1 Humbisa a mambu mo maana, me anzuhi hu mayulu, ndaha yi mifudi, we ya konge a baatu. Yo yaakaleele:

«Haleluya!

Liyobolo, muyusu na matwala bili bya Nzambi a bisu!

2 Matsundusu ma nde mali ma mbuli na ma butsiitsa!

Nde asyembi lilaala li linene

li laakayuya baatu ba toto mu bumbembo bwa lo.

Nzambi miikambisa nde makila ma basalili ba nde baa hoho hwa nde hwadubi.»

3 Bo baabweleele: «Haleluya! Mwiki a musyenge wu munene wu baatsuhi, li muukumasa mu bilima na bilima!»

4 Mikukunyungu maku moole mina mo, na bivaangu bya moonyi bibina, baakongimini na baakuundi Nzambi wu li mu utuma ŋa kiti-ipfumu. Bo baaleeli: «Amen! Haleluya!»

5 Ndaha yapali ŋa kiti-ipfumu. Yo yaakaleele: «Yimbalaani Nzambi a bisu, benu basalili ba nde boosi. Benu baa lili na boomo bwa nde, bakuutu we bangebe!» 6 Titswene, me anzuhi ndaha yinene we ya konge a baatu. Yo yaaba we mapuba ma banzali, we bidumu bi banzyedi bi mifudi. Yo yaakaleele:

«Haleluya!

Mu tooni ati, Pfumu Nzambi a bisu Pungu matwala,

amiivangimasa ipfumu hya nde!

7 Libaani mu kinya na lifulalaani mu musaangu,

livaani nde muyusu!

Mu tooni ati, taangu mukungi a makweele ma Mwana Limeme yimiito,

nuumba a nde makweele amiivangama!

8 Baatumi nde mu ulwata ikutu hya liino hya talu,

hi hibaamwedeme na hi hyatsyeme.»

Tsanda a liino ya talu yiina ni mavaanga ma tsiitsa ma baatu ba Nzambi.

9 Pofi aleeli me: «Sonehe: kinya yili na ba baateele hu mukungi makweele ma Mwana Limeme!» Nde ni ubweleele: «Maniima mali mambu ma mbuli ma Nzambi nde mwakulu amiileele.»

10 Buuna, me atsokimi ŋa miilu mya nde mu ukuunda nde. Ka nde aleeli me: «A sa buuna ve! Me musalili we we me ndi, we baana ba ngu a we ba bali ngetetee mu imbuli hi Yisu hamweesi. Ni Nzambi ndulu we afwana ukuunda!» Ka imbuli hya Yisu bu himiimonehele, hyo hibaava matwala huli mimbihuli.

11 Na me amoni yulu laadibuma, na buuru wu mufuuka amonihili ŋa busu bwa me. Wu aba ŋa yulu a nde nduhi a nde wa «ngetetee» na wa «mbuli». Nde ubaatsundasa na ubaalwana na butsiitsa. 12 Miisu ma nde mali mu ulula we ludi la mbaahu, ŋa yulu mutswe a nde hu li na mitata mi milahi. Nde li na nduhi yi baasonehe, yi ndulu nde mwakulu hayaaba. 13 Nde alwati iyunga hi hyayobohono makila. Nduhi a nde «Mukuma a Nzambi». 14 Makonge ma balwani ma hu yulu maakabaduukala nde. Mo maaba ŋa yulu babuuru ba bafuuka na maaba maalwata bikutu bya talu bya liino, li lifuuka na li laatsyeme. 15 Mu munywa a nde, hwakapala sabila a nduunga mu utete mabuli. Nde sa abita mabuli moosi na lituma li linono, na nde sa anyihula mbutu a vinye mu inyihuli hya kesi yi mifudi ya Nzambi Pungu matwala. 16 Ŋa yulu iyunga hya nde mu masungimini ma ibelo, baaba baasonehe nduhi mo yiniiyi: «Mutumi batumi na Pfumu bapfumu». 17 Titswene, me amoni pofi ateleme hutso a taangu. Nde afulihi mu ndaha yi mifudi huli banyunyi boosi ba baakadyengele hu hati a yulu: «Yaani, kuukamaani mu tooni mukungi wu munene wu udya wa Nzambi! 18 Yadyaani musunya batumi, musunya bakuutu ba masadaadu, musunya a banga matwala, musunya babuuru na wu babiti ba bo. Musunya a baatu boosi ba bali bunyanga na ba bali baviha, bangebe na bakuutu.» 19 Titswene, me amoni ibulu, batumi baa toto na makonge ma bo ma masadaadu, baakuukama mu ulwanisa wu atsahala ŋa yulu a buuru na konge a nde yi masadaadu. 20 Baakangi ibulu na mumbihuli wu mapfuta, wu asiidi biliimbu bya kimuhili mu nduhi ibulu, mu udungasa ba baayaki iliimbu hi ibulu, ba baakakongemene ifwita hya nde. Baabwahi bo baboole baa moonyi, hutso a dyanga la mbaahu a suufe. 21 Masadaadu ma maasaali baadubi mo mu sabila wu li mu upala mu munywa a wu anama ŋa yulu a buuru, na banyunyi boosi baaywati bu baadiidi misunya mya bo.