1 A̱ꞌkhue̱n rí xa̱bo̱ fariséo̱ jamí mbá tikhuun xa̱bo̱ tsí nusngáá xtángoo, tsí niguwá ná Jerusalén, ni̱xu̱ꞌma-mijná ná inuu Jesús. 2 Ikhiin xa̱bo̱ tsúꞌkhue̱n ndiyáá rí mbá tikhuun tsí naꞌsngúún Jesús túni̱i̱ xómá nune̱ jañúu̱ ikhii̱n, rí nujñáa̱ ñawúu̱n ído̱ rí napiꞌtsii̱, rúꞌkhue̱n kajngó nuthee̱n rí ra̱máján ini̱i̱.* 3 (Numuu rí tsí xa̱bo̱ fariséo̱ jamí mbá xúgíin xa̱bo̱ judío̱, tsíni̱ꞌñáa̱ rí nuni̱i̱ rí nene̱ táta̱-xi̱ꞌñúu̱ wajyúú, rí tsípiꞌtsii̱ xí tsíjñáa̱ mújúu̱n ñawúu̱n. 4 Jamí xí naguwáa̱n ná xuáá, tsípiꞌtsii̱ xí tsíjñáa̱ ñawúu̱n. Jamí ríga̱ mbaꞌa i̱ꞌwá rí niꞌgí-mijnée̱ rí mune̱-mbáníi̱, xó rí jaꞌyoo ma̱gaꞌwu̱u xu̱wa̱á rí naꞌwa̱a̱n ga̱jma̱á iya, daan tsígo̱ꞌ ná najno̱ꞌ iya, daan ajwa̱nꞌ, jamí xi̱yoo rí traꞌa̱ guꞌwáá). 5 Ikhaa jngó xa̱bo̱ fariséo̱ gajmíí xa̱bo̱ tsí nusngáá xtángoo ni̱ra̱xíi̱ Jesús:

―Náá numuu kajngó tsí narasngúún ikháánꞌ na̱nguá ijñáa ñawúún ído̱ rí napeꞌtso, xómá nene̱ jañúú táta̱-xi̱ꞌñálóꞌ wajyúú róꞌ.

6 A̱ꞌkhue̱n niriꞌña Jesús:

―¡Xa̱bo̱ tsí a̱jma̱ inúú ñajwanlaꞌ! Phú gakon rí niꞌthán ga̱jma̱á numalaꞌ Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

"Xa̱bo̱ xuajen ríge̱ꞌ i̱ndo̱ó máꞌ ga̱jma̱á rawúu̱n nune̱-mbúu̱n,

xómáꞌ a̱kuíi̱n, tsíngua̱ꞌ ríga̱ ne̱ ná inuꞌ.

7 Nda̱a̱ máꞌ numuu rí nune̱-mbúu̱n,

numuu rí xtángoo rí nusngáa̱,

i̱ndo̱ó máꞌ xtángawúún xa̱bo̱ numbaa ñajuun ne̱".*

8 Numuu rí ni̱ni̱ꞌñáálaꞌ xtángawoo Ana̱ꞌlóꞌ, jamí tsíni̱ꞌñáá nu̱ne̱laꞌ rí nune̱ jañúú xa̱bo̱ numbaa: xó rí jaꞌyoo ma̱gaꞌwu̱u daan tsígo̱ꞌ jamí xu̱wa̱á rí nawanlaꞌ ga̱jma̱á iya. Jamí ríga̱ mbaꞌa i̱ꞌwá rí xkuaꞌnii máꞌ nu̱ne̱laꞌ.

9 Niꞌthúu̱n mangaa:

―Máján ni̱ma̱ñalaꞌ xáne mu̱ne̱laꞌ rí ma̱xági̱ꞌdoo numuu xtángawoo Ana̱ꞌlóꞌ, kajngó i̱wa̱á ma̱gi̱ꞌdoo numuu rí nu̱ne̱laꞌ jayu. 10 Numuu rí xáꞌnii niꞌthán Moisés: "Atiamakuíí tátiáaꞌ ga̱jma̱á nániáaꞌ".* Jamí xáꞌnii mangaa: "Tsí maxná-máꞌáan anu̱u̱ o nánée, jaꞌyoo rí ma̱ja̱ñúu̱".* 11 Xómáꞌ ikháanꞌlaꞌ nu̱sngáálaꞌ rí mbáa xa̱bo̱ ma̱goo maꞌthúun tátée o nánée xáꞌnii: "Ma̱xáxóo ma̱mbáyáaꞌlo̱ꞌ, numuu rí mbá xúgíí rí gúꞌdo̱ꞌ rí ma̱goo ma̱mbáyáaꞌ ga̱jma̱á ñajuun korbán" (rí nandoo gáꞌthán: «kixnáxe̱ ná inuu Ana̱ꞌlóꞌ»). 12 Ikhaa jngó tsíni̱ꞌñáálaꞌ xa̱bo̱ tsúꞌkhue̱n rí mambáyúu tátée o nánée mbo̱ꞌ. 13 Xkuaꞌnii nu̱ne̱laꞌ rí ma̱xági̱ꞌdoo numuu ajngóo Ana̱ꞌlóꞌ, numuu rí nu̱sngáálaꞌ rí ma̱gu̱ma rí nu̱ne̱laꞌ jayu máꞌ. Jamí ríga̱ mbaꞌa i̱ꞌwá rí xkuaꞌnii máꞌ nu̱ne̱laꞌ.

