1 Nixtáa mbáa xa̱bo̱ tsí najáñuu mbiꞌyuu Lása̱ro̱, jamí ná Betánia̱ xuajñuu xa̱bo̱ tsíge̱ꞌ. Ikhaa̱ gíꞌdii̱n a̱jmi̱i jñáguíi̱: mbáa mbiꞌyuu María̱ jamí i̱mba̱a̱ꞌ mbiꞌyuu Márta̱. 2 Ikhaa máꞌ María̱ tsíge̱ꞌ ñajuun tsí nitsuaꞌaan iya ndaa thawuun Táta̱, jamí nixúdíi̱ nakhúu ga̱jma̱á tsu̱u̱n idxu̱u̱. 3 Ikhaa jngó jñáguíi Lása̱ro̱ ni̱xu̱ꞌmee̱ ajngáa ríge̱ꞌ ná inuu Jesús: «Táta̱, najáñuu iyanga̱jwia̱aꞌ tsí phú nandaaꞌ xtayáá».

4 Ído̱ nidxawuun Jesús ajngáa ríge̱ꞌ, a̱ꞌkhue̱n niꞌthée̱n: «Ra̱ꞌkhá nandii rí ma̱ja̱ñúu xa̱bo̱ ñajuun ríge̱ꞌ, rí ikhaa ne̱ ma̱ꞌne rí ma̱gu̱ma-mba̱a̱ Ana̱ꞌlóꞌ, xúꞌkhue̱n máꞌ ma̱ꞌne ne̱ rí ma̱gu̱ma-mba̱a̱ A̱dée Ana̱ꞌlóꞌ».

5 Maske máꞌ Jesús phú nandoo jaꞌyoo Márta̱, María̱ jamí Lása̱ro̱, 6 ído̱ nidxawuu̱n rí najáñuu Lása̱ro̱, xóó ninguanúu̱ a̱jma̱ mbiꞌi ná xtáa̱. 7 Nda̱wa̱á niꞌthúu̱n tsí naꞌsngúu̱n:

—Gu̱ꞌgua̱lóꞌ mbu̱júꞌ ná numbaa Judéa̱.

8 A̱ꞌkhue̱n tsí naꞌsngúu̱n nitháa̱n:

—Táta̱ naꞌsngáá, ni̱kú máwáa ndiñúú gúxíña̱á xa̱bo̱ ñajun judío̱ ga̱jma̱á itsí, jamí ikhín máꞌ iyaaꞌ gídxú mbu̱jwáaꞌ ráanꞌ.

9 Xómáꞌ Jesús niꞌthúu̱n:

—Mbámbá mbiꞌi na̱ri̱ya̱a̱ꞌ a̱kha̱ꞌ gu̱wa̱ꞌ i̱jma̱ (12) kíxnuu iduu ajwa̱nꞌ. Tsí nangrigo̱o̱ꞌ awúun mbiꞌi tsíxíne̱e̱ꞌ, numuu rí nambiꞌyuu̱ aguu numbaa ríge̱ꞌ. 10 Xómáꞌ tsí nangrigo̱o̱ꞌ mbroꞌon rá, naxíne̱e̱ꞌ, numuu rí ikhaa̱ ra̱gíꞌdoo̱ agu rí mbayá ikhoo̱.

11 Ído̱ wámbo̱o̱ Jesús niꞌthán rúꞌkhue̱n, niríguu̱ ríge̱ꞌ:

—Naꞌgu iyanga̱jwia̱ꞌlóꞌ Lása̱ro̱. Xómáꞌ ikhúúnꞌ ma̱ꞌgá gáxkaxii̱lo̱ꞌ.

12 A̱ꞌkhue̱n nithan tsí naꞌsngúún Jesús:

—Táta̱, xí naꞌguii̱, ma̱ꞌni̱i a̱kuii̱n.

13 Xómáꞌ Jesús naꞌthúu̱n rí nijáñuu Lása̱ro̱, jamí ikhii̱n nifruꞌúu̱n rí naꞌguii̱ ndayáa̱ xu̱u̱ꞌ. 14 A̱ꞌkhue̱n Jesús niꞌthán-jmbúu̱n:

—Nijáñuu Lása̱ro̱. 15 Jamí ga̱jma̱á numa ikháanꞌlaꞌ nadxuꞌ rí táxtáálo̱ꞌ ikhín, kajngó ma̱nimba̱ꞌlaꞌ ju̱yo̱ꞌ. Xúge̱ꞌ rí gu̱ꞌgua̱lóꞌ gúꞌyáa̱ rá.

