1 Allahne insanna Mısayna düə

2 Nimee nasılbı badaledxheyid,

Xudaavanda, şi Valqa yı’q' qizzır.

3 Suvabıyiy ç’iyeyn aq’va, dyunye ixhanassecad Ğu Allah ıxha,

Gırgıne gahbışilır Allahcar ixhes.

4 Ğu insanar nyuq’nelqa savaak’al haa’a.

Ğu manbışik’le eyhen: «Aadamın dixbı, nyuq’nelqa savk’le».

5 Yiğne ulesqa aazır sen, sa ılğeç’uyn yiğ xhinne,

Xəmdiyna sa-q’öble sə’ət xhinne qadayle.

6 Selin xhinne Ğu insanar vukkeka,

Manbı nyak' xhinne qabı avayk’an.

Manbı miç’eeb alyabıyne ok’uk akar:

miç’eeb k’atele qooxhe t’et'-t’ele g’ayhe,

xəmdemee hı’ç’ı’bğı’n, qooqqana.

7 Yiğne qəlan şi gyabat’anbı,

Vaqa qəlnang’a şi nyaqame vuxhesınbı aaxva.

8 Yişin taxsirbı Vak’le ats’a,

Yişde dyugulene bınahbışilqa Yiğne aq’vayn nur gexha.

9 Ğu qəllamışxheene yişda ı’mı’r cit’a qooxhe.

Yişin senbı ul gyapxı aaqasse ılğeeç’enbı.

10 Şi yights’al (70) sennana ı’mı’r haa’a,

Vuk’diyk’ıree molyts’aleeqab (80) hiviyxharanbı.

Mane senbışin g’ellesınbıd dağamiyvalee, ı’k’aree ı’lğəə,

Yişda ı’mı’r zarabacab ç’əvooxhena, alivxu avayk’an.

11 Şavuk’lene Yiğne qəlına guc vaats’a?

Vale nimeeyiy qəvəyq’ən,

Vaqa manimeenab qəl vob.

12 I’mı’r cit’aba vuxhay şas yik’el qale’e,

Şi ək’elika vuxhes.

13 Ya Rəbb, şasqa sak’le! Nimeene gahnane inəxüd ixhes?

Yiğne g’ulaaşis rəhı’m hee’e!

14 Şi gırgıne gahbışil şadba vuxhecenva,

Miç’eeb şalqa Yiğna yugvalla gyooğee’e.

15 Şalqa ver ablyav’uyn yiğbımee,

Balyaa ablyav’uyn senbımee, şi şad hee’e.

16 Ğu hı’iynbı Yiğne g’ulaaşik’le,

Yiğna xəbvallab cone uşaxaaşik’le g’avcecen.

17 Ay Xudaavanda yişda Allah, şaqa yugra ixhe,

Yişde xılen hı’iynçis barakat hevle,

Hucoone ixhes, yişde xılen hı’iynçis barakat hevle.