1 Ŋa Mwana Limeme hamaasi bwiingu bu mutsambu, yulu loosi laasiidi swii mu itini hya ngunga. 2 Me amoni bapofi batsambu baateleme ŋa busu bwa Nzambi. Baaviidi bo bakulambeete tsambu. 3 Pofi mukima ayateleme ŋa pedu a itsuhili hya paha. Nde aba akaanga itsuhili hya paha hya mu wolo. Baaviidi nde paha yindahi ya tsulu yimbwe, mana nde atsuha yo na masambulu ma baatu bangidi, ŋa yulu a diiku la mu wolo li lili ŋa busu bwa kiti-ipfumu. 4 Mwiiki a paha a tsulu yimbwe na masambulu ma baatu ba ngidi, byakumi umata ŋa kaka la pofi, natee ŋa busu bwa Nzambi. 5 Titswene, pofi avoli itsuhili hya paha, aluusi hyo mu makala ma mbaahu ma mu diiku la tsuhili bungodu na abumi hyo ŋa toto. Masulubete, toto yanyingimi, banzyedi baabaandi, hwaba mandaha na mivedi-a-vedi.

6 Bapofi tsambu ba baaba na bakulambeete, baakavangama mu ufula bo.

7 Pofi watsomi afuli kulambeete. Mvula mamanya na mbaahu bi byapfuutini na makila, baabwahi byo ŋa toto. Kabu limoosi mu matatu la toto laanyengi, kabu limoosi mu matatu li miti laanyengi, na biimbu byosi bya mamba✝ byaanyengi.

8 Pofi waboole afuli kulambeete. Isiha imosi hi hyafwanina na isyelo hiinene hi hili mu unyenge, baabwahi hyo hutso mubu. Na Kabu limoosi mu makabu matatu li mubu, laakituhi makila, 9 kabu limoosi mu matatu li bivaangu bya moonyi bi byaba hutso mubu laakwidi, na kabu limoosi mu matatu li makuumbi laanyambihini.

10 Pofi wu mutatu afuli kulambeete. Mvwelele wu munene wu akalulaha we munyangi, abwidi ŋa toto umata hu yulu. Nde abwidi ŋa yulu a kabu limoosi mu matatu li banzali, na ŋa yulu mitswe mi banzali. 11 Nduhi a mvwelele mo wuuna: «Abisinti»*. Kabu limoosi mu matatu la mamba, laakituhi kali, na ba balahi mu baatu ba baanywidi mamba mo maana, baakwidi mu tooni a kali a mamba.

12 Pofi wu muna afuli kulambeete. Baateti kabu limoosi mu matatu la taangu, la tsuungi na li bamvwelele, mana kabu limoosi mu makabu matatu liba mu piipidi, na mana ilumbu hidymbasa kabu limosi mu matatu li liyalala la hyo, bumosi kaka we ŋa butsuhu✝.

13 Me ambwetala, me anzuhi ngo-nyunyi mumosi wu akadumaha hu hati a yulu, na ubaaleele mu mifudi: «Lingebe! Lingebe! Ki pila lingebe huli baatu ba bali ŋa toto, mu taangu yi bapofi batatu bakima buufula bakulambeete ba bo!»