1 A̱ꞌkhue̱n Jesús nigájna̱a ná Kapernaúm, ni̱ke̱e̱ ná numbaa Judéa̱ jamí ná mbaa rí kri̱ga̱ ná i̱mba̱ mbíꞌthóo matha Jordán. A̱ꞌkhue̱n maphú mbaꞌiin xa̱bo̱ ni̱gi̱mbúun mbu̱júꞌ ná inuu Jesús, jamí mbu̱júꞌ máꞌ naꞌsngúu̱n xómá rí naꞌnii̱ jayu. 2 A̱ꞌkhue̱n ni̱xu̱ꞌma-mijná mbá tikhuun xa̱bo̱ fariséo̱ ná inuu Jesús, jamí ni̱ra̱xíi̱ xí ma̱goo rí maniña̱a a̱ꞌgui̱i xa̱biya̱. Rúꞌkhue̱n ni̱ra̱xíi̱ numuu rí nandúu̱n mbuyáa̱ dí gáꞌthée̱n. 3 Xómáꞌ ikhaa̱ niꞌthúu̱n:

—Dí lá ñajuun rí niꞌthán-ñájwanlaꞌ Moisés rá.

4 Xómáꞌ ikhii̱n nithee̱n:

—Moisés niꞌthán rí mbáa xa̱biya̱ ma̱goo ma̱ꞌne mbá i̱yi̱i̱ꞌ ná naꞌthán rí naniña̱a a̱ꞌgo̱, a̱ꞌkhue̱n rí xa̱biya̱ ma̱goo maniña̱a a̱ꞌgui̱i.

5 A̱ꞌkhue̱n niriꞌña Jesús:

—Moisés niꞌtháán xtángoo rúꞌkhue̱n numuu rí ikháanꞌlaꞌ phú gúkú a̱kia̱nꞌlaꞌ. 6 I̱ndo̱ó máꞌ numuu rí asndo nákhí ni̱gi̱ꞌdu̱u̱n-muu numbaa, «xa̱biya̱ jamí a̱ꞌgo̱ niꞌnii»* Ana̱ꞌlóꞌ. 7 «Ikhaa jngó xa̱biya̱ maniñuu tátée jamí nánée, rí ma̱mba̱xúu̱ ga̱jmáa̱ a̱ꞌguii̱, 8 jamí nájmii̱ ma̱nindxúu̱n i̱mba̱wíi xa̱bo̱».* Ikhaa jngó nákha máꞌ a̱jmii̱, rí i̱mba̱wíi xa̱bo̱ ñajúu̱n. 9 Ikhaa jngó, tsí ni̱ru̱wi̱in Ana̱ꞌlóꞌ, ra̱jáꞌyoo xa̱bo̱ numbaa rí ma̱ꞌne-wájíi̱n.

10 Ído̱ rí niguwáa̱n guꞌwáá, a̱ꞌkhue̱n tsí naꞌsngúu̱n ni̱ra̱xe̱ mangiin ga̱jma̱á numuu rí ni̱ra̱xe̱ xa̱bo̱ fariséo̱. 11 A̱ꞌkhue̱n niꞌthúu̱n: «Asndo tsáa xa̱biya̱ tsí naniña̱a a̱ꞌgui̱i jamí ndayáa i̱mba̱a̱ꞌ a̱ꞌgo̱, xa̱biya̱ tsúꞌkhue̱n naꞌne aꞌkhán inuu a̱ꞌgui̱i tsí ginii. 12 Xúꞌkhue̱n máꞌ xí a̱ꞌgo̱ naniña̱a a̱jmba̱a jamí ndayáa i̱mba̱a̱ꞌ xa̱biya̱, naꞌnii̱ aꞌkhán rí nabóo̱ ga̱jmáa̱».

