1 Wu ni me mukuutu, ndi mu utsonehe muhanda mo wunuuwu huli mbaahi a me wu litondo Ngayusi, wu me atondo mu mbuli. 2 Mbaahi a me, me toondi ti pasi isiha hi we usa hibwaaha, na we baa na polo yi linyutu, we bu muvumu a we ali mu ubuuha.

3 Me amono kinya yindahi ŋa baana ba ngu baaya na baatiila we imbangi mu imbuli hi we akangama mu hyo, na mu ndyatili a we ya hutso imbuli. 4 Kinya a me yi yafulala, ni mu uyuha ti baana ba me bali mu udyata mu imbuli.

5 Mbaahi a me wu litondo, we akangama mu ma we li mu uvanga mu ukumbasa baana ba ngu, tso ba bali byenyi. 6 Baatu mo baana, baata imbangi mu litondo la we ŋa busu bu libundu loosi. Kolo-kolo a we! Kumbasa bo we bu hwafwana ŋa busu bwa Nzambi, mu byosi bi bo bali na byo nzala mu mudyenge a bo. 7 Mu tooni ati, bo bali mu udyenge mu uyayabisa nduhi a Kristo, hwavele uyaka likumbasa huli bangoyi. 8 Ni mu buuna, bisu lafwana ubaakumbasa baatu ba pila mo yiina, mana libaani itwadi na bo mu isalu hi bo bali mu usa, mu uyabisa imbuli.

9 Me atsonihi muhanda wu mukusi huli libundu, ka Dyotelefe wu atondo ubaamonehele watsomi ŋa hati la baana ba libundu mu pasi dyaambu, a hasiingi tumili a bisu ve. 10 Ni mu buuna, ŋa me unza, me utsaangula mambu moosi ma nde ali mu uvanga: mambu ma mabi ma nde ali mu upfutahala bisu. Titswene, nde a hali mu usuka ŋaana ve: nde li mu ubisa uyaka baana ba ngu ba bali mu midyenge. Nde li mu upfubasa kaka baa bubaakana uyaka bo, na nde li mu ubinga bo mu libundu.

11 Mbaahi a me wu litondo, a haduukala mavaanga ma nde ma mabi, ka duukala mavaanga ma mabwe. Wu li mu uvanga ma mabwe li mwaana a Nzambi. Ka woosi wu li mu uvanga ma mabi, a hayaba Nzambi ve.

12 Ka uto ti Demetiyusi, baatu boosi bali mu utiila nde imbangi hi ibwe, napa imbuli hili mu umweese ti nde na mbiili yimbwe. Bisu kaka lili mu utiila nde imbangi hi hibwe, na we yaabi ti imbangi hya bisu hili hya mbuli.

13 Me kini na mambu ma malahi ma ubweyabisa we, ka me a hatondi usonehele we mo mu muhanda na ilapi ve. 14 Lehemene la me mawasa-mawasa, ni li uya huli we na umoho me mwakulu na we. 15 Nyaha hyenze hiba na we! Bambaahi ba we bamiibwehe we. Va mabwehe huli muutu muutu mu bambaahi ba bisu.