1 I̱mbá majun mbiꞌi iꞌyóo rí ma̱ga̱jnúu ndxa̱a̱ Páskua̱ ído̱ ni̱ga̱nú Jesús ná Betánia̱, ná xtáa̱ Lása̱ro̱, tsí nijáñuu jamí ndiyáa mbiꞌyuu neꞌne Jesús. 2 Ikhín ni̱gu̱ma-mújúun rí me̱kho̱-añuu Jesús. Márta̱ nastráma xúba̱, jamí Lása̱ro̱ ñajuun mbáa tsí ꞌgí nakueꞌtso-añuu ga̱jma̱á nindxu̱u̱ Jesús. 3 Xómáꞌ María̱ ni̱ꞌkha̱ jayóo mbá tsíꞌtsún mba̱a̱ rí gajno̱ꞌ iya ndaa thawuun rí ninújngoo numuu, mbáko máꞌ iyoo mbá iná rí mbiꞌyuu nárdo̱ ñajuun ne̱. Iya rúꞌkhue̱n nistrámuu̱ ná nakhúu Jesús jamí nixúdíi̱ ne̱ ga̱jma̱á tsu̱u̱n idxu̱u̱. A̱ꞌkhue̱n mbá xúgíí awúun guꞌwá nijni̱í xu̱u̱ꞌ iya ndaa thawuun rúꞌkhue̱n.

4 A̱ꞌkhue̱n niꞌthán Júda̱s Iskarióte̱, a̱dée Simón,* mbáa máꞌ tsí mbá gu̱wa̱ꞌ i̱jmi̱i (12) niꞌsngúún Jesús jamí nixnáxi̱i̱ nda̱wa̱á: 5 «Náá numuu kajngó táwatangu̱jo̱o̱ iya ndaa thawuun rúꞌkhue̱n mbá atsú siénto (300) mbúkha̱a̱ ajwa̱nꞌ,* jamí ma̱janúú mbúkha̱a̱ rúꞌkhue̱n xa̱bo̱ tsí ngíníi róꞌ». 6 Xómáꞌ Júda̱s táꞌthée̱n ríge̱ꞌ numuu gakon rí naxná-gamiéjuu̱n ene̱ tsí ngíníi, rí numuu rí ku̱ꞌwá ñajuu̱n. Ikhaa̱ wéje̱ inuu̱ rí ma̱ña̱wu̱u̱n xtábúxo̱o̱ mbúkhúu̱n, jamí naꞌne-kúwe̱e̱ꞌ tháan rí nu̱dri̱ya̱ꞌ xa̱bo̱ ikhín.

7 A̱ꞌkhue̱n Jesús niꞌthán: «Xátra̱jmaa̱. Ikhaa̱ niyáxii̱ iya ndaa thawuun ríge̱ꞌ ma̱jmaa ído̱ rí mi̱ꞌdúunlo̱ꞌ. 8 Tsí ngíníi jámba̱ miꞌtsú ma̱ju̱wá ga̱jma̱á nindxa̱ꞌlaꞌ, xómáꞌ ikhúúnꞌ ma̱xáxtáá jámba̱ miꞌtsú ga̱jma̱á nindxa̱ꞌlaꞌ».

9 Maphú mbaꞌiin xa̱bo̱ judío̱ ni̱dxawíín rí xtáa Jesús ná Betánia̱, ikhaa jngó nigóo̱ ikhín, ra̱ꞌkhá máꞌ i̱ndo̱ó rí mbuyáa̱ Jesús rí numuu rí mbuyáa̱ Lása̱ro̱ mangaa, tsí ndiyáa mbiꞌyuu neꞌne Jesús. 10 A̱ꞌkhue̱n rí dxakuun tsí gíꞌdoo numúú niguáꞌdáa̱ awan rí mu̱xíya̱a̱ Lása̱ro̱ mangaa. 11 Numuu rí ga̱jma̱á numuu Lása̱ro̱ phú mbaꞌiin xa̱bo̱ judío̱ nu̱rawí-mijnáa ná inúu̱, jamí nanimbúu̱n juyáa̱ Jesús.

12 Phú mbaꞌiin xa̱bo̱ niguwá ndxa̱a̱ Páskua̱ ná Jerusalén. Watse rí i̱mba̱ mbiꞌi ni̱dxawíi̱n rí ma̱ꞌkha̱ Jesús mangaa. 13 Kajngó ni̱ru̱thii̱n iná ida jamí nigájnúu̱ gútsijníi̱. A̱ꞌkhue̱n ni̱ndxa̱ꞌwe̱e̱:

«¡A̱gu̱ma-mba̱a̱ Ana̱ꞌlóꞌ!

¡A̱gu̱ma-tsakun-rámaa tsí na̱ꞌkha̱ ga̱jma̱á numuu Táta̱!