16 A̱ꞌkhue̱n niꞌthán Tomás, tsí mbiꞌyuu máꞌ Dídi̱mo̱ mangaa, niꞌthúu̱n i̱ꞌwíin tsí naꞌsngúún Jesús: «Gu̱ꞌgua̱ mangáanꞌlóꞌ, kajngó ma̱ja̱ñálóꞌ ga̱jma̱á nindxu̱u̱».

17 A̱ꞌkhue̱n ni̱ga̱nú Jesús ná xuajen Betánia̱, jamí ído̱ ni̱ga̱níi̱ nidxawuu̱n rí naꞌne máꞌ akho̱ mbiꞌi rí waꞌdi̱i Lása̱ro̱. 18 Rí xuajen Betánia̱ mijngi ꞌgí ne̱ ga̱jma̱á xuajen Jerusalén, naꞌne mbá atsú kilóme̱tro̱* wáa. 19 Ikhaa jngó phú mbaꞌiin xa̱bo̱ judío̱ niguwá gúxnáá tsiakhe̱ a̱kui̱in Márta̱ ga̱jma̱á María̱, numuu rí nijáñuu díñíi̱. 20 Ído̱ nidxawuun Márta̱ rí inu na̱ga̱nú Jesús, a̱ꞌkhue̱n nigájnuu̱ ni̱ka̱ gátsijnuu̱. Xómáꞌ María̱ ninguanúu guꞌwáá.

21 A̱ꞌkhue̱n Márta̱ niꞌthúun Jesús:

—Táta̱, xí numuu rí niraxtaa ge̱jyoꞌ, tájáñuu díye̱ꞌ. 22 Maske máꞌ xkuaꞌnii niríga̱ rá, ikhúúnꞌ nda̱yo̱o̱ rí Ana̱ꞌlóꞌ maxnáaꞌ asndo náá máꞌ rí gáta̱nda̱ꞌáa̱.

23 Xómáꞌ Jesús niꞌthúun Márta̱:

—Mbayáa mbiꞌyuu díya̱aꞌ.

24 A̱ꞌkhue̱n Márta̱ niꞌthán:

—Aan, nda̱yo̱o̱ máꞌ rí mbayáa̱ mbiꞌyuu̱ ído̱ gága̱nú mbiꞌi rí mbuya̱a mbiꞌñúú tsí nijáñúú, ído̱ gága̱nú mbiꞌi rí ndámba̱wóo.

25 Xómáꞌ Jesús niꞌthúun Márta̱:

—Ikhúúnꞌ na̱ne̱ rí ma̱ju̱wá jámuu xa̱bo̱, jamí ikhúúnꞌ na̱ne̱ rí mbuya̱a mbiꞌñúú tsí nijáñúú. Maske nijáñuu tsí ninimbo̱o̱ꞌ jaꞌyeꞌ, mba̱ꞌyee̱ jámuu. 26 Jamí xúꞌkhue̱n máꞌ mangaa, jámba̱a̱ tsí ndaꞌya jamí nanimbo̱o̱ꞌ jaꞌyeꞌ, ni miꞌtsú ma̱xájáñuu̱. Á nanimba̱a̱ꞌ ríge̱ꞌ rá.

27 A̱ꞌkhue̱n niꞌthán Márta̱:

—Aan, Táta̱, ikhúúnꞌ nanimbo̱ꞌ rí ikháánꞌ ñajwaanꞌ Krísto̱. Ikháánꞌ ñajwaanꞌ A̱dée Ana̱ꞌlóꞌ, ikhaa tsí wéje̱ máꞌ rí ma̱ꞌkha̱ ná numbaa.

28 Ído̱ wámbo̱o̱ Márta̱ niꞌthán ríge̱ꞌ, ni̱kaa̱ guꞌwóo̱ gándxaꞌwóo̱ María̱. Xáꞌnii niꞌthúu̱n ngu̱ꞌwa̱:

—Ni̱ga̱nú máꞌ Táta̱ naꞌsngáá, jamí nandxaꞌwáaꞌ.

29 Ído̱ nidxawuun ríge̱ꞌ María̱, mbá nacha̱ máꞌ ni̱tu̱xu̱u̱ꞌ jamí ni̱ka̱ gáꞌyoo̱ Jesús. 30 Xóó máꞌ táto̱ꞌo̱o̱ Jesús ná xuajen, rí ikhín máꞌ xóó wíji̱i̱ ná nixkamaa̱ Márta̱. 31 Xómáꞌ xa̱bo̱ judío̱ tsí gachúún guꞌwáá nuxna̱a la tsiakhe̱ a̱kui̱in María̱, ído̱ ndiyáa̱ rí ni̱tu̱xu̱u̱ꞌ jamí mbá nacha̱ nigájnuu̱, a̱ꞌkhue̱n nigóo̱ tsu̱du̱u̱, numuu ni̱ju̱múu̱ rí ná iñá-wajíín i̱ka̱ gámbi̱ye̱e̱ꞌ.

