Romanos 16

Páblo̱ naraxi̱in xa̱bi̱i Jesús

1 Na̱xna̱ngáwalaꞌ tháan dxájwalóꞌ Fébe̱, tsí nambáyú-jmuu ná majñu̱ú tsí nanimbu̱únꞌ juyáá Jesús ná xuajen Senkréa̱. 2 Gu̱dríguíi̱laꞌ xómá jaꞌyoo mbáa yumbée Táta̱, xómá jaꞌyoo rí mune̱-mba̱ꞌwo̱-mijná xa̱bi̱i Ana̱ꞌlóꞌ. Gu̱mbáyíi̱laꞌ asndo náá máꞌ rí ndaꞌyóo̱ ágúya̱álaꞌ, numuu rí ikhaa̱ phú mbaꞌiin xa̱bo̱ nimbáñúu̱, jamí asndo mangúúnꞌ máꞌ nimbáyíꞌ.

3 Na̱ra̱xi̱ilo̱ꞌ Prisíla̱*16.3 Ikhaa máꞌ Prisíla̱ ñajuun Príska̱. ga̱jma̱á Akíla̱, a̱ngui̱nꞌ tsí nu̱mbáyíꞌ rí na̱gu̱ma ñajuun Krísto̱ Jesús, 4 jamí asndo inu ma̱ja̱ñúu̱ ga̱jma̱á numuꞌ ikhúúnꞌ. Ikhaa jngó na̱rígu̱u gamaku ná inúu̱, jamí ra̱ꞌkhá máꞌ i̱ndo̱ó ikhúúnꞌ, rí mbá xúgíí máꞌ kuthuun tsí nanimbu̱únꞌ juyáá Jesús tsí ra̱ꞌkháa xa̱bo̱ judío̱ ñajúún mangiin.

5 Xúꞌkhue̱n máꞌ na̱ra̱xi̱inlo̱ꞌ tsí nanimbu̱únꞌ juyáá Jesús tsí na̱gi̱mbíin ná guꞌwóo Prisíla̱ ga̱jma̱á Akíla̱.

Na̱ra̱xi̱ilo̱ꞌ xa̱bo̱ iyanga̱jwe̱ꞌ Epéne̱to̱. Ikhaa̱ ñajuu̱n tsí ginii jayu ninimbo̱o̱ꞌ jaꞌyoo Krísto̱ ná numbaa Ásia̱.

6 Na̱ra̱xi̱ilo̱ꞌ María̱, tsí phú niñajun ga̱jma̱á numalaꞌ.

7 Na̱ra̱xi̱ilo̱ꞌ Andróni̱ko̱ ga̱jma̱á Júnia̱s, xa̱bo̱ xuajñuꞌ tsí nitraꞌi̱in géjwa̱nꞌ ga̱jma̱á nindxu̱ꞌ. Ikhii̱n na̱gu̱maꞌnuu̱ májíi̱n ná inúú tsí waxúngui̱inꞌ, jamí ginuu̱ ikhii̱n ninimbúu̱n juyáa̱ Krísto̱ xó rí ikhúúnꞌ.

8 Na̱ra̱xi̱ilo̱ꞌ Ámplia̱s, iyanga̱jwe̱ꞌ tsí phú nandoꞌ ja̱yo̱o̱ ga̱jma̱á numuu Táta̱.

9 Na̱ra̱xi̱ilo̱ꞌ Urbáno̱, tsí nañajun ga̱jma̱á nindxa̱ꞌxo̱ꞌ ná ñajuun Krísto̱. Xúꞌkhue̱n máꞌ na̱ra̱xi̱ilo̱ꞌ Estáki̱s mangaa, iyanga̱jwe̱ꞌ tsí phú nandoꞌ ja̱yo̱o̱.

10 Na̱ra̱xi̱ilo̱ꞌ Apéle̱s, tsí phú mbaꞌa miꞌtsú nisngájma rí jmbii ná inuu Krísto̱.

Xúꞌkhue̱n máꞌ na̱ra̱xi̱inlo̱ꞌ xa̱bo̱ guꞌwóo Aristóbu̱lo̱.

