̱á tsiakhe̱. I̱ndo̱ó máꞌ numuu rí xu̱kú mogo̱ túdxawíín rí nithee̱n. 9 Ikhúúnꞌ ñajunꞌ xkrugua. Tsí ma̱to̱ꞌo̱o̱ ná xkrugua ríge̱ꞌ ma̱jríya̱a̱ꞌ. Ma̱nindxu̱u̱ xómá xu̱kú mogo̱ tsí na̱to̱ꞌo̱o̱ jamí nagájna̱a, jamí naxkamaa ra̱xa̱ me̱kho̱. 10 Tsí ku̱ꞌwá na̱ꞌkhe̱e̱ rí ma̱ꞌne-kúwii̱nꞌ, rí ma̱gu̱díi̱n jamí rí ma̱ꞌne-gámbii̱n xu̱kú mogo̱. Xómáꞌ ikhúúnꞌ niꞌkhalo̱ꞌ rí mbuyee̱, jamí rí ma̱ju̱wée̱ꞌ tsímáá nda̱a̱ rí gáꞌñúu̱.

11 »Ikhúúnꞌ ñajunꞌ waxtú tsí májáan. Waxtú tsí májáan, xtáa̱ na̱ma̱ñuu̱ rí ma̱ja̱ñúu̱ ga̱jma̱á numúú xu̱kú mogo̱. 12 Xómáꞌ tsí nadaa numuu rí ma̱ña̱wu̱ún xu̱kú mogo̱ rá, nagáyuu̱ ído̱ ndaꞌyoo̱ rí na̱ꞌkha̱ i̱ña̱ꞌ. Naniñúu̱ numuu rí ra̱ꞌkhá ikhaa̱ ñajuu̱n ña̱ꞌñíí xu̱kú mogo̱. A̱ꞌkhue̱n rí i̱ña̱ꞌ naxkúún xu̱kú mogo̱ jamí ge̱e̱ ñúꞌún i̱dráꞌiin iꞌnii̱. 13 Tsí nadaa numuu tsíxná-gamiéjuu̱n ene̱ xu̱kú mogo̱, ikhaa jngó nagáyuu̱. Rí madaa̱ numuu̱ phú naxná-gamiéjuu̱n eꞌne.

14 »Ikhúúnꞌ ñajunꞌ waxtú tsí májáan. Na̱ne̱ꞌnúu mogui̱ꞌ, jamí ikhii̱n nune̱-nuwúu̱n, 15 xómá rí naꞌne-nuwúúnꞌ Tátéꞌ, jamí rí ikhúúnꞌ na̱ne̱-núwíi̱nlo̱ꞌ. Rúꞌkhue̱n kajngó na̱xna̱xí-mina̱ꞌ rí ma̱ja̱ñúꞌ ga̱jma̱á numúú mogo̱. 16 Gúꞌdiin i̱ꞌwíin mogo̱ tsí ndawi̱in ná kúra̱a̱ ríge̱ꞌ. Ikhiin tsúꞌkhue̱n jaꞌyoo rí ma̱ꞌgá gágu̱un mangiin, kajngó mu̱dxawíi̱n rí na̱tha̱nlo̱ꞌ. A̱ꞌkhue̱n mu̱wii̱n jamí mbáwíi máꞌ waxtú ma̱ña̱wúu̱n mangaa.

17 »Ikhaa jngó Tátéꞌ nandoo jaꞌyeꞌ, numuu rí na̱xna̱xí-mina̱ꞌ rí ma̱ja̱ñúꞌ kajngó mba̱ya̱a mbiꞌyuꞌ. 18 Nimbáa tsíxíñu̱úꞌ ga̱jma̱á tsiakhe̱, rí jmínu̱úꞌ máꞌ ikhúúnꞌ na̱xna̱xí-mina̱ꞌ rí ma̱ja̱ñúꞌ. Gúꞌdo̱ꞌ tsiakhe̱ rí ma̱xna̱xí-mina̱ꞌ ma̱ja̱ñúꞌ, xúꞌkhue̱n máꞌ gúꞌdo̱ꞌ tsiakhe̱ rí mba̱ya̱a mbiꞌyuꞌ. Ikhaa ríge̱ꞌ nixná-ñájwinꞌ Tátéꞌ rí ma̱ne̱lo̱ꞌ».

