1 «Sonehele huli pofi a Libundu li musyenge a Sarede:

Mono ma mali mu uleele wuuna wu li na mavupu tsambu ma Nzambi na bamvwelele tsambu: "Me nzaabi mavaanga ma we, me nzaabi ti we na lidumu la muutu wu li moonyi, kaahu, we wu akwa li. 2 Suuha, hwadisa bi bikini moonyi, bi byaka bebele mu ukwa. Mu tooni ati, mbiili a we a yaakuha ŋa busu bwa Nzambi a me ve. 3 Yibuhala moonyi mu ndongisili yi we ayaki na yi we ayuhi. Baakeelese yo na sobo mbiili. Tso we veliba likanda, me unza huli we, we mwibi, hwavele we uyaaba taangu. 4 Ka mwa bakima ba we mu musyenge a Sarede, a baasumana bikutu bya bo ve. Bo buuyene itwadi na me mu bikutu bi bifuuka. Mu tooni ati, bo bali baatu ba baakuha na byo.

5 Ni mu buuna, wuuna wu ubiinga, buulwatisa bikutu bi bifuuka. Me a upfwinzala nduhi a nde mu libuuku la moonyi ve. Me utiila nde imbangi ŋa busu bwa Taata a me, na ŋa busu bu bapofi ba nde.

6 Nyaha pasi nga matswi ayuha bubwe-bubwe ma Livupu ali mu uleele huli Mabundu!"»

7 «Sonehele huli pofi a Libundu li musyenge a Filadelefi:

Mono ma mali mu uleele wa Ngidi, wa Mbuli, wu li na tsaafi a mutumi Davidi. Wuuna wu li mu udibula, mana pasi muutu a hadibuha. Wu li mu udibuha, mana pasi muutu a hadibula: 8 "Me nzaabi ndyatili a we, me amiindibula munywa a nzo ŋa busu bwa we, wu pasi muutu huveletwala udibuha. Me nzaabi ti we mwa mifudi ndulu hole li na myo, kaahu we beedi ngetetee mu mambu ma me, na we a hatunala me ve. 9 Mono ma me upanga mu baatu ba kabu la Saatana, bapfuti mo baana, ba bali mu uleele ti bo Bayudaayo bali. Kaahu bo a bali Bayudaayo ve. Me utuma bo mu ukongemene ŋa busu bwa we. Bo sa bayaaba ti me atondo we. 10 Mu tooni ati, we akeelese tumili mu uba na mukonono. Me kaka, me ukeelese we mu taangu yi lingebe yiyuya mu tsi yoosi, mu ukete baatu ba ŋa toto. 11 Me aka mu unza. Bamina hi we li na hyo, mana pasi muutu a havolo mutata a we wa mbingili.

12 Wuuna wu ubiinga, me ukitusa nde kuunzi mu nzo a Nzambi a me, na nde a hubwepala muuna ve. Me utsonehe mu nde nduhi a Nzambi a me, na yi musyenge a Nzambi a me, ni Yeruselemi yi nyatihi. Yeruselemi yi yili mu ukulamana umata hu yulu, yi Nzambi a me hutsindaha. Me utsonehe kaka nduhi a me yi nyatihi✝ mu nde.

13 Nyaha pasi muutu nga matswi ayuha bubwe-bubwe ma Livupu ali mu uleele huli Mabundu!"»

14 «Sonehele huli pofi a Libundu la Lawodise:

Mono ma mali mu uleele wu bali mu uteele Amen, mbangi wa ngetetee, wa mbuli, wu li mbandu a byosi bi Nzambi havanga: 15 "Me nzaabi ndyatili a we. Me nzaabi ti we a hali piyu ve, we a hali kaka mbaahu ve. Kini beedi we ba piyu, buuve we ba mbaahu! 16 Ka bu we li ndulu hyelele, mbaahu ve, piyu ve, me unduha we mu munywa a me! 17 We ubaaleele ti: ‘Me isina ndi na me amiikuukaha busina bu bulahi, me utwala ukiima isiha tso imosi ve.’ Ka we a hali mu uyaaba ti we mutso mapasi na munyongi we li ve! We li iyaha, we li inzimana na we li pene.

18 Ni mu buuna, me ndi mu upa we ndoongi mu usumba huli me, wolo li bamiimaasa mbindu hu mbaahu, mana we ba isina hya mbuli a mbuli. Suumba kaka bikutu bi bifuuka, mana we lwata na ubwevelemono tsonyi a pene a we. Na suumba biloongo bi utsolese mu miisu ma we, mana we mono. 19 Me umbaatsuungaha na usyembe boosi ba me atondo. Ni mu buuna, mweese lehemene la we na sobo mbiili.

20 Yuha, me amiiteleme ŋa munywa a nzo na me ndi mu undodo. Tso muutu yuhi ndaha a me na dibuli munywa a nzo, me ukoto huli nde, me undya itwadi na nde, na nde kaka udya itwadi na me. 21 Huli wuuna wu ubiinga, me upa nde muswa wu utsahala itwadi na me ŋa kiti-ipfumu hya me. We me, ŋa me ambiingi, me atsahili na Taata a me ŋa kiti-ipfumu hya nde.

22 Nyaha pasi muutu nga matswi ayuha bubwe-bubwe ma Livupu ali mu uleele huli Mabundu!"»