11 Na̱ra̱xi̱ilo̱ꞌ xa̱bo̱ xuajñuꞌ, Erodión.

Xúꞌkhue̱n máꞌ na̱ra̱xi̱inlo̱ꞌ xa̱bo̱ guꞌwóo Narsíso̱, tsí nanimbu̱únꞌ juyáá Táta̱ Jesukrísto̱.

12 Na̱ra̱xi̱ilo̱ꞌ Triféna̱ ga̱jma̱á Trifósa̱, go̱ꞌo̱ tsí phú nuxna-mijná tsiakhe̱ rí mune̱ ñajuun Táta̱.

Xúꞌkhue̱n máꞌ na̱ra̱xi̱ilo̱ꞌ dxájwalóꞌ Pérsi̱da̱, tsí maphú niñajun ga̱jma̱á numuu Táta̱.

13 Na̱ra̱xi̱ilo̱ꞌ Rúfo̱, tsí watraꞌwíi rí ma̱nimbo̱o̱ꞌ jaꞌyoo Táta̱, jamí xúꞌkhue̱n máꞌ nánée̱ mangaa, tsí ñajuun xómá nánéꞌ mangúúnꞌ.

14 Na̱ra̱xi̱ilo̱ꞌ Asínkri̱to̱, Flegónte̱, Érma̱s, Patróba̱s, jamí Érme̱s mangaa. Xúꞌkhue̱n máꞌ na̱ra̱xi̱in a̱ngia̱nꞌlóꞌ tsí júwa̱ꞌ ga̱jma̱á nindxúu̱n.

15 Na̱ra̱xi̱ilo̱ꞌ Filólo̱go̱ ga̱jma̱á Júlia̱, xúꞌkhue̱n máꞌ Neréo̱ ga̱jma̱á máꞌ dxáguíi̱ mangaa. Xúꞌkhue̱n máꞌ na̱ra̱xi̱ilo̱ꞌ Olímpa̱s jamí mbá xúgíin a̱ngia̱nꞌlóꞌ tsí júwa̱ꞌ ga̱jma̱á nindxúu̱n.

16 Gu̱ra̱xi̱-mijnáalaꞌ mbá xúgiáanꞌlaꞌ ga̱jma̱á gamaku.

Nu̱ra̱xáanꞌlaꞌ mbá xúgíí kuthuun tsí nanimbu̱únꞌ juyáá Krísto̱.

Rí naxnángoo Páblo̱ nda̱wa̱á jayu

17 A̱ngui̱nꞌ, na̱tha̱n-jáñalaꞌ rí gu̱ña̱wa̱n-mijnálaꞌ inúú tsí nune̱ rí mu̱xpi̱ꞌtha̱-mijná xa̱bo̱, jamí nune̱ rí ma̱ꞌne a̱jma̱ a̱kui̱ín mbá tikhuun ga̱jma̱á numuu rí kriꞌkhu isngáa̱ xó rí ni̱ma̱ñalaꞌ ikháanꞌlaꞌ. Ma̱xámbáxa̱ꞌlaꞌ gajmiálaꞌ xa̱bo̱ tsúꞌkhue̱n. 18 Numuu rí ikhii̱n ra̱ꞌkhá ñajuun Tátiálóꞌ Jesukrísto̱ ini̱i̱, rí i̱ndo̱ó máꞌ nu̱ñajwii̱n ga̱jma̱á numuu rí nandúu̱n máꞌ ikhii̱n, jamí ga̱jma̱á ajngáa mi̱nduwa rí mitsaan iwán nune̱-nduwii̱n xa̱bo̱ tsí tsíma̱ñúú. 19 Mbá xúgíin xa̱bo̱ nduyáá rí ikháanꞌlaꞌ nu̱ne̱-mbáníílaꞌ ajngóo Jesús. Ikhaa jngó phú nadxu a̱kui̱nꞌ e̱ne̱laꞌ. I̱ndo̱ó máꞌ numuu rí nandoꞌ rí phú wiphiáanꞌlaꞌ gáꞌne rí mu̱ne̱laꞌ rí máján, ra̱ꞌkhá rí mu̱ne̱laꞌ rí xkawe̱ꞌ.

