1 Niꞌthúu̱n mangaa: «Na̱tha̱nꞌ-jmbalaꞌ rí mbá tikhuun tsí gachúún ge̱jyoꞌ xúge̱ꞌ, ma̱xájáñúu̱ asndo gúyáa̱ rí Ana̱ꞌlóꞌ naꞌthán-ñájúún xa̱bo̱ ga̱jma̱á ski̱yu̱u̱ꞌ».

2 Nda̱wa̱á, ído̱ ninújngoo mbá majun mbiꞌi, a̱ꞌkhue̱n Jesús ni̱ka̱ ga̱jma̱á Pédro̱, Santiágo̱ jamí Juáán, ni̱ke̱e̱ gajmíi̱ i̱ndo̱ó máꞌ ikhii̱n ná inuu mbá júba̱ tsída̱ꞌ. Ikhín neꞌne mbrúthiin mbá jayu Jesús ná inúu̱. 3 Niꞌni̱i miꞌxá mi̱ndaꞌkho xtíñuu̱, asndo nambiꞌi-taꞌa ne̱. Miꞌxá mi̱ndaꞌkho ne̱ xómá idi ngúwán rí na̱ga̱taa ná inuu júba̱,* rí asndo nimbáa xa̱bo̱ numbaa ma̱xáꞌngo̱o̱ maꞌjñáa rí miꞌxá xkuaꞌnii. 4 A̱ꞌkhue̱n nikujmaa Elía̱s ga̱jma̱á Moisés ná inúu̱, jamí ndiyáa̱ rí nu̱ndxákuu̱n ga̱jma̱á nindxu̱u̱ Jesús.

5 A̱ꞌkhue̱n Pédro̱ niꞌthúun Jesús: «Táta̱ naꞌsngáá, phú máján rí trámáálóꞌ ge̱jyoꞌ. Mu̱ne̱xo̱ꞌ atsú guꞌwá xtúgua: mbá dríga̱a̱ꞌ ikháánꞌ, mbá drígo̱o̱ Moisés, jamí i̱mba̱ drígo̱o̱ Elía̱s». 6 Xkuaꞌnii niꞌthán Pédro̱, numuu rí phú nimíñuu̱ gajmíi̱ a̱nguii̱n, jamí tsíꞌyoo̱ rí iꞌthée̱n.

7 A̱ꞌkhue̱n ni̱ꞌkha̱ mbá du̱u̱n nimbráꞌii̱n, jamí ná awúun du̱u̱n niwán-ti̱ya̱ꞌ mbá a̱ꞌwá rí niꞌthán: «Tsíge̱ꞌ ñajuun A̱ꞌdéꞌ tsí phú nandoꞌ ja̱yo̱o̱. Gu̱dxawíínlaꞌ rí naꞌthée̱n ikhaa̱». 8 Mbá nacha̱ máꞌ ni̱ya̱xi̱i̱ mbá nawa̱a̱, a̱ꞌkhue̱n nánguá máꞌ ndiyáa̱ asndo nimbáa, rí i̱mba̱wíi máꞌ Jesús wéje̱ ndiyáa̱.

9 Awúun máꞌ rí naguátaa̱n ná inuu júba̱, a̱ꞌkhue̱n Jesús nixnángáwúu̱n tsí naꞌsngúu̱n ríge̱ꞌ: «Mu̱xútha̱ánlaꞌ asndo nimbáa xa̱bo̱ rí ndi̱ya̱álaꞌ, rí asndo ído̱ gáyáa mbiꞌyuu A̱dée Xa̱bo̱ Numbaa, a̱ꞌkhue̱n ma̱goo mu̱thu̱únlaꞌ xa̱bo̱». 10 Jamí ikhii̱n nene̱-mbáníi̱ rí Jesús nixnángawúu̱n, i̱ndo̱ó máꞌ numuu rí nu̱ra̱xe̱-mijnée̱ dí iyoo gáꞌthán rí «ído̱ gáyáa mbiꞌyuu».

11 A̱ꞌkhue̱n ni̱ra̱xíi̱ Jesús:

—Náá numuu kajngó nuthan xa̱bo̱ tsí nusngáá xtángoo rí ndaꞌyóo ma̱ꞌkha̱ Elía̱s ginii róꞌ.

