1 Iliimbu hiinene hyamonihili hu mayulu: mukaasu mumosi alwata taangu we ikutu. Tsuungi aba hu tsina a miilu mya nde, na mutata nga bamvwelele kuumi na boole ŋa yulu mutswe a nde. 2 Nde aba na yimi, na nde akafulaha mu pasi mibaandu mi misoongo.

3 Iliimbu ikima hyamonihili hu mayulu: ibulu hya nduhi a Darango*, hi libengu la mbaahu, hyaba na mitswe tsambu na matsyembo kuumi. Na ŋa yulu a pasi mutswe hwaba na mutata. 4 Mu mukila a nde, nde adutihi kabu limosi mu makabu matatu hi litangu li bamvwelele baa hu yulu, na nde abwisi bo ŋa toto. Ibulu hya kimuhili hiinene hi hili na mapapi, hyatelimi ŋa busu bu mukaasu wu aba bebele na ubuta, mana hyo hydya mwaana wu nde huubuta. 5 Mukaasu abuti mwaana wa bahala, wu utuma matsi moosi na likaanda li itali✝ mu myoho. Mawasa-mawasa, Nzambi amaasi mwaana, asuusi nde ŋa pedu a nde na ŋa pedu a kiti-ipfumu hya nde. 6 Na mukaasu abati hu kumu a nzala, hu Nzambi haba hamiivangila nde mbuha. Mana abuungala nde mu iveeve imosi makama moole na maku masamunu (1 260) ma bilumbu.

7 Buuna, mudiingu abwiidi hu mayulu. Mikayeli na bapofi ba nde, baalwanisi ibulu hya kimuhili hi hili na mapapi. Ibulu hya kimuhili na bapofi ba nde baalwani. 8 Ka Mikayeli na bapofi ba nde baabiingili ibulu. Na ibulu hya kimuhili hi hili na mapapi, na bapofi ba nde a baabwebaha mbuha hu yulu ve. 9 Baatsindihili ibulu hya kimuhili hi hili na mapapi hiinene hu mbadi, hyo hili taadi a tsomi, nga nduhi mukuyi na Saatana, wu ubaasoho baatu ba toto yoosi. Baabwisi nde hu toto, na bapofi ba nde✝.

10 Buuna, me anzuhi ndaha mosi yi mifudi hu yulu yi yaakaleele:

«Yiniiyi ka ni taangu liyobolo,

taangu yi Nzambi a bisu huumweese matwala ma nde,

na Ipfumu hya nde.

Tangu mo yiniiyi, lituma lika mu myoho mya Masiya ma nde,

mu tooni ati, bamiibwaha mukesi a bana baa ngu ba bisu hu mbadi,

nde ni wu akakese bo nyangu na butsuhu ŋa busu bwa Nzambi a bisu.

11 Ka baana ba ngu ba bisu baabiingili nde,

mu makila ma Mwana Limeme,

na mu mambu ma bo baatiili imbangi.

Bo baayehuli idiingu hya bo,

natee mu usiinga lipfu.

12 Ni mu buuna, baani mu kinya! Mayulu

na benu boosi ba lili mu utsahala huuna,

ni lingebe huli benu, toto na mubu!

Mu tooni ati, mukuyi amiikulamana huli benu,

na kesi yi mifudi,

bu nde ayabi ti, taangu ndulu hole yimiisaala nde.»

13 Ŋa ibulu hya kimuhili hi hili na mapapi hyamoni ti bamiitsindahala nde hu toto, nde abaandihi ubingasa mukaasu wu abuti mwaana wa bahala. 14 Buuna, baaviidi mapapi moole ma mbida wu munene huli mukaasu, mu udumaha natee hu mbuha yi baaba baamiivangila nde hu kumu a nzala, lala na taadi. Mana babuungala nde huuna, mu bilima bitatu na batsungi basamunu. 15 Taadi aluhi mamba we nzali wu munene hu mbisa mukaasu, mana nyamba yibita nde. 16 Ka toto yakumbisi mukaasu. Yo yadibumi na yamini nzali wu ibulu hya kimuhili hi hili na mapapi hyapalisi mu munywa a nde. 17 Bu nde haluli mu kesi mu mukaasu mo wuuna, ibulu hya kimuhili hi hili na mapapi, hyayalwanisa baa imbisa hi mukaasu bakima ba basaali. Bo ba bali mu ukeelese mikele mya Nzambi na ba baakangama mu imbuli hi Yisu ali mu uyabisa. 18 Na ibulu hya kimuhili hi hili na mapapi, hyatelimi ŋa muvanga mubu.