13 A̱ꞌkhue̱n ni̱ꞌkha̱ jiꞌdiin mbá tikhuun e̱je̱n tsí lakiin ná inuu Jesús, kajngó maxkrámii̱ jamí ma̱ꞌne-tsakun-rámii̱. Xómáꞌ tsí naꞌsngúu̱n nu̱xprígúún xa̱bo̱ tsí naguwá judiin i̱ji̱ín. 14 Ído̱ ndiꞌyoo Jesús rí nuni̱i̱, a̱ꞌkhue̱n nijiꞌnáa̱ jamí niꞌthúu̱n: «Gu̱ni̱ꞌñúúlaꞌ e̱je̱n rí ma̱guwá ná inuꞌ, mu̱xúrikhúu̱nlaꞌ. Numuu rí Ana̱ꞌlóꞌ naꞌthán-ñájúún xa̱bo̱ tsí jaꞌñúú xómá ikhii̱n. 15 Na̱tha̱nꞌ-jmbalaꞌ rí xa̱bo̱ tsí na̱nguá iniña-mina̱ꞌ rí mi̱ꞌthán-ñájwíín gáꞌne Ana̱ꞌlóꞌ xómá eꞌne mbáa ada̱, ma̱xáxóo ma̱nindxu̱u̱ xa̱bo̱ tsí nithán-ñájwíín eꞌne Ana̱ꞌlóꞌ». 16 A̱ꞌkhue̱n nigo̱raꞌii̱n e̱je̱n, jamí neꞌne-tsakun-rámii̱ awúun máꞌ rí naxkrámii̱.

17 Ído̱ nagájna̱a máꞌ Jesús rí mbayáa jambo̱o̱ ma̱ꞌga, a̱ꞌkhue̱n ni̱ꞌkha̱-ragáyuu mbáa xa̱bo̱ gásmáti̱go̱o̱ ná inuu̱, jamí niraxu̱u̱:

—Táta̱ naꞌsngáá, tsáánꞌ phú májáán, dí jaꞌyoo ma̱ne̱ kajngó ma̱goo ma̱xtáá jámuu róꞌ.

18 A̱ꞌkhue̱n Jesús niꞌthúu̱n:

—Náá numuu kajngó narathán rí mújúún róꞌ. Asndo nimbáa xa̱bo̱ numbaa na̱nguá májáan, rí i̱ndo̱ó máꞌ mbáwíi tsí májáan, ikhaa ñajuun Ana̱ꞌlóꞌ. 19 Nathane̱-nuwiin máꞌ xtángawoo Ana̱ꞌlóꞌ: "Ma̱xátha̱ba̱a̱ꞌ ga̱jma̱a̱ꞌ xa̱bo̱ tsí tíya̱a̱, ma̱xáta̱xíya̱a̱ xa̱bo̱, ma̱xátha̱ne̱ ku̱ꞌwá, ma̱xátrígu ajngáa waꞌa tsu̱du̱u̱ xa̱bo̱, ma̱xátha̱ne̱-nduwa, jamí atiamakuíí tátiáaꞌ ga̱jma̱á nániáaꞌ".*

20 A̱ꞌkhue̱n rí xa̱bo̱ tsúꞌkhue̱n niꞌthán:

—Táta̱ naꞌsngáá, asndo nákhí máꞌ lájúún na̱ne̱-mbánuu mbá xúgíí rúꞌkhue̱n.

21 A̱ꞌkhue̱n Jesús niyaxu̱u̱, ndiyoo̱ jaꞌyoo̱, jamí niꞌthúu̱n:

—I̱mbo̱ó máꞌ rí ndaꞌyóo ma̱tha̱ne̱. Ayu gáta̱ngu̱jwa̱a mbá xúgíí rí xtaꞌdáá, jamí araxnúú mbúkha̱a̱ rúꞌkhue̱n xa̱bo̱ tsí ngíníi, a̱ꞌkhue̱n ma̱raꞌdáá rí phú gíꞌdoo numuu ná mikhuíí. Nda̱wa̱á a̱ꞌkhue̱n, aya̱ ga̱jma̱á nindxu̱ꞌ.*

22 Xómáꞌ ikhaa̱, ído̱ nidxawuu̱n rúꞌkhue̱n, mingíná neꞌne a̱kuii̱n ni̱kaa̱, numuu rí phú mbaꞌa rí gíꞌdoo̱.

23 A̱ꞌkhue̱n niyaxe̱ Jesús mbá nawa̱a̱, jamí niꞌthúu̱n tsí naꞌsngúu̱n: «¡Maphú mingíjyúu rí xa̱bo̱ tsí guáꞌdáá mi̱ndaꞌkho, ma̱nindxúu̱n xa̱bo̱ tsí nithán-ñájúún eꞌne Ana̱ꞌlóꞌ!». 24 Xómáꞌ tsí naꞌsngúu̱n maphú nimakúún ga̱jma̱á numuu ajngáa rí niꞌthée̱n. A̱ꞌkhue̱n niꞌthán mbu̱júu Jesús: «I̱ji̱nꞌ, ¡maphú mingíjyúu rí xa̱bo̱ tsí wéje̱ a̱kui̱ín ná inuu rí guáꞌdáá mi̱ndaꞌkho, ma̱nindxúu̱n xa̱bo̱ tsí nithán-ñájúún eꞌne Ana̱ꞌlóꞌ!* 25 Asndo i̱wa̱á máꞌ ma̱goo ma̱nújngoo mbáa kaméyo̱ ná iñúu itso̱ gúxa̱, xó rí mbáa xa̱bo̱ tsí gíꞌdoo mi̱ndaꞌkho, ma̱nindxu̱u̱ xa̱bo̱ tsí nithán-ñájwíín eꞌne Ana̱ꞌlóꞌ».

