1 Titswene, me amoni ibulu imosi hyapali mu mubu. Hi hyaba na matsyembo kuumi, na mitswe tsambu na mutata ŋa yulu a pasi tsyembo, ŋa yulu mitswe mya nde, baasonehe manduhi ma utuha Nzambi. 2 Ibulu hi me amoni, hyaba we ngo, miilu mya nde myaba we mya imbungu na munywa a nde we wa kosi. Ibulu hya nduhi a Darango hyaviidi nde matwala ma nde, kiti-ipfumu hya nde na lituma la nde li linene✝. 3 Mutswe mumosi ŋa hati li mitswe mi Ibulu, aba we wu amiisumbaha mu iteesi hi lipfu, ka libuma la nde laabeeluhi. Toto yoosi yaakoti hutso a kimuhili, na yaaduukili Ibulu. 4 Baatu baakongimini ŋa busu bwa Darango. Mu tooni ati, nde aviidi lituma huli Ibulu. Bo baakongimini kaka ŋa busu bu Ibulu na ubaalele: «Na afwanina na Ibulu? Na utwala ulwanisa hyo?»

5 Baaviidi Ibulu lituma li ubaapalisa mambu ma isaayi, na bituhi. Na hyo hyabahi kaka lituma li ubaavanga moosi ma litondo la nde, mu batsungi maku mana na boole. 6 Nde abaandihi mu ubaatuha Nzambi, mu ubaatuha nduhi a Nzambi na ngooto a ngidi a nde, napa boosi ba bubaatsahala hu yulu. 7 Nde ayaki lituma li ulwanisa buli la baatu ba Nzambi na ubiingala lo. Nde abahi lituma ŋa yulu bibandu byosi, pasi buli, pasi ndaha na pasi tsi. 8 Baatu ba ŋa toto boosi buukongemene nde. Ni bo baana umata mbandihili a tsi, baa manduhi baavelesonehe mu libuuku la moonyi la Mwana Limeme wu baadubi.

9 Nyaha nga matswi ayuha!

10 Tso muutu afwana uba ikondaayi,

nde sa akoto kondaayi.

Muutu wu afwana ukwa mu sabila,

nde sa akwa mu sabila.

Ni mu buuna, baa ibaandu hya Nzambi baafwana umweese mukonono na imiinu.

11 Titswene me ambwemono ibulu ikima hi hyakapala hutso a toto. Hyo hyaba na matsyembo moole ma we ma Mwana Limeme, ka hyo hyakatoyo we Darango. 12 Hyo hyakasalila lituma loosi li ibulu hyatsomi, hi hyapali mu mamba. Ibulu mo hya byole, hyakatuma baatu ba toto mu ukongemene ŋa busu bu Ibulu hyatsomi, hi baabelusi libuma la pasi. 13 Ibulu mo hya byole hyakasa bipadi bya kimuhili. Hyo hyakakulamasa mbaahu umata hu mayulu natee ŋa toto ŋa miisu ma baatu boosi. 14 Hyo hyakadungasa baatu ba ŋa toto mu biliimbu bya kimuhili, bi baaviidi nde lituma mu usa ŋa busu bu ibulu hyatsomi. Hyo hyakasimbala baatu mu uvanga ifwita, mu muyusu a ibulu hi hyanemini mu sabila, ka hyo hyabwefutaha moonyi. 15 Ibulu hya byole hyayaki lituma li uva moonyi huli ifwita hi Ibulu hyatsomi, mana ifwita mo hiina hitwala utoyo na utuma uduba boosi ba buuvelekongemene hyo. 16 Ibulu hyakasimbala baatu boosi, bangebe na bakuutu, bisina na biyaha, baviha na ba bali bunyanga, mu usiinga uyaka iliimbu ŋa kaka la mbahala buuve ŋa libunzu. 17 Muutu utwala usumba tso usumbasa pasi isiha tso nde a hali na iliimbu mo hiina ve. Iliimbu mo ni nduhi ibulu, buuve litangu li bisono bi byayelemene na nduhi mo yiina. 18 Hwafwana uba na tsiki. Muutu nga buyedi utwala ubaangula lisuunga li litangu li Ibulu. Mu tooni ati, litangu mo laayelemene na nduhi a muutu. Litangu la nde, ni makama masamunu maku masamunu na bisamunu (666).