1 Titswene me amoni ŋa Mwana Limeme hamaasi bwiingu bumosi mu tsambu la bwiingu. Na me anzuhi ivangu imosi hya moonyi mu bibina, hyakaduma we nzyedi na ubaaleele: «Yaanga!» 2 Me atali na me amoni buuru wu mufuuka. Wuuna wu aba anama ŋa yulu a nde aba akaanga munayi. Nzambi aviidi nde mutata a mbiingili, mana nde ayalwana mu ubaha mbiingili.

3 Ŋa Mwana Limeme hamaasi bwiingu bwa moole, me anzuhi ivangu hya moonyi hya byole mu uleele: «Yaanga!» 4 Na buuru mukima wu mubeenge we mbaahu apali. Huli wuuna wu aba anama ŋa yulu a nde, baaviidi lituma li umaasa hyenze hya toto. Mana baatu bahehesene makiingu. Na baaviidi nde sabila wu munene.

5 Ŋa Mwana Limeme hamaasi bwiingu bu mutatu, me anzuhi ivangu hya moonyi hi bitatu mu uleele: «Yaanga!» Me atali na me amoni buuru mumosi wu mupiinda. Wu aba anama ŋa yulu a nde aba akaanga ŋa kaka, ivolili hya byetso bi byaleme. 6 Na me anzuhi ya we ndaha mosi ŋa hati li bivaangu bya moonyi bibina. Yo yaakaleele: hyetso imosi hya bele mu denye mumosi. Byetso bitatu bya olose, mu denye mumosi. Ka mu maadi na malamu, a libiiyasa byo ve.

7 Ŋa Mwana Limeme hamaasi bwiingu bu muna, me anzuhi ndaha ivangu hya moonyi hi bina mu uleele: «Yaanga!» 8 Me amoni buuru wa mwindu makaya ma tsaha. Wuuna wu aba anama ŋa yulu a nde nduhi «lipfu», na tsi a babaakwa yaakaduukala nde. Baaviidi bo lituma ŋa yulu itsudu himosi mu bitsudu bina bya toto mu uduba baatu mu sabila, mu limbunga, mu wongo na mu bibulu bi bukanyi bya toto.

9 Ŋa Mwana Limeme hamaasi bwiingu bu mutaanu, me amoni hu tsina a diiku li bubaatsuha bungodu, mivumu mya ba baadubi mu tooni a ngetetee a bo mu mambu ma Nzambi na mu imbangi hi bo baakatiila mu mo. 10 Bo baakafulaha mu mifudi: «Mulongisi wa ngidi na wa mbuli, ki taangu we utsundasa baatu ba toto na ufutala bo pindu makila ma bisu?» 11 Baaviidi huli pasi muutu mu bo, muroopo wu mufuuka. Na baaleeli bo mu ukeele mu mwaana a taangu hole, nate bu bambaahi ba bo ba isalu na baana ba ngu a bo ba baakiiduba we bo, buukuha.

12 Titswene, me amoni ŋa Mwana Limeme hamaasi bwiingu bu musamunu. Toto yanyingimi mu mifudi: taangu yapiindi we tsanda yi piinda; tsuungi wosi abeengi we makila, 13 na bamvwelele ba hu yulu baabwiidi ŋa toto, we ŋa muti a fiinge ubaabwisa mbutu yi yaaveleyele, mu ifula hi mifudi. 14 Yulu laadiimbili we libuuku li bali mu upoto. Bisyelo byosi na biliiŋa baamaasi byo ŋa mambuha ma byo. 15 Bapfumu ba toto, batumi, bakuutu ba balwani, bisina, baatu banga matwala na baatu bakima, baviha boosi na baatu ba bali bunyanga, baayasweme hutso mirali na hutso mamanya ma bisyelo. 16 Na bo baakaleele huli bisyelo na mamanya: «Bwani ŋa yulu a bisu na swehani bisu lala na hiinzi hya wu atsahala ŋa kiti-ipfumu na lala na kesi a Mwana Limeme. 17 Mu tooni ati, ilumbu hiinene hya kesi a bo himiito. Na utwala ukunda hyo✝?»