1 Me ambwetala: me amoni Mwana Limeme aba ateleme ŋa yulu isyelo hya Syoni. Itwadi na nde, hwaba biveeve kama maku mana na bina (144 000) bya baatu, ba baaba baasonehe nduhi a Limeme, na ya Taata a nde mu libunzu la bo. 2 Me anzuhi ndaha mosi yi yaakamata hu yulu, yaakapala we puba a mamba yinene na we idumu hi mifudi hya nzyedi. Na munyingu wu me anzuhi, aba we munyingu mi mingongo mi baatu bali mu usiha. 3 Biveeve mo bya baatu byakayimba dyimbu li linyatihi ŋa busu bwa kiti-ipfumu, ŋa busu bu bivaangu bya moonyi bibina na ŋa busu bu mikukunyungu. Muutu tso mumosi a hakitwala uyiha dyimbu mo liina ve, ndulu ni biveeve kama maku mana na bina (144 000) bya baatu ba Nzambi haayobili ŋa toto.

4 Bo a baasumini nyutu abo mu upala na bakaasu ve, ka bo baakeelisi bungidi. Bo bali mu uduukala Mwana Limeme pasi hu nde ali mu uyene. Nzambi ayobili bo ŋa hati la baatu ba tsi, mana bo baba baatu baatsomi baa buuyeholo huli Nzambi na huli Mwana Limeme. 5 Mu minywa mya bo, a hu li na mambu ma upfuta ve. Bo a bali na dyaambu li buutwala usyembe bo ve.

6 Titswene, me ambwemono pofi mukima wu akadumaha hu hati a yulu. Nde aba na Musamu wu Mubwe wu bilima na bilima wu uyabisa huli baatu ba ŋa toto, huli baatu ba matsi moosi, huli baatu ba bibandu byosi, baa mandaha moosi na baa mabuli moosi. 7 Nde akaleele mu ndaha yi mifudi: «Kiinzaani Nzambi na vaani nde muyusu, mu tooni ati taangu a tsundusu a baatu yimiito. Kongemenaani ŋa busu bwa wu avanga yulu, toto, mubu, na mitswe mi banzali!»

8 Pofi mukima waboole, ayaduukala watsomi na uleele: «Nde miibwa, nde miibwa, musyenge wu munene: Babylooni! Nde anywisi mabuli moosi vinye yi bunuumba bwa nde bu bwafulala!»

9 Pofi mukima, wu mutatu wu aduukili bapofi boole batsomi akaleele mu ndaha yi mifudi: «Tso muutu kongimini ŋa busu bu ibulu na ifwita hya nde, na tso nde yaki iliimbu ŋa libunzu buuve ŋa kaka, 10 nde unywa kaka vinye a kesi ya Nzambi. Yo ni vinye yi baavelesoho na iloho ikima, na Nzambi usyeholo yo mutso a mbungu a nde ya kesi. Boosi ba buusa buuna, buunyongese bo hutso a mbaahu a suufe ŋa busu bu bapofi bangidi na ŋa busu bwa Mwana Limeme. 11 Mwiki a mbaahu wu li mu unyongese bo, ukaakumasa mu bilima na bilima. Butsuhu na nyangu, ba bali mu ukongemene ŋa busu bu Ibulu na ŋa busu bu ifwita, a bali mu uvuma ve. Na pasi muutu wu li mu uyaka iliimbu hya nduhi a nde kaka a hali mu uvuma ve.» 12 Ni mu buuna, yiniiyi ka ni taangu yi mukonono huli baatu ba Nzambi, ba bali mu ukeelese matumili ma nde, na ba bali mu usa imiinu mu Yisu.

13 Titswene me anzuhi ndaha mosi hu mayulu yakaleele me: «Sonehe mambu mo maniima: "Kinya yili huli ba bali mu ukwa mu tooni isalu hya Pfumu, mu taangu mo yiniiyi!" Livupu lileeli ti: "Eye, bo buuvuma hu mbisa bisalu bya bo bi binono, mu tooni ati mavaanga ma bo ma mabwe mali mu uduukala bo!"»

14 Me amoni yidu li lifuuka. Na ŋa yulu a yidu hwaba hwatsahala wu afwanina na mwaana a muutu✝. Nde aba alwata mutata wa mu wolo mu mutswe a nde. Na nde aba akaanga ŋa hooho, mukwati wu ato. 15 Pofi mukima apali mu nzo a Nzambi. Nde akafulaha mu mifudi huli wu aba atsahala ŋa yulu a yidu na ubaaleele: «Volo mukwati a we na kese mihunu. Yiniiyi ka ni taangu yi utsonzehe mu tooni ati, mihunu mya toto mimiiyele!✝» 16 Ni mu buuna, muutu wu aba atsahala ŋa yulu a yidu, avoli mukwati a nde, na akesi mihunu mya toto.

17 Pofi mukima apali mu nzo a Nzambi yi yili hu yulu. Nde kaka aba akaanga mukwati wu ato.

18 Pofi mukima kaka wu aba na matwala ma utuma mbaahu, apali hutso a diiku li bubaatsuha bungodu. Mu mifudi myosi, nde aleeli huli pofi wu aba akaanga mukwati wu ato: «Volo mukwati a we wu ato, na kese bisaka bya mbutu a vinye ya toto. Mu tooni ati, mbutu a vinye yaamiiyele.» 19 Pofi avoli mukwati a nde wu ato, na nde atsonzihi mbutu a vinye ya toto. Nde abwahi mbutu hutso inyihili hinene hya kesi a Nzambi. 20 Baanyihi mbutu a vinye hutso inyihili hu mbadi musyenge. Makila ma maapali mu inyihili, maatoodi natee mu mutaabu munywa a buuru*. Makila mo maapuhimi mu iteesi hi bakilometere makama matatu (300)✝.