12 A̱ꞌkhue̱n ikhaa̱ niriꞌñee̱:

—Gakon máꞌ rí Elía̱s ma̱ꞌkha̱ ginii, jamí ma̱ꞌne-májáa̱n mbá xúgíí. Xáne lá kajngó ka̱ma naꞌthán ná i̱yi̱i̱ꞌ ajngóo Ana̱ꞌlóꞌ rí A̱dée Xa̱bo̱ Numbaa mamínu̱u̱ꞌ guéño jamí ma̱xáxúún xa̱bo̱ gúyáa̱ xúꞌkhue̱n rá. 13 Xómáꞌ ikhúúnꞌ na̱tha̱nꞌlaꞌ rí ni̱ꞌkha̱ máꞌ Elía̱s, jamí niñíi̱ mbá xúgíí rí ndiñúu̱, xómá ka̱ma naꞌthán ga̱jma̱á numuu̱.

14 Ído̱ niguáꞌnúu̱ ná gatiin i̱ꞌwíin tsí naꞌsngúu̱n, a̱ꞌkhue̱n ndiyáa̱ rí phú mbaꞌiin xa̱bo̱ gatiin mbá nawa̱a̱ ná inúú tsúꞌkhue̱n, jamí mbá tikhuun xa̱bo̱ tsí nusngáá xtángoo na̱tsa̱ñúu̱ gajmíi̱. 15 Ído̱ ndiyáá xa̱bo̱ rí ni̱ga̱núu Jesús, a̱ꞌkhue̱n mbá xúgíin phú nimakúu̱n jamí nagáñúu̱ nigóo̱ gúra̱xii̱. 16 Xómáꞌ ikhaa̱ niraxúu̱n:

—Náá rí numuu na̱tsa̱ña̱ꞌlaꞌ ga̱jma̱á nindxúu̱n róꞌ.

17 A̱ꞌkhue̱n niriꞌña mbáa xa̱bo̱ ná majñu̱ú tsí mbaꞌiin:

—Táta̱ naꞌsngáá, niꞌkha ja̱ya̱a̱ a̱ꞌdéꞌ ná inaaꞌ, numuu rí gíꞌdaa̱ mbáa gíñá ꞌguéen tsí naꞌne rí ma̱ꞌga ajngóo̱. 18 Gíñá ꞌguéen tsúꞌkhue̱n nagatuwiin a̱ꞌdéꞌ asndo náá máꞌ ngrigo̱o̱ꞌ, jamí naꞌnii̱ rí ma̱xpátri̱ga̱a̱ mbayíí. Asndo naxpáwíi xngaꞌá rawuu̱n, naꞌkho̱-ꞌduu̱n iñuu̱, xúꞌkhue̱n máꞌ naꞌne xa̱a̱ꞌ. Jamí ni̱thu̱ún tsí narasngúún rí mu̱xkriya̱a̱ꞌ gíñá ꞌguéen, xómáꞌ ikhii̱n táꞌngúu̱n.

19 A̱ꞌkhue̱n niriꞌña Jesús: «¡Ikháanꞌlaꞌ ñajwanlaꞌ xa̱bo̱ tsí tsínimbu̱únꞌ juyáá Ana̱ꞌlóꞌ! Asndo nguáná jaꞌyoo rí ma̱xtáá ga̱jma̱á nindxa̱ꞌlaꞌ róꞌ. Asndo nguáná jaꞌyoo rí ma̱ꞌngo̱o̱ a̱kui̱nꞌ gúne̱laꞌ róꞌ. A̱guwa ju̱ya̱a̱laꞌ dxáma ge̱jyoꞌ».

20 A̱ꞌkhue̱n niguwá juya̱a̱ dxáma ná inuu̱. Jamí ído̱ gíñá ꞌguéen ndiꞌyoo Jesús, a̱ꞌkhue̱n niꞌnii̱ rí ma̱guaꞌaan gakhe̱ dxáma jamí ma̱xpátri̱ga̱a̱ mbayíí ga̱jma̱á tsiakhe̱. Xúꞌkhue̱n máꞌ nigíꞌdu̱u̱n nirngáxe̱-mine̱e̱ꞌ jamí naxpáwíi xngaꞌá rawuu̱n. 21 A̱ꞌkhue̱n Jesús niraxu̱u̱ anu̱u̱ dxáma:

—Tiwátha̱ mba̱yo̱ꞌ eꞌne rí nagíꞌnuu̱ ríge̱ꞌ róꞌ.

