Marcos 11

Jesús naxná-máꞌáan ixu̱u̱ ígo̱ rí nda̱a̱ xndúu

12 Jamí i̱mba̱ mbiꞌi, ído̱ nagájnáa̱ ná Betánia̱, a̱ꞌkhue̱n ni̱xki̱dxu̱u̱ Jesús. 13 Jamí asndo tsíngua̱ꞌ ndiꞌyoo̱ rí wéje̱ mbá ixu̱u̱ ígo̱ rí gíꞌdoo inúu, a̱ꞌkhue̱n ni̱ke̱e̱ gáꞌyoo̱ xí maxkamaa̱ mbá xndúu ne̱. Ído̱ ni̱ga̱níi̱ ná wéje̱ ne̱, a̱ꞌkhue̱n na̱nguá nixkamaa̱ nimbá xndúu ne̱, rí i̱ndo̱ó máꞌ inúu ne̱ gíꞌdoo, numuu rí ra̱ꞌkháa mbiꞌi rí najma̱a̱ xndúu ne̱ ñajuun mbiꞌi rúꞌkhue̱n. 14 A̱ꞌkhue̱n Jesús niꞌthúun ixu̱u̱ ígo̱: «¡Asndo nimbáa xa̱bo̱ náma̱xékho̱ xndáaꞌ rá!». Xómáꞌ tsí naꞌsngúu̱n ni̱dxawíín rí niꞌthée̱n.