1 »Ma̱xáguaꞌdáálaꞌ gaꞌkho̱. Ga̱nimba̱ꞌlaꞌ ju̱ya̱á Ana̱ꞌlóꞌ, jamí ga̱nimba̱ꞌlaꞌ ju̱yo̱ꞌ mangúúnꞌ. 2 Ná guꞌwóo Tátéꞌ phú gaꞌchú ná ma̱juwalóꞌ. Xí ra̱ꞌkhá xkuaꞌnii jaꞌnii, ni ma̱xátha̱nꞌlaꞌ rí ma̱ꞌgá gáne̱-mújúnꞌ ná ma̱juwalaꞌ xúꞌkhue̱n rá. 3 Jamí ído̱ wámbo̱ꞌ ne̱ne̱-mújúnꞌ ná ma̱juwalaꞌ rá, a̱ꞌkhue̱n ma̱ꞌkha gáguáanꞌlaꞌ kajngó mu̱ꞌgualaꞌ ga̱jma̱á nindxu̱ꞌ. Xkuaꞌnii jngó ma̱juwalaꞌ ná xtáá ikhúúnꞌlo̱ꞌ. 4 Ikháanꞌlaꞌ nu̱ne̱-nuwiinlaꞌ máꞌ jamba̱a̱ rí na̱ga̱nú ná nakalo̱ꞌ.

5 A̱ꞌkhue̱n niꞌthán Tomás:

—Táta̱, tsíya̱áxo̱ꞌ náá idxo̱ꞌ. Xáne lá gágoo mu̱ne̱-nuwiinxo̱ꞌ jamba̱a̱ rí xkuaꞌnii rá.

6 Jamí Jesús niꞌthúun Tomás:

—Ikhúúnꞌ ñajunꞌ jamba̱a̱, ikhúúnꞌ ñajunꞌ rí gakon jamí ikhúúnꞌ na̱ne̱ rí ma̱ju̱wá jámuu xa̱bo̱. Nimbáa ma̱xáxóo ma̱ꞌkha̱ ná inuu Ana̱ꞌlóꞌ xí ra̱ꞌkhá ga̱jma̱á numuꞌ ikhúúnꞌ. 7 Xí ikháanꞌlaꞌ nu̱ne̱-nuwúúnlaꞌ, nu̱ne̱-nuwiinlaꞌ máꞌ Tátéꞌ mangaa. Asndo nákhí máꞌ xúge̱ꞌ nu̱ne̱-nuwii̱nlaꞌ, jamí ndi̱yáa̱laꞌ.

8 A̱ꞌkhue̱n niꞌthán Felípe̱:

—Táta̱, atasngájmaxo̱ꞌ Tátiáaꞌ, jamí mbájndi máꞌ rí ma̱ta̱snga̱jmáxo̱ꞌ ikhaa̱.

9 Xómáꞌ Jesús niꞌthúun Felípe̱:

—Felípe̱, maphú neꞌne máꞌ xtáá ga̱jma̱á nindxa̱ꞌlaꞌ, jamí xóó tsíthane̱-nuwúún ráanꞌ. Tsí ndiꞌyeꞌ ikhúúnꞌ, ndiꞌyoo̱ máꞌ Tátéꞌ mangaa. Náá numuu kajngó narathúnꞌ rí ma̱snga̱jmálaꞌ Tátéꞌ róꞌ. 10 Á tsínimba̱a̱ꞌ rí ikhúúnꞌ xtáá jayu ga̱jmi̱ꞌ Tátéꞌ, jamí ikhaa̱ xtáa̱ jayu ga̱jma̱á nindxu̱ꞌ dxe̱ꞌ. Ra̱ꞌkhá ikhúúnꞌ ndi̱ya̱ idxu̱ꞌ ajngáa rí ni̱tha̱nꞌlaꞌ, rí Tátéꞌ tsí xtáa̱ jayu ga̱jma̱á nindxu̱ꞌ naꞌnii̱ ñajuu̱n. 11 Ga̱nimba̱ꞌlaꞌ rí ikhúúnꞌ xtáá jayu ga̱jma̱á nindxu̱u̱ Tátéꞌ, jamí ikhaa̱ xtáa̱ jayu ga̱jma̱á nindxu̱ꞌ ikhúúnꞌ. Xí tsínimba̱ꞌlaꞌ ga̱jma̱á numuu rí na̱tha̱nꞌlaꞌ, ga̱nimba̱ꞌlaꞌ ga̱jma̱á numuu rí na̱ne̱lo̱ꞌ. 12 Na̱tha̱nꞌ-jmbalaꞌ rí xa̱bo̱ tsí nanimbo̱o̱ꞌ jaꞌyeꞌ ikhúúnꞌ, ma̱ꞌnii̱ mangaa̱ rí na̱ne̱ ikhúúnꞌ. Jamí asndo i̱tha̱án máꞌ mba̱ꞌwo̱ rí ma̱ꞌnii̱ ikhaa̱, numuu rí ikhúúnꞌ naka̱aꞌlo̱ꞌ ná xtáa Tátéꞌ. 13 Jamí ikhúúnꞌ ma̱ne̱ asndo náá máꞌ rí mu̱nda̱ꞌa̱álaꞌ Ana̱ꞌlóꞌ ga̱jma̱á numuꞌ ikhúúnꞌ. Xkuaꞌnii kajngó ma̱gu̱ma-mba̱a̱ Ana̱ꞌlóꞌ ga̱jma̱á majñu̱u̱ A̱dée̱. 14 Ikhúúnꞌ ma̱ne̱lo̱ꞌ mbá xúgíí rí mu̱nda̱ꞌa̱laꞌ ga̱jma̱á numuꞌ ikhúúnꞌ.