26 A̱ꞌkhue̱n ikhii̱n nimakúu̱n i̱tha̱án xóó, jamí nithan-mijnée̱:

—Xí xkuaꞌnii jaꞌnii, asndo nimbáa máꞌ xa̱bo̱ ma̱xájríya̱a̱ꞌ xúꞌkhue̱n róꞌ.

27 A̱ꞌkhue̱n Jesús niyaxúu̱n, jamí niꞌthúu̱n:

—Tsíꞌngu̱ún xa̱bo̱ numbaa gúne̱ rúꞌkhue̱n, xómáꞌ Ana̱ꞌlóꞌ na̱ꞌngo̱o̱ naꞌne ne̱, numuu rí Ana̱ꞌlóꞌ na̱ꞌngo̱o̱ naꞌne mbá xúgíí.

28 A̱ꞌkhue̱n Pédro̱ niꞌthúun Jesús:

—Táta̱, nathayáá máꞌ rí ikháanꞌxo̱ꞌ ni̱ni̱ꞌñáá mbá xúgíí, kajngó mu̱ꞌguáxo̱ꞌ ga̱jma̱á nindxa̱a̱ꞌ.

29 A̱ꞌkhue̱n niriꞌña Jesús:

—Na̱tha̱nꞌ-jmbalaꞌ rí ma̱xándáti̱go̱o̱ nitháan asndo tsáa tsí niniñuu guꞌwóo, o dxíyo̱o̱, o jñáguíi, o tátée, o nánée, o a̱ꞌgui̱i, o i̱ji̱in, o mbayuu mbo̱ꞌ, ga̱jma̱á numuꞌ ikhúúnꞌ jamí ga̱jma̱á numuu ajngáa máján. 30 Numuu rí ná numbaa máꞌ ríge̱ꞌ ma̱janáa̱ mbá witsu skíñú (100) mbaꞌa inuu mbámbá rúꞌkhue̱n: guꞌwá, dxíyo̱o̱, jñáguíi̱, nánée̱, i̱jii̱n, jamí mbaa, ga̱jma̱á máꞌ rí mbayamínu̱u̱ꞌ ga̱jma̱á numuꞌ. Jamí ná numbaa rí ni̱kú ma̱ꞌkha̱ rá, ma̱xtáa̱ mbá jámuu ga̱jma̱á nindxu̱u̱ Ana̱ꞌlóꞌ. 31 I̱ndo̱ó máꞌ numuu rí júwa̱ꞌ mbaꞌiin xa̱bo̱ tsí phú gíꞌdoo numúú xúge̱ꞌ, ikhiin tsúꞌkhue̱n ma̱xági̱ꞌdoo numúú ná jámuu. Jamí júwa̱ꞌ xa̱bo̱ tsí nda̱a̱ numúú xúge̱ꞌ, ikhiin tsúꞌkhue̱n phú ma̱gi̱ꞌdoo numúú ná jámuu.

32 Nagóo̱-ratsimúu̱ ná jamba̱a̱ rí na̱ka̱ ná Jerusalén, jamí ginii Jesús i̱ka̱. Xómáꞌ tsí naꞌsngúu̱n phú namakúún nagóó tsu̱du̱u̱, jamí tsí i̱ꞌwíin namíñúú naguwá ná tsu̱dúu̱n. A̱ꞌkhue̱n Jesús mbu̱júꞌ máꞌ nindxaꞌwúu̱n janíí tsí mbá gu̱wa̱ꞌ i̱jmi̱i (12), jamí nigíꞌdu̱u̱n niꞌthúu̱n rí ma̱gíꞌnuu̱. 33 Xáꞌnii niꞌthúu̱n: «Rí xúge̱ꞌ rá, nakualóꞌ ná Jerusalén, jamí A̱dée Xa̱bo̱ Numbaa mi̱xnáxi̱i̱ ná ñawúún dxakuun tsí gíꞌdoo numúú, jamí ná ñawúún xa̱bo̱ tsí nusngáá xtángoo. Ikhii̱n muthee̱n rí jaꞌyoo ma̱ja̱ñúu̱, jamí mu̱xna̱xíi̱ ná ñawúún xa̱bo̱ tsí ra̱ꞌkháa judío̱ ñajúún. 34 A̱ꞌkhue̱n mu̱ndu̱ꞌwa̱jmaa̱, mu̱xpa̱thíi̱n ga̱jma̱á ñuu xtá, mu̱ndu̱tájmaa̱ jamí mu̱xíya̱a̱. Xómáꞌ ikhaa̱ rá, mbayáa̱ mbiꞌyuu̱ ído̱ gárámuu atsú mbiꞌi».

