1 Ído̱ wámbo̱o̱ Jesús niꞌthán ríge̱ꞌ, a̱ꞌkhue̱n niyaxi̱i̱ mikhuíí jamí niꞌthée̱n: «Táa̱, ni̱ga̱nú mbiꞌi rá. Athane̱ rí xa̱bo̱ mbuyáá rí phú mba̱a̱ A̱ꞌdiáaꞌ, kajngó A̱ꞌdiáaꞌ mangaa ma̱ꞌne rí xa̱bo̱ mbuyáá rí phú mba̱ánꞌ ikháánꞌ. 2 Numuu rí ikháánꞌ niraxnáá tsiakhe̱ A̱ꞌdiáaꞌ rí maꞌthán-ñájúu̱n mbá xúgíin xa̱bo̱ numbaa, kajngó ma̱ꞌnii̱ rí mbuya jámuu mbá xúgíin tsí nitaxnáxi̱in ná ñawúu̱n. 3 Ikhaa ríge̱ꞌ ñajuun rí naꞌne rí ma̱ju̱wá jámuu xa̱bo̱: Rí mune̱-nuwíi̱n ikháánꞌ tsáánꞌ mbáwíín gakon rí Anúu̱ ñajwaanꞌ, jamí rí mune̱-nuwii̱n Jesukrísto̱ tsí nitaxúngua̱a̱ꞌ. 4 Ikhúúnꞌ ni̱snga̱jmá ná numbaa rí nda̱ya̱-makuaaꞌ, numuu rí ne̱ne̱-gáxu̱u̱lo̱ꞌ ñajun rí nithaꞌgí inuꞌ rí ma̱ne̱lo̱ꞌ. 5 Rí xúge̱ꞌ rá, Táa̱, athane̱ rí ma̱gruígú mba̱a̱ gamaku ná níjñáaꞌ, ikhaa máꞌ mba̱a̱ gamaku rí ni̱gruígú ga̱jma̱á nindxa̱a̱ꞌ asndo nákhí máꞌ xóó nda̱a̱ numbaa.

6 »Xa̱bo̱ numbaa tsí niraxníꞌ, ni̱snga̱jmúu̱ tsáa ñajwaanꞌ ikháánꞌ. Xa̱bia̱aꞌ máꞌ ikháánꞌ ninindxúu̱n, xómáꞌ ikháánꞌ niraxníꞌ, jamí ikhii̱n nene̱-mbáníi̱ ajngáaꞌ rí ni̱thúu̱nlo̱ꞌ. 7 Xúge̱ꞌ nduyáa̱ rí mbá xúgíí rí niraxnúꞌ na̱ꞌkha̱ ná inaaꞌ ikháánꞌ. 8 Numuu ni̱thúu̱nlo̱ꞌ ajngáa rí niraxná-ngawoꞌ rí ma̱thúu̱nlo̱ꞌ, jamí ikhii̱n ni̱dri̱guíi̱ ne̱. Nduyáa̱ mújúu̱n máꞌ rí ná xtaa ikháánꞌ niꞌkhalo̱ꞌ, jamí ninimbúu̱n rí ikháánꞌ nitaxúngu̱únꞌ. 9 Na̱tha̱n-jáñaaꞌ ga̱jma̱á numúu̱. Tsítha̱n-jáñaaꞌ ga̱jma̱á numúú mbá xúgíin xa̱bo̱ numbaa, rí na̱tha̱n-jáñaaꞌ ga̱jma̱á numúú tsí niraxníꞌ, numuu rí xa̱bia̱aꞌ máꞌ ikháánꞌ ñajúu̱n. 10 Mbá xúgíin tsí gúꞌdiin ikhúúnꞌ xa̱bia̱aꞌ máꞌ ikháánꞌ ñajúu̱n, jamí mbá xúgíin tsí xtaꞌdiin ikháánꞌ xa̱bi̱ꞌ máꞌ ikhúúnꞌ ñajúu̱n. Jamí ga̱jma̱á majñúu̱ ikhii̱n na̱gu̱ma-mbu̱únꞌ.

11 »Rí ikhúúnꞌ rá, náxáxtáá máꞌ ná numbaa ríge̱ꞌ, xómáꞌ ikhii̱n ma̱ju̱wée̱ꞌ xóó ná numbaa, jamí ikhúúnꞌ naka̱aꞌlo̱ꞌ ná xtaa ikháánꞌ. Táa̱, tsáánꞌ phú jaꞌwíín, a̱tia̱wu̱ún tháan ga̱jma̱á ski̱ya̱a̱ꞌ xa̱bo̱ tsíge̱ꞌ tsí niraxníꞌ,* kajngó ma̱nindxúu̱n mbáwíi máꞌ xa̱bo̱ mangii̱n, xómá rí ikháánꞌ jamí ikhúúnꞌ. 12 Nákhí xtáá ga̱jma̱á nindxúu̱n ná numbaa ríge̱ꞌ, ikhúúnꞌ na̱ña̱wúu̱nlo̱ꞌ ga̱jma̱á ski̱ya̱a̱ꞌ tsí niraxníꞌ. Jamí nimbáa̱ tándáti̱ga̱a̱, rí i̱ndo̱ó máꞌ tsí wéje̱ máꞌ rí ma̱ndáti̱ga̱a̱, kajngó ma̱mba̱núu rí naꞌthán ná i̱yi̱i̱ꞌ ajngáaꞌ.