¡A̱gu̱ma-tsakun-rámaa Thúngaa drígo̱o̱ numbaa Israél!».

14 Nixkamaa Jesús mbáa xtángidi lájwíin jamí ni̱riguii̱ tsu̱du̱u̱, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

15 «Ma̱xámíñalaꞌ, xa̱bo̱ xuajen Sióón.

Ge̱jyoꞌ i̱ꞌkha̱ Thúngaa dríga̱ꞌlaꞌ,

ríguii̱ tsu̱du̱u̱ mbáa xtángidi lájwíin».*

16 Nákhí rí ginii táfruꞌu̱ún nitháan ríge̱ꞌ tsí naꞌsngúún Jesús. Asndo nda̱wa̱á, ído̱ rí nijáñuu̱ jamí ndiyáa̱ mbiꞌyuu̱, a̱ꞌkhue̱n ndiyáa̱ rí Jesús neꞌne-mbánuu rí ka̱ma waꞌtháán ga̱jma̱á numuu̱ máꞌ ikhaa̱.

17 Phú mbaꞌiin xa̱bo̱ gachúún nákhí rí Jesús niꞌthúu̱n Lása̱ro̱ rí ma̱ga̱jnáa̱ ná iñá-wajíín, jamí niꞌnii̱ rí mbayáa mbiꞌyuu. Ikhiin tsúꞌkhue̱n tsíni̱ꞌñáa̱-ruthúu̱n xa̱bo̱ rí ndiyáa̱. 18 Ikhaa numuu rúꞌkhue̱n phú mbaꞌiin xa̱bo̱ nigájnúú gútsijníí Jesús, numuu ni̱dxawíi̱n rí phú wáá rí niꞌnii̱. 19 Xómáꞌ xa̱bo̱ fariséo̱ nuthan-mijná: «A̱gu̱ya̱álaꞌ rí nimbá rí nu̱ꞌne̱lóꞌ tsímbáyúu rí ma̱we̱je̱ꞌthu̱u̱n. Mbá xúgíin xa̱bo̱ nagóó tsu̱du̱u̱».

20 Nigóó mbá tikhuun xa̱bo̱ griégo̱ mangiin ná Jerusalén, kajngó mune̱-mba̱a̱ Ana̱ꞌlóꞌ awúun ndxa̱a̱ rí mbiꞌyuu Páskua̱. 21 Ikhiin xa̱bo̱ tsíge̱ꞌ ni̱xu̱ꞌma-mijná inuu Felípe̱, tsí na̱ꞌkha̱ ná xuajen Betsáida̱, mbayuu Galiléa̱, jamí nithán-jáñíi̱: «Táta̱, nandaxo̱ꞌ mbu̱ya̱á Jesús». 22 Jamí Felípe̱ ni̱ka̱ gáꞌthúun Andrés. A̱ꞌkhue̱n rí nájmii̱ nigóo̱ gútháa̱n Jesús.

23 A̱ꞌkhue̱n waꞌthúu̱n neꞌne Jesús: «Ni̱ga̱nú máꞌ mbiꞌi rí ma̱gu̱ma-mba̱a̱ A̱dée Xa̱bo̱ Numbaa rá. 24 Na̱tha̱nꞌ-jmbalaꞌ, xí tsíjngúun tsíga ná awúun ju̱ba̱ꞌ, tsíjáñuu ne̱, mbóó máꞌ ne̱ xúꞌkhue̱n gáꞌne. Jamí xí najngúun ne̱ ná awúun ju̱ba̱ꞌ, ma̱ja̱ñúu ne̱, jamí phú mbaꞌa xndúu ne̱ gájma̱a̱. 25 Tsí na̱ña̱wu̱u̱n guéño mbiꞌyuu, ma̱ja̱ñúu̱. Xómáꞌ tsí tsíña̱wu̱u̱n guéño mbiꞌyuu ná numbaa ríge̱ꞌ, ma̱xájáñúu̱, rí mba̱ꞌyee̱ jámuu. 26 Xí mbáa nandoo gáꞌne-mba̱ꞌwu̱ún, ga̱ꞌkhe̱e̱ tsu̱du̱ꞌ. Ná rí ma̱xtáá ikhúúnꞌlo̱ꞌ, ikhín máꞌ ma̱xtáa tsí naꞌne-mba̱ꞌwu̱ún mangaa. Tsí naꞌne-mba̱ꞌwu̱ún, Tátéꞌ ma̱ꞌne rí phú ma̱gi̱ꞌdoo numuu̱».