15 »Xí ikháanꞌlaꞌ nandalaꞌ ju̱yo̱ꞌ, mu̱ne̱-mbáníílaꞌ rí na̱xna̱-ñájwanlaꞌ. 16 Jamí ikhúúnꞌ ma̱tha̱n-jáñuu Tátéꞌ rí maxuꞌmaa̱ i̱mba̱a̱ꞌ tsí maꞌthán-mbáá numalaꞌ, jamí ma̱xtáa̱ mbá jayu ga̱jma̱á nindxa̱ꞌlaꞌ. 17 Ikhaa tsúꞌkhue̱n ñajuun Xe̱ꞌ tsí nasngájma rí gakon, tsí tsíyoo mu̱dri̱guíi xa̱bo̱ numbaa, numuu rí na̱nguá iyáa̱ ni máꞌ tsíne̱-nuwii̱n. Xómáꞌ ikháanꞌlaꞌ nu̱ne̱-nuwii̱nlaꞌ numuu rí xtáa̱ ga̱jma̱á nindxa̱ꞌlaꞌ, jamí ma̱xtáa̱ ná awúun a̱kia̱nꞌlaꞌ. 18 Ma̱xáni̱ꞌñá tsidxuáꞌalaꞌ. Ma̱ꞌkha̱aꞌ gáxtáá ga̱jma̱á nindxa̱ꞌlaꞌ. 19 Nangiyuu máꞌ rí náxúyeꞌ xa̱bo̱ numbaa rá. Xómáꞌ ikháanꞌlaꞌ mbu̱yo̱ꞌlaꞌ mbu̱júꞌ. Numuu rí ikhúúnꞌ xtáá nda̱ya̱lo̱ꞌ, mbu̱ya̱ máꞌ mangáanꞌlaꞌ. 20 Ído̱ gága̱nú mbiꞌi rúꞌkhue̱n, mbu̱ya̱álaꞌ rí ikhúúnꞌ xtáá jayu ga̱jma̱á nindxu̱u̱ Tátéꞌ, jamí rí ikháanꞌlaꞌ juwalaꞌ jayu ga̱jma̱á nindxu̱ꞌ, xúꞌkhue̱n máꞌ rí ikhúúnꞌ xtáá jayu ga̱jma̱á nindxa̱ꞌlaꞌ. 21 Tsí na̱ma̱ñuu jamí naꞌne-mbánuu rí na̱xna̱-ñájun ikhúúnꞌ, tsúꞌkhue̱n nasngájma rí nandoo jaꞌyeꞌ. Jamí tsí nandoo jaꞌyeꞌ ikhúúnꞌ, Tátéꞌ ma̱goo jaꞌyoo tsúꞌkhue̱n. Xúꞌkhue̱n máꞌ mangúúnꞌ ma̱goꞌ ja̱yo̱o̱ jamí ma̱snga̱jmá-mina̱ꞌ inuu̱.

22 A̱ꞌkhue̱n niraxe̱ i̱mba̱a̱ꞌ tsí mbiꞌyuu Júda̱s (ra̱ꞌkháa Júda̱s Iskarióte̱):

—Táta̱, náá numuu kajngó ma̱ta̱snga̱jmá-mina̱ꞌ ná ina ikháanꞌxo̱ꞌ, jamí ra̱ꞌkhá ná inúú i̱ꞌwíin xa̱bo̱ numbaa róꞌ.

