1 I̱mba̱ miꞌtsú, phú mbaꞌiin xa̱bo̱ ni̱gi̱mbúun mbu̱júꞌ, jamí na̱nguá judee̱ rí mu̱phi̱i̱. A̱ꞌkhue̱n Jesús nindxaꞌwúún tsí naꞌsngúún, jamí niꞌthúu̱n:

2 ―Nañáwíin a̱kui̱nꞌ ja̱ñu̱ú xa̱bo̱ tsíge̱ꞌ, numuu rí naꞌne máꞌ atsú mbiꞌi rí júwe̱e̱ꞌ ga̱jma̱á nindxu̱ꞌ, jamí na̱nguá judee̱ rí mu̱phi̱i̱. 3 Jamí xí ma̱xu̱ꞌmíi̱ magúu̱n guꞌwúu̱n rí na̱xki̱dxúu̱n, ma̱jámíndúu̱n ná jamba̱a̱ gáꞌne, numuu rí mbá tikhuun naguwá tsíngua̱ꞌ.

4 Xómáꞌ tsí naꞌsngúu̱n ni̱riꞌñáa̱:

―Náá lá gáꞌkha̱ ná mbaa niníí ge̱jyoꞌ rí mu̱pho̱ xa̱bo̱ tsíge̱ꞌ asndo ma̱gi̱ꞌmúú rá.

5 Xómáꞌ ikhaa̱ niraxúu̱n:

―Wátha̱ guma ju̱dalaꞌ rá.

Xómáꞌ ikhii̱n nithee̱n:

―Mbá juwan ne̱.

6 A̱ꞌkhue̱n Jesús nixná-ñájúún mbá xúgíin xa̱bo̱ rí ma̱trigi̱in mbayíí. A̱ꞌkhue̱n niguatuu̱n rí mbá juwan guma, jamí niríguu̱ la gamaku inuu Ana̱ꞌlóꞌ ga̱jma̱á numuu ne̱. A̱ꞌkhue̱n nixpíꞌthá-makoo̱ ne̱, jamí nixnúu̱ ne̱ tsí naꞌsngúu̱n. Xómáꞌ ikhii̱n nixna-raꞌee̱ ne̱ ná inúú mbá xúgíin xa̱bo̱ kajngó mu̱pho̱. 7 Jamí judii̱n mbá wáthi̱in wáa i̱gi̱ꞌ tsí makiin mangaa. Niríguu̱ la gamaku inuu Ana̱ꞌlóꞌ ga̱jma̱á numúu̱, jamí nixná-ñájwii̱n rí ma̱wiꞌthá-raꞌiin ná inúú xa̱bo̱. 8 A̱ꞌkhue̱n rí mbá xúgíin xa̱bo̱ nipeꞌtso asndo ni̱gi̱ꞌmúú. Nda̱wa̱á a̱ꞌkhue̱n ni̱raxii̱ mbá juwan ixtu xkuꞌxí rí nipíduun. 9 Xómáꞌ tsí nipeꞌtso naꞌne xó mbá akho̱ míl (4 000) wáa xa̱bo̱ ñajúu̱n. A̱ꞌkhue̱n Jesús niꞌthán-ngawúu̱n rí magúu̱n. 10 A̱ꞌkhue̱n nitsimuu Jesús gajmíí tsí naꞌsngúún ná awúun ixe̱-rguwa rí na̱ka̱ inuu iya, jamí ni̱ke̱e̱ ná numbaa Dalmanúta̱.