35 A̱ꞌkhue̱n rí Santiágo̱ ga̱jma̱á Juáán, tsí i̱ji̱in Sebedéo̱, ni̱xu̱ꞌma-mijná ná inuu Jesús jamí nitháa̱n:

—Táta̱ naꞌsngáá, nandaxo̱ꞌ rí ma̱ra̱xna̱ꞌxo̱ꞌ rí mu̱nda̱ꞌa̱a̱ꞌxo̱ꞌ.

36 Xómáꞌ ikhaa̱ niraxúu̱n:

—Dí ñajuun iyalaꞌ rí ma̱ne̱ ga̱jma̱á numalaꞌ rá.

37 A̱ꞌkhue̱n ikhii̱n nitháa̱n:

—Araxnáxo̱ꞌ rí ma̱trigáanꞌxo̱ꞌ ga̱jma̱á nindxa̱a̱ꞌ ná phú tsímáá ma̱ra̱tha̱n-ñájun. Mbáa ma̱ge̱ꞌe̱ ná ñawún májáanꞌ, jamí i̱mba̱a̱ꞌ ma̱ge̱ꞌe̱ ná ñawún xti̱ya̱a̱ꞌ.

38 A̱ꞌkhue̱n Jesús niꞌthúu̱n:

—Ikháanꞌlaꞌ tsíya̱álaꞌ rí nu̱nda̱ꞌa̱laꞌ. Á ma̱ꞌnga̱ꞌlaꞌ mu̱wanlaꞌ rí miꞌkhu̱u̱n naña̱ꞌ ikhúúnꞌ rá dxe̱ꞌ. Á ma̱ꞌnga̱ꞌlaꞌ ma̱nújngalaꞌ ná awúun jamínu̱ꞌ xómá rí ma̱nújngoꞌ ikhúúnꞌ rá dxe̱ꞌ.

39 Xómáꞌ ikhii̱n nithee̱n:

—Aan, ma̱ꞌnga̱ꞌxo̱ꞌ.

A̱ꞌkhue̱n Jesús niꞌthúu̱n:

—Gakon máꞌ rí ikháanꞌlaꞌ mu̱wanlaꞌ rí miꞌkhu̱u̱n naña̱ꞌlo̱ꞌ, jamí ma̱nújngalaꞌ ná awúun jamínu̱ꞌ xómá rí ma̱nújngoꞌ ikhúúnꞌ. 40 Xómáꞌ ga̱jma̱á numuu rí ma̱trigáanꞌlaꞌ ná ñawún mújúnꞌ jamí ná ñawún xti̱yu̱ꞌ rá, ra̱jáꞌyoꞌ ikhúúnꞌ rí ma̱xna̱ꞌlaꞌ rúꞌkhue̱n. Numuu rí júwa̱ꞌ máꞌ tsí nimbánuu rí ma̱janúú rúꞌkhue̱n.

