1 Baana baa ngu, mu ma mali mu utala matangu na bilumbu, benu a lili na nzala ati basonehele benu ve. 2 Mu tooni ati benu liyabi bubwe-bubwe benu mwakulu, ti ilumbu hya Pfumu sa iya we muyibi hutso butsuhu. 3 Tangu yi baatu buuba mu uleele bunuubu: «Tsi yoosi yika hutso a hyenze, midiingu a misaali ve», ŋaana ni ŋa mapasi muupuhama ŋa yulu a bo we ŋa misoongo mibaabaanda mukaasu nga yimi. Muutu tso mumosi a huufuuha ve.

4 Baana baa ngu, benu a lili hutso a piipidi ve, mana ilumbu hya Pfumu iyiila benu we muyibi. 5 Mu tooni ati, benu boosi lili baana ba liyalala, ba bali mu udyata mu liyalala. Bisu a benu a lili baatu ba butsuhu tso baa piipidi ve. 6 Bisu a benu a libwamina we baatu bakima ve, ka bisu a benu laafwana uba likanda, na ukuta linyutu. 7 Babwamini, ni butsuhu bali mu ubwamina. Bakoli baa malamu kaka, ni butsuhu bali mu ukolo malamu. 8 Ka bisu baa lili baana ba liyalala, bisu laafwana ukuta linyutu. Likaangaani imiinu na litondo we ikutu hi itali na hiitu hi liyobolo we ibudu hi midiingu✝. 9 Nzambi a hateele bisu mu ubwana tsyembili a nde ve, ka mu ubaha liyobolo mu Pfumu a bisu Yisu Kristo. 10 Yisu Kristo akwa mu tooni a bisu, mana tso lili moonyi buuve babaakwa, bisu liba moonyi itwadi na nde. 11 Ni mu buuna, hwadasanaani na kumbasanaani mu ukula mu imiinu, we bu benu lili mu ubaasa.

12 Baana baa ngu, bisu livondi benu mu ubaakiinza ba bali mu usala na bugeele bwosi ŋa hati la benu. Baakiinzaani ba bali mu usuungaha benu mu nduhi a Pfumu, na ba bali mu uyelese benu. 13 Baamweesaani bo litondo na likiinzu lilinene mu tooni a kwadili a bo mu isalu. Baabaani mu hyenze ŋa hati la benu.

14 Baana baa ngu, bisu livondi benu mu ubaayibusa baa bubaasala hyayuhu. Baahwadisaani baa mitima myamiiduka, baakumbasaani ba baavele mifudi, baabaani na bulembo ŋa busu bwa baatu boosi. 15 Kebaani muutu a hafutala ma mabi mu ma mabi ve, ka mu pasi taangu, baasahaani libwe ŋa hati la benu, na ŋa hati la baatu boosi.

16 Kwilalaani mu kinya, 17 baasambilaani taangu yoosi. 18 Baafutalaani matondo huli Nzambi mu pasi musamu. Liina ni li Nzambi ubaavondo benu, mu idiingu hya benu na Yisu Kristo. 19 A lidimasa Livupu la Ngidi ve. 20 A lirokolo mbihulili ve. 21 Ka baakengesaani pasi dyaambu, baakangaani ma mali ma mabwe. 22 Tahuhaani na pasi dyaambu li libi.

23 Nyaha Nzambi wu li suhu la hyenze, akuhasa bungidi bwa nde boosi mu benu. Na nde akeelese benu we bu hwafwana: iluunzi hyoosi, muvumu woosi na nyutu yoosi bya benu, biveleba na masyembo mu ilumbu hya nziili a Pfumu a bisu Yisu Kristo. 24 Wu li mu uteele benu li wu akuha, nde sa atswihasa maana moosi.

25 Baana baa ngu, baasambilaani kaka mu tooni a bisu. 26 Bumbasanaani na litondo, we baana ba ngu. 27 Me ndi mu utuma benu mu nduhi a Pfumu: taangaani muhanda mo wunuwu huli baana ba ngu boosi.

28 Nyaha hyese hya Pfumu a bisu Yisu Kristo hiba na benu boosi!