11 A̱ꞌkhue̱n niguáꞌnú xa̱bo̱ fariséo̱ inuu Jesús jamí ni̱tsa̱ñúu̱ ga̱jma̱á nindxu̱u̱. Numuu rí nandúu̱n mbuyáa̱ xí gakon rí Ana̱ꞌlóꞌ nixuꞌmaa̱, ikhaa jngó ni̱nda̱ꞌáa̱ rí ma̱ꞌnii̱ mbá rí phú wáá. 12 Xómáꞌ Jesús phú mba̱a̱ niꞌgíi̱ xe̱ꞌ, a̱ꞌkhue̱n niꞌthée̱n: «Náá numuu kajngó xa̱bo̱ tsí júwa̱ꞌ mbiꞌi ríge̱ꞌ nu̱nda̱ꞌa̱ rí mbuyáá mbá rí phú wáá róꞌ. Na̱tha̱nꞌ-jmbalaꞌ rí ma̱xájanúu̱ mbuyáa̱ nimbá rí phú wáá». 13 A̱ꞌkhue̱n niniñúu̱ xa̱bo̱ tsúꞌkhue̱n, jamí nitsimaa̱ ná awúun ixe̱-rguwa rí na̱ka̱ ná inuu iya, ni̱ke̱e̱ ná i̱mba̱ kri̱doo iya.

14 Xómáꞌ tsí naꞌsngúún Jesús nimbumúú gúda guma rí mu̱pho̱. I̱mbo̱ó xáꞌnii guma juye̱e̱ ná awúun ixe̱-rguwa. 15 Xómáꞌ Jesús niꞌthúu̱n xáꞌnii: «Xawi lá gúne̱laꞌ, jamí gu̱ña̱wa̱n-mijnálaꞌ inuu ñu̱u̱ miga̱ꞌ drígu̱ún xa̱bo̱ fariséo̱, jamí ñu̱u̱ miga̱ꞌ drígo̱o̱ Eróde̱s».

16 A̱ꞌkhue̱n tsí naꞌsngúu̱n ni̱gíꞌdi̱ín nithan-mijná: «Naꞌthánlóꞌ rúꞌkhue̱n numuu rí na̱nguá juꞌdalóꞌ guma». 17 Ído̱ ndiꞌyoo Jesús rí xkuaꞌnii nuthan-mijnée̱, a̱ꞌkhue̱n niꞌthúu̱n:

―Náá numuu kajngó nu̱tha̱nlaꞌ rí na̱nguá guáꞌdáálaꞌ guma róꞌ. Á xóó tsíya̱álaꞌ jamí tsífraꞌa̱ꞌlaꞌ májánlaꞌ dxe̱ꞌ. Á xóó phú gúkú a̱kia̱nꞌlaꞌ rá. 18 "Guáꞌdáá idalaꞌ jamí tsífriga̱ꞌlaꞌ ráanꞌ. Guáꞌdáá ñaꞌwanlaꞌ jamí tsídxawíínlaꞌ ráanꞌ". Jamí xóó tsírmáꞌáan a̱kia̱nꞌlaꞌ ráanꞌ. 19 Ído̱ ni̱xpíꞌtháa witsu guma rí niꞌpho̱ mbá witsu míl (5 000) xa̱bo̱, wátha̱ ixtu gatíí xkuꞌxí rí nipíduun ni̱raxi̱ilaꞌ nákhí xúꞌkhue̱n rá.

Xómáꞌ ikhii̱n nithee̱n:

―Mbá gu̱wa̱ꞌ i̱jma̱ (12) ixtu.

20 ―Jamí ído̱ ni̱xpíꞌtháa mbá juwan guma rí niꞌpho̱ mbá akho̱ míl (4 000) xa̱bo̱ rá. Wátha̱ ixtu gatíí xkuꞌxí rí nipíduun ni̱raxi̱ilaꞌ nákhí xúꞌkhue̱n rá.

Xómáꞌ ikhii̱n nithee̱n:

―Mbá juwan ixtu.

21 A̱ꞌkhue̱n niꞌthúu̱n:

―Xáne jaꞌnii rí xóó tsífraꞌa̱ꞌlaꞌ xúꞌkhue̱n rá.