41 Ído̱ nidxawíín tsí i̱mbá gu̱wi̱inꞌ tsí naꞌsngúún Jesús ga̱jma̱á numuu rí ni̱nda̱ꞌa̱ a̱nguíi̱n, a̱ꞌkhue̱n ni̱gíꞌdíi̱n nijiꞌníi̱ juyáa̱ Santiágo̱ ga̱jma̱á Juáán. 42 A̱ꞌkhue̱n Jesús nindxaꞌwúu̱n jamí niꞌthúu̱n: «Ndu̱ya̱á máꞌ ikháanꞌlaꞌ rí xa̱bo̱ tsí nuthan-ñajun ná numbaa ríge̱ꞌ, nuxna-ñajúu̱n xa̱bo̱ xómá rí naꞌne a̱kuíi̱n ikhii̱n. Jamí xa̱bo̱ tsí guáꞌdáá tsiakhe̱, nikhuáa ithan-ñajúu̱n xa̱bo̱ xuajen. 43 I̱ndo̱ó máꞌ numuu rí ná majña̱ꞌ ikháanꞌlaꞌ ma̱xáꞌne xkuaꞌnii. A̱ꞌkhue̱n gakon, tsí nandoo ma̱gi̱ꞌdoo numuu ná majña̱ꞌlaꞌ, ikhaa̱ ma̱ꞌne-mba̱ꞌwáa̱nꞌlaꞌ. 44 Jamí tsí nandoo ma̱nindxu̱u̱ xa̱bo̱ ginii ná majña̱ꞌ ikháanꞌlaꞌ, ikhaa̱ ma̱nindxu̱u̱ yumbáá waꞌtsi̱i̱ drígu̱ún mbá xúgíin. 45 Numuu rí A̱dée Xa̱bo̱ Numbaa táꞌkhe̱e̱ rí ma̱gu̱ma-mba̱a̱, rí ni̱ꞌkhe̱e̱ ma̱ꞌne-mba̱ꞌwuu̱n xa̱bo̱. Xúꞌkhue̱n máꞌ ni̱ꞌkhe̱e̱ rí maxnáxe̱-mine̱e̱ꞌ rí ma̱ja̱ñúu̱, kajngó ma̱jáwíin mbaꞌiin xa̱bo̱».

46 Nda̱wa̱á a̱ꞌkhue̱n niguáꞌníi̱ ná Jerikó. Ído̱ nagájna̱a Jesús ná Jerikó gajmíí tsí naꞌsngúún, jamí phú mbaꞌiin xa̱bo̱ nagóó tsu̱du̱u̱, mbáa xa̱bo̱ tsí tsífrigo̱o̱ꞌ, mbiꞌyuu Bartiméo̱, a̱dée Timéo̱, ꞌgí ná rawuun jamba̱a̱ na̱nda̱ꞌa̱-mínu̱u̱ꞌ. 47 Ído̱ nidxawuu̱n rí Jesús tsí na̱ꞌkha̱ ná Nasarét na̱ka̱-ranújngoo, a̱ꞌkhue̱n nigíꞌdu̱u̱n nindxaꞌwée̱ gakhe̱: «¡Jesús, A̱dée Dabíd, ga̱ñáwíin a̱kia̱anꞌ xtayoꞌ!».

48 Jamí mbaꞌiin xa̱bo̱ nu̱xpríguíi̱ kajngó ma̱ꞌne-wíyuu rawuu̱n. Xómáꞌ ikhaa̱ i̱tha̱án gakhe̱ indxaꞌwée̱: «¡A̱dée Dabíd, ga̱ñáwíin a̱kia̱anꞌ xtayoꞌ!».

49 A̱ꞌkhue̱n Jesús ni̱we̱je̱-wíyuu, niꞌthée̱n rí ma̱ꞌkha̱* xa̱bo̱. A̱ꞌkhue̱n ni̱ndxa̱ꞌwáa̱ tsí tsífrigo̱o̱ꞌ, jamí nitháa̱n: «¡Araxná-mina̱ꞌ tsiakhe̱! Araxo̱n mu̱ꞌgua̱lóꞌ, numuu rí nandxaꞌwáaꞌ Táta̱». 50 A̱ꞌkhue̱n ikhaa̱ nidee̱ xtátsii̱n rí jambráꞌaa̱, jamí ni̱tu̱xu̱u̱ꞌ ni̱ke̱e̱ inuu Jesús. 51 A̱ꞌkhue̱n Jesús niraxu̱u̱:

—Dí ñajuun iyaaꞌ rí ma̱ne̱ ga̱jma̱á numaaꞌ rá.

Xómáꞌ tsí tsífrigo̱o̱ꞌ niꞌthán:

—Táta̱ naꞌsngáá, nandoꞌ rí ma̱frigo̱ꞌ mbu̱júꞌ.

52 Xómáꞌ Jesús niꞌthúu̱n:

—Ma̱goo máꞌ mi̱dxu̱uꞌ rá. Niꞌni̱i idaaꞌ numuu rí nanimba̱a̱ꞌ xtayoꞌ.

A̱ꞌkhue̱n núkho̱ máꞌ ndiyoo niyaxi̱i̱, jamí na̱ke̱e̱ tsu̱du̱u̱ Jesús ná jamba̱a̱ rí na̱ka̱.