Deuteronômio 34

1 Mısa Moav eyhene suvabışde q’adaalile Nevolqa arı, maane Yerixoyne ögilyne Pisga eyhene axtıne cigeeqa ılqeç’e. Rəbbee mang’uk’le gırgın cigabı hagvanbı. Danilqamee ts’ıts’ooxhena Gilead, 2 gırgın Naftaliyn, Efrayimıniy Menaşşeyn cigabı, garbne deryahılqamee ts’ıts’exhxhen Yahudayn cigabı, 3 Negev, xurmabışda şahar Yerixo, mançine qadalilyne Tsoar eyhene şaharılqamee ts’ıts’exhxhen gırgın cigabı hagva.

4 Rəbbee mang’uk’le eyhen:

– Haane Zı İbrıhımıs, I’saq’ıs, Yaaq’ubıs k’ın g’assır helesva uvhiyn cigabı, şoke g’abıynbışis Zı manbışis heles. Zı vak’le man cigabı hagvanbı, vassemee maqa ikkeç’es əxəs deş.

5 Rəbbee uvhiyn xhinne eyxhe, Rəbbina g’ul Mısa Moavee qek’a. 6 Mana Moavee, Bet-Peorne ögilyne q’adaalil k’eyxha. G’iyniyne yiğılqamee neng’uk’lecad mang’une nyuq’vnen ciga ats’a deş. 7 Mısayqa qek’ang’a vəşşe g’alle (120) senniy vod. Mang’une uleppışin işixıd k’ıl qıxha deşdiy, guculer g’a’arxhu deşdiy. 8 Moavne q’adaalil İzrailybışe Mısays xhebts’al (30) yiğna ak' hoole. Mısayqa gyaaşen yiğbı, yasın yiğbı ç’əveedaxhenbı.

9 Mısee Nunne dixelqa Yeşualqa xıleppı gixhxhıva Rəbbee mang’us k’orana ək’el hoole. İzrailybışed Yeşual k’ırı iliyxhen, Rəbbee Mısayk’le nəxüdiy uvhu, manbışed gırgın həməxüdıd ha’an.

10 İzrailybışiqa Mısa peyğambar xhinne, Rəbbika hambaz hambazıka yuşan hı’ına, merna ıxha deş. 11 Rəbbee mana g’axuvunaniy Misiree fironus, mang’une gırgıne insanaaşis, ölkayscad geed əlaamatbı hagvas. Şavussecad Mısayle geed əlaamatbı hagvas əxı' deş. 12 İzrailybışik’le məxdın qəvəəq’ənasın, ç’ak’ın, gucnan gorsatmabı hagvana, Mısa xhinnena merna g’acu deş.