1 Me Pahuli, Silaasi na Timoteho, lili mu ubila libundu la bisu Tesalonika, la Nzambi Taata a bisu na Pfumu Yisu Kristo. 2 Nyaha Nzambi Taata a bisu na Pfumu Yisu Kristo, bava benu hyese na hyenze.

3 Baana bangu, bisu lafwana ubafutala matondo taangu yoosi huli Nzambi, mu tooni a benu. Hwafwana huli bisu mu usa buuna, mu umono buni imiinu hya benu hili mu ukula. Bisu lili mu umono kaka buni litondo li benu lili mu umweese mu bana, lili mu ukula. 4 Ni mu buuna, bisu lili na nyeme mu uyambila mu benu mutso mabundu ma Nzambi. Mu tooni ati benu laateleme mu imiinu, tso bu benu lili mu ubwana mbingisili na mapasi.

5 Ŋaniiŋa huli mu umweese huli baatu boosi iliimbu hya ti, tsundusu a Nzambi yili yi butsiitsa. Mapasi ma benu lili mu ukunda, mali mu uva benu muswa mu umonehele ba bakuha mu ukoto mu Ipfumu hya Nzambi. Ipfumu hi benu lili mu umono mapasi mu hyo. 6 Mu mbuli, Nzambi li wu akuha. Nde ufutala munyongi huli baa bubaanyongese benu. 7 Huli benu ba bali mu unyongese, Nzambi sa ava benu pumiili itwadi na bisu. Sa huba buuna, ŋa Yisu uyamonehele hu mayulu na bapofi ba nde baa nga matwala. 8 Nde sa aya hutso a ludi la mbaahu, mu usyembe ba baaveleyaba Nzambi na ba baavelesingala Musamu wu Mubwe wa Pfumu a bisu Yisu. 9 Bo sa bayaka tsyembili ya pasi, ni lipfu li bilima na bilima. Bo a buumono hiinzi hya Pfumu na muyusu wu mifudi mya nde ve. 10 Maana sa mavangama ŋa nde huya mu uyaka muyusu ŋa hati la ba nde boosi. Ba bali mu usa imiinu mu nde, sa baba hutso a kimuhili na minywa bwasi. Benu sa liba ŋa hati la bo, mu tooni ati benu laasa imiinu mu ndongisili a bisu.

11 Ni mu buuna, bisu libaasambila taangu yoosi mu benu. Bisu libaavondo huli Nzambi a bisu mu ukitusa benu ba baakuha, mu teelili yi benu laayaka. Bisu lili mu uvondo ti, mu matwala ma nde, nde akumbasa benu mu ukuhasa peyu a benu mu uvanga ma mabwe, mana imiinu hya benu himonehele mu mavaanga. 12 Buuna, nduhi a Pfumu a bisu Yisu sa bayusa mu tooni a benu. Na sa bayuusa benu mu tooni a nde. Hiina sa hiba iliimbu hya hyese hya Nzambi a bisu na Pfumu a bisu Yisu Kristo.