Xómáꞌ ikhaa̱ niꞌthée̱n:

—Asndo nákhí lájwíi̱n xkuaꞌnii máꞌ igíꞌnuu̱. 22 Jamí phú mbaꞌa nothon gíñá ꞌguéen naꞌne rí ma̱xpátuáꞌáa̱n ná awúun agu jamí ná awúun iya, kajngó maxíya̱a̱. Ikhaa jngó, xí na̱ꞌnga̱a̱ꞌ nathane̱ mbá rí máján, ga̱ñáwíin a̱kia̱anꞌ xtayaxo̱ꞌ. Atambáyáxo̱ꞌ, táta̱.

23 Xómáꞌ Jesús niꞌthúu̱n:

—Ma̱xára̱tha̱n: "xí na̱ꞌnga̱a̱ꞌ nathane̱ mbá rí máján". Tsí nanimbo̱o̱ꞌ jaꞌyoo Ana̱ꞌlóꞌ, mbá xúgíí rí ma̱goo ma̱gu̱ma ga̱jma̱á numuu̱.

24 A̱ꞌkhue̱n anu̱u̱ dxáma mbá nacha̱ máꞌ niꞌthée̱n gakhe̱:

—¡Nanimbo̱ꞌlo̱ꞌ! Atambáyúꞌ rí ma̱nimbo̱ꞌ i̱tha̱án xóó ja̱ya̱a̱ꞌ, táta̱.

25 Jamí ído̱ ndiꞌyoo Jesús rí phú mbaꞌiin xa̱bo̱ nu̱gímbú-mijná, a̱ꞌkhue̱n niꞌthúu̱n gíñá ꞌguéen: «Ikháánꞌ gíñá ꞌguéen, tsáánꞌ nathane̱ rí tsíꞌthán jamí tsíꞌdxuun dxáma tsíge̱ꞌ, ikhúúnꞌ na̱xna̱-ñájwaanꞌ, a̱ga̱jnáaꞌ re̱ jamí nimi̱ꞌtsu̱ náxáta̱ꞌa̱a̱ꞌ ná xuyuu̱».

26 A̱ꞌkhue̱n rí gíñá ꞌguéen nindxaꞌwá jamí niꞌnii̱ rí mbu̱júꞌ máꞌ ma̱guaꞌaan gakhe̱ dxáma, a̱ꞌkhue̱n nigájnaa̱. Xómáꞌ ikhaa̱ kri̱ga̱a̱ mbayíí asndo xó mbáa tsí nijáñuu, rúꞌkhue̱n kajngó mbaꞌiin xa̱bo̱ nithan rí nijáñuu̱. 27 Xómáꞌ Jesús niguatuun ñawúun dxáma, nixúxii̱. Jamí ni̱tu̱xi̱i dxáma ni̱we̱je̱ nakhúu.

28 Ído̱ rí Jesús ni̱to̱ꞌo̱o̱ guꞌwáá, a̱ꞌkhue̱n tsí naꞌsngúu̱n ni̱ra̱xíi̱ i̱ndo̱ó máꞌ ikhaa̱:

—Náá numuu kajngó ikháanꞌxo̱ꞌ táꞌnga̱ꞌxo̱ꞌ gúxkriya̱a̱ꞌ gíñá ꞌguéen tsúꞌkhue̱n róꞌ.

29 A̱ꞌkhue̱n Jesús niꞌthúu̱n:

—Gíñá ꞌguéen tsí xkuaꞌnii jaꞌñúú, nda̱a̱ i̱mba̱ xó ma̱goo ma̱ga̱jnáa̱, rí i̱ndo̱ó máꞌ ga̱jma̱á ski̱yu̱u̱ꞌ rí mi̱ꞌthán-jáñíí Ana̱ꞌlóꞌ jamí rí mbi̱ꞌya-miꞌkhíí,* xkuaꞌnii nandoo nagájnáa̱.