20 Ana̱ꞌlóꞌ, tsí naꞌne rí ma̱juwalóꞌ tsímáá, inu máꞌ masngutiga̱a̱ Satanás ná agoo nakhuálaꞌ. Tátiálóꞌ Jesukrísto̱*16.20 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «Tátiálóꞌ Jesús». gáꞌne-tsakun-rámáaꞌlaꞌ.

Mbaꞌiin tsí nu̱ra̱xi̱in xa̱bi̱i Jesús tsí júwa̱ꞌ ná Róma̱

21 Naraxáa̱nꞌlaꞌ Timotéo̱, dxájuꞌ tsí na̱ñajun ga̱jmi̱ꞌ. Xúꞌkhue̱n máꞌ nu̱ra̱xáa̱nꞌlaꞌ xa̱bo̱ xuajñuꞌ Lúsio̱, Jasón, jamí Sosípa̱te̱r.

22 Ikhúúnꞌ ñajunꞌ Térsio̱, tsúún ni̱tháánlo̱ꞌ i̱yi̱i̱ꞌ ríge̱ꞌ. Na̱ra̱xáanꞌlaꞌ mangúúnꞌ ga̱jma̱á majñu̱u̱ Táta̱.

23 Naraxáa̱nꞌlaꞌ Gáyo̱, tsí xtáálo̱ꞌ ná guꞌwóo, jamí ikhaa̱ máꞌ naxnátiꞌñee̱ guꞌwóo rí ma̱gi̱mbíin mbá xúgíin tsí nanimbu̱únꞌ juyáá Jesús ge̱jyoꞌ.

Naraxáa̱nꞌlaꞌ Erásto̱ mangaa, tsí na̱ña̱wu̱u̱n mbúkho̱o̱ guꞌwá-ñajun.

Xúꞌkhue̱n máꞌ dxájwalóꞌ Kuárto̱ mangaa, naraxáa̱nꞌlaꞌ.

24 Tátiálóꞌ Jesukrísto̱ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*16.24 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa rí tima ná kíxnuu 24.

A̱gu̱ma-mba̱a̱ Ana̱ꞌlóꞌ ga̱jma̱á majñu̱u̱ Jesukrísto̱

25 Gu̱ꞌne̱-mba̱a̱lóꞌ Ana̱ꞌlóꞌ. Ikhaa̱ na̱ma̱ñuu̱ ma̱ꞌnii̱ rí ma̱wajún-gúkuálaꞌ ga̱jma̱á majñu̱u̱ ajngáa máján rí na̱sngáálo̱ꞌ jamí ga̱jma̱á majñu̱u̱ gisngáá rí na̱tha̱n-ráꞌalo̱ꞌ ga̱jma̱á numuu Jesukrísto̱. Ajngáa máján ríge̱ꞌ ñajuun awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, rí niríga̱ ngu̱ꞌwa̱ asndo nákhí máꞌ xóó nda̱a̱ numbaa. 26 Xómáꞌ xúge̱ꞌ rá, nikujma ne̱ ga̱jma̱á majñu̱u̱ rí nitháán tsí ni̱rawíjnga̱a ajngóo Ana̱ꞌlóꞌ, xómá nixnángoo Ana̱ꞌlóꞌ tsí xtáa jámuu. Awan ríge̱ꞌ, rí ni̱gi̱ꞌdoo ngu̱ꞌwo̱o̱ Ana̱ꞌlóꞌ, ni̱ma̱ꞌthoo ne̱ ná inúú mbá xúgíin xa̱bo̱ tsí ra̱ꞌkháa judío̱ ñajúún, kajngó ma̱nimbúu̱n juyáa̱ gisngáá ga̱jma̱á numuu Jesús. 27 Ga̱jma̱á majñu̱u̱ Jesukrísto̱, a̱gu̱ma-mba̱a̱ jámuu Ana̱ꞌlóꞌ tsí mbáwíi phú na̱ma̱ñuu. Xkuaꞌnii gáꞌne.