1 Titswene, me amoni pofi mumosi mu ukulamana umata hu yulu. Nde aba akaanga tsaafi a mbeenge ya doheselee ŋa kaka na paanga yinene. 2 Nde akaangi Darango, taadi wu mukulu, nga nduhi mukuyi na Saatana, na nde ahadi nde mu iveeve hi bilima. 3 Pofi abwaahi nde hutso a mbeenge ya doheselee. Titswene, nde adibuhi yo mu tsaafi, na nde anyemi bwiingu ŋa yulu, mana Darango aveledungasa mabuli, natee bu iveeve hi bilima hyuvyoho. Hu mbisa iveeve hi bilima, baafwana unyangula Darango mu mwaana a taangu hoole. 4 Titswene, me amoni makiti ma ipfumu: ba baaba baatsahala ŋa yulu a mo, baayaki lituma li utsundasa. Me amoni kaka mivumu mya ba baadubi mu tooni imbangi hya bo mu Yisu na mu mambu ma Nzambi. Bo a baakundi ibulu ve, tso ifwita hya nde ve. A baakumi bo iliimbu ŋa libunzu tso ŋa kaka ve. Bo baabwefutaha moonyi na baabwetuma na Kristo mu iveeve hi bilima. 5 Baatu bakima ba baakwidi a baabwebaha moonyi ve, tehele iveeve hi bilima hifwa. Yiina ni tsuuhili yatsomi ya babaakwa. 6 Kinya huli ba bali mu ukoto mu tsuuhili yatsomi ya babaakwa! Bo bali bangidi, na lipfu la moole a lili na lituma ŋa yulu a bo ve. Ka bo sa baba bangaanga ba Nzambi baa bukaasalila Nzambi na Kristo. Na bo sa batuma na Kristo mu iveeve hi bilima.

7 Bu iveeve hi bilima hyufwa, sa banyahula Saatana mu kondaayi. 8 Nde sa apala mu udungasa matsi ma mali mu Gog na Magog* ni buuna buukateele matsi ma mali iboho na buli la Nzambi mu tsukusu a taangu., ni ti bituungu bibina bya ŋa toto, mana bakuukaha bo mu mudiingu. Matsi mo sa malaha we musyeŋunyu mu muvanga a mubu. 9 Bo baatelimi mu toto yoosi, baadiingi itsaka hi hyaba baatu ba Nzambi na musyenge wu Nzambi hatondo. Ka mbaahu yaakulimini umata hu yulu na yaakudisi bo. 10 Na mukuyi wu akapfuta bo, sa baabwaha nde hutso a dyanga la mbaahu a suufe, hu hwamiitswamina ibulu na mumbihuli wu mapfuta. Huuna sa banyongese bo nyangu na butsuhu, mu bilima na bilima.

11 Titswene, me amoni kiti-ipfumu yinene yi fuuka, na wu aba atsahala ŋa yulu a yo. Toto na mayulu byatahuhi lala na hiinzi hya nde, na a baabwemono byo ve. 12 Titswene, me amoni babaakwa, bakuutu na bangebe, baateleme ŋa busu bwa kiti-ipfumu. Baadibuli mabuuku. Baabwedibula libuuku likima, ni libuuku la moonyi. Baatsundisi babaakwa mu mavaanga ma bo baasiidi, we bu baasonehe mutso mabuuku✝. 13 Mubu apalisi bamvumbi ba nde haaba na bo. Lipfu na tsi a babaakwa, bo kaka baapalisi babaakwa ba bo. Na baatsundisi bo boosi mu mavaanga ma bo baasiidi. 14 Lipfu na tsi a babaakwa baabwahi hutso a dyanga la mbaahu a suufe. Dyanga la mbaahu ni lipfu la moole. 15 Woosi wu baavelisonehe nduhi mu libuuku la moonyi, baabwahi nde hutso a dyanga la mbaahu.