1 Titswene, me amoni hu yulu, iliimbu ikima hiinene na hya kimuhili, bapofi tsambu baaba baakaanga mapasi tsambu. Maana ni mapasi ma tsyelele, mu tooni ati, ni mu mo kesi a Nzambi ya tsukusu yi umonehele.

2 Na me amoni mubu wu akamonehele yanga-yanga we mulingu wu apfuutana na mbaahu. Boosi ba baabiingili ibulu, ifwita hya nde na litangu li laayelemene na nduhi a nde, baaba baateleme ŋa yulu mubu wa yalalaa wuuna. Pasi muutu mu bo aba akaanga mingongo mya Nzambi. 3 Bo bali mu uyimba dyimbu la Moose, musalili a Nzambi, na dyimbu la Mwana Limeme:

«Pfumu Nzambi Pungu Matwala,

mavaanga ma we mali ma manene na ma kimuhili!

We li Pfumu a mabuli moosi,

manzila ma we mali ma tsiitsa na ma mbuli!

4 Pfumu, na uyehele uvelekiinza we?

Na ubisa uva we muyusu?

Mu tooni ati, ndulu we li wa ngidi,

baatu boosi buuyaakongemene we,

mu tooni ati, butsiitsa bwa we bumiimonehele✝.»

5 Hu mbisa a maana, me amoni hu mayulu mbuha a ngidi, ngooto a ngidi ya nzuhisini a Nzambi, yaadibumi. 6 Bapofi batsambu ba baaba baakaanga mapasi matsambu, baapali hu mbadi a mbuha a ngidi. Bo baaba baalwata bikutu bya lino, bi lifuuku li libaamwedeme. Bo baaba na midi mya mu wolo mu luungu. 7 Ivangu hya moonyi imosi ŋa hati li bivaangu bya moonyi bibina, hyaviidi huli bapofi batsambu, bikoombe tsambu bya mu wolo bi byaluula mu kesi a Nzambi, wu li moonyi mu bilima na bilima. 8 Mbuha a ngidi yaaluuli mu mwiki, mu tooni muyusu na matwala ma Nzambi✝. Muutu tso mumosi aba utwala ukoto hu mbuha a ngidi ve, tswaamina mapasi matsambu ma bapofi batsambu mafwa.