1 Titswene, me amoni pofi mukima mu ukulamana ŋa toto umata hu yulu. Nde aba na lituma li linene, na muyusu a nde ayalusi toto yoosi. 2 Nde afulihi mu mifudi: «Nde miibwa, nde miibwa, musyenge wu munene wa Babylooni! Mu taangu mo yiniiyi, yi ka ndulu mbuha yi matengo mu ukaatsahala, iswemili hi mavupu ma mabi ma pila mu pila. Iswemili hi banyunyi na bibulu byosi bi byasumaha na bi bibi. 3 Mabuli moosi maanywidi malamu ma bunuumba bwa nde bu mifudi. Mu tooni ati, bapfumu ba toto baamiikoto hutso bunuumba na nde, na basumbisi baa mumbungu ŋa toto baamiibaha busina bu bulahi mu bunene bu busina bwa nde.»

4 Titswene, me anzuhi ndaha kima yi yaamati hu mayulu na yaakaleele: «Benu buli la me, palaani mu musyenge mo wunuuwu, mana liveleba likoongo mu masumu ma nde. Na liveleyaka itwadi na nde, mapasi ma muubwila nde. 5 Mu tooni ati, masumu ma nde maamiiluula natee hu yulu. Na Nzambi a havusana mavaanga ma tsonyi maana ve. 6 Futaani nde we bu nde hafuti bana. Futalaani nde pfutala yoole yi mavaanga ma mabi ma nde havangi. Lusaani mbungu a nde mu malamu ma maavyohelele mifudi pyoho yoole. We bu nde haakanywisa baatu bana. 7 Mwesaani nde munyongi na lingebe li lilahi we bu nde haakatondo muyusu na busina. Kotesaani nde hutso lingebe li lafwana. Nde li mu uleele hutso mutima a nde: "Ŋaniiŋa, me ndi mutumi wu mukaasu. Me a handi mukwili ve, na me a hukwisa muutu tso mumosi ve." 8 Ni mu buuna, mapasi mo maniima moosi muubwila nde ilumbu imosi: lipfu, lingebe na nzala. Mbaahu sa yinyengese nde. Ka Pfumu Nzambi wu atsundasa nde, li na matwala✝.»

9 Batumi baa ŋa toto ba baasiidi bumbembo na makinya ma busina na nde, sa balila na unyongo mu tooni a nde. Ŋa bo buutalila mwiiki a musyenge wu bamiitsuha. 10 Bo sa batahuha mwaana a lala, mu tooni a boomo bu munyongi a nde, na bo sa baleele: «Lingebe! Ki pila lingebe! O Babylooni, musyenge wu munene na wu matwala! Mu ngunga ndulu mosi, we miibaha tsyembili✝!»

11 Baatu banga mumbungu ŋa toto kaka bali mu ulila na bali mu lingebe mu tooni a musyenge mo wuuna. Mu tooni ati, muutu tso mumosi a habwesumba fwanda a bo ve: 12 wolo, itali hi hyafuuka, mamanya ma talu, bilabu, matsaanda ma mu liino, matsaanda ma talu ma mabeenge, swa. Miti mya pila mu pila mya pasi mu ubaha, bisiha bya pila mu pila, bya mu mapungi ma banzahu, bya mu mabaya ma talu, bya mu itali hi hyabeenge, bya mu itali, buuve bya mu mamanya ma mabwe ma baasyenge. 13 Bisuungu bi miti, na bisiha bikima bya tsulu yimbwe mu byudya, nyafi, miire na paha a tsulu yimbwe, malamu, maadi, farine na masangu. Bangombe na mandombo, babuuru, matomo ma babuuru, baviha na bikondaayi. 14 Bo bali mu uleele: «Yuha ti, bisiha byosi bi we aba na byo nzala, byamiidimbala hu bwa we. Busina na bubwe bwa we bi miidimbala. Na a buukabwemono byo ve.» 15 Banga mumbungu ba baabaha busina mu tooni mumbungu mutso musyenge mo wunuwu, sa batahuha lala, mu boomo bu munyongi a nde. Bo sa balila na uyayana. 16 Bo sa baleele: «Lingebe! Ki pila lingebe mu musyenge wu munene! Nde beedi baalwatisa tsanda ya liino, na matsanda ma talu ma mabeenge. Nde beedi aluula mu bilengele bya mu wolo, mamanya ma talu, na bilabu. 17 Na mu ngunga mosi ndulu, busina bwosi bwadimbili!»

Babiti boosi ba makuumbi, na badyengi boosi ba bali mutso a mo, ba bali mu usala na bo, boosi ba bali mu usa bisalu hu mubu, baatahuhi lala. 18 Na bo baakafulaha ŋa bo baatalili mwiki a mbaahu yi yaakanyengese musyenge: « A hwaba na musyenge tso mumosi wu munene we nde wunuuwu ve!» 19 Bo baakabwahasana mufundu hu yulu mitswe na baakalila. Bo baakayayana na baakafulaha: «Lingebe! Ki pila lingebe mu musyenge wu munene! Ni mu busina bwa nde baatu boosi banga makuumbi ŋa yulu mubu baakabaha busina. Ka mu ngunga mosi ndulu, byosi bi miidimbala!»

20 Yulu, baa mu kinya mu tooni a musyenge wu miibwa! Baani mu kinya benu baatu ba ibaandu hya Nzambi, biluumbi na mimbihuli! Mu tooni ati, Nzambi miitsundasa musyenge mu bubi bu nde havangila benu. 21 Titswene, pofi mumosi nga matwala avoli manya limosi li laaleme la we inyihili hya mbutu a bele, abwahi lo hutso mubu na aleeli: «Ni bunuubu, bubwisa musyenge wu munene wa Babylooni mu mifudi, na a bubwemono nde ve. 22 A bubweyuha huli we, munyingu a mingongo na munyingu wu bayimbi ve. A bubweyuha munyingu wu basihi baa lileeso buuve wu bafuli baa kulambeete ve. A bubwemono basali ba mu myoho tso mumosi ve. A buubweyuha kele inyihili hya mbutu a bele ve. 23 Liyalala la mwinda a luubwemwedeme huli we ve. A buubweyuha ndaha mulumi na yi mukadi ba bamiikwelene ve. Banga mumbungu beedi baalutahala biita mu toto yoosi. Na mu tooni a tsalili a we yi bungaanga, we miidungasa mabuli moosi.» 24 Hu Babylooni baatsolisi makila ma mimbihuli na ma baatu ba ibaandu hya Nzambi. Makila ma baatu boosi ba baadubi ŋa toto, maatsoli✝.