19 Ído̱ ni̱dxawíín xa̱bo̱ judío̱ ajngóo Jesús, a̱ꞌkhue̱n ni̱xpi̱ꞌtha̱-mijnée̱ mbu̱júꞌ. 20 Phú mbaꞌiin tsí ikhii̱n nuthan: «Najmiyuu xa̱bo̱ tsúꞌkhue̱n, gíñá ꞌguéen gíꞌdoo̱. Náá numuu kajngó nu̱dxawíínlaꞌ rí naꞌthée̱n róꞌ». 21 Xómáꞌ i̱ꞌwíin nuthan: «Nimbáa xa̱bo̱ tsí waꞌyáa eꞌne gíñá ꞌguéen tsíꞌthán xkuaꞌnii. Á ma̱ꞌngo̱o̱ mbáa gíñá ꞌguéen marmáꞌthoo idúún tsí tsífrigu̱únꞌ dxe̱ꞌ».

22 Ni̱ga̱nú go̱nꞌ rí naꞌne ngúwán, ído̱ na̱gu̱ma-ri̱ya̱aꞌ ndxa̱a̱ ná Jerusalén rí waxnáxe̱ guꞌwá dxákuun. 23 Awúun máꞌ mbiꞌi rúꞌkhue̱n ngrigo̱o̱ꞌ Jesús ná rixo̱o̱ guꞌwá dxákuun, ná agoo xka̱mixa rí neꞌne mbiꞌyuu Salomón. 24 A̱ꞌkhue̱n ni̱gi̱mbíin xa̱bo̱ judío̱ ná inuu̱ jamí ni̱ra̱xíi̱:

—Asndo nguáná gára̱tha̱nꞌxo̱ꞌ tsáa phú ñajwaanꞌ róꞌ. Arathán-jmbaaꞌ xí ikháánꞌ ñajwaanꞌ Krísto̱.

25 Xómáꞌ Jesús niriꞌñúu̱:

—Ni̱tha̱nꞌlaꞌ máꞌ tsáa ñajunꞌ, jamí ikháanꞌlaꞌ tsínimba̱ꞌlaꞌ rí ni̱tha̱nꞌlaꞌ. Mbá xúgíí rí phú wáá rí na̱ne̱lo̱ꞌ ga̱jma̱á ski̱yu̱u̱ꞌ Tátéꞌ, rúꞌkhue̱n nasngájma tsáa ñajunꞌ. 26 Xómáꞌ ikháanꞌlaꞌ tsínimba̱ꞌlaꞌ ju̱yo̱ꞌ, xómá rí ikhúúnꞌ ni̱tha̱nꞌlaꞌ,* numuu rí ra̱ꞌkhíin mogui̱ꞌ ñajwanlaꞌ. 27 Tsí ñajúún mogui̱ꞌ nu̱dxawíi̱n rí na̱tha̱nlo̱ꞌ. Ikhúúnꞌ na̱ne̱ꞌnúu̱ jamí ikhii̱n nagóo̱ tsu̱du̱ꞌ. 28 Ikhúúnꞌ na̱ne̱ rí ma̱ju̱wée̱ꞌ jámuu, jamí ni miꞌtsú ma̱xájáñúu̱, xúꞌkhue̱n máꞌ nimbáa ma̱xáꞌngo̱o̱ ma̱gu̱wíi̱n ná ñawúnꞌ. 29 Tátéꞌ nixníꞌ mogo̱ tsíge̱ꞌ, jamí ikhaa̱ phú i̱tha̱án mba̱a̱ tsiakhe̱ gíꞌdoo̱ xó rí mbá xúgíin, ikhaa jngó nimbáa ma̱xáꞌngo̱o̱ ma̱gu̱wíi̱n ná ñawúun Tátéꞌ. 30 Mbáwíi máꞌ xa̱bo̱ ñajunꞌ ikhúúnꞌ ga̱jmi̱ꞌ Tátéꞌ.

31 A̱ꞌkhue̱n rí xa̱bo̱ ñajun judío̱ ni̱ra̱tuu̱n mbu̱júꞌ itsí, kajngó muxnáa̱ Jesús asndo mu̱xíya̱a̱. 32 Xómáꞌ Jesús niꞌthúu̱n:

—Ikháanꞌlaꞌ ndi̱ya̱álaꞌ rí phú mbaꞌa rí máján ne̱ne̱lo̱ꞌ ga̱jma̱á ski̱yu̱u̱ꞌ Tátéꞌ. Náá rí rúꞌkhue̱n rí nandalaꞌ gúxnu̱ꞌ itsí ga̱jma̱á numuu rá.