14 A̱ꞌkhue̱n Jesús nindxaꞌwúún mbá xúgíin xa̱bo̱ tsí phú mbaꞌiin, jamí niꞌthúu̱n: «Gu̱dxawíínlaꞌ mbá xúgiáanꞌlaꞌ, jamí ga̱fraꞌa̱ꞌlaꞌ rí ma̱tha̱nꞌlaꞌ. 15 Nda̱a̱ nimbá rí me̱kho̱ xa̱bo̱ rí ma̱ꞌne miꞌsmbaa̱. Xómáꞌ rí nagájnuu ná awúun a̱kui̱in xa̱bo̱, rúꞌkhue̱n ñajuun rí naꞌne miꞌsmbaa̱. 16 Xí mbáa gíꞌdoo ñaꞌwuun rí madxawuun, gadxawuu̱n».*

17 Ído̱ Jesús niniñúú xa̱bo̱ tsí phú mbaꞌiin, ni̱ta̱ꞌaa̱ guꞌwáá, a̱ꞌkhue̱n tsí naꞌsngúu̱n ni̱ra̱xíi̱ ga̱jma̱á numuu ajngáa xkri̱da. 18 Xómáꞌ ikhaa̱ niꞌthúu̱n: «Á tsífraꞌa̱ꞌlaꞌ mangáanꞌlaꞌ dxe̱ꞌ. Á tsífraꞌa̱ꞌlaꞌ rí mbá xúgíí rí naꞌkho̱ xa̱bo̱, tsíꞌne miꞌsmbaa̱ eꞌne ne̱ dxe̱ꞌ. 19 Numuu rí tsíjngúun ne̱ ná awúun a̱kui̱in xa̱bo̱, rí ná awúun xa̱bo̱ najngúun ne̱, jamí nda̱wa̱á nagájna̱a ne̱ ná xuyuu̱». Ajngáa ríge̱ꞌ niꞌthán Jesús kajngó ma̱fruꞌúu̱n rí mbá xúgíí máꞌ ganitsu jaꞌwu ne̱ ná inuu Ana̱ꞌlóꞌ.

20 Jamí niꞌthée̱n mangaa: «Rí nagájnuu awúún, rúꞌkhue̱n ñajuun rí naꞌne miꞌsmbaa xa̱bo̱. 21 Ikhín nagájnuu mbá xúgíí rí xkawe̱ꞌ nu̱ndxa̱ꞌwa̱-mijnée̱: rí nubúu̱n gajmíi̱ xa̱bo̱ tsí túya̱a̱, rí nu̱radíi̱n xa̱bo̱, 22 rí nune̱-ku̱ꞌwée̱, rí na̱ni̱gúu̱nꞌ ma̱guáꞌdáa̱ mi̱ndaꞌkho, rí nuni̱i̱ rí xkawe̱ꞌ, rí nune̱-nduwee̱, rí na̱wa̱ꞌa̱ a̱kuíi̱n rí muni̱i̱ aꞌkhán, rí naxígúu̱n, rí nuxna-maꞌíi̱n xa̱bo̱, rí nu̱xu̱xí-mijnée̱, jamí rí tsíndxa̱ꞌwa̱-mijnée̱ mújúu̱n. 23 Mbá xúgíí rí xkawe̱ꞌ rúꞌkhue̱n, ná awúun a̱kui̱ín xa̱bo̱ nagájnuu ne̱, jamí ikhaa máꞌ rúꞌkhue̱n ñajuun rí naꞌne miꞌsmbii̱n».