22 Nda̱wa̱á a̱ꞌkhue̱n niguáꞌníi̱ ná Betsáida̱. A̱ꞌkhue̱n niguwá xa̱bo̱ juya̱a̱ mbáa xa̱bo̱ tsí tsífrigo̱o̱ꞌ ná inuu Jesús, jamí nithán-jáñíi̱ rí maxkrámaa̱. 23 A̱ꞌkhue̱n Jesús niguatuun ñawúun xa̱bo̱ tsí tsífrigo̱o̱ꞌ, ni̱ka̱ jayáa̱ ná rawuun xuajen. Jamí ikhín nindútée̱ ná iduu, nixkrámaa̱ ga̱jma̱á ñawúu̱n, jamí niraxu̱u̱:

―Á nandoo nathayáá wáa rá.

24 Xómáꞌ ikhaa̱ niyaxi̱i̱ jamí niꞌthée̱n:

―Nda̱ñu̱úlo̱ꞌ xa̱bo̱, xómá ixe̱ jaꞌñúu̱. I̱ndo̱ó máꞌ numuu rí nda̱yo̱o̱ rí ngrigúu̱n.

25 Nda̱wa̱á a̱ꞌkhue̱n nixkajmee̱ mbu̱júꞌ iduu. A̱ꞌkhue̱n rí xa̱bo̱ tsúꞌkhue̱n ni̱ma̱ꞌtha̱a mújúun iduu, jamí niꞌni̱i ne̱ mbá jayu. Nandoo máꞌ ndaꞌyoo̱ mbá jaꞌwu mbá xúgíí. 26 A̱ꞌkhue̱n Jesús nixuꞌmaa̱ ma̱ꞌgaa̱ ná guꞌwóo̱, jamí niꞌthúu̱n:

―Ma̱xánújnga̱aꞌ ná xuajen, ni máꞌ ma̱xára̱tha̱án ríge̱ꞌ asndo nimbáa xa̱bo̱ ná xuajen.*

27 Nda̱wa̱á a̱ꞌkhue̱n, nigájnuu Jesús ni̱ka̱ gajmíí tsí naꞌsngúún ná triga̱ xuajen laka ná numbaa Sesaréa̱ drígo̱o̱ Filípo̱. Awúun máꞌ rí nagóo̱ ná jamba̱a̱ niraxúu̱n tsí naꞌsngúu̱n:

―Tsáa ñajunꞌ ithan xa̱bo̱ i̱ya̱álaꞌ rá.

28 Xómáꞌ ikhii̱n ni̱riꞌñee̱:

―Mbá tikhuun nuthan rí Juáán tsí nixúꞌdu-maꞌíin xa̱bo̱ ná awúun iya ñajwaanꞌ. I̱ꞌwíin nuthan rí Elía̱s ñajwaanꞌ. Jamí i̱ꞌwíin nuthan rí mbáa tsí ni̱gu̱wíjnga̱a ajngóo Ana̱ꞌlóꞌ wajyúú ñajwaanꞌ.

29 A̱ꞌkhue̱n Jesús niraxúu̱n:

―Xómáꞌ ikháanꞌlaꞌ, tsáa ñajunꞌ i̱tha̱n ikháanꞌlaꞌ rá.

A̱ꞌkhue̱n niriꞌña Pédro̱:

―Ikháánꞌ ñajwaanꞌ Krísto̱.

