1 Titswene, baaviidi me litsootso li lili we libasi li bubaavolo hyetso, na baaleeli: «Teleme, yavolo hyetso hya mbuha a ngidi ya nzo a Nzambi, hya diiku la tsuhili a paha a tsulu, na taanga litangu la baatu ba bali mu ukunda muuna. 2 Ka uto ti litandala la hu mbadi a Nzo a Nzambi, a havolo hyetso hya lo. Siisa lo ŋa muvanga, mu tooni ati baavahula lo huli bangoyi; bo baniiba buuhesolo musyenge a ngidi mu batsungi maku mana na boole. 3 Mu iveeve imosi makama moole na maku masamunu (1 260) ma bilumbu, me upa lituma luuyayabisa musamu a me huli bambangi ba me boole, ba baalwata matsanda ma bukwili.»

4 Bambangi mo baboole, ni miti mya oliive mi myole na bitsuhili bya paha bi byole bi byateleme ŋa busu bwa Pfumu a toto✝. 5 Tso muutu tondi ukwamisa bambangi ba me, mbaahu yiupala mu minywa mya bo na unyengese baboho ba bo. Eye, buuna ni bu Nzambi hamiivangimasa bikwilili bya wuuna wu tondi ukwamisa bo. 6 Bambangi mo baboole bali na lituma li ukaanda mvula, natee bu bo buumana uyabisa musamu a Nzambi. Bo bali kaka na matwala ma ukitusa mamba mu makila, na ubwahila toto mapasi ma pila mu pila, mu pasi taangu yi bo batondi✝.

7 Bu bo buumana uyabisa musamu a Nzambi, ibulu hya tsisu hi himiipala hutso a mbeenge ya doheselee, hyulwanisa bo, hyubiingala bo na hyuduba bo. 8 Buuyala bamvumbi ba bo mu luuha lilinene li musyenge wu munene, huuna hu baakomini Pfumu a bo. Mu uduukala matsimi ma baatu ba musyenge mo wuuna, mbiili a bo yaaba we yi musyenge a Sodoomo na tsi a Ngipiti. 9 Baatu ba mabuli moosi, bibandu byosi, mandaha moosi, matsi moosi, buukaamono bamvumbi ba bo mu bilumbu bitatu na itini. Na a buusiingasa ti badiiha bo ve. 10 Baatu ba ŋa toto buuba mu kinya na musaangu na usa mukungi mu umono bamvumbi mo baana. Bo baakatsindasana bungodu mu tooni ati, mimbihuli mo mya myole miniimi, myaanyongisi baatu ba ŋa toto.

11 Ka hu mbisa bilumbu mo bibitatu na itini, muvumu wu ubaava moonyi amati huli Nzambi, akoti mu bo, na bo baatelimi✝, na boosi ba baamoni bo, baamoni tsisu yindahi. 12 Mimbihuli mo mi myole, myayuhi ndaha mosi yi mifudi hu mayulu yi yaakatuma bo: «Vataani huni!» Bo baavati hutso a yidu, ŋa busu bu baboho ba bo. 13 Mu taangu mo yiina, toto yanyingimi mu mifudi. Ikuuku imosi mu kuumi li bikuuku hi musyenge hyatsamuhi. Biveeve tsambu (7 000) bya baatu byanyambihini mu tooni a toto yi yanyingimi. Baatu bakima baamoni tsisu yindahi, na baayusi Nzambi a hu mayulu.

14 Lingebe la moole limiivyoho. Ka kebaani! Lingebe li mutatu laaka bebele mu uya.

15 Buuna, pofi wu mutsambu afuli kulambeete. Mandaha ma mifudi maayuhini hu mayulu na maakaleele: «Lituma la toto limiivyoho ŋa myoho mya Pfumu a bisu na huli Masiya ma nde. Lituma mo liina luuba mu bilima na bilima!» 16 Mikukunyungu maku moole mina mi myaba myatsahala mu makiti ma bo ma ipfumu ŋa busu bwa Nzambi, myakongimini, myakuundi Nzambi 17 na ubaaleele:

«Pfumu Nzambi Pungu matwala,

we wu li, na wu aba,

bisu limiifutala matondo huli we,

bu we salili matwala ma we ma manene,

na mu utsahisa Ipfumu hya we.

18 Mabuli ma baatu beedi maamiiteleme na kesi,

ka bunuubu ni kesi a we yimiimonehele,

napa taangu yi utsundasa babaakwa yimiito,

yi usyende basalili ba we, mimbihuli,

baatu ba ngidi na boosi ba bali mu ukiinza nduhi a we,

tso bali baatu ba baanyanza, tso baatu ba likiinzu,

na uduba ba bali mu ubiyasa toto!»

19 Mbuha a ngidi ya Nzambi ya hu mayulu yaadibumi, na kasu a nzuhisini yaamonihili. Mivedi-a-vedi myamwedimi, kele mandaha yaayuhini, banzyedi baabaandi, toto yanyingimi na mvula mamanya wu mifudi anohi.