24 Nda̱wa̱á, Jesús nigájnuu ná numbaa Galiléa̱, ni̱ke̱e̱ ná numbaa naꞌwáán, ná ꞌgí Tíro̱ ga̱jma̱á Sidón.* A̱ꞌkhue̱n ni̱to̱ꞌo̱o̱ awúun mbá guꞌwá, jamí asndo nimbáa xa̱bo̱ tsíyoo̱ rí madxawuun náá xtáa̱. I̱ndo̱ó máꞌ numuu rí ra̱khóo gárkaꞌu-mine̱e̱ꞌ. 25 Numuu rí mbá nacha̱ máꞌ nidxawuun nánée mbáa dxáꞌgú tsí gíꞌdaa gíñá ꞌguéen ga̱jma̱á numuu Jesús, a̱ꞌkhue̱n nána̱ tsúꞌkhue̱n ni̱ꞌkha̱ gásmáti̱go̱o̱ ná wéje̱ Jesús. 26 (A̱ꞌgo̱ tsíge̱ꞌ ñajuun xa̱bo̱ i̱mba̱ xuajen, numuu rí ná Sirofenísia̱ ni̱gu̱maa̱.) A̱ꞌkhue̱n niꞌthán-jáñuu̱ Jesús rí maxkriya̱a̱ꞌ gíñá ꞌguéen tsí gíꞌdaa a̱dée̱. 27 Xómáꞌ Jesús niꞌthúu̱n:

―Atatsíñáá rí mu̱peꞌtso ma̱gi̱ꞌmúú e̱je̱n tsí guꞌwáá ginii, numuu ra̱máján rí ma̱ga̱ta-jáꞌñúu̱ gaꞌwúu̱n kajngó mi̱ꞌda ne̱ ná inúú xu̱wánꞌ mu̱pho̱.

28 A̱ꞌkhue̱n niriꞌñee̱ ikhaa̱:

―Gakon máꞌ rí xkuaꞌnii jaꞌnii, Táta̱. I̱ndo̱ó máꞌ numuu rí asndo xu̱wánꞌ naꞌpho̱ i̱ꞌñúu guma rí nafrigu ene̱ e̱je̱n, ná agoo xapa nakhú ná napeꞌtso-rámúu̱.

29 A̱ꞌkhue̱n Jesús niꞌthúun a̱ꞌgo̱:

―Ga̱jma̱á numuu ajngáa rí nirathán, ma̱goo máꞌ mi̱dxu̱uꞌ rá, numuu rí nigájna̱a máꞌ gíñá ꞌguéen tsí ni̱gi̱ꞌdaa a̱ꞌdiáaꞌ.

30 Ído̱ ni̱ga̱núu̱ ná guꞌwóo̱, a̱ꞌkhue̱n ndiꞌyoo̱ rí jabóo a̱dée̱ ná xi̱yoo, jamí nigájna̱a máꞌ gíñá ꞌguéen ná xuyuu̱.

31 A̱ꞌkhue̱n nigájna̱a Jesús ná numbaa Tíro̱, ni̱ke̱e̱ ná numbaa Sidón, jamí ná numbaa Dekápo̱li̱s, xkuaꞌnii asndo ni̱ga̱níi̱ ná ñañuu a̱pha̱ rí mbiꞌyuu Galiléa̱. 32 Ikhín niguáꞌnú xa̱bo̱ ná inuu̱, gajmíi̱ mbáa xa̱bo̱ tsí tsíꞌdxuun jamí tsíꞌthán mújúun. A̱ꞌkhue̱n nithán-jáñíi̱ rí maxkrámaa̱. 33 Xómáꞌ Jesús niríya̱a̱ꞌ janíí ná inúú xa̱bo̱, a̱ꞌkhue̱n nixudaa̱ a̱dée ñawúu̱n ná ñaꞌwuun xa̱bo̱ tsúꞌkhue̱n, xúꞌkhue̱n máꞌ nixkajmee̱ ra̱ju̱u̱n ga̱jma̱á iyandawoo̱. 34 A̱ꞌkhue̱n niraꞌée̱n mikhuíí, jamí mba̱a̱ niꞌgíi̱ xe̱ꞌ, a̱ꞌkhue̱n niꞌthúu̱n: «Efatá», (rí nandoo gáꞌthán «¡Ga̱mba̱ꞌtháán rá!»).

35 Núkho̱ máꞌ ni̱ma̱ꞌthoo ñaꞌwuu̱n, xúꞌkhue̱n máꞌ nikhúu ra̱ju̱u̱n, jamí nandxákuu̱n mújúu̱n. 36 A̱ꞌkhue̱n Jesús nixná-ngáwúún xa̱bo̱ rí mu̱xúthan asndo nimbá rí niríga̱. I̱ndo̱ó máꞌ numuu rí ído̱ naꞌthúu̱n xa̱bo̱ rí mu̱xúthan, a̱ꞌkhue̱n gakon i̱tha̱án máꞌ nuthee̱n a̱pha̱ ga̱jma̱á numuu̱. 37 Ninújngoo namakúún xa̱bo̱ iꞌnii̱, jamí nuthee̱n: «Mbá xúgíí rí naꞌne xa̱bo̱ tsíge̱ꞌ maphú máján. Asndo naꞌnii̱ rí mu̱dxawíín tsí tsídxawíín, xúꞌkhue̱n máꞌ rí muthan tsí tsíthan».