1 Mısa gırgıne İzrailybışisqa qığeç'u inəxüd eyhe:

2 – Zaqa vəşşe g'alle (120) sen vod. İnçile qiyğa zasse vuşda xərna ixhes əxəs deş. Rəbbeeyid zak'le uvhiynniy: «Ğu İordan eyhene damayle ılğeç'es deş». 3 Şu maqa ılğepç'ımee, şole ögil Vuc Rəbb, vuşda Allah, əlyhəəs. Şos qızaxxıyn milletbı Mang'veecad kunfa-yakun ha'as. Manbışin cigabıd şos ixhes. Rəbbee uvhiyn xhinne, şos xəbvalla Yeşuee haa'as. 4 Rəbbee Emorğançen paççahar Sixoniy Og gyapt'ı manbışde cigabışilqa alli'ıyn yiğbı, şos qızaaxasde milletbışde vuk'lelqa qalya'asınbı. 5 Rəbbee manbı vuşde xıleqa qevles, şunad manbışik gırgın zı uvhiyn he'e. 6 Qı'məəq'ən, yik'bı it'umda aqqe. Şoka Rəbb, vuşda Allah, ı'qqə, nyaggah manbışile qəpq'ı'n yı'q'əlqa qımeebaxhe. Mang'vee ğu g'alerçu əlyhəəs deş.

7 Qiyğa Mısee Yeşua qort'ul, gırgıne İzrailybışde ulene ögil mang'uk'le eyhen:

– Rəbbee dekkaaşis k'ın g'assır helesva uvhiyne cigeeqa ğu in millet qıkkes. Ğu manbışis man ciga bit'al ha'as. Mançil-allar qı'məyq'ən yik' it'umda aqqe! 8 Rəbb Vuc vaka ixhes, vale ögil əlyhəəs. Mang'vee ğu g'alerçu əlyhəəs deş. Yik'eka ixhe, qı'məyq'ən!

9 Mısee mana Q'aanun opk'un, Rəbbika mugaavilenana q'utye quvkekkane Leviyke g'abıyne kaahinaaşisqayiy gırgıne İzrailyne ağsaqqalaaşisqacab qoole. 10 Qiyğa Mısee manbışik'le inəxüd eyhe:

– Yighne sene səyaqqees, borcbı yik'el hixana'ane sen, K'odiybışin bayramnang'a* 11 gırgın İzrailybı Rəbbine, vuşde Allahne, ögil vuxhesva Mang'vee g'əyxəsde cigeeqa qabıyng'a, mana Q'aanun İzrailybışis qəpqe. 12 Milletıken adamer, yedar, uşaxar, menne cigeençe qabıynbı gırgınbı see'e. Hasre manbışde gırgıng'us g'ayxhı, xət qixhecen Rəbbile vuşde Allahıle qəpq'ı'n gırgın Mang'une Q'aanunee otk'unin xhinne he'ecen. 13 Hasre Q'aanun dyaats'ane uşaxaaşik'led g'ayxhecen, Rəbbile, vuşde Allahıle, qəvəəq'ənas xət qixhecen. İordanne damayle ılğepç'ı, man cigabı vuşunbı ıxhameeyid, nimelleteyiy şu ç'iyeyne aq'val vob, hasre məxüd ixhecen.