27 »Rí mbrúma ríge̱ꞌ maphú na̱mínu̱u̱ꞌlo̱ꞌ, jamí tsiánguá eꞌne a̱kui̱nꞌlo̱ꞌ. Naꞌne a̱kui̱nꞌ rí ma̱thu̱u̱n Tátéꞌ: "Táa̱, ma̱xáta̱tsi̱ꞌñúꞌ rí ma̱mínu̱u̱ꞌlo̱ꞌ xkuaꞌnii". Jamí xí ikhaa máꞌ numuu rúꞌkhue̱n niꞌkhalo̱ꞌ rá. 28 I̱wa̱á máján xáꞌnii gáthu̱u̱nlo̱ꞌ: "Táa̱, athane̱ rí ma̱gu̱ma-mba̱ánꞌ gúne̱ xa̱bo̱"».

A̱ꞌkhue̱n niwán mbá a̱ꞌwá ná mikhuíí rí niꞌthán: «Xkuaꞌnii máꞌ ne̱ne̱lo̱ꞌ, jamí ma̱ne̱ rí ma̱gu̱ma-mbu̱únꞌ xóó gúne̱ xa̱bo̱». 29 Xa̱bo̱ tsí wájun ikhín ni̱dxawíi̱n a̱ꞌwá. Mbá tikhuun xa̱bo̱ nithan rí be̱go̱ nindxaꞌwá, i̱ꞌwíi̱n nithee̱n rí mbáa ánje̱l niꞌthán-mina̱ꞌ ga̱jma̱á nindxu̱u̱ Jesús.

30 Xómáꞌ Jesús niꞌthúún xa̱bo̱: «Ra̱ꞌkhá ga̱jma̱á numuꞌ ikhúúnꞌ niwán a̱ꞌwá rúꞌkhue̱n, rí ga̱jma̱á numalaꞌ ikháanꞌlaꞌ. 31 Xúge̱ꞌ ni̱ga̱nú mbiꞌi rí ma̱to̱ꞌo̱o̱ awan ga̱jma̱á numúú xa̱bo̱ numbaa rá. Jamí rí mi̱xkriya̱a̱ꞌ rixa̱á tsí naꞌthán-ñájun ná numbaa ríge̱ꞌ. 32 Xómáꞌ ikhúúnꞌlo̱ꞌ ído̱ rí mi̱drákamúú ná ixe̱, ma̱ne̱lo̱ꞌ rí mbá xúgíin xa̱bo̱ ma̱guwá ná inuꞌ».

33 Xkuaꞌnii niꞌthán Jesús kajngó ma̱fruꞌu̱ún xa̱bo̱ xáne wéje̱ rí ma̱ja̱ñúu̱. 34 A̱ꞌkhue̱n ni̱riꞌña xa̱bo̱, nitháa̱n Jesús:

—Ikháanꞌxo̱ꞌ ni̱dxawíínxo̱ꞌ rí ná xtángoo naꞌthán rí jámuu xtáa Krísto̱. Xáne kajngó ikháánꞌ narathán rí ndaꞌyóo mi̱drákamaa ná ixe̱ A̱dée Xa̱bo̱ Numbaa róꞌ. Tsáa A̱dée Xa̱bo̱ Numbaa ñajuun tsúꞌkhue̱n róꞌ.

35 A̱ꞌkhue̱n Jesús niꞌthúu̱n:

—I̱mbá wátha̱ mbiꞌi xóó ma̱guaꞌdáálaꞌ agu ga̱jma̱á nindxa̱ꞌlaꞌ. Ikhaa jngó ga̱ngriga̱ꞌlaꞌ awúun mbiꞌi rí guáꞌdáálaꞌ agu, ra̱ꞌkhá marugua-maꞌáanꞌlaꞌ mbroꞌon. Numuu rí xa̱bo̱ tsí ngrigo̱o̱ꞌ ná mijína, tsífrigo̱o̱ꞌ ná ma̱ꞌgee̱. 36 Awúun mbiꞌi rí guáꞌdáálaꞌ agu, ga̱nimba̱ꞌlaꞌ ju̱ya̱á ne̱, kajngó ma̱nindxa̱ꞌlaꞌ xa̱bo̱ tsí nambiꞌñúú agu.

Ído̱ wámbo̱o̱ Jesús niꞌthán ríge̱ꞌ, a̱ꞌkhue̱n niríya̱ꞌ-mine̱e̱ꞌ jamí nirkaꞌu-mine̱e̱ꞌ inúú xa̱bo̱.

37 Maske máꞌ phú mbaꞌa rí phú wáá neꞌne Jesús ná inúu̱, tánimbúu̱n juyáa̱. 38 Xkuaꞌnii nimbánuu rí niꞌthán Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú:

«Táta̱, tsáa lá ninimbo̱o̱ꞌ ajngáa rí nu̱tha̱n-ráꞌaxo̱ꞌ rá.

