1 Libuuku mo liniili lili na nzabisili yi Yisu Kristo hayaka. Nzambi aviidi nde yo mana nde amweese huli basalili ba nde mambu ma muuvangama masulubete ma. Kristo atsindihi pofi a nde huli musalili a nde Yowani, mu uyabisa nde yo. 2 Yowani li mu uta imbangi ti moosi ma nde hamoni, mali mambu ma Nzambi na imbangi hya Yisu Kristo. 3 Kinya yili huli muutu wu li mu utanga libuuku mo liniili! Kinya yili huli ba bali mu uyuha tsangu a mbihulili mo yiniiyi, na ba bali mu ukeelese Mabasonehe muuna! Mu tooni ati, taangu yi mambu mo maana muuvangama, yaaka bebele.

4 Ni me Yowani ndi mu utsonehele huli mabundu tsambu ma mali hu itaanzi hya Asiya:

Nyaha Nzambi wu li, wu aba na wu li mu uya, na mavupu tsambu ma mali ŋa busu bwa kiti-ipfumu hya nde, basyeme benu na bava benu hyenze, 5 na nyaha Yisu Kristo nde kaka avanga bumosi mu benu. Nde wu li mbangi wa ngetetee, Pasa-mabeelo, watsomi wu asuuha ŋa hati la babaakwa, nde li kaka Pfumu bapfumu ba toto. Kristo atondo bisu na nde ayobolo bisu mu masumu mu makila ma nde. 6 Yisu akitusi bisu baa ipfumu hi bangaanga ba Nzambi, mu tooni usalila Nzambi Taata a nde. Nyaha muyusu na matwala biba bya nde taangu yoosi! Amen.

7 Monwaani, nde aka mu uya hutso mayidu! Baatu boosi buumono nde, tso ba baapihi nde kongo mu libanzi. Mabuli moosi ma ŋa toto, sa malila mu tooni a nde. Eye, sa buba buuna! Amen.

8 «Me ni Alafa na Omenga.» Huleeli Pfumu Nzambi. Nde wu li, wu aba na wu li mu uya, Pungu Matwala.

9 Me Yowani, mwaana a ngu a benu, me ndi mu umono pasi na benu, itwadi na benu, me ndi wu Ipfumu hya Nzambi na me ndi na mukonono mu uba wu akangama mu Yisu. Baakangi na baabiti me hu iliiŋa hya Patamose, mu tooni Mukuma a Nzambi na imbangi hya Yisu. 10 Mu ilumbu hya Pfumu, Livupu la Ngidi laakaangi me, na me anzuhi humbisa a me ndaha yi mifudi, we ndaha a kulambeete. 11 Ndaha yakaleele bunuubu: «Sonehe mutso a libuuku, mambu moosi ma we li mu umono. Na tsindaha libuuku mo huli mabundu tsambu maniima: hu Efeso, hu Simirine, hu Perengami, hu Tyatire, hu Sarede, hu Filadelefi na hu Lawodise.»

12 Me kinguha mu umono na akatsuha huli me, me amoni bisiha tsambu bya wolo, bi bubaasuusala minda. 13 Ŋa hati la byo, me amoni hya moonyi hi hyafwanina na muutu*. Muutu mo wuuna aba alwaata muroopo wu akulamana natee hu miilu. Nde aba alwaata mudi a luungu wa wolo mu butulu bwa nde. 14 Mutswe na naanga a nde, byaba byafuuka we myoso mi mifuuka mi limeme, lifuuku li lafulala vee. Miisu ma nde maakalulaha we ludi la mbaahu. 15 Miilu mya nde myakamwedeme we itali hi himiibeenge hutso a mbaahu. Na ndaha a nde yaakapala we kele mapuba ma manene. 16 Nde aba akaanga bamvwelele tsambu ŋa kaka la nde la mbahala. Na sabila a mengo moole wu ato, akapala mutso munywa a nde. Hiinzi hya nde hyakamwedeme we taangu a mwangulu. 17 Ŋa me amoni nde, me ambwidi ŋa miilu mya nde, we muutu wu miikwa. Nde asuusili me kaka la mbahala, na aleeli: «A baa na boomo ve! Ni me ndi watsomi na wa tsukusu✝. 18 Me ndi muutu wa moonyi. Me amba amiikwa, ka bunuubu me ka moonyi mu bilima na bilima. Me ndi na batsaafi baa lipfu na baa tsi a babaakwa. 19 Sonehe mambu ma we li mu umono: ma mali mu uvyoho mu taangu mo yiniiyi, na ma mu uvangama mu bilumbu bi byuya. 20 Mono mbindulili a tswehi bamvwelele tsambu ba we li mu umono ŋa kaka la me la mbahala, na miinda tsambu mya wolo ni yiniiyi: bamvwelele tsambu ni bapofi ba mabundu tsambu mo maana, na miinda tsambu ni mabundu tsambu mo maana.»