30 Jamí ído̱ nigájnáa̱ ikhín, a̱ꞌkhue̱n nigóo̱ ná numbaa Galiléa̱. Xómáꞌ Jesús ra̱khóo̱ rí mu̱dxawíín xa̱bo̱ rí ikhín na̱ka̱-ranújngoo̱. 31 Numuu rí nandoo̱ maꞌthúu̱n i̱ndo̱ó máꞌ tsí naꞌsngúu̱n. Xáꞌnii niꞌthúu̱n: «A̱dée Xa̱bo̱ Numbaa mi̱xnáxi̱i̱ ná ñawúún xa̱bo̱ sia̱nꞌ, jamí ikhii̱n mu̱xíya̱a̱. I̱ndo̱ó máꞌ numuu rí ído̱ gárámuu atsú mbiꞌi rí nijáñuu̱, a̱ꞌkhue̱n mbayáa̱ mbiꞌyuu̱». 32 Xómáꞌ ikhii̱n tsífruꞌúu̱n dí iyoo gáꞌthán ajngáa rúꞌkhue̱n, jamí namíñúu̱ gúra̱xíi̱.

33 A̱ꞌkhue̱n Jesús gajmíí tsí naꞌsngúún niguáꞌníi̱ ná xuajen Kapernaúm. Ído̱ rí xtáa̱ máꞌ guꞌwáá, a̱ꞌkhue̱n niraxúu̱n: «Náá rí numuu naguwa-ra̱tsa̱ña̱ꞌlaꞌ ná jamba̱a̱ róꞌ». 34 Xómáꞌ ikhii̱n wíí neꞌne rawúu̱n. Numuu rí ná jamba̱a̱ niguwée̱ꞌ-ra̱tsa̱ñúu̱, nu̱ra̱xe̱-mijnée̱ tsáa tsí ikhii̱n i̱wa̱á gíꞌdoo numuu. 35 A̱ꞌkhue̱n ni̱ge̱ꞌe̱ Jesús, nindxaꞌwúu̱n tsí mbá gu̱wa̱ꞌ i̱jmi̱i (12), jamí xáꞌnii niꞌthúu̱n: «Xí mbáa nandoo ma̱nindxu̱u̱ xa̱bo̱ ginii, ikhaa tsúꞌkhue̱n jaꞌyoo rí ma̱nindxu̱u̱ tsí nda̱wa̱á jayu ná inúú mbá xúgíin, jamí ikhaa̱ ma̱ꞌne-mba̱ꞌwuu̱n mbá xúgíin xa̱bo̱».

36 A̱ꞌkhue̱n Jesús nigatuwiin mbáa ada̱ lájwíin, nitsijii̱ ná majñúu̱ ikhii̱n, wámba̱ rúꞌkhue̱n ndiyáraꞌaa̱ ada̱ jamí niꞌthúu̱n tsí naꞌsngúu̱n: 37 «Tsí na̱grui̱guíi mbáa ada̱ tsí jaꞌnii xómá tsíge̱ꞌ ga̱jma̱á numuꞌ, ikhúúnꞌ máꞌ i̱grui̱gúu̱n xúꞌkhue̱n rá. Jamí tsí na̱grui̱gúúnꞌ ikhúúnꞌ, ra̱ꞌkhá máꞌ i̱ndo̱ó ikhúúnꞌ i̱grui̱gúu̱n rí mangaa máꞌ na̱grui̱guíi̱ tsí nixúngu̱únꞌ».

38 A̱ꞌkhue̱n Juáán niꞌthúun Jesús:

—Táta̱ naꞌsngáá, ndi̱ya̱áxo̱ꞌ mbáa xa̱bo̱ tsí naríya̱ꞌ mbiꞌyaaꞌ rí naxkawíin gíñá ꞌguéen, jamí ikhaa̱ na̱nguá ngrigo̱o̱ꞌ ga̱jma̱á nindxa̱ꞌlóꞌ.* A̱ꞌkhue̱n ni̱tháa̱nxo̱ꞌ rí náxáꞌnii̱ rúꞌkhue̱n, numuu rí na̱nguá ngrigo̱o̱ꞌ ga̱jma̱á nindxa̱ꞌlóꞌ.