Jamí tsáa lá ñajuun tsí wasngájmáá ski̱yu̱u̱ꞌ Táta̱ rá».*

39 Ikhaa jngó ra̱khóo gánimbu̱únꞌ xa̱bo̱, numuu rí xáꞌnii niꞌthán Isaía̱s mangaa:

40 «Ana̱ꞌlóꞌ nirugoo idúu̱n ikhii̱n,

jamí neꞌne gúkuíi̱ a̱kui̱ín xa̱bo̱,

kajngó mu̱xúyáa̱ ga̱jma̱á idúu̱n,

ni máꞌ ma̱xáfruꞌúu̱n ga̱jma̱á a̱kuíi̱n,

ni máꞌ ma̱xáthangii̱n ná inuꞌ ikhúúnꞌ,

kajngó ma̱ne̱-thanúu̱lo̱ꞌ».*

41 Ikhaa ríge̱ꞌ niꞌthán Isaía̱s, numuu ndiꞌyoo̱ rí phú ma̱gi̱ꞌdoo numuu Jesús, jamí ikhaa rúꞌkhue̱n niꞌthée̱n numuu.

42 Maske máꞌ xkuaꞌnii, phú mbaꞌiin xa̱bo̱ ninimbu̱únꞌ juyáá Jesús, asndo mbá tikhuun xa̱bo̱ ñajun judío̱ mangiin, i̱ndo̱ó máꞌ numuu rí tsíthee̱n rí nanimbúu̱n juyáa̱ ná inúú xa̱bo̱, numuu namíñúu̱ rí mi̱xkawíi̱n gúne̱ xa̱bo̱ fariséo̱ ná awúun guꞌwá rí na̱gi̱mbíin xa̱bo̱ judío̱. 43 Numuu rí i̱wa̱á máꞌ na̱ni̱gúu̱nꞌ rí muthan rí máján xa̱bo̱ ga̱jma̱á numúu̱, xó rí ma̱nguanú-mújúu̱n ná inuu Ana̱ꞌlóꞌ.

44 A̱ꞌkhue̱n niꞌthán Jesús gakhe̱: «Tsí nanimbo̱o̱ꞌ jaꞌyeꞌ ikhúúnꞌ, ra̱ꞌkhá máꞌ i̱ndo̱ó ikhúúnꞌ nanimbo̱o̱ꞌ jaꞌyeꞌ, rí nanimbo̱o̱ꞌ máꞌ jaꞌyoo̱ tsí nixúngu̱únꞌlo̱ꞌ mangaa. 45 Jamí tsí ndaꞌyeꞌ ikhúúnꞌ, ndaꞌyoo̱ máꞌ tsí nixúngu̱únꞌlo̱ꞌ mangaa. 46 Ikhúúnꞌ ñajunꞌ agu rí ni̱ꞌkha̱ ná numbaa ríge̱ꞌ, kajngó jámba̱a̱ tsí nanimbo̱o̱ꞌ jaꞌyeꞌ náxáxtáa̱ ná mijína.

47 »Xí mbáa nadxawuun ajngóꞌ jamí tsíꞌne-mbánuu ne̱, ra̱ꞌkhá ikhúúnꞌ ñajunꞌ tsí ma̱ne̱-mbánuu ga̱jma̱á numuu̱. Numuu táꞌkhalo̱ꞌ rí ma̱ne̱-mbánuu ga̱jma̱á numúú xa̱bo̱ numbaa, rí niꞌkhalo̱ꞌ ma̱ne̱-jáwíi̱n. 48 Tsí tsíyoo ágrui̱gúún jamí tsígrui̱gú rí na̱sngáálo̱ꞌ, gíꞌdaa̱ máꞌ tsí ma̱ꞌne-mbánuu ga̱jma̱á numuu̱. Ikhaa ajngáa rí ni̱tha̱nlo̱ꞌ, rúꞌkhue̱n ma̱ꞌne-mbánuu ga̱jma̱á numuu̱ ído̱ gága̱nú mbiꞌi rí ndámba̱wóo. 49 Numuu rí ra̱ꞌkhá ikhúúnꞌ ndi̱ya̱ idxu̱ꞌ rí ni̱tha̱nlo̱ꞌ, rí Tátéꞌ tsí nixúngu̱únꞌ nixná-ñájwinꞌ náá rí jaꞌyoo ma̱tha̱nlo̱ꞌ jamí náá rí jaꞌyoo ma̱sngáálo̱ꞌ. 50 Jamí nda̱yo̱o̱ mújúnꞌ máꞌ rí ajngóo Tátéꞌ naꞌne rí ma̱ju̱wá jámuu xa̱bo̱. Ikhaa jngó, xómá niꞌthínꞌ Tátéꞌ rí ma̱thu̱únlo̱ꞌ xa̱bo̱, xkuaꞌnii máꞌ i̱thúu̱nlo̱ꞌ».