23 Xómáꞌ Jesús niriꞌñuu̱:

—Tsí nandoo jaꞌyeꞌ, ma̱ꞌne-mbánuu̱ rí na̱tha̱nlo̱ꞌ. Xómáꞌ Tátéꞌ ma̱goo jaꞌyoo̱, jamí ma̱guwaxo̱ꞌ ná inuu̱ jamí ma̱juwaxo̱ꞌ jayu ga̱jma̱á nindxu̱u̱. 24 Tsí tsíyoo jaꞌyeꞌ, tsíꞌne-mbánuu̱ máꞌ rí na̱tha̱nlo̱ꞌ mangaa. Ajngáa rí ni̱dxawíínlaꞌ ga̱jma̱á majñu̱u̱ rí ni̱sngálaꞌ, ra̱ꞌkhá ajngóꞌ ikhúúnꞌ ñajuun ne̱, rí ajngóo Tátéꞌ tsí nixúngu̱únꞌ ñajuun ne̱. 25 Na̱tha̱nꞌlaꞌ mbá xúgíí ríge̱ꞌ awúun mbiꞌi rí xóó xtáá ga̱jma̱á nindxa̱ꞌlaꞌ. 26 Xómáꞌ tsí ma̱ꞌkha̱ maꞌthán-mbáá numalaꞌ ñajuun Xu̱u̱ꞌ Ana̱ꞌlóꞌ, tsí maxúngua̱a̱ꞌ Tátéꞌ ga̱jma̱á numuꞌ ikhúúnꞌ. Ikhaa̱ maꞌsngálaꞌ mbá xúgíí, jamí ma̱ꞌnii̱ rí ma̱rmáꞌáan a̱kia̱nꞌlaꞌ mbá xúgíí rí ni̱tha̱nꞌlaꞌ.

27 »Na̱ni̱ꞌñúulo̱ꞌ rí tsímáá ga̱jma̱á nindxa̱ꞌlaꞌ. Ra̱ꞌkhá xómá tsímáá rí nuxna xa̱bo̱ numbaa, rí tsímáá drígo̱ꞌ ikhúúnꞌ na̱xna̱ꞌlaꞌ. Ma̱xáguaꞌdáálaꞌ gaꞌkho̱, ni máꞌ ma̱xámíñalaꞌ. 28 Ikháanꞌlaꞌ ni̱dxawíín rí ni̱tha̱nꞌlaꞌ: "Naka̱aꞌlo̱ꞌ, jamí ma̱ꞌkha̱aꞌlo̱ꞌ mbu̱júꞌ ma̱xtáá ga̱jma̱á nindxa̱ꞌlaꞌ". Xí gakon rí nandalaꞌ ju̱yo̱ꞌ, gíꞌmaa rí ma̱ꞌdxu a̱kia̱nꞌlaꞌ rí naka̱aꞌlo̱ꞌ ná xtáa Tátéꞌ, numuu rí ikhaa̱ phú i̱tha̱án gíꞌdoo numuu̱ xó rí ikhúúnꞌ. 29 Wapha máꞌ i̱tha̱nꞌlaꞌ ríge̱ꞌ, nákhí rí xóó tsíríga̱ ne̱, kajngó ído̱ rí ma̱ri̱gá ne̱, ma̱nimba̱ꞌlaꞌ.

30 »Náxátha̱n máꞌ mbaꞌa ajngáa ga̱jma̱á nindxa̱ꞌlaꞌ rá, numuu rí na̱ꞌkha̱ máꞌ tsí naꞌthán-ñájun ná numbaa ríge̱ꞌ. Ikhaa̱ ra̱gíꞌdoo̱ nitháan tsiakhe̱ rí ma̱ꞌngo̱o̱ inuꞌ, 31 i̱ndo̱ó máꞌ numuu rí ndaꞌyóo rí mbá xúgíin xa̱bo̱ numbaa mbuyáá rí nandoꞌ ja̱yo̱o̱ Tátéꞌ, ikhaa jngó na̱ne̱-mbánuu xómá niꞌthínꞌ rí ma̱ne̱lo̱ꞌ.

»Ga̱waxu̱nlaꞌ rá. Gu̱ꞌgua̱lóꞌ i̱mba̱ janíí.