1 Titswene, me amoni libuuku li laafwanina na muhanda wu baapoto ŋa kaka la mbahala la muutu wu aba atsahala ŋa kiti-ipfumu. Libuuku mo aba baasonehe hu hati na hu mbadi a lo. Baaba baahada lo mu mikudu tsambu, na baabadiha bwiingu mu pasi mukudu. 2 Titswene me amoni pofi nga matwala, wu akata ibila mu mifudi: «Na li na lituma li unyangula mikudu na umaasa bwiingu?» 3 Ka muutu tso mumosi, tso hu yulu, tso ŋa toto, tso hu tsina a toto, a hatwali udibula libuuku tso utaanga lo ve. 4 Me andili huulahi mu tooni ati, muutu a hasolihi ve, wu atwali udibula libuuku na utaanga lo. 5 Na mumosi mu Mikukunyungu aleeli me: «Nyaha ulila! Tala! Kosi a buli la Yuda, li imbisa hi mutumi Davidi✝ miibiinga mudiingu. Nde li na matwala ma umaasa bwiingu na udibula libuuku.»

6 Na me amoni Mwana Limeme ateleme ŋa butima bwa kiti-ipfumu, bivaangu bya moonyi mo bibina na mikukunyungu, baaba baadiinga nde. Nde aba we wu baahehe likiingu. Nde aba na matsyembo tsambu, na miisu tsambu, ma maaba mavupu tsambu ma Nzambi ma baatsindihi mu toto yoosi. 7 Mwana Limeme asusihi na avoli libuuku mo ŋa kaka la mbahala la wuuna wu aba atsahala ŋa yulu a kiti-ipfumu. 8 Na mu mawasa, hu mbisa a hu nde havoli libuuku, bivaangu mo bya moonyi bibina na mikukunyungu maku moole mina, baatsokimi ŋa busu bwa Mwana Limeme. Mumosi mumosi mu bo aba akaanga mungongo a nde na mambungu ma wolo, ma maaluula mu paha a tsulu yimbwe, ni masambulu ma baatu ba ngidi. 9 Na bo baakayimba mukuunga wu munyatihi:

«We li na matwala ma uvolo libuuku

na ma umaasa bwiingu.

Ka baahehi we likiingu,

na mu makila ma we,

we ayobili baatu mu ubita bo huli Nzambi:

baatu ba bibandu byosi,

baa mandaha moosi,

baa mabuli na matsi moosi.

10 We akitusi bo baa ipfumu

na bangaanga ba Nzambi

mu usalila Nzambi,

na bo sa babaatuma ŋa toto.»

11 Bu me akatali, me anzuhi ndaha bapofi ba balahi. Bo baaba biveeve na biveeve. Bivaangu bya moonyi na mikukunyungu baaba baadiinga kiti-ipfumu. 12 Bo baakayimba mu ndaha yi mifudi:

«Mwana Limeme wu baadubi,

li wu akuha mu uyaka matwala,

busina, tsiki, mifudi,

butsitu, muyusu na nyimbu!»

13 Me anzuhi kaka bivaangu byosi bi Nzambi havangi bi bili hu mayulu, ŋa toto, hu tsina a toto na hutso mubu, byakayimba bunuubu:

«Huli wuuna wu atsahala ŋa kiti-ipfumu

na huli Mwana Limeme,

muyusu, butsitu, na matwala

mu bilima na bilima!»

14 Bivaangu bya moonyi bibina byaleeli: «Amen!» Na Mikukunyungu myakongimini mu ukuunda.