1 Pofi wu mutaanu afuli kulambeete. Me amoni mvwelele abwidi ŋa toto umata hu yulu. Baaviidi nde tsaafi a mbeenge ya doheselee. 2 Mvwelele adibuli mbeenge ya doheselee. Mwiki wu apali muuna, aba afwanina na mwiki a furunu yinene, taangu na livupu byapiindi mu mwiki mo wuuna. 3 Makooko maapali hutso a mwiki na maatsamuhi ŋa toto yoosi. Baaviidi mo matwala ma we ma bangeenge baa toto. 4 Baalihi mo mu usa bubi mu biimbu bya toto, tso byosi bi bibaamene, tso miti. Ka ndulu huli baatu ba baavele na iliimbu hya Nzambi mu biinzi bya bo. 5 Baaviidi mo muswa wu unyongese baatu mo baana mu batsungi bataanu. Ka a mu uduba bo ve. Munyongi mibaandu mi makooko, aba we munyongi wu li ŋa ngeenge amiikaha muutu. 6 Mu bilumbu mo biina, baatu bu usaha lipfu, ka bo a buusoolo lo ve. Bo bu usaha ukwa, ka lipfu luubata bo.

7 Makooko mo maaba maafwanina na babuuru ba baamiivangimasa mu mudiingu. Mu yulu mitswe mya bo, hwaba na bisiha we mitata mya mu wolo, na biinzi bya bo byaba we biinzi bya baatu. 8 Mo maaba na naanga yinda, na miinyu ma bo we miinyu ma bakosi. 9 Matulu ma bo maaba we ma baalwaatisa ikutu hi mudiingu hi itali. Na kele mapapi ma bo, yaaba we kele makuumbi ma midiingu ma babuuru ba balahi bali mu ubita tiinu hu mudiingu✝. 10 Makooko mo maaba na mikila we mikila mi bangeenge mi mili na mikumba. Ni mu mikumba mo miina, mo maaba na matwala ma unyongese baatu mu batsungi bataanu. 11 Mukuutu wu akatuma mo, ni pofi a mbeenge ya doheselee. Nduhi a nde mu Ibeleho ni Abadoni na mu ndaha Ingereke ni Apolyoni*.

12 «Lingebe» latsomi limiivyoho. Humbisa, mambu moole makima ma lingebe muubweya.

13 Pofi wu musamunu afuli kulambeete. Buuna, me anzuhi ndaha mosi yapali hu matsoso mamana ma diiku la tsuhili bungodu la mu wolo, li lili ŋa busu bwa Nzambi; 14 ndaha mo yaleeli huli pofi wu musamunu wu aba akaanga kulambeete: «Nyangula bapofi babana ba baahada mapanga ŋa yulu a nzali wu munene wa Efarate». 15 Buuna baanyanguli bapofi mo babana baana, ba baaba baavangama mu uduba kabu limoosi mu makabu matatu li litangu la baatu ba ŋa toto, mu ngunga mo yiina, mu ilumbu mo hiina, mu tsungi mo wuuna, mu ilima mo hiina. 16 Baaleeli me litangu li masadaadu ma ŋa yulu babuuru. Mo maaba makama moole ma bamiliyon (2 000 00000). 17 Na mu imono-miisu, me amoni babuuru na baatu ba baaba ŋa yulu a bo: Bo baaba baalwata bikutu bi bitali bi bibeenge we mbaahu. Bikutu mo byaba na mwindu a safiire, na mwindu a suufe. Mitswe mi babuuru myaba we mitswe mi bakosi. Mu minywa mya bo hwakapala mbaahu, mwiki na suufe. 18 Kabu limoosi mu matatu li litangu la baatu ba ŋa toto, baakwidi mu tooni mapasi mo mamatatu maniima: mbaahu, mwiki na suufe bi byakapala mu minywa mi babuuru. 19 Mu tooni ati, matwala ma babuuru mali mutso minywa mya bo, na mutso mikila mya bo. Mikila mya bo mili we bataadi. Myo mili na mikumba, mi bo bubaasalila mu usiila baatu bubi.

20 Kabu la baatu li laasaali, boosi ba baavelikwa mu mapasi mo maana, a baasobi mbiili a bo ve. Bo baahwadi mu ukongemene matengo, bifwita bya wolo, bya mbongo, bi itali hi ibeenge, bi mamanya na bi miti, bi byuveletwala tso umono, tso uyuha, tso uyene.

21 Bo a baanyahi kaka uduba hwa baatu ve. Ka bo baahwadi mu bungaanga bwa bo, mu mayamba ma bo, na mu mayiba ma bo.