1 Me amoni pofi mukima, nga matwala, wu akakulamana umata hu mayulu. Mayidu maaba maalwata nde, na muhyama aba adiinga mutswe a nde. Hiinzi hya nde hyakamwedeme we taangu, na miilu mya nde myaba we makuunzi ma mbaahu. 2 Nde aba akaanga libuuku li likeehe la bwasi ŋa kaka. Nde asuusi hulu hwa mbahala ŋa yulu mubu, na hulu hwa kaasu ŋa toto. 3 Nde afulihi mu mifudi, we ŋa kosi ubaasiinga. Mu muyamu a nde, banzyedi batsambu baabaandi. 4 Bu banzyedi batsambu baabaandi, me akiitsonehe ma bo baaleeli, ka me anzuhi ndaha yi yamati hu mayulu yaaleeli: «Keelese tswehi a mambu ma banzyedi batsambu baleeli; a hasonehe mo.»

5 Buuna, pofi wu me amoni mu tele ŋa yulu mubu na ŋa yulu a toto, asyenuli hoho hwa mbahala hu yulu, 6 na alabi mulabu mu nduhi a wu li moonyi taangu yoosi, wu avanga yulu na byosi bi bili mu yo, toto na byosi bi bili mu yo, mubu na byosi bi bili mu nde. Pofi aleeli: «Ibiinda a hyubweba ve! 7 Ka mu bilumbu bi pofi wu mutsambu huufula kulambeete, Nzambi utswihasa tswehi a nde we bu hu li musamu wu mubwe wu nde haayabisi huli basalili ba nde, mimbihuli.»

8 Titswene, ndaha yi me anzuhi yi yamati hu mayulu, yabweleele me bunuubu: «Yene yavolo libuuku li likeehe li lili bwasi ŋa kaka la pofi wu li mu tele ŋa yulu mubu na ŋa yulu a toto.»

9 Me atsusihi hu pedu a pofi, na me andeeli nde mu uva me libuuku li likeehe. Nde akaali me: «Volo lo na mina lo; Lo luuluusa moonyi a we kali, ka mutso munywa a we, lo luuba na nyehe we nyuhi.»

10 Me apoli libuuku li likeehe ŋa kaka la pofi na me amini lo: lo laaba na nyehe we nyuhi mutso munywa a me, ka bu me andiidi lo, moonyi a me aluuli mu kali✝.

11 Buuna, baaleeli me: «We afwana ubwebihula mu nduhi a Nzambi, huli bibandu bi bilahi, mabuli, mandaha na bapfumu.»