33 A̱ꞌkhue̱n rí xa̱bo̱ ñajun judío̱ nitháa̱n:

—Tsíyaxo̱ꞌ gúxíña̱á ga̱jma̱á numuu nimbá rí máján nithane̱, rí ga̱jma̱á numuu rí narathán-xkawi̱íꞌ Ana̱ꞌlóꞌ. Numuu rí ikháánꞌ tsáánꞌ ñajwaanꞌ xa̱bo̱ numbaa, nathane̱-mina̱ꞌ Ana̱ꞌlóꞌ.

34 Xómáꞌ Jesús niꞌthúu̱n:

—Ná xtángoo dríga̱ꞌlaꞌ ka̱ma naꞌthán: "Ikhúúnꞌ ni̱tha̱n rí ikháanꞌlaꞌ ñajwanlaꞌ ana̱ꞌlóꞌ".* 35 Ana̱ꞌlóꞌ nixná mbiꞌñúú "ana̱ꞌlóꞌ" xa̱bo̱ tsí ni̱drígú ajngáa rawuu̱n. Jamí nduꞌyáálóꞌ máꞌ rí ma̱xáxóo ma̱xtiꞌkhuu i̱yi̱i̱ꞌ ajngóo Ana̱ꞌlóꞌ. 36 Ikhúúnꞌ niraꞌwúún Tátéꞌ jamí nixúngúu̱nꞌ ma̱ꞌkha ná numbaa ríge̱ꞌ rí ma̱ne̱lo̱ꞌ ñajuu̱n. Ikhaa jngó nda̱a̱ numuu rí mu̱tha̱nlaꞌ rí na̱tha̱n xkawe̱ꞌ numuu̱ ído̱ rí na̱tha̱nlo̱ꞌ: "A̱dée Ana̱ꞌlóꞌ ñajunꞌ". 37 Xí ikhúúnꞌ tsíne̱lo̱ꞌ ñajun rí nigíꞌmúú Tátéꞌ ma̱ne̱lo̱ꞌ, ma̱xánimba̱ꞌlaꞌ ju̱yo̱ꞌ xúꞌkhue̱n rá. 38 I̱ndo̱ó máꞌ numuu rí, xí na̱ne̱lo̱ꞌ rí nandoo Tátéꞌ rá, ga̱nimba̱ꞌlaꞌ ju̱ya̱á rí na̱ne̱lo̱ꞌ, maske máꞌ ma̱xánimba̱ꞌlaꞌ ju̱yo̱ꞌ ikhúúnꞌ. A̱ꞌkhue̱n rí mbáko máꞌ ágúya̱álaꞌ rí Tátéꞌ xtáa̱ jayu ga̱jma̱á nindxu̱ꞌ, jamí ikhúúnꞌ xtáá jayu ga̱jma̱á nindxu̱u̱ Tátéꞌ.

39 Mbu̱júꞌ máꞌ ndiñúu̱ gúrtuwii̱n Jesús, xómáꞌ ikhaa̱ neꞌne-jríya̱ꞌ-mine̱e̱ꞌ ná ñawúu̱n.

40 Jamí ni̱ke̱e̱ mbu̱júu̱ ná i̱mba̱ kri̱doo matha Jordán, ikhín ná Juáán nixúꞌdu-maꞌíin xa̱bo̱ ná awúun iya nákhí rí ginii. Awúun máꞌ rí nixtáa Jesús ikhín, 41 maphú mbaꞌiin xa̱bo̱ niguwá gúyáa̱, jamí nithee̱n: «Maske máꞌ nimbá rí phú wáá táꞌne Juáán, i̱ndo̱ó máꞌ numuu rí maphú gakon mbá xúgíí rí niꞌthée̱n ga̱jma̱á numuu xa̱bo̱ tsíge̱ꞌ». 42 Jamí phú mbaꞌiin xa̱bo̱ tsí júwa̱ꞌ ikhín ninimbu̱únꞌ juyáá Jesús.