1 Mu ma mali mu utala nziili a Pfumu a bisu Yisu Kristo, na kuukimini a bisu ŋa pedu a nde, bisu livondi benu dyaambu limosi, baana ba ngu. 2 A lilenge mu uba na boomo, buuve mu uba matsimi helini-helini ve, tso muutu yayabisa benu ti ilumbu hya nziili a Pfumu himiito. A liyuhala nde ve, tso baaleele ti mbihulili, buuve ti maluumbi, buuve ti muhanda miimata huli bisu. 3 Likele muutu a hasoho benu we bu nde atoondi ve. Mu tooni ati, ilumbu mo hiina a hyuya tswamina baatu bateleme mu utuna Nzambi ve. Na tswamina bubi bumonehele mu iteesi hya muutu nga bukanyi, wu amiidunga. 4 Muboho mo wunuuwu, wu unangimana pasi baatu bubaasambila, bi bubaamono ti bili bya ngidi. Nde sa anangimana biina byosi na sa ayakoto natee mu nzo a Nzambi, na utsahala muuna na ubaatuka tulu, ti nde ni Nzambi.✝

5 Benu a lili mu uyibwala moonyi ti me anzabisi benu lo ŋa me amba kini na benu ve? 6 Ka benu liyaabi ti isiha himosi hyakanga muutu mo nga bukanyi, mana nde amonehele ndulu mu taangu yi Nzambi haakese. 7 Mu tooni ati, matwala ma nga bukanyi, mamiitswiha mu tswehi. Hwamiisaala ndulu aka ti, wu akaanga matwala mo maana, uhwada mu ukaanga mo natee taangu yi nde hudimbala. 8 Buuna, nga bukanyi sa amonehele. Pfumu Yisu sa aduba nde mu mupu wu upala mu munywa nde, na nde sa ahesolo nde mu matwala ma nziili a nde. 9 Nga bukanyi mo wunuwu, sa aya na matwala ma Saatana. Nde sa avanga bipadi bya pila mu pila, biliimbu bya kimuhili, na bimangu bya soho. 10 Nde usalila bubi bwa pila mu pila, mu usoho boosi ba buudunga. Bo buudunga mu tooni ati, bo a baayaka tso utondo imbuli hi hyuyobolo bo ve. 11 Buuna Nzambi sa atsindaha bo matwala ma udunga, mana bo basa hiitu mu mapfuta. 12 Ni mu buuna, baatu boosi ba baavelisa hiitu mu imbuli, ka baamoni kinya na baakangimi mu mavaanga ma mabi, sa batsundasa bo.

13 Uto ti bisu a benu, baana ba ngu baa Pfumu hatondo, bisu lafwana ubaafutala matondo huli Nzambi taangu yoosi mu tooni a benu. Benu baa Pfumu hasooli hati a tsomi, mu uyoboho mu isalu hi Livupu li libaava benu bungidi. Benu luuyoboho kaka, mu tooni imiinu hya benu hi hyakangama mu imbuli. 14 Mu ukuhasa dyaambu mo liina, Nzambi ateele benu mu nzila a Musamu wu Mubwe wu bisu laayabisi benu. Nzambi hateele benu, mana benu liyaka muyusu a Pfumu a bisu Yisu Kristo. 15 Ni mu buuna, baana ba ngu, telemaani ŋa benu lili na kangamaani mu ndongisili yi bisu laatoosili benu mu munywa, buuve mu muhanda.

16 Mu hyese hya nde, Nzambi Taata a bisu atondo bisu, na nde ava bisu ibahala hi hyavele na tsukusu na hiitu hi hibwe. Nyaha nde na Pfumu a bisu Yisu Kristo nde mwakulu, 17 baluusa mitima mya benu mu ibahala! Nyaha bava benu kaka mifudi mi ubaavanga ma mabwe taangu yoosi. Na nyaha mambu ma mali mu upala mu minywa mya benu maba mambu ma lisuunga!