30 Xómáꞌ ikhaa̱ nixná-ñájúu̱n tsí naꞌsngúu̱n rí mu̱xútháa̱n asndo nimbáa xa̱bo̱ tsáa ñajuu̱n ikhaa̱.

31 A̱ꞌkhue̱n nigíꞌdu̱u̱n niꞌsngúu̱n: «Maphú ndaꞌyóo rí A̱dée Xa̱bo̱ Numbaa ma̱nújngoo awúun mbaꞌa jamínu̱ꞌ. Ma̱xáxúún gúyáa̱ xa̱bo̱ buanuu gajmíí dxakuun tsí gíꞌdoo numúú jamí xa̱bo̱ tsí nusngáá xtángoo. Mu̱xi̱ya̱a̱, jamí nda̱wa̱á mbayáa̱ mbiꞌyuu̱ ído̱ gárámuu atsú mbiꞌi». 32 Mbá jaꞌwu jayu niꞌthán Jesús ajngáa ríge̱ꞌ. A̱ꞌkhue̱n rí Pédro̱ ni̱ka̱ jayáa̱ janíí jamí nigíꞌdu̱u̱n nixprígúu̱ numuu rí niꞌthée̱n ajngáa rúꞌkhue̱n. 33 Xómáꞌ Jesús, nitangayii jamí niyaxúu̱n tsí naꞌsngúu̱n, a̱ꞌkhue̱n nixprígúu̱ Pédro̱. Xáꞌnii niꞌthúu̱n: «¡Araxo̱n janíí ná inuꞌ, ikháánꞌ Satanás! Numuu rí tsítandxaꞌwá-mina̱ꞌ ga̱jma̱á numuu rí nandoo Ana̱ꞌlóꞌ, rí natandxaꞌwá-mina̱ꞌ i̱ndo̱ó máꞌ rí nandúún xa̱bo̱ numbaa».

34 A̱ꞌkhue̱n nindxaꞌwúu̱n mbá xúgíin xa̱bo̱ jamí tsí naꞌsngúu̱n, a̱ꞌkhue̱n niꞌthúu̱n: «Xí xtáa mbáa tsí nandoo gáꞌkha̱ tsu̱du̱ꞌ, ga̱mbumuu̱ jaꞌya-mine̱e̱ꞌ. Ga̱ꞌngo̱o̱ a̱kuii̱n rí mamínu̱u̱ꞌ jamí asndo rí ma̱ja̱ñúu̱ ga̱jma̱á numuꞌ, jamí ga̱ꞌkhe̱e̱ tsu̱du̱ꞌ xúꞌkhue̱n rá. 35 Numuu rí jámba̱a̱ tsí nandoo gáꞌne-jríya̱a̱ꞌ mbiꞌyuu, ma̱ndáti̱go̱o̱ ne̱. Jamí jámba̱a̱ tsí nandáti̱go̱o̱ mbiꞌyuu ga̱jma̱á numuꞌ ikhúúnꞌ jamí ga̱jma̱á numuu ajngáa máján, tsúꞌkhue̱n tsí ma̱jríya̱a̱ꞌ. 36 Náá lá rí gámbáyúu mbáa xa̱bo̱ rí ma̱janáá mbá xúgíí rí ríga̱ ná tsu̱du̱u̱ numbaa, xí ma̱ndáti̱ga̱ nímii̱ rá. 37 Wátha̱ lá jaꞌyoo ma̱ꞌne-numa xa̱bo̱ kajngó mbayáa ními̱i rá.

38 »Mbiꞌi xúge̱ꞌ júwa̱ꞌ xa̱bo̱ tsí na̱nguá jmbiin jamí nuni̱i̱ máꞌ xúꞌkhue̱n aꞌkhán. Xí xtáa mbáa xa̱bo̱ tsí na̱ti̱yu̱u̱ꞌ e̱ne̱lo̱ꞌ jamí na̱ti̱yu̱u̱ꞌ ga̱jma̱á numuu rí na̱sngáá ná inúú xa̱bo̱ tsúꞌkhue̱n, A̱dée Xa̱bo̱ Numbaa ma̱ti̱yu̱u̱ꞌ mangaa̱ gáꞌne xa̱bo̱ tsúꞌkhue̱n ído̱ ma̱thangaa̱ ga̱jma̱á ski̱yu̱u̱ꞌ Anu̱u̱ gajmíí ánje̱l drígo̱o̱ Ana̱ꞌlóꞌ».