1 Me Yude, muviha a Yisu Kristo na mwaana a ngu a Yaki. Me ndi mu utsonehe muhanda mo wunuuwu, huli boosi ba Taata Nzambi hateele, ba nde hatondo na ba nde ubaakeelese mu Yisu Kristo. 2 Nyaha kwili lingebe, hyenze na litondo bi byafulala, bava huli benu.

3 Bambaahi ba me baa litondo, me amba na lehemene li lafulala mu usonehele benu muhanda, mu tooni itwadi hi liyobolo la bisu a benu. Me moni ti, me apfwana usonehele benu nde, mu uhwadisa benu mu ulwana mu tooni a hiitu hi Nzambi haviidi va limosi, huli bisu a benu baatu bangidi. 4 Me ndi mu utsonehele benu, mu tooni ati, ŋa hati la benu baatu bababi bakima, baamiiyakotelele benu mu tswehi. Bo bali baatu ba baavelekiinza Nzambi a bisu, mu usobo bubwe bwa nde mu mbili a bo yi bumbembo. Na bo bali mu utunala ka Yisu Kristo, Mulongisi na Pfumu a bisu mumosi wu. Ka umata beleve, Libuuku la Ngidi laamiiyabisa tsyembili yi bo buyaka. 5 Eye, benu laamiikwayaba maana moosi nzyeni. Ka me ndi mu unzibwala benu moonyi, buni Pfumu hayobili bisu Isereli hu tsi a Ngipiti. Na buni nde hadubi banga mutima ngototo. 6 Yibwalaani moonyi mu bapofi ba baavelikeelese butsitu bwa biita la bo na ba baatimbi nzo a bo. Nzambi amiihada bo mu mapanga ma bitali, hutso a pipidi yinene, tswamina ilumbu hya tsundusu mu uto. 7 Yibwalaani ka moonyi mu bisu Sodoomo na Ngomooro, na baa misyenge mikima mya bebele. Ba baakatsahala mu misyenge mo miina, baaba na mbiili yi butsutsungu we yi bapofi mo baana. Baatu mo baana baakasa bumbembo, na mayamba. Bo bali na tsyembili ya mbaahu yi bilima na bilima. Yina yili kebisili huli baatu boosi. 8 Bumosi ka mu baatu ba baakotilili benu mu tswehi, bubaalooto ma mu baabehe tsumili mu manyutu ma bo. Bo bali mu urokolo lituma la Nzambi, na bo bubaatuha bapofi ba muyusu a hu yulu. 9 Tso mukuutu bapofi Mikayeli, a hasa buuna ve. Mu taangu yi nde hakasa litsotso na Saatana mu tooni a mvumbi a Moose, Mikayeli a hakesili nde tsyembili bituhi ve. Ka ndulu nde aleeli bunubu: «Nyaha Pfumu asyembe we!»

10 Ka baatu mobaniba bali mu urokolo bi bo baaveletsikaha. Na bi bo baayaba, bo baayaba byo we bibulu bya bwadi bi byavele buyedi. Mbiili mo yiina yili mu ubungasana bo. 11 Lingebe huli bo! Mu tooni ati, bo baasumihi we musumihi Kayini. Bo baadungi mu tooni a lingi la mbongo, we bu mumbihuli Balaami hasiidi. Bo baakwidi mu tooni ati, bo baatumbihi we bu Kore hasiidi.*. Balaami utala Mat 31.16. Koreutala Mat 16.1-35. 12 Baatu mo baana, bubaayungasa na bubaabiyasa mikungi mya benu mi udya, mi itwadi hya baana bangu. Bo bubaadya itwadi na benu hwavele buyumu, na bo ubaatsima ndulu bo mwakulu. Bo bali we mayidu ma maleme, ma mavelenohese mvula, ma bifula bibaabita. Bo bali we miti mi myavelebuta mbutu, tso ŋa mwanga. Na bu bamitupala myo, myo mibaakwa kwa yoole. 13 Bo baafwanina na mapo ma mifudi ma mubu. Bo bali mu utswamisa ŋa busu bwa bo, mavaanga ma bo ma tsonyi. Mavaanga mo maana mali we mafudi ma mbindu yi mapo mu baatsindala. Bo bali we bamvwelele baa mikila. Na Nzambi amiiswehele bo mbuha a nzyeni hutso butsuhu bu bwafulala pipidi. 14 Enooke, kaaha a bisu wu mutsambu mu imbisa hya Adami, abihuli mu tooni a baatu mo bababi baana. Nde abihuli: «Yuhaani: Pfumu sa aya na biveeve na biveeve bi bapofi ba nde bangidi, 15 mu utsundasa baatu boosi. Pfumu sa asyembe banga masumu boosi mu tooni mavaanga ma mabi. Pfumu sa asyembe bo, mu tooni bituhi bi baatu mobaniba, ba baavele na buyumu baapalisi mu nde.» 16 Baatu mo baana a bubaaba na kinya ve, bo bali mu uŋono taangu yoosi mu idiingu hya bo. Bo bali mu udukala manzala ma linyungi la bo. Minywa mya bo mili mu upalisa mambu ma nyehe, ma usohese baatu mu ubaha kaluha.

17 Ka huli benu bambaahi ba me, yibwalaani moonyi mu mambu ma biluumbi bya Pfumu a bisu Yisu Kristo, byayabisi benu hutsomi. 18 Byo baayabisi benu: «Hu tsukusu a taangu, sa huba na bakwedi. Bo bukaakwede Nzambi na baatu ba nde. Na baa bukaadyata we bu huli matsimi ma mabi, ma mu utahusa bo na Nzambi✝.» 19 Ni bo baana, bali mu ubehe buraandu! Bo bubaaduukala matsimi ma nyutu a bo, na Livupu la Nzambi a lili mu bo ve.

20 Ka benu, bambaahi ba me ba mutima, hwadaani mu ukula mu imiinu hya ngidi hya benu. Sambilaani mu matwala ma Livupu la Ngidi. 21 Kwilalaani ka hutso litondo la Nzambi, mu ukeele Pfumu a bisu Yisu Kristo. Mu bubwe bwa nde, benu luubaha moonyi wu bilima na bilima. 22 Baani na kwili lingebe mu baatu ba bakini na matsika. 23 Huli na bakima baa benu luutwala uyobolo, mu upalisa bo hutso a mbaahu. Huli bakima ka, kwilaani bo lingebe, kwili lingebe yi buyedi bwosi. Ka mu ukwila bo lingebe, baakelaani ukubaana bikutu bya bo, bi bili na mapiti ma mavaanga ma bo ma musunya.

24 Nzambi li na matwala ma ukeelese benu, mana benu livelebwa mu masumu. Na nde ni wu usa ti, benu limonehele baatu ba baavele ipiha, na ba baaluula mu kinya ŋa busu bu muyusu a nde. 25 Nde li Nzambi mosi ndulu, ni nde ayobili bisu mu likumbasa la Yisu Kristo, Pfumu a bisu. Nyaha muyusu, bunene, matwala na lituma, biba na nde umata pangili a tsi, bunubu na mu bilima na bilima! Ameni.