39 Xómáꞌ Jesús niriꞌña:

—Mu̱xúrikháa̱laꞌ. Numuu rí asndo nimbáa xa̱bo̱ tsí naꞌne rí phú wáá ga̱jma̱á ski̱yu̱ꞌ ikhúúnꞌ, ma̱xáꞌthán rí xkawe̱ꞌ ga̱jma̱á numuꞌ nda̱wa̱á. 40 Numuu rí xa̱bo̱ tsí ra̱gíꞌdáánlóꞌ sia̱nꞌ, ikhaa tsúꞌkhue̱n xtáa ga̱jma̱á nindxa̱ꞌlóꞌ. 41 Jamí asndo tsáa máꞌ tsí maxnálaꞌ maske asndo mbá xu̱wa̱á yaꞌsi mu̱wanlaꞌ ga̱jma̱á numuꞌ, numuu rí ikháanꞌlaꞌ ñajwanlaꞌ xa̱bi̱ꞌ, tsúún ñajunꞌ Krísto̱, na̱tha̱nꞌ-jmbalaꞌ rí xa̱bo̱ tsúꞌkhue̱n ma̱grui̱gúu gamaku.

42 »Asndo tsáa tsí naꞌne rí ma̱ꞌne aꞌkhán mbáa tsí lájwíin ge̱jyoꞌ, tsí nanimbu̱únꞌ máꞌ juyeꞌ, i̱wa̱á máján rí ma̱xtuꞌwájma mbá itsí mba̱a̱ drígo̱o̱ tse̱no̱ ná aphuu xa̱bo̱ tsúꞌkhue̱n, jamí mi̱ꞌdaa̱ ná awúun iya a̱pha̱ ma̱xmáto̱ꞌo̱o̱. 43 Xí ñawáanꞌ naꞌñaaꞌ rí ma̱tha̱ne̱ aꞌkhán, a̱tro̱thon-rígú ne̱. I̱wa̱á máján rí ma̱ta̱ꞌa̱a̱ꞌ mixndu mbá ñawáanꞌ ná nduya jámuu xa̱bo̱, xó rí mi̱dxo̱ꞌ ga̱jma̱á mbá nájma̱ ñawáanꞌ ná awúun agu rí nakha jámuu, rí ninguáná tsíwíyuu. 44 Ikhín tsíjáñúú ñu̱u̱ tsí naꞌphu̱ún xa̱bo̱, ni máꞌ agu ninguáná tsíwíyuu.* 45 Jamí xí nakhuáaꞌ naꞌñaaꞌ rí ma̱tha̱ne̱ aꞌkhán, a̱tro̱thon-rígú ne̱. I̱wa̱á máján rí ma̱ta̱ꞌa̱a̱ꞌ mixndu mbá nakhuáaꞌ ná nduya jámuu xa̱bo̱, xó rí mi̱ꞌdáán ga̱jma̱á mbá nájma̱ nakhuáaꞌ ná awúun agu rí nakha jámuu, [rí ninguáná tsíwíyuu. 46 Ikhín tsíjáñúú ñu̱u̱ tsí naꞌphu̱ún xa̱bo̱, ni máꞌ agu ninguáná tsíwíyuu.]* 47 Jamí xí idaaꞌ naꞌñaaꞌ rí ma̱tha̱ne̱ aꞌkhán, atríya̱ꞌ ne̱. I̱wa̱á máján rí ma̱ta̱ꞌa̱a̱ꞌ ga̱jma̱á mbóó idaaꞌ ná naꞌthán-ñájun Ana̱ꞌlóꞌ, xó rí mi̱ꞌdáán ga̱jma̱á mbá nájma̱ idaaꞌ ná awúun agu rí nakha jámuu. 48 Ikhín tsíjáñúú ñu̱u̱ tsí naꞌphu̱ún xa̱bo̱, ni máꞌ agu ninguáná tsíwíyuu.

49 »Numuu rí mbá xúgíin na̱gu̱ma-ríníi ga̱jma̱á agu, jamí mbá xúgíí tsi̱gi̱jña̱ꞌ na̱gu̱ma-ríná ga̱jma̱á idú.* 50 Máján rí idú. I̱ndo̱ó máꞌ numuu rí, xí nánguá ríná ne̱ rá, xáne lá gágoo rí ma̱ꞌne rínáa ne̱ mbu̱júꞌ rá. Ikhaa jngó, májáanꞌlaꞌ gáꞌne xómá rí máján idú, jamí tsímáá gájuwalaꞌ ga̱jma̱á nindxu̱ún tsí i̱ꞌwíin.