13 »Xúge̱ꞌ rí naka̱aꞌlo̱ꞌ ná xtaa ikháánꞌ rá. Na̱tha̱nlo̱ꞌ ríge̱ꞌ awúun rí xóó xtáálo̱ꞌ ná numbaa, kajngó phú gagi gájúwe̱e̱ꞌ xómá rí xtáá ikhúúnꞌ. 14 Ikhúúnꞌ ni̱thúu̱nlo̱ꞌ ajngáaꞌ, ikhaa numuu rúꞌkhue̱n tsíñúú xa̱bo̱ numbaa gúñúu̱, numuu rí ra̱ꞌkhá xa̱bi̱i numbaa ñajúu̱n, xómá rí ikhúúnꞌ ra̱ꞌkhá xa̱bi̱i numbaa ñajunꞌ. 15 Tsínda̱ꞌa̱a̱ꞌ máꞌ rí ma̱rawíi̱n ná numbaa ríge̱ꞌ, rí na̱nda̱ꞌa̱a̱ꞌ rí ma̱tia̱wúu̱n kajngó ma̱xáxkajmii̱ tsí ra̱májáan. 16 Ra̱ꞌkhá xa̱bi̱i numbaa ñajúu̱n ikhii̱n, xómá rí ikhúúnꞌ ra̱ꞌkhá xa̱bi̱i numbaa ñajunꞌ. 17 Athane̱ rí ga̱jma̱á majñu̱u̱ rí gakon ma̱ju̱wée̱ꞌ rí muni̱i̱ i̱ndo̱ó máꞌ ñajwaanꞌ ikháánꞌ. Ajngáaꞌ máꞌ ñajuun rí gakon. 18 Xómá rí ikháánꞌ nitaxúngu̱únꞌ rí ma̱ꞌkha ná numbaa, xkuaꞌnii máꞌ na̱xu̱ꞌmíi̱ mangúúnꞌ rí magóo̱ ná numbaa. 19 Ga̱jma̱á numúu̱ ikhii̱n ni̱xna̱xí-mina̱ꞌ rí ma̱ne̱ ñajwaanꞌ, kajngó ikhii̱n mangii̱n ma̱ju̱wée̱ꞌ rí muni̱i̱ i̱ndo̱ó máꞌ ñajwaanꞌ ikháánꞌ ga̱jma̱á majñu̱u̱ rí gakon.

20 »Tsítha̱n-jáñaaꞌ i̱ndo̱ó máꞌ ga̱jma̱á numúú tsíge̱ꞌ, rí na̱tha̱n-jáñaaꞌ máꞌ mangaa ga̱jma̱á numúú tsí ma̱nimbu̱únꞌ juyeꞌ ga̱jma̱á majñu̱u̱ ajngáa rí muthee̱n ikhii̱n, 21 kajngó mbá xúgíi̱n gánindxúu̱n mbáwíi máꞌ xa̱bo̱. Táa̱, xómá rí ikháánꞌ xtaa jayu ga̱jma̱á nindxu̱ꞌ jamí ikhúúnꞌ xtáá jayu ga̱jma̱á nindxa̱a̱ꞌ, athane̱ rí xkuaꞌnii máꞌ mbáwíi xa̱bo̱ gánindxúu̱n ikhii̱n ga̱jma̱á nindxa̱ꞌlóꞌ, kajngó ma̱nimbu̱únꞌ xa̱bo̱ numbaa rí ikháánꞌ nitaxúngu̱únꞌ. 22 Ikhúúnꞌ ne̱ne̱lo̱ꞌ rí mu̱dríguíi̱ ikhaa máꞌ gamaku rí ikháánꞌ nithane̱ rí ma̱gruígúlo̱ꞌ, kajngó mbáwíi máꞌ xa̱bo̱ gánindxúu̱n mangii̱n, xómá rí mbáwíi máꞌ xa̱bo̱ ñajwanlóꞌ ikháánꞌ jamí ikhúúnꞌ. 23 Ikhúúnꞌ xtáá jayu ga̱jma̱á nindxúu̱n ikhii̱n, jamí ikháánꞌ xtaa jayu ga̱jma̱á nindxu̱ꞌ ikhúúnꞌ, kajngó ma̱ꞌne káxe̱ rí mbáwíi xa̱bo̱ ñajúu̱n. Xkuaꞌnii kajngó mbuyáá xa̱bo̱ numbaa rí ikháánꞌ nitaxúngu̱únꞌ, jamí rí ikháánꞌ nandaaꞌ xtañúu̱ xómá rí nandaaꞌ xtayoꞌ ikhúúnꞌ.

24 »Táa̱, tsí niraxníꞌ nandoꞌ rí ma̱ju̱wée̱ꞌ ga̱jma̱á nindxu̱ꞌ ná ma̱xtáálo̱ꞌ, kajngó mbuyáa̱ rí phú mitsaan mbá xúgíí rí niraxnúꞌ, numuu rí nandaaꞌ xtayoꞌ asndo nákhí máꞌ xóó tágu̱ma-ku̱maa numbaa.

25 »Táa̱, ikháánꞌ ñajwaanꞌ tsí phú májáan. Maske máꞌ túne̱-nuwíín xa̱bo̱ numbaa, xómáꞌ ikhúúnꞌ na̱ne̱-núwíínlo̱ꞌ, xúꞌkhue̱n máꞌ xa̱bi̱ꞌ tsíge̱ꞌ mangiin nduyáa̱ rí ikháánꞌ nitaxúngu̱únꞌ. 26 Ikhúúnꞌ ni̱snga̱jmúu̱ tsáa ñajwaanꞌ, jamí ma̱snga̱jmúu̱ máꞌ xóó, kajngó ma̱gúu̱n jayu juya-mijnée̱ ikhii̱n xómá rí nandaaꞌ jayu xtayoꞌ ikháánꞌ, jamí ikhúúnꞌ ma̱xtáá jayu ga̱jma̱á nindxúu̱n ikhii̱n».