32 Ído̱ ni̱ga̱nú María̱ ná wéje̱ Jesús, niyaxu̱u̱ jamí nismáti̱go̱o̱ inuu. A̱ꞌkhue̱n María̱ niꞌthúun Jesús:

—Táta̱, xí numuu rí niraxtaa ge̱jyoꞌ, tájáñuu díye̱ꞌ.

33 Ído̱ ndiꞌyoo Jesús rí na̱mbi̱ya̱ꞌ María̱ jamí xa̱bo̱ judío̱ tsí niguwá ga̱jma̱á nindxu̱u̱, a̱ꞌkhue̱n rí phú nidaa a̱kuii̱n jamí niñáwíin a̱kuii̱n, 34 jamí niraxúu̱n:

—Náá ni̱dii̱laꞌ rá.

A̱ꞌkhue̱n ikhii̱n nitháa̱n:

—Ge̱jyoꞌ, Táta̱, aya̱ ma̱tha̱ya̱á.

35 Ikhín ni̱mbi̱ya̱ꞌ Jesús. 36 A̱ꞌkhue̱n nithan xa̱bo̱ judío̱:

—Nakujma rí phú nandoo̱ jaꞌyoo̱ tsí nijáñuu.

37 Xómáꞌ tsí i̱ꞌwíin xa̱bo̱ judío̱ nithan:

—Ikhaa tsíge̱ꞌ ñajuun tsí neꞌne-thanuu iduu xa̱bo̱ tsí tsífrigo̱o̱ꞌ. Ni̱ꞌngo̱o̱ máꞌ ni̱we̱je̱-ꞌthu̱u̱n rí ma̱xájáñuu Lása̱ro̱ mangaa, xí numuu rí ikhaa̱ ndiyoo̱.

38 Mbu̱júꞌ máꞌ phú nadaa a̱kui̱in Jesús, a̱ꞌkhue̱n nixuꞌma-mine̱e̱ꞌ ná iñá-wajen. Mbá iñúu itsí rí waꞌndi-raꞌáá ñajuun ná waꞌdi̱i Lása̱ro̱, jamí mbá itsí júgoo ga̱jma̱á ná rawuun ne̱.

39 A̱ꞌkhue̱n niꞌthán Jesús:

—Gu̱ya̱xíngaalaꞌ itsí.

Xómáꞌ Márta̱, dxáguíi tsí nijáñuu, niꞌthúu̱n Jesús:

—Táta̱, ndaa xkawi̱i̱ꞌ máꞌ, numuu rí xúge̱ꞌ eꞌne akho̱ mbiꞌi rí nijáñuu̱.

40 Jamí Jesús niriꞌñuu Márta̱:

—Ni̱tha̱a̱nꞌ máꞌ: xí nanimba̱a̱ꞌ, ma̱tha̱ya̱á rí phú wáá naꞌne ski̱yu̱u̱ꞌ Ana̱ꞌlóꞌ.

41 A̱ꞌkhue̱n rí xa̱bo̱ ni̱ꞌgí níjníí itsí. Xómáꞌ Jesús niyaxe̱ mikhuíí jamí niꞌthán:

—Táa̱, núma̱aꞌ la numuu rí nitadxawunꞌ. 42 Ikhúúnꞌ nda̱yo̱o̱ rí jámba̱ miꞌtsú natadxawunꞌ, xómáꞌ ríge̱ꞌ na̱tha̱nlo̱ꞌ ga̱jma̱á numúú xa̱bo̱ tsí gatiin ge̱jyoꞌ, kajngó ma̱nimbúu̱n rí ikháánꞌ nitaxúngu̱únꞌ.

43 Ído̱ wámbo̱o̱ Jesús niꞌthán ríge̱ꞌ, a̱ꞌkhue̱n nindxaꞌwée̱:

—Lása̱ro̱, a̱ga̱jnáaꞌ rixa̱á.

44 A̱ꞌkhue̱n tsí nijáñuu nigájna̱a ná iñá. Mbá xa̱ꞌ jayu jambráꞌa xtíin ná ñawúu̱n jamí nakhúu̱ nigájnaa̱, jamí ná inuu̱ jambráꞌa ga̱jma̱á mbá pañíto̱. Ikhaa jngó Jesús niꞌthúún xa̱bo̱:

—Gu̱ra̱khuíi̱laꞌ kajngó ma̱goo ma̱ꞌgee̱.

45 Phú mbaꞌiin xa̱bo̱ judío̱ tsí nigóó ágúyáá María̱, jamí ndiyáa̱ rí neꞌne Jesús, a̱ꞌkhue̱n ninimbúu̱n juyáa̱. 46 Xómáꞌ tsí i̱ꞌwíin nigóo̱ gúñúu̱ xa̱bo̱ fariséo̱, jamí nithúu̱n rí neꞌne Jesús. 47 A̱ꞌkhue̱n dxakuun tsí gíꞌdoo numúú jamí xa̱bo̱ fariséo̱, ni̱ru̱wii̱n xa̱bo̱ buanuu ede̱, jamí ni̱ra̱xúu̱n:

—Dí gúꞌne̱lóꞌ ga̱jma̱á nindxu̱u̱ xa̱bo̱ tsíge̱ꞌ róꞌ, numuu rí maphú mbaꞌa rí phú wáá na̱ꞌkha̱-raꞌnii̱. 48 Xí mu̱ni̱ꞌñáa̱lóꞌ máꞌ xkuaꞌnii, mbá xúgíin xa̱bo̱ ma̱nimbu̱únꞌ juyáa̱. A̱ꞌkhue̱n rí ma̱guwá xa̱bo̱ Róma̱ mune̱ gámbúu̱n guꞌwá dxákuun dríga̱ꞌlóꞌ jamí mbá numbaa xuajñalóꞌ.

49 Xómáꞌ Kaifás, ikhaa tsí jayá idxu̱ún dxakuun tsigu rúꞌkhue̱n, niꞌthúu̱n xa̱bii̱:

—¡Ikháanꞌlaꞌ nda̱a̱ rí i̱mañalaꞌ! 50 Ni máꞌ tsífraꞌa̱ꞌlaꞌ rí i̱tha̱án máꞌ máján rí mbáwíi xa̱bo̱ ma̱ja̱ñúu ga̱jma̱á numuu xuajen xó rí mbá xúgíin xa̱bo̱ xuajen ma̱ja̱ñúú.

51 Ra̱ꞌkhá idxu̱u̱ ikhaa Kaifás ndiyá rí niꞌthán ríge̱ꞌ, rí ga̱jma̱á numuu rí ikhaa̱ ñajuu̱n tsí jayá idxu̱ún dxakuun tsigu rúꞌkhue̱n, ikhaa jngó Ana̱ꞌlóꞌ neꞌne rí maꞌthée̱n rí Jesús ma̱ja̱ñúu ga̱jma̱á numúú mbá xúgíin xa̱bo̱ judío̱. 52 Jamí ra̱ꞌkhá i̱ndo̱ó ga̱jma̱á numúú mbá xúgíin xa̱bo̱ judío̱, rí ga̱jma̱á numuu rí mu̱wi̱in i̱ji̱in Ana̱ꞌlóꞌ tsí júwa̱ꞌ i̱ꞌwá janíí numbaa mangaa. 53 Ikhaa jngó asndo nákhí máꞌ mbiꞌi rúꞌkhue̱n niguáꞌdáá awan xa̱bo̱ buanuu ede̱ rí mu̱xíya̱a̱ Jesús.

54 Ikhaa jngó nánguá máꞌ ngrigo̱o̱ꞌ Jesús ná pa̱jnu inúú xa̱bo̱ judío̱. A̱ꞌkhue̱n niríya̱ꞌ-mine̱e̱ꞌ ná numbaa Judéa̱, ni̱ke̱e̱ ná mijngi mbaa niníí, ná ꞌgí mbá xuajen rí mbiꞌyuu Efraín. Ikhín nixtáa̱ gajmíi̱ tsí naꞌsngúu̱n.

55 Nangiyuu máꞌ rí ma̱gu̱ma ndxa̱a̱ drígu̱ún xa̱bo̱ judío̱ rí mbiꞌyuu Páskua̱. Ikhaa jngó phú mbaꞌiin xa̱bo̱ tsí júwa̱ꞌ ná xuajen laka natsimúu̱ nagóo̱ ná Jerusalén, kajngó mune̱-jaꞌwu-mijnáa̱, ído̱ rí xóó tsígi̱ꞌdu̱u̱n Páskua̱. 56 Ngrigúu̱n ruꞌyáa̱ Jesús ná awúun guꞌwá dxákuun, jamí nu̱ra̱xe̱-mijnée̱: «Dí i̱tha̱n ikháanꞌlaꞌ. Á ma̱ꞌkha̱ Jesús ndxa̱a̱ rá, o ma̱xáꞌkhe̱e̱ dxe̱ꞌ».

57 Numuu rí dxakuun tsí gíꞌdoo numúú jamí xa̱bo̱ fariséo̱, nixna-ñajwii̱n máꞌ ríge̱ꞌ: xí mbáa ndaꞌyoo náá xtáa̱ Jesús, gíꞌmaa rí maꞌthée̱n kajngó ma̱goo ma̱khuáa̱.