1 Sayid zas şok’le inniy eyhes ıkkan: çocar, Rəbbinemee şadeepxhe! Şolqa akaran karbı otk’uniyn zı ozar ha’a deş, mançin şu havaace. 2 Şucab-şu xvaabı xhineene insanaaşike havaace. Manbışe pisın işbı g’ece-g’ece, şosqa hexxadacad sunnatbı haa’as ulyooka. 3 Şi insanaaşe ha’ane sunnatılqa umud haa’a deş. Şi Allahne Rı’hı’leğana ı’bəədat ha’anbı, I’sa Masih axtı qa’anbı vob. Mançil-allab şi hək’ebab sunnat hav’uynbı vob. 4 Zasse insanaaşe ha’ane sunnatılqa umud haa’as vəəxəyiy. Merıng’une fıkreeqa mançilqa umud hav’uy qööxheene, zasse sık’ılbab geeb mançilqa umud haa’as vəəxəyiy. 5 Zı, zaqa molyulle yiğnang’a Q’aanunus sik’ı sunnat hı’ı. İzrailyne milletna, Benyaminne nasılena, cühüt’yaaşike g’arına zı sa cühüt' vorna. Zı ı’mı’r Q’aanunus sik’ı, yəqqı’le qığdeç’u, fariseyaaşe* xhinne hav’u. 6 Zas Allah geer ıkkanva, zı I’sa Masihılqa imannanbışiqa öc alyapt’ı. Q’aanunne ögil zı qorkura ıxha, şavussecadıd mançine hək’ee zak’le hexxan eyhes dəxə.

7 Şenke zı axtı qa’an hucooyiy vod, həşde man zasqa Masihnemee vuççud deşin kar xhinne qöö. 8 Sa mancad deş, zak’le Xərna I’sa Masih yugra ats’axhxhesva, yizdemee axuyn mansa gırgın kar ulele g’a’aytxhuyn. Masih aveykiynemee, zı zaqa vodun-deşin həş xhinne dağetçu. 9 Zas Q’aanunus sik’ıyne yizde qopkuvalil-alla deş, Masihılqa hı’iyne imanıl-alla Mang’uka sa ixhes ıkkan. Məxdın iman Allahee qopkuvalla xhinne hı’sab ha’a. 10 Zas Masihiy Mana üç’ür qexhena Allahna guc vaats’a vuxhes vukkan. Zas Mang’vee ts’ıts’av’una əq’üba zalqab bit’al haa’as vukkan. Zasır, Masihıs xhinne qek’ang’ar, Allahne cuvabıle qığdeç’es ıkkan. 11 Məxüb zaqab hapt’ıynbışde yı’q’neençe üç’ür qixhesda umud vuxhesda.

12 Zı eyhe deş, mane gırgınçilqa hirxhılyna. Zas aqqas ıkkanançinemee qihna zı g’adayxhvancar vor. I’sa Masiheeyir zı həməxürniy aqqı. 13 Çocar, man gırgın zaqa vodnançina zasqa qöö deş. Zı saccu sa kar ha’a: yı’q’əlin yı’q’əl g’aletçu, ögiylinbışilqa can ayhe. 14 Zı finişilqa g’adayxhvanna gırgıne gahbışisda ı’mrena mukaafat xəybışee alyapt’as. Allahee I’sa Masihıleğana mana mukaafat alyapt’as qort’ul.

15 Yişda vuşuyiy imanee mane gırgınçilqa hirxhıl, manbışe məxbına fıkır ha’as vukkan. De’eş, şu mebne fıkıreexhe, Allahee man şok’le hagvas. 16 Qudoora, şi nyaqayiy hipxhır, məxbına ı’mı’r haa’as.

17 Çocar, zına xhinnena ı’mı’r hee’e. Zı şok’le haaguyne misaalays sik’ı ı’mı’r vukkekkanbışiqa ilyaakı, yugda xət qıxhe. 18 Zı şok’le geed nəqqees uvhiyn xhinne, həşded geşşe-geşşe meed eyhen: gellesınbışe Masihın çarmıxıl qik’uy k’ap’ik’ıle avqa qaa’a. 19 Manbışda allah cona vuxhun vobna. Manbışe cocab-co ç’ak’ıba haagvane karbışe manbışis naş qa’a. Manbışe ine dyunyeynacab haa’a. Manbışikın ixhesın. 20 Yişdame vatan xəybışee vobna. Mançer şi g’attivxhan haa’ana Xərna I’sa Masih gozit ha’a. 21 Allahee Masihıs gırgın Cune xılee aqqasda guc hevles. Mane gucukab Masihee yişin g’iyniyn k’ap’ik’ıle avqa qıxhayn tanbı badal hı’ı, Cune nuruka gyatsts